《Band of Brothers》&《The Pacific》

講起打仗片，相信好多人都會諗起《Saving Private Ryan》同《Black Hawk Down》。

不過呢兩套都唔係我心水選擇，我甚至連碟都冇買。


如果你鍾意睇戰爭片，我會推薦以下兩套。

《Band of Brothers》&《The Pacific》

呢兩套係 HBO 嘅 TV miniseries　而唔係電影。

都係 Produced by Steven Spielberg 同 Tom Hanks.


《Band of Brothers》講登陸諾曼第，打德軍。

《The Pacific》講太平洋戰爭，打日軍。


《Band of Brothers》最吸引我嘅地方係片中歷史背景嘅真實性。

差不多每個角色都係真有其人，而且每集都有訪問。

睇到聽到感受到嘅，絕對係我哋呢啲未經歷過戰亂嘅人不能想像嘅畫面。


《Band of Brothers》大大話話我都睇咗三、四次（共十集）。

依家 TVB Pearl 逢星期一晚１２點重播我都仍然會捱夜重溫。


至於《The Pacific》，我都係第一次睇。

TVB Pearl 逢星期二晚１０點半。

踏入第二集，開始精采。

No Coke. No Hope.

最近睇咗套戲。

入面有個有糖尿病嘅亞伯好鍾意飲可樂同講英文。

每次當亞伯個孫女唔俾佢飲可樂嘅時候。

亞伯都會講句「No Coke. No Hope.」


我見到將來嘅我。

因為我幾乎每日都會飲可樂。


最早接觸 Coke-Zero 係響澳洲嘅時候，2006年。

雖然好多人都唔鍾意佢嗰種「冇可樂味嘅可樂味」，但係我就幾喜歡。

而且心理上總係覺得飲佢又好似真係冇咁肥。

健唔健康係另一回事。


有時飲返「紅色」原味反而會唔習慣．．．

閱書報告 - 王沛然《填充題》

一本１４６頁嘅書，我用咗超過一個月嘅時間先讀畢。


我認我睇書慢，因為我無耐性。

拎起本書三分鐘熱度過後就好難再有動力再拎起。

再加上我睇散文比較多，更加唔需要有甚麼連貫性。


入返正題。


睇一個經常響電視見到但其實又唔識佢嘅人寫一個我唔認識嘅佢其實都幾有趣。

呢個人響鏡頭以外諗嘅嘢都幾特別喎！

起初的確有咁嘅感覺。


越睇越後就越覺得有點做作。

有啲內容同比喻又有啲牽強等等。

而且發覺一個多嘢諗（或鍾意胡思亂想）嘅人原來有時都幾煩。

我講我。

閱讀時間

早於十日前，我同自己講。

「每晚臨瞓之前要用半個鐘頭嚟睇書！」


結果十日後，書仍然響書架上原封不動。

嗰半個鐘，仍然繼續俾電話、電視、電影、電腦、遊戲機佔據了。


幾時先會睇得完我買落嘅書？

恐怕將來要搵人燒落去俾我慢慢睇．．．

不可思議

以往聽見啲人講咩「李氏力場」我都係一笑置之。


今次我一心諗住實有假放啦。

點知．．．

《Star Wars》

一套風靡全球嘅電影。

但我唔識欣賞。


咁多年嚟我都堅持唔去接觸任何同《Star Wars》有關嘅資料。

為嘅就係等佢出 boxset 之後一口氣咁睇晒佢。

我「以為」我會同其他人一樣咁鍾意《Star Wars》。

結果係我睇到瞓著．．．


６集，我已經睇咗５集。

其中３集係用嚟攝時間所以睇嘅。

而且可以分段咁睇，完全唔求一氣呵成。


唔打算花時間解釋點解我唔鍾意呢套戲。

因為鍾意《Star Wars》嘅人唔會明。

而同我一樣唔鍾意《Star Wars》嘅人就自然會明。


雖然套戲吸引唔到我。

但我仍然好想買嗰把 Lightsaber!

（附錄：Star Wars Lightsaber）

《秋天的童話》

《秋天的童話》

一套經典，1987年。


咁多年嚟我都冇認認真真咁睇過呢齣戲。

每次電視播嘅時候都係望兩望之後就轉台。


上星期放假寫 BLOG 時咁啱有線又重播，於是就邊寫邊聽戲。

聽下聽下，就變為專心睇戲。


吸引到我轉移視線嘅原因。

係「船頭尺」嘅說話，同佢嘅做人態度。

我見到某啲時候嘅自己。

如果真係可以好似佢咁做人，應該都會幾開心。


另外我亦發現，原來 鍾楚紅 真係幾靚。

唔知道當年廿幾歲嘅女仔，係咪大部份都好似戲入面嘅「十三妹」一樣咁簡單咁清純（單純）嘅呢？


又係時候入返隻 Blu-ray 嚟收藏。

苦短

我有兩個鬧鐘。


響要返工嘅日子。

一個 6:30am 響，另一個 6:35am。


每日最好瞓嘅時段。

往往都係拍熄第一個鬧鐘同第二個鬧鐘響之間嗰五分鐘。

無題

她說：惡夢，幸好最後也醒了。


我想：夢醒，才是惡夢的開始．．．

見鬼

今朝一瞓醒開電視睇新聞就見到前國家主席響電視上出現。


我腦中閃過嘅第一個諗法並唔係「復活？！」

而係「嘩！假人呀！咁似樣嘅？」


然後我反覆咁睇咗段片好多次。

都仍然搵唔出呢個喬裝高手嘅破綻．．．

大開眼界

早前講過有興趣參加一個流動影片製作比賽。

（附錄：原來我有夢）

於是今日就去咗第一個工作坊 -「流動影片製作工作坊 (電影導演篇)」


原來，電影真係可以好深奧。

又或者咁講，拍一套電影真係唔簡單。


我一向都只係一個純粹「睇戲」嘅觀眾，甚少花精神同時間去「研究」一部電影。

對於電影嘅製作，更加可以話係一竅不通。


我本以為我只要拎住部機將我所見同想表達嘅嘢拍低然後呈現響螢幕就可以。

原來當中嘅拍攝技術同技巧係我意料唔到咁多。


導師悉心咁揀咗好多經典同非經典嘅電影嚟講解當中嘅拍攝手法。

由希治閣到岩井俊二到吳宇森杜琪峰周星馳同彭氏兄弟都有。


經過上完呢一堂工作坊嘅沖擊之後。

我發覺我暫時真係無咩本事去參加比賽。

因為今日所學到嘅嘢已經完完全全咁將我嘅部署打亂。


電影世界對我嚟講已經變得不一樣。



＜題外話＞

我一向都好佩服一啲好敢於響人群之中發言嘅人。


話說響工作坊度坐咗一個好多嘢講嘅人。

坐我後面，而且講嘢好大聲。

我相信佢係一個學生，因為佢不斷同佢身邊嘅人「討論」導師所播嘅每一段片。

與其話係「討論」，應該話係佢不斷「懶醒」咁向佢身邊嘅人講解。

當去到一刻導師響螢幕上播出一段日本片然後問「有冇人知係邊個大師？」時。

我身後嘅嗰位「學生」就好大聲咁同佢身邊嘅人講「嘩！正呀！黑澤明。」。

然後我就聽見導師響咪度吐出五個字「小津安二郎」。

之後，個「學生」靜咗好耐．．．

喬布斯之死

喬布斯死了。

我沒甚麼感覺。

一般來說，我對人的離世都沒太大感覺。

相比起他的離開，我的 iPhone 壞了我比較難過。


剛巧昨天要拿 iPhone 到 IFC APPLE STORE 修理。

到達時見到人頭擁擁並有大批記者在場，我仍不以為然的問那店員。

「你們自開幕到現在每天都這樣人山人海嗎？」

「是啊！」

「每天都有記者嗎？」我好奇的問。

「不是。喬布斯死了。蘋果燈也熄了。」他答。

「是啊！」我心想。恍然大悟。

明明我兩小時前已知悉他的死訊，怎樣會完全沒印象。


我擁有很多 APPLE 產品：iPhone 4, iPad 1 & 2, iPod Shuffle/Nano/Touch 及 MacBook Air.

