30 1月, 2006

抖抖

今朝宣佈結果,我算是成功了,總算冇白費力氣;所以今日可以抖抖。

尋晚訓唔著,o係高登開o左兩個 post,第一個係〝想死〞;呢個的確o係星期六晚o既想法。post 入面冇內容,因為我只係想死,冇打算真係死,更冇考慮點死。

第二個 post 係〝晶哥電台〞;唔開心o既時候聽下自己鍾意o既歌的確會舒服o的,未至於會開心番,但至少可以舒緩一下。

有一天假期,仍決定出街走走,shopping。買o左一樣冇乜必要但想買好耐o既無謂o野,又買o左一式兩件等(搵)o左好耐居然o係澳洲會有貨o既o野。又食o左一餐味道還可以但又頗貴o既日本o野,至愛o既滑蛋豬扒飯 + 魚生十片,約 HK$120。感覺滿足。

夜晚睇o左一套戲,《The Cave》,冇期望,冇失望,無無聊聊兩個鐘,應該有續集。

訓得幾好。

29 1月, 2006

年初一,戰鬥繼續

年初一,戰鬥繼續。

早上十時到晚上七時半,盡了力,問心無愧。
今日無輸無贏,結果明天揭曉 。冇咩可以再做。

越來越認同一句說話:『千祈唔好俾人知你識整電腦』。

中午打電話俾爹娘拜年,講o左一o的我從來都唔會講o既說話;眼濕濕,差o的喊出o黎,好在‘才禁’得住。男兒有淚不輕彈。

夜晚可以返屋企一邊睇 Australian Open Final 一邊食餐 KFC 一邊抖抖,已經係好寫意好快樂o既一件事。

28 1月, 2006

年廿九,黑到痺

雞年o既最後一日,黑到痺。稱不上全