但我可不是甚麼「蘋果教」的「教徒」。

假如一個人滿屋也是日本品牌的電器，你倒不能說他就是一個日本人吧？


對我來說 喬布斯 也不是甚麼「教主」。

但我認同他是一個出色的生意人及設計師，一生充滿傳奇。

有人說他是一位「偉大的發明家」。

發明家？

諾貝爾、愛迪生、萊特兄弟、貝爾，這些人才算是吧！


又有人說他「改變了世界」，我倒覺得沒有這麼誇張。

他只是改變了某些人的生活習慣。

其實人一向也是善變、容易被影響及貪新忘舊的動物，沒甚麼稀奇。

你何曾見過貓每天也去游泳？雀不再飛改用腳代步？


也許是我悟性低，不明白 喬布斯 那些人生理念及思想。

所以才沒有像其他人一樣被他深深吸引。

又或者是因為在我內心一向只有「我自己」一個人獨大。

容不下其他人的入侵。


忽發奇想。


今天人們讚頌 喬布斯 的偉大。

假如十年後很多人也患上眼疾。

而研究發現是因為雙眼長期受到 iPhone 及 iPad 的電子屏幕所影響導致。

不知到那時人們又會怎樣評價 喬布斯 呢？

唔．．．

應該是 富士康 的問題。

嘥氣

響面書上有兩樣嘢我係唔會做嘅。


1. 講 Happy Birthday

靠面書提醒先記得講嘅祝福，無咩意義。


2. 講 R.I.P.

人都死咗咯，更加無咩意義。

重陽節 - 亂諗廿九

重陽節，唔駛拜山。

只拜清明。


無聊響度諗。

將來我嘅葬禮需要邀請咩人出席呢？

面書嘅朋友清單可以用嚟參考一下。


我嘅面書朋友有１４８人，增長率一向非常慢。

基本上響清單入面嘅每一個人我都係識嘅，雖然有啲係素未謀面。


我將佢哋分咗類。如下：

舊同學：５７

網友：２７

親戚：２５

透過親戚或朋友認識：１５

舊同事或響工作上認識：１４

唱歌班認識：６

打籃球認識：４


清單中大慨只有一半左右嘅人係有保持聯絡，包括所有親戚在內。

而當中又大慨只有一半左右嘅人係熟嘅，亦包括親戚在內。


算算手指，三圍坐晒。


（附錄：清明節 - 亂噏廿四 及 下年請早）

無題

濫情。

只因缺愛．．．

頹歌之王

有咩歌可以頹得過呢首？


高雪嵐 《絕》

作曲：陳輝陽
填詞：黃偉文
編曲：陳輝陽
監製：陳輝陽

寧願滯留在此處　寧願叫時間中止
我不會再信未來　我不要再看歷史
還能活才是諷刺　故此不用做傻事
讓痛苦　輪迴千次　彰顯那快樂有盡時

曙光全部熄滅　殺掉我影子
我只能獨處　背後全沒有支柱

甚麼叫絕望　抬起眼望望
如今我在你面前呈堂　隨便收看
靈魂被抽乾　殘留著軀幹
從此與未了願同存亡　地老天荒

還不夠絕望　尚可更絕望
留給我日後用來形容前面境況
能夠這樣　謝謝你幫忙
將僅有願望都風光殮葬

曙光全部熄滅　殺掉我影子
我只能獨處　背後全沒有支柱

甚麼叫絕望　抬起眼望望
如今我在你面前呈堂　隨便收看
靈魂被抽乾　殘留著軀幹
從此與未了願同存亡　地老天荒

還不夠絕望　尚可更絕望
留給我日後用來形容前面境況
能夠這樣　謝謝你幫忙
將僅有願望都風光殮葬

甚麼叫絕望　抬起眼望望
如今我在你面前呈堂　隨便收看
靈魂被抽乾　殘留著軀幹
從此與未了願同存亡　地老天荒

還不夠絕望　尚可更絕望
留給我日後用來形容前面境況
能夠這樣　謝謝你幫忙
將僅有願望都風光殮葬

何來未來未開創　我對希望沒期望
未放開　提前釋放
明知道敗仗　就不應該對抗

能夠這樣　全靠你幫忙
將戀愛絕後的標準答案

手術失敗

下星期有新 iPhone 發佈會。


我部 iPhone 4 都用咗一年零一個月，啱啱過咗保養。

HOME 制一早忽忽地，之後連 ON/OFF 制都虧埋。

到今日連靜音制同個音量（－）制亦宣佈罷工。

不得不佩服 APPLE 於控制產品壽命上的準確性。


由於我預咗會轉台兼出新機。

於是就膽粗粗試下幫部電話做「手術」。

最後當然係宣告「手術失敗」，而部電話亦正式啞咗。

只曉震，唔曉響。

唔好意思無你份

甚少論政治，但不吐不快。


嗰個「巴斯光年」職都已經辭咗，仲日日響度講咩「考慮、考慮、考慮」。

煩ｘ死人。

夠薑考慮完唔好選丫笨！


嗰個「奸樣」又係一樣，日日流晒口水咁大鑼大鼓話要選。

唔該去整整容整甩個「大陸樣」先，因為你額頭鑿住「親中」兩隻字。


嗰個「范婦人」都唔好得幾多，得閒無事就出嚟廢噏。

一副隔岸觀火坐定笠六嘅死款。

唔好俾我批中佢一定出嚟選。


我老豆話：「咁多個疑似候選人得『掃帚頭』最好，呢個人真係做嘢。如果佢出嚟選，我即刻登記做選民投佢一票。」

我回：「亞王生，唔好意思無你份呀！你唔係嗰百二人。你等２０１７啦。」

玩晒

咩叫「玩晒」？

由 普京 同 梅德韋杰夫 兩條友親身演繹。

《不再讓你孤單》

買咗一段時間都未睇。

趁打風放假睇完《如果．愛》有 mood 順勢睇埋佢。


一個戇居男（我）睇另一個戇居男的愛情故事。


戲好看嗎？

唔太好也唔太差。


舒淇 嘅演技為套戲救回唔少分數。

當然某啲場節嘅拍攝手法亦都值得我學習。


呢啲故事。

應該又係只會響電影裡面先會出現吧．．．

《如果．愛》

重溫《如果．愛》


重溫前已經不太記得劇情，是好事。

一向不太熱衷歌舞片，幸好亦不估太多戲份。


要數最喜歡的國內女演員。

應該就是 周迅 了。

當她在螢幕上出現，總有一種莫名的吸引力。

所以，我只喜歡在電影內的她。


如果，愛．．．

意外驚喜

八號波。

忽然多咗一日假，當然喜出望外。


今朝６點半鬧鐘響之後第一時間就梗係睇天氣報告。

見到八號波已掛之後無即刻瞓返，反而係睇咗半個鐘頭新聞。


再次瞓醒之後其實都係１０點幾。

見到好多朋友響面書問幾點前落波就要返工之類。

當天文台宣佈上午唔會改掛三號波之後我已經疊埋心水準備下午嘅娛樂。


因為假如２點前落咗八號波然後冒住風雨兼塞車返到公司都已經６點收工。

換轉係你你仲會唔會出門口？


睇過戲、打過機、上過網都仲係４點幾可以瞓多個晏覺。


點解今日呢個颱風假可以悠閒咁多？

《常在我心》

又再重溫《常在我心》


已經不記得看過多少次了，無論是於電視重播還是播碟。


而每一次看，都仍然是會流淚。

每一次聽片尾播著《活著多好》，都仍是會跟著唱。


朋友們，請在我的葬禮上替我辦兩件事。

一．於靈堂上放大量的菊花，因我很喜歡它的香味。

二．於靈堂上播放《活著多好》，因我很喜歡它的歌詞。


「遊玩時開心一點不必掛念我．．．」

《LAST NIGHT》（一夜誘情）

男與女也會越軌。

很多時只是行為與思想之間的分別。

其實沒有分別。

始終是越了軌。


p.s. 仍然是最喜歡《Bend It Like Beckham》時期的 Keira Knightley.

《愛．作戰》

重溫《愛．作戰》

最鍾意係開頭十六分鐘。

尤其係鬧分手嗰段。

監

昨晚爸致電我說。

爸：你媽聽了你說要搬後偷泣了數天。

我：不是吧？！

爸：是。她說不知道是父母倆有甚麼做得不好所以你要搬。

我：交通啊！沒啥別的。

爸：我也是這麼跟她說，但你媽就是愛胡思亂想。

我：真多餘。

爸：我跟著也有問她。若將來兒子成家立室怎麼辦？也是要搬走啊！她回答說可能到時接受得了。

我：．．．

爸：那有父母想兒子離開呢？

我：若不是你們在港，我早兩年已跑回澳洲了。

爸：那．．．你真的要搬嗎？

我：還在算著。可能下年初吧。

爸：你怎麼負擔得了？

我：負擔不來也要撐著啊！我再也忍受不了這地方的交通。

爸：你自己考慮清楚吧。

我：我會。那媽方面怎麼辦？

爸：你自己來收拾這個爛攤子。搬走之前不要再提搬走就好了。

我：唔．．．


今天晚上，我跟媽說我不會搬了。

她眼濕濕的笑了。


就這樣，我還是繼續待下去．．．

多餘

我覺得呢一個廣告其實有一個人就夠。

唔化

我都唔明啲人。

都幾廿歲啦。

仲會鬧翻／反面嘅？

到咗咁嘅年紀好話唔好聽冇咗一個好朋友都未必有機會搵返個。


有咩咁不共戴天呢請問？

好笑咩

我話我肥，啲人以為我講笑。

我話我樣衰，啲人以為我講笑。

我話我無錢，啲人以為我講笑。

我話我鍾意依家呢份工，啲人以為我講笑。

我話我收工之後返到屋企唔會開電腦，啲人以為我講笑。


最大鑊係。


我同每一任女朋友講我唔打算結婚唔打算要小朋友，佢哋每一個都以為我講笑．．．

原來我有夢

在 Leona 的 BLOG 看到了這一篇 《最動人的短片》。

然後二話不說就登記了出席 流動影片製作論壇。


我唔識咩拍攝手法，咩分鏡，咩剪接，咩效果，諸如此類。

我甚至乎連一部 video camera 都無。

我只知我鍾意睇戲。

我只知我有啲嘢想拍出嚟。


我唔知道去呢個論壇會唔會有嘢學到。

亦唔知道我最終會唔會參加呢個比賽。


雖然 夢想 終歸是夢想。

但我仍然會想。

因由

係唔係每一樣嘢發生都需要一個原因，或者一個理由？


見到一啲自殺新聞嘅時候我響度諗。

一般人自殺都會留下遺書講低原因。

若然係無嘅，事後啲人就會不斷去猜測究竟自殺者係因咩事而自殺。

點都堆砌一個原因或者理由出嚟俾個主角。


我相信。

Sometimes NO REASON is the reason ...

工

從來冇諗過我會熱愛一份工作。

一向認為只有「唔駛做」先算得上係一份優差。

不過原來響不知不覺間我已經喜歡上我依家呢份工。


我份工嘅概況大致如下：

．有固定辦公時間但無固定工作量，有時一坐就坐足一日。

．永遠唔知下一秒會有咩做因為電腦無特定時間癡線而 user 亦無特定時間發癲。

．只需要有事時出現，無事時個人去咗邊係無人會理。

．可遲到可早退甚至自行失蹤。

．無固定工作地點，好天曬落雨淋。

．可著 casual wear 返工，甚至短褲。


好多人都會問我點解有 office 唔坐有太子爺唔做而要走出去捱。

係因為我知道我唔係一個可以接受到著住恤衫西褲響 office 坐定定嘅人。


起初我都以為自己係因為「自由」而鍾意呢份工。

但原來唔係。


睇《HOUSE》嘅時候我諗通咗。

我鍾意呢份工係因為夠「challenging」同埋我「like solving the puzzle」。

再加上工作上嘅對手係一件唔需要有任何感情交流嘅死物。

簡單而直接。

家

我決定搬。

不過我父母及一眾長輩都唔理解。


其實我已經忍咗三年。

由幾乎忍無可忍變到幾乎麻木再變到真係忍無可忍。

講緊嘅，係我住嗰區嘅交通。


父母同長輩話我唔知好，唔識得珍惜。

有咁大間屋同咁好嘅環境俾我住我都要走。

我想講，我唔係唔知好，唔係唔識珍惜。

不過呢個只不過係你哋認為係好嘅標準。

你哋唔知道要我每日出入都花兩至三個鐘頭坐車返工放工係一件幾咁痛苦嘅事。

遇上週末或公眾假期嘅時候因為有太多遊客搞到要等車塞車嘅話隨時又多一兩個鐘。

所花嘅時間同金錢對我嚟講係完全唔值得嘅。

而呢個唔係買架車俾我揸就可以解決到嘅問題。

我要嘅。係方便，有地鐵。


以我嘅收入，以我嘅職位。

我需要嘅只係響市區有間房住同埋交通方便。

你哋嗰個高檔次嘅「家」，唔適合我。


由我十一年前離開香港去澳洲開始，我已經失去咗「家」嘅呢個概念。

響澳洲嘅時候，我都搬過幾次。

我唔係一個好鍾意安定落嚟嘅人。

可能係因為我無自己嘅「家庭」。


所以最近當公司話有機會派員工到澳門或新加坡長駐工作時。

我真係想立即入紙申請。

唔想再留響香港。


其實間屋大定細，間房大定細。

屋外嘅環境係風光如畫抑或大廈林立無景可言。

我一啲都唔在乎。

因為我根本唔望。


我需要嘅，一向都只係一個「竇」。

一個可以俾到自由空間我做我自己鍾意嘅嘢同方便我日常生活嘅「竇」。


就當我身在福中不知福啦。

兩敗俱傷

若我「以貌取人」的話就注定我會揀錯。

若她「以貌取人」的話就注定不會揀我。

結果雙方仍然繼續維持著各自孤單一個。

下一站

原本無打算出門，結果響短短３個月內去咗兩次旅行。

台灣及新加坡。


去旅行係會上癮嘅。

我俾自己一個咁樣嘅理由／藉口。

決定每年都出一出門。


去完台灣之後曾經打算重遊北京，畢竟又係廿年未去過。

結果俾新加坡懾咗個 quota.


如果要定下年嘅目的地，我想離開亞洲去遠啲。

一個比較長遠嘅旅程。


返澳洲？

似乎未係時候。


或者，去歐洲。

去英國曼徹斯特嘅曼聯主場奧脫福睇場波仍然係我嘅夢想。

旅行後記

《同房》

自從３年前返港開始，就回復返一個人瞓嘅生活。

今次去新加坡寄住親戚屋企，免不了要同人同房。

好在唔係孖舖，不過都好唔慣。

當有個人瞓響你附近而佢呼吸好大聲又或者有鼻鼾嘅話。

我確實好難熟睡。


《唔自在》

某日匆忙出門口，行到半路中途先發現唔記得戴手鍊。

條鍊大大話話都戴咗十年。

結果全日都「周身唔自在」。

間中又會驚會唔會係趺咗而唔係唔記得戴。

自從舊年唔見咗一條由１８歲開始戴嘅金頸鍊連一個十字架吊咀之後。
（亞媽買嘅「成年」生日禮物）

我就好怕會再失去一啲已經陪伴咗我好多年嘅身外物。


《濫拍》

數碼相機對我嚟講絕對係一項偉大嘅發明。

以前仍然係用菲林嗰陣，每次去旅行都俾屋企人話我影埋一大堆「唔等駛」嘅嘢嘥菲林。

十天行程影十幾筒菲林確實又係有點誇。

所以我依家可以好放肆，旅程中每日大概影３００～４００張左右。

當然最後可能都只係得十幾張值得分享。

說到底，其實係我好怕我會忘記咗一啲我想記住嘅畫面．．．


《空中購物》

終於獻出咗我嘅第一次。

終於明白點解響飛機上面都可以做到生意。

實在太悶．．．

空中情緣

每次坐飛機前都會好期待一陣隔離坐個咩人。

當然我從未好運過。

甚至乎期望有個靚靚空姐招呼。

到頭來就出現一個空中少爺。


好可能我每次都失望嘅同時。

坐我隔離嗰個其實比我更失望。


電影裡面所發生嘅橋段只會在電影裡面發生。

旅伴

今次去新加坡短暫旅遊其實係出於突發，要清假。

所以上次去完台灣之後定落嚟嘅三項目標都係做唔到。

（下次下次）


幸好去新加坡嘅四日入面得最尾一日係熱到溶之外，其餘日子都還好。


由於今次有親戚招待嘅關係，所以四日入面基本上係得一日我有自由時間到處遊蕩。

我嗰種 plan 好晒但又臨時會轉而且經常棄車步行嘅旅行模式，應該係得我自己先頂得順。


去玩機動遊戲嘅話一大班人一齊當然無咩問題。

但到我想去觀光望下呢個城市嘅時候，佢哋話陪我我又唔好意思推。

結果係佢哋又悶又辛苦之餘我又遊得唔自在。

何苦呢？


我諗。

我都係比較適合一個人去旅行。

遊新加坡黑仔事件簿

上次遊台黑仔（遊台黑仔事件簿），今次遊新加坡當然亦係走唔甩。


夜機，但中午時check-in 已經攞唔到我最鍾意嘅「窗口邊走廊位」。
（不過臨上機前又調到俾我）


20:00機，19:00去到機場一望個顯示板。
「Delay - EST 20:50」
去到新加坡都已經凌晨一點。


響 Universal Studios Singapore 排隊玩過山車。
排咗一個鐘之後臨上車之際．．．停電。
（好彩唔係玩玩下停）
（半個鐘之後開返結果玩完死唔去）


響親戚屋企滿心歡喜期待一齊睇波。
結果唔知咩問題完全無晒訊號。
我人未出現之前係前所未見。
（搞一大輪最後都總算有得睇）


錯手 delete 咗張 memory card 上面嘅幾百張相。
（好彩最後 recover 到）


帶數碼相機出去影相點知原來兩粒電都冇電。
（好彩仲有部 iPhone 頂住）


坐地鐵入唔切俾度閘夾到應一應。
（之後又開返俾我上）


回程時遇著係空中少爺。
（呢樣最黑！）


係「黑仔」定係「好彩」？

其實我已經分唔到。

遊新加坡的二三事

第一次踏足新加坡，感覺良好。

空曠、整潔、空氣清新。

有點澳洲的感覺。


新加坡積極發展旅遊業，旅遊景點多得令我喜出望外。

幾天也玩不完。

商業發展步伐急速，卻又於城市中保留了一些歷史面貌。

新舊交錯，保育工作下了不少功夫。


來之前我估不到原來新加坡是這個模樣的。

看到新加坡政府如何積極發展，香港政府著實應該好好反省反省。


很多人不喜歡新加坡。

說沒自由，很共產。

某程度上沒錯。

但若然要我選一個地方安居樂業組織家庭。

新加坡確實會在考慮之列。

我又不是去犯法或搞政府。

她共產不共產與我沒太大關係。

至少，她比大陸好得多。

社會政策亦比現在的香港好。


我公司是有一 team 人在新加坡負責做 support 的。

如果將來有機會被調派到當地工作也不錯。

我妄想著．．．

新加坡的四天

　

　

　

　

　

　

（點選 Read more 觀看更多相片）

新加坡

記得十幾年前全「王家」去新加坡飲。

唯獨我一個要留響香港唔知係考會考定考ＡＬ。


今日終於有機會去。


出發！

無可奈何

有啲人當你對住佢嘅時候你會好想「樁」佢。

但由於佢好 nice 嘅關係又導致你唔忍心。


就好似今朝我 call 的士。

的士司機同 call 台講５分鐘就到。

結果我等咗超過５分鐘之後嘅唔知幾多分鐘。

開始火滾嘅時候架的士終於出現。

個司機離遠見到我已經較低隻窗大聲講早晨。

上到車又好有禮貌咁講多次早晨，又好有禮貌咁問去邊。

又無問題又唔該又多謝又剩。

搞到咩火都發唔出。


又好似我隔離房嘅三位同事。

真係物以類聚人以群分。

不同在於。

一個純如羔羊、一個經常呆若木雞、一個急如熱鍋上嘅螞蟻。

相同在於。

口唔清、耳唔靈、腦唔轉。

有時同佢哋溝通真係「忟」到想搵幅牆撼自己個頭埋去死咗佢算。

但佢哋友善又有禮貌。

我可以點？


我都知。

蠢係無罪嘅．．．

亞媽唔認仔

亞媽經常批評我部 iPhone 收音差聽唔清楚我講乜。

於是某日下午我就用公司電話打返屋企。

對話如下。


＜電話接通，聽筒對面傳來我亞媽把聲＞

媽：喂？

我：媽咪呀！

媽：你搵邊個？

我：搵你囉。

媽：你係邊個？

我：我咪你個仔囉。

媽：你打幾多號電話？

我：下？

＜正當我猶豫之際，我俾人 cut 線。於是我再打多次。＞

我：喂？媽咪呀！

媽：你搵邊個呀？　＜態度開始勞氣＞

我：我搵你囉。

媽：咁你係邊個丫？　＜態度異常差＞

我：我咪你個仔囉！

媽：你唔係我個仔！　＜響呢一刻，我打咗個突．．．＞

我：我喎！你個仔「王晶」喎！

＜對面靜咗兩秒＞

媽：車！點解你把聲唔同咗嘅？個電話號碼又唔同。

我：公司電話。諗住你可以聽得清楚啲嘛．．．

媽：車！把聲都唔同，真係俾你玩死。

我：．．．（都唔知係邊個玩死邊個？！）


我亞媽並唔係因為睇得《警訊》多而提高警覺。

而係佢早排已經收過兩次類似嘅白撞電話所以先咁「醒」。

「醒」，係我父母夜晚傾返件事檢討完之後得出嘅結論。

而我就只有「無奈」兩個字刻響額頭。


當我亞媽斷言我唔係佢個仔嘅嗰一刻。

我確實受到打擊同傷感咗一秒。

然後下一秒，我開始驚。

「死！亞媽失憶．．．」

劇毒

由《HOUSE》SEASON 7 DVD 入手嘅嗰一晚開始，我每晚最少煲兩至三集。

直接導致我每日響辦公時間時都「烏烏下」。

隨咗係因為睡眠不足之外。

亦令我雲遊太虛不斷思考。


《HOUSE》吸引我嘅地方。

係佢可以令我諗到好多嘢。

由「個人」到「人與人之間」到「工作」到「存在意義」等等。


係咪「有點誇」？

有機會再講。

眼郁腦唔郁

朋友介紹睇一套響明珠台播嘅美劇。

喪屍片。

《The Walking Dead》



其實一向唔好喪屍片。

不過見呢排悶悶地於是就乜鬼都睇下。

為沉悶同枯燥嘅生活加入一點血腥、驚嚇同核突。


呆呆咁望住電視緊張一個鐘。


明知係假，都唔知睇嚟做乜。

已經係第二個禮拜．．．

繼續 911

尋晚又睇咗一個同 911 有關嘅節目。

《Giuliani's 9/11》

主要講述前紐約市長點樣去面對同處理當年 911 呢件災難。


雖然呢類節目已經睇過無數次。

每個時段所發生嘅嘢都幾乎記得。

但畫面依舊震撼。


最震撼嘅畫面並唔係塌樓嘅一刻。

而係啲人響一百樓左右一躍而下．．．


何等絕望。


（附錄：911）

熟悉的陌生人

因為 blogging 認識了一些人。

一些素未謀面但互相認識甚至互相了解嘅人。


有時我都會諗，究竟佢哋係邊個。

會唔會有一啲其實係我響現實中已經見過面？


係某月某日某街道上擦身而過嘅嗰位大叔？

係地鐵上面全神貫注望住部 iPhone 睇 blog 嘅嗰位小姐？
（我間中會偷睇人哋睇緊咩）

係小巴上坐我隔離周身郁嘅嗰位哥哥仔？

係公司而又成日煩住我嘅嗰位同事？

係同 team 嘅某一個兄弟？

定係每日都響 office 嘮嘮叨叨嘅嗰位大嬸？


無限個可能。


如果某年某月某日你忽然認出我。

記得話聲我知。

相同不相同

同一個地球，同一個地方，同一個車廂。

不同的三個人，不同的三隻錶，不同的三個時間。

死唔斷氣

最近睇咗兩套戲，都係續集再續集之後一路續到唔知幾時為止嗰啲。


《PIRATES OF THE CARIBBEAN: ON STRANGER TIDES》



《FAST & FURIOUS 5》



頭一套 Jack Sparrow 真係差啲睇到瞓著。

反而另一套 Dominic Toretto 就睇到我熱血沸騰。


想講嘅係。

呢兩套戲響最尾都有繼續留下伏線。

仍然未完仲有下集．．．

童年陰影

最近有一句電視廣告嘅對白係咁嘅。

「係咪想娶個痘皮婆呀？」


我記得我細個嘅時候經常都聽到呢句帶有恐嚇性嘅說話。

而當時年紀小小嘅我。

真係會因為驚將來娶個痘皮婆而乖乖咁清晒碗裡面嘅飯。


到咗依家。

每次我食唔晒啲飯時都仍然會諗起呢句說話。

雖然我唔會再迫自己清晒啲飯。

但我仍然會驚真係因為呢個原因而將來娶個痘皮婆．．．

好事成雙

天朗氣清時灑一陣掃興嘅雨。

偏偏就會出現美麗嘅彩虹。

世事就係咁吹脹。


平常坐車返工時，多數都會瞓。

某日偶然無瞓覺。

竟然俾我見到彩虹。

仲要係兩次，不同地點。


已經唔記得有幾耐冇見過彩虹。

唔知係因為我經常「閉目養神」唔望呢個世界。

定抑或係因天氣關係而導致出現彩虹嘅機會越來越少。


見到彩虹，心情都好啲。

唔知點解。


送上一張「雙彩虹」嘅相片。

（轉載自：雙彩虹‧主虹‧虹霓）

一面屁

我做 IT SUPPORT.

甲：你平時收工之後有咩娛樂？
　　我估你都係返屋企對住部電腦架啦。
我：唔好意思。我返到屋企之後係唔會開電腦嘅。
甲：．．．


我好少主動同同事傾偈。

乙：你哋啲做 IT 嘅真係唔多講嘢架喎。
我：我唔係唔講嘢，我係同你無咩好講啫。
乙：．．．


我屋企做鐘錶業生意

丙：你屋企做錶，咁你一定好識手錶啲嘢同好多錶戴啦。
我：我對錶嘅認識係零，而且我已經無戴錶廿年。
丙：．．．


我家境不錯

丁：你返工都係為過日晨，打份風流工啫。
我：如果我真係咁富貴我就唔駛做啦。日曬雨淋你估好過癮？
丁：你大把錢喎。
我：唔好意思。係我父母有錢啫，我好窮。到佢哋香咗時我先大把。
丁：．．．


點解永遠都要響未清楚認識我之前就假設我係你哋諗咁嘅人？

都係嗰句，你估我唔到嘅。

（附錄：戇居）

我睇你睇我自己

劉心悠微博：有人曾說, 你喜歡一套戲或劇集裡面的人物或情節，不多不少是因為你看到了自己的影子.....


無錯。

我確實覺得我有時同 HOUSE 一樣咁 PK．．．


《HOUSE》SEASON 7 DVD 已入手。

不眠不休煲劇的日子又再來臨了～

病向「錢」中醫

近幾個月斷斷續續的看了幾次醫生。

診金加藥費再加上 sick leave 沒糧發。

算一算已經不見了幾千元。

還要未斷尾啊！


以前聽長輩說人要儲錢以備不時之需。

總覺得多餘。

現在倒覺得有點道理。

一點點而已。


腦中仍然常常想終止了那兩份人壽及意外保險。

反正得到賠償之時我多數也無福消受。

莫非要好像姜大衛賣的廣告那樣想「留返落嚟嘅都算係一份心意，而唔係一個負累」？


每年供幾千元。

拿來看醫生可能還划算。

文字戀

最近生活枯燥乏味。

雖然一向都談不上多采多姿。

但至少也可自得其樂。


近來連看戲打機也提不起勁。

亦忽然覺得自己內裡空空如也。

怎麼辦？


看書吧！

我對自己說。


對於書，我一向「好買」不「好看」。

買回來一大堆書，很少會把整本看完。

有些連翻也沒翻一下。


對於書的類別，偏好看散文。

但其實甚麼也會看。

跟看電影一樣。


我相信我是喜歡看書的。

看書時我的心總能平靜下來。

也許是時候替自己找回那種感覺了。

寧濫勿缺

前排瘋狂買碟。

短時間內煲晒。


最近瘋狂買書。

但買咗又唔睇。


想點？

偷來的 blog tag - 自問自答

問: 一個人的時候最想做什麼?
答: 聽歌兼大聲跟住唱。

問: 最討厭自己什麼?
答: 胡思亂想。

問: 最喜歡自己什麼?
答: 心地善良。

問: 有什麼特別的習慣嗎?
答: 帶上耳筒與世隔絕。

問: 朋友多嗎?
答: 不多。

問: 自覺難相處嗎?
答: 非常難。太自我中心。

問: 在一個圈子或群體喜歡當什麼角色?
答: 隱形人。

問: 最討厭什麼人？
答: 阿諛奉承的人。

問: 最想成為哪一種人?
答: 被重視的好人。

問: 有什麼夢想?
答: 沒有夢想，只有妄想。

問: 幸福是怎麼一回事？
答: 上有高堂下有妻房。

問: 挫折是怎麼一回事？
答: 吃力不討好。

問: 命運是什麼？
答: 有佢揀冇我揀只有跟住行。

問: 現時最大成就是什麼？
答: 還可以算是一個好人兼對得住天地良心。

問: 死前留給世界一句話，會說什麼？
答: 一世夠了，不想再來。

食飯小插曲（三）

話說自從麥當勞將「脆辣雞腿包」中間啲配菜換咗跟住試過一次之後我就再無食過。

又話說某一晚忽然間想食「麥香雞」於是就幫襯。

點知一打開個包就見到係件「脆辣雞腿」。

心諗咁黑仔咁都俾錯？

算數照食。

一咬之下竟然喜出望外。

發現個包嘅配搭係「脆辣雞腿包」嘅雞 加「麥香雞」嘅包同菜。

即係我響錯有錯著之下食返一個舊版「脆辣雞腿包」。

咁都有？

哈哈！

顛倒

有啲人視力不正常。

可能會願意忍受睇嘢朦查查。

或者戴隱形眼鏡戴到雙眼發炎。

都堅決唔戴有框眼鏡。


有啲人視力好正常。

偏偏就掛住個齋框無鏡片。


咩世界？


無錯。

就當我唔知咩叫 FASHION 啦！

得物無所用

兩張電影贈券連汽水券即將到期。

其實 keep 住都差不多一年但一直冇用。


唔係因為啲戲吸引唔到我入場。

而係越來越唔鍾意戲院個環境兼氣氛。

啲人傾偈接電話收發ＳＭＳ食嘢等發雜音我實在受不了。

再加上之前提過抗拒３Ｄ電影。

港產片又驚會「中伏」。

所以一直都冇動力入場。


另外，贈券有兩張。

我要約人睇嗎？

我到今時今日都唔太明點解要約人一齊睇戲。

睇戲又唔駛講嘢或者討論嘅，約著個多口嘅去睇可能反而仲掃我興。

如果係同女朋友拍拖去睇戲又唔同。

因為係「志在一齊去」而唔係「志在搵人陪」睇戲。


結果。

我送咗兩張贈券俾人。

不過。

我仲有兩張．．．

下年到期。

My life ...

癡癡呆呆坐埋一檯

今日收工時響地鐵又遇到一個有精神問題嘅年青人。

開頭見到佢表面上都唔似有嘢。

但自從佢見到一位女士玩 iPad 之後就開始忽然間好興奮咁叫。

叫完又叫。


之前都提過，香港已經變為一個 癲瘋之城。


個年青人落咗車之後我響度諗。

平時我坐地鐵，唔望人，聽住歌，口擘擘，但冇聲。

可能響其他乘客眼中我都只不過係另一名癲佬。

Departures

呢個節目已經去到 Season 3.

但係我今日先第一次睇。


About the show -

Aimed at the adventure seeker, Departures is an action-packed and personal journey about two travelers. Scott Wilson and Justin Lukach leave their lives behind in search of unique experiences through some of the most beautiful and remote places on earth.


忽然吸引到我睇嘅原因。

主要係因為今次呢兩個旅者去嘅目的地 - 北韓。


我一向對韓國嘅娛樂事業 (歌、劇) 毫無興趣。

但係我對北韓呢個「對外封閉」嘅國家就相當有興趣。


節目最終都冇令我失望。

北韓某部份嘅神秘面紗亦有響螢光幕上出現。


不過見到北韓啲小朋友嘅生活，確實係睇到幾心噏。

唔係因為佢哋窮冇啖好食。

而係佢哋被北韓政府思想改造。

每個小朋友都似極機械人。

沒有笑容、沒有童真。


想像唔到啲小朋友係點？

諗下幾十年前中國文化大革命嘅時候係點就知。

同一個模樣。

大掃除

是日無聊，於是執房。

其實屋企裝修完都半年有多，但我拖下拖下拖到依家都未完全執好我啲濕碎嘢。


響床下底拉出兩個大膠袋。

裡面全部都係一啲一直都唔想處理於是將佢哋炒埋一碟嘅嘢。

而全部都同「過去」有關。


包括：
舊相（ＢＢ年代）
舊護照（已剪角）
舊文件（都唔知仲有冇用）
舊錶（應該唔會再戴）
舊卡（會員卡、折扣卡、提款卡、信用卡）
舊咭（生日、聖誕、仲有人哋請飲）
舊信（ex ...）
舊票尾（電影、演唱會）
舊利是封（近一兩年嘅拆咗未掉個封）
外幣（去完旅行剩落幾蚊雞）
場刊、入場券（去旅行參觀時留落）
鎖匙（已經唔記得係用嚟鎖咩嘅匙）

諸如此類，「垃圾」一大堆。


結果係。

藍字嘅留低。

紅字嘅銷毀。


舊信

記得唔記得以前嘅事已經唔重要，反而想忘記嘅比較多。


舊票尾

最近響 Facebook 見到有朋友由中學時期開始儲票尾儲到依家。
雖然每張票尾都係一段同某人一齊嘅回憶。
但無留開就無謂留啦。

舊利是封

其實一向都有掉，只不過係今次太懶所以先搞咁耐。

而且仲俾我響其中一個利是封入面搵到張廿蚊。
哈哈！


回憶嘅嘢，記到入腦就記。

係記唔到嘅，留件死物響度都無意思。

回味

一個麥當勞早餐，令我諗起澳洲。


由於我亞媽異常揀食嘅關係，所以自細開始有好多食物我都無機會試。

慢慢亦都養成咗一個好少嘗試新嘢食嘅不良習慣。


記得第一次食「熱香餅」，應該係廿零歲響澳洲嘅時候。

不過唔係響麥當勞。

而係 homestay mother 響超市買返嚟一 pack 六件嘅 pancake (我哋叫佢做 hotcake)。


一試難忘之後。

往後幾年都 keep 住有買嚟食。

直到幾年前返咗嚟香港就一路都無再食過。


今朝呢兩塊熱香餅嘅味道。

令我諗返起好多響澳洲生活嘅片段。

漏電

忽然覺得自己像一顆幾近耗盡的可充電電池。


可惜我仍然找不到合適的專屬充電器．．．

有效日期

快樂太短暫，往往只有一刻。


痛苦太持久，偏偏佔據餘生。


那內疚呢？

內疚會纏繞一個人到甚麼時候？


碰見你。

我不禁問自己。

我還會內疚多久？

壞腦

腦袋仍然未能正常運作。


工作上還能應付。

只是比平常慢了四分一拍。

間歇性語無倫次。


下班回到家就一連看幾集《康熙來了》直至就寢。

沒有思考的看、聽、笑。


遊戲機沒打。

電影沒看。

書沒讀。

完全提不起興趣。


偶爾會忽然間問自己：

「噓！今日係星期幾？」

一時間真的不知道。


連日子也記不起。

是因為每一天我都像是在虛度。

打敗仗

自以為連續食十日抗敏感藥會好返。

結果響停藥後嘅第三日賴死不走嘅「風癩」再度復發。

終於。

我去咗睇醫生。


循例。

都係要俾嗰個睇住我大嘅家庭醫生「哦」幾句。

因為我已經拖咗兩個月先去求診。


之後大家一齊響度鬥估我係對咩敏感。

噏咗一大堆疑似源頭。

其實都係「斷估無辛苦」。

現階段係唔會有答案。


估完身理之後估埋心理。

因為心情影響都會引致病發。


醫生從量血壓得知我精神緊張。

我又同佢講我瞓得唔好。

於是。

佢開咗「鎮靜藥」俾我等我瞓得好啲。


「抗敏感藥」加「鎮靜藥」。

呢次真係想唔昏迷都唔得咯．．．

反樸歸真

偶然響網上見到一部幾有趣嘅手提電話 - John's phone.

冇 screen.

即係冇來電顯示冇 SMS 冇 Whatsapp 冇得上網。

甚至連記錄電話都要用機背嗰本手寫嘅電話簿。


真係想整返部嚟過下癮。

一小時快樂

當亞洲電視仍有轉播中天亞洲台嘅時候。

幾乎每晚都會準時收睇《康熙來了》。

唔響屋企嘅話都會錄起。


我唔係好熱衷於娛樂圈嘅嘢。

亦唔係一個台灣迷。

咁鍾意睇呢個節目嘅原因。

係因為我可以響呢個鐘頭入面真真正正咁放鬆下開心下。

雖不至於睇每一集都會開懷大笑。

但至少都唔會睇到心情沉重愁眉苦臉丫。


自從亞洲電視暫停轉播中天亞洲台開始。
（好似係四月中）

我就失去咗呢一樣歡樂。

雖然我知道 Youtube 有得睇。

不過就一直都冇行動。


直到今日。

又係百無聊賴嘅星期日。

我一口氣搵返數小時嘅快樂。

盡孝

長輩大壽。

我安排咗一家人一齊食餐飯。


兩年前另一位長輩生日時都搞過一次。

（見：孝）


家中有幾個長輩都冇結婚。

我覺得由依家擺大壽到將來擔幡買水。

都係我哋呢啲後輩應該做嘅事。

呢個想法仍然無變。


我無祝福長輩「長命百歲」。

我只係祝佢「身體健康」。


因為我唔知道。

祝人「長命百歲」究竟係祝福定詛咒。

知道不知道

我知道。

我倆由出生的那一刻已命中注定會走在一起。


可是我不知道。

我甚麼時候才會遇上妳。


奈何我更不知道。

我某天遇上的究竟是不是妳．．．

從前情人好嗎

《第二最愛》

從前情人好嗎　現在幸福嗎　還生氣嗎
誰人何時替我　給你一個家

從前情人還好嗎　尚獨身嗎　還想我嗎
無緣成為最愛　卻又很牽掛

從前情人好嗎　自己都驚訝
分開加倍念掛　你不信吧

《我不好愛》

TO S：

如果當年我成熟一點。

也許我不會跟你開始。

但或許仍是會不知不覺的走在一起。

然後一樣無稽地分手。


TO L：

如果當時我再考慮得清楚一點。

也許我現在已經跟你結了婚，有家庭、有小孩。

但或許只是跟你再拖多三數年。

到頭來還是分開。


TO V：

如果當時我認真一點。

也許我會跟你走得遠一點久一點。

但或許只是短暫延長壽命。

由原來的三星期加倍變為六星期。


TO K：

如果當時我再幼稚一點。

也許我可以跟你繼續在一起。

但或許只會是加深我的痛苦。

生不如死的換成是我不是你。


TO C:

如果當時我沒有吻下去。

也許我．．．

但或許．．．

還是無疾而終。




沒有如果，只有不知是對是錯的結局。


《我不好愛》

歌手：陳奕迅
作曲：Eric Kwok
填詞：黃偉文
編曲：Billy Chan

不好愛　已經造成不少傷害
別再忍耐　病情這麼危殆
沒幾多　奇蹟可　昐待
在世間　千萬人　億萬人
有一些人卻　實在不適合被寵愛

你　又美麗　又偉大　又這麼慷慨
我　被厚待　亦相當意外
給　你寵愛　這戀愛　結果倒下來
大概只是　我不好愛

我　又憤怒　又脆弱　固執不會改
怕　被冷落　卻不肯接待
給　你寵愛　這戀愛　愛不出未來
大概都是　我不好愛

不好愛　太多問題假裝不在
沒處不在　事情的不完美
是超出　受得起　以外
就算你　吞下來　忍下來
有一些人卻　永遠不適合被深愛

你　又美麗　又偉大　又這麼慷慨
我　被厚待　亦相當意外
給　你寵愛　這戀愛　結果倒下來
大概只是　我不好愛

我　又憤怒　又脆弱　愛都不敢愛
怕　被冷落　卻不肯接待
當　你跟我　有一個　那麼不易愛
得你一人　越來越可愛

軀殼

最近對好多事都冇咗感覺。

係因為藥力影響？

定係因為已經變得麻木？


以前響工作上遇到不順。

總會忟一陣怪自己運滯。

以往出外工作時落大雨或烈日當空。

總會怨天幾句怪自己黑仔。

每當感情上遇到波折。

總會呻到樹葉都落笑自己傻仔。


但最近嘅情況係。


響工作上遇到阻滯時心無雜念繼續做。

出外工作時落大雨就無聲氣地開遮擋雨。

烈日當空時就顎高個頭曬下感受下太陽嘅熱力。

感情上一片空白冇無謂嘢可以諗。


每件事都俾到適當反應但全無感覺可言。

只係覺得自己內裡空空洞洞。

個靈魂唔知趺咗去邊．．．

Hea

辦公時間我鍾意四處奔走
放假時候我喜歡在家攤抖


星期日休息。


攤在床足足２０小時。

瞓覺、睇台灣綜藝節目、睇戲、睇書、睇波、打機。


餘下的４小時就留俾「生理需要」。

離開張床去廁所、食飯、沖涼等等。


一天假期就這麼完了。


仿似頹廢但又很滿足。

敏甚麼感

由五月尾某晚開始。

忽然間間歇性地皮膚敏感。

出「風癩」。
（我一直查唔到個正字係點寫）


睇過一次醫生，搽過藥膏，食過藥。

好咗。

但藥力一過。

又出。


醫生話過未必可能搵得出係對咩敏感。

反正無答案。

之後我索性連醫生都唔睇。

去藥房買藥膏同成藥就算。


每隔幾日出一次。

我就每隔幾日搽一搽藥啪一啪丸。

反反覆覆。

直到依家。


屋企人知道之後當然係左估右估希望估到個估唔到嘅源頭。


我亦唔知點解我今次好唔想去睇醫生。


每次都係響瞓著之後先出「風癩」。

我開始懷疑我係對「瞓覺」敏感。

係就「大檸樂」了．．．

不孝有三

仍然記得上星期契仔嚟我屋企時當我父母照顧佢、同佢玩時面上流露嘅嗰種喜悅。


我終於切實感受到我不孝。


阿意曲從，陷親不義，一不孝也；

家貧親老，不為祿仕，二不孝也；

不娶無子，絕先祖祀，三不孝也。

面口

甚少主動同同事傾偈。

亦甚少同事主動搵我閒聊。


早幾日同事Ａ見到我時主動說。

Ａ：做乜你個樣咁憔悴？

我：吓？我一向都係咁嘅樣架啦。

Ａ：今日特別憔。

我：下．．．


尋日同事Ｂ見到我時主動說。

Ｂ：做乜你個樣咁苦惱？

我：吓？我做嘢時係咁嘅樣。

Ｂ：．．．


上個月同上司一齊開工時佢忽然主動說。

上司：亞晶乜你好似忽然間老咗幾年咁嘅？

我：吓？可能係因為無剃鬚影響啫。


我知我響辦公時間嘅時候個樣一定唔討好。

因為我時時刻刻都好認真同緊張。


查實我都好想可以靈魂出竅。

響人哋嘅眼中見下自己開工時究竟係咩死樣。

灰色軌跡

生日時收到一個 headphone 做禮物。

由於新 headphone 無配件可以接駁 iPod。

所以已經放埋近兩年嘅 MP3 機可以重見天日。


睇返或者聽返一啲過去嘅嘢。

往往猶如尋寶。


我已經唔記得我兩年前聽嘅係咩歌。

一睇返個 songs list 連我自己都呆一呆。

２００幾首歌入面。

有大慨１５０首左右都可以響我依家每日都聽緊嘅 iPod 入面搵到。

餘下嘅幾十首。

都係好鍾意但遺忘咗嘅歌。

當然。

全部都係頹歌。


響呢兩年入面。

行為上及性格上我或多或少都改變咗唔少。

但原來個底仍然係無變。

依舊咁灰．．．

怨歌

有兩首歌。

只要一聽見段 intro.

我嘅心情就會變得沉重。

無論當時做緊嘅咩都好。

每次效果都一樣。


我相信我會將呢兩首歌一直放響ＭＰ３機入面．．．


《於心有愧》

《黑風暴雨》

打碟

曾幾何時開過網上電台。

啲人鍾意聽嘅原因。

相信係我識揀歌。

聽落有共鳴。


我經常都諗。

如果有朝一日我做 sales 或者自己有間舖頭。

又或者係做職業司機。

我一定會爭取負責響工作嘅地方選擇播咩歌。


我希望可以響短時間內令到嚟幫襯嘅顧客嘅耳仔可以舒舒服服。

甚至愉快地哼上一兩句。


坐一程車或者食一餐飯時不斷要聽住啲礙耳嘅歌。

係一件好辛苦嘅事．．．

食飯小插曲（二）

話說某日中午去一間經常幫襯嘅台式麵店。


我：唔該午餐「燒腩併肉碎麵」，凍檸茶少甜。

侍應：凍飲１２蚊喎！

我：唔係午餐凍飲加２蚊咩？

侍應：午餐就係，但你咁樣叫無午餐。

我：下？我平時食開都係咁叫喎。

侍應：我唔知你平時係點叫，但我哋午餐入面係無燒腩呢個選擇嘅。

我：我咪叫「燒腩併肉碎麵」囉，啲亞姐係咁整俾我。
雙併加＄１５，凍飲加＄２，總共＄４７。
（似乎我熟到可以去兼職）

侍應：先生，我哋嘅午餐入面無「燒腩」，你叫我點併俾你呢？

我：咁我可唔可以咁叫？
一個午餐「肉碎麵」連凍檸茶少甜。
另外再加份「燒腩」。
即係午餐＄３０加燒腩＄１５之後凍飲＄２總共＄４７。

侍應：咁就可以。

我：．．．．．．．．．．．
（心諗：有咩分別？）

可一不可再

契仔今日嚟咗我屋企。

三個月大了。


佢係一個好好笑容嘅Ｂ。

尤其係瞓醒覺嗰陣。


我亞媽話。

當我仲係ＢＢ嗰陣都係一瞓醒就笑。


點估到依家「瞓覺」反而成為咗我最大嘅煩惱．．．

遺照

我好憎影相。

最近一次影相可能已經係兩年前生日嘅時候。


今日忽然響度諗。

將來我香咗嘅時候如果啲後人要幫我搵張車頭相或者靈堂相都應該算係 mission impossible.


或者係時候影定張．．．

１０００

原本諗住響第1000篇時嚟個回顧。

點知寫下寫下都冇咗件事。

到 check 返嘅時候原來已經過咗。


「已發佈 - 共 1020 個」＠Blogger


一千篇唔係一個小數目。

我亦無諗過我會維持寫 blog 維持咁耐。


記得寫第一篇 blog 嘅時候係 31/12/2005 ...

不勞而獲

如果想祝福我將來會好有錢。

唔好同我講「祝你搵多啲」或者「祝你發達」。

因為「搵多啲」然後「發達」隨時做到趴街。

真係要祝福我嘅。

就祝我「中一注獨得嘅六合彩頭獎」啦。

實際好多。

失眠

最近只有響呢兩個情況下至會瞓得比較好。

１）飲咗酒

２）食咗敏感藥


正確啲嚟講。

係昏迷．．．

食飯小插曲（一）

話說某晚去幫襯《何洪記》。

叫咗個 雲吞牛腩撈。


我：亞姐！漏咗蠔油喎，俾啲蠔油我丫！

亞姐：蠔油要加錢架喎！

我：乜撈麵唔係有蠔油嘅咩？

亞姐：雲吞撈就有蠔油。你雲吞牛腩撈就無。

我：‧‧‧‧‧‧‧‧‧‧加幾錢？

亞姐：三蚊。

我：咁‧‧‧加‧‧‧啦‧‧‧

理智地衝動

每次坐船都會想跳海。

每次去摩天大廈又會想跳樓。


今日坐渡輪過海時又閃過一下衝動。

可惜我份人太理智。


連衝動都理智過人．．．

《回到過去》

MP3 機響起《回到過去》


以前好鍾意呢首歌。

因為我以前好鍾意回憶同緬懷過去。

依家。

我就打死都唔想時光倒流。

因為人會重蹈覆轍。

而且往事不堪回首。


《回到過去》

作詞：劉畊宏
作曲：周杰倫
編曲：邁可林

一盞黃黃舊舊的燈　時間在旁悶不吭聲
寂寞下手毫無分寸　不懂得輕重之分
沉默支撐躍過陌生　靜靜看著凌晨黃昏
妳的身影　失去平衡　慢慢下沉

黑暗已在空中盤旋　該往哪我看不見
也許愛在夢的另一端　無法存活在真實的空間

想回到過去　試著抱妳在懷裡　羞怯的臉帶有一點稚氣
想看妳看的世界　想在妳夢的畫面　只要靠在一起就能感覺甜蜜

想回到過去　試著讓故事繼續　至少不再讓妳離我而去
分散時間的注意　這次會抱得更緊
這樣挽留不知還來不來得及　想回到過去

思緒不斷阻擋著回憶播放　盲目的追尋仍然空空盪盪
灰濛濛的夜晚睡意又不知躲到哪去
一轉身孤單已躺在身旁

想回到過去　試著抱妳在懷裡　羞怯的臉帶有一點稚氣
想看妳看的世界　想在妳夢的畫面　只要靠在一起就能感覺甜蜜

想回到過去　試著讓故事繼續　至少不再讓妳離我而去
分散時間的注意　這次會抱得更緊
這樣挽留不知還來不來得及　想回到過去

(沉默支撐躍過陌生　靜靜看著凌晨黃昏
妳的身影　失去平衡　慢慢下沉...想回到過去)

思覺失調

我經常胡思亂想。

而且無辦法令自己個腦停落嚟唔諗。


為咗唔再俾紊亂嘅思緒影響到我。

於是我揀咗一款要動腦筋嘅 iPhone game 嚟玩。


用專心玩 game 所佔用嘅腦力嚟令自己分心唔再諗無謂嘢．．．

勇氣

我一向唔鍾意自己個樣。

甚至有點憎。

相信呢個亦係我無自信嘅其中一個原因。


有時響街見到一啲有失天缺憾或者後天毀容嘅人。

我都好配服佢哋可以繼續面對自己面對人。


活著需要嘅勇氣遠遠大於了結自己生命．．．

書展

每年嘅書展都係喺差唔多時候搞。

好多時又會撞正我生日。

所以中學階段時有兩三年嘅生日都係去書展度過。


當年嘅書展仲有漫畫賣。

依家諗返都唔知辛辛苦苦排個幾兩個鐘頭隊迫入去買漫畫同漫畫精品然後一袋二袋山長水遠咁抬返屋企係為乜。

因為明明書展之後過一個星期就周圍都有得賣。

不過後生仔就係咁戇居架啦。


近年已經冇再去書展。

因為人太多睇唔到咩書之餘買完仲要拎餐死。

所以寧願繼續悠悠閒閒間中去下書局好過。


響地鐵站見到有廣告介紹今年書展有 王司馬 嘅《牛仔》。

我唔知往年有冇。

不過我細個時就睇好多。

因為我姑丈響 博益 做印刷。

成日拎書同漫畫俾我睇。

包括《牛仔》同《成語動畫廊》。

三十有二

今年嘅生日。

係快樂嘅。


由星期六開始同屋企人聚會。

到星期一、二都約咗朋友食飯。

再到今日同父母兼帶埋堂細佬細妹一齊食飯。

每日都排得密密麻麻。

我諗。

我係刻意唔俾自己空閒落嚟。


原本。

約咗今日同「佢」去海洋公園。

最後。

我決定取消。

因為。

我單方面覺得我同「佢」唔應該繼續落去。


今日忽然間多咗出嚟嘅時間。

我一個人去咗行街。


記得以前中學時。

每次生日我都會「懶瀟灑」咁一個人四圍去。

機場、東涌、青衣、荃灣。

諸如此類。

一個人「懶憂鬱」咁過一個孤單嘅生日。


今年，又打回原形。

不過，今年係心情輕鬆咁享受一個人獨處嘅時間。


越來越覺得。

相對於愛情。

家人同朋友都係同等重要。

以前嘅我。

忽略咗。


舊年生日做過咩已經唔記得因為無寫低。

亦唔想再記起．．．

明日何其多

我好鍾意定一啲期限俾自己。

例如。

邊月邊日開始做某啲嘢。

邊月邊日開始唔做某啲嘢之類。

而到頭來多數都係做唔到。

我唔知其他人會唔會都係咁。


定呢啲咁嘅日子確實係無咩意義。

其實都係俾個藉口自己再拖下先。

係有心做或者唔做就會即刻坐言起行啦。

仲等？


不過人係會不斷重複犯錯嘅。


聽日生日。

我定咗幾件事響過埋聽日之後開始實行。

一：唔再搵佢。

二：俾３年時間自己去做個好人、好仔。

三：再開始返做運動減肥。


下年生日時檢討。

一定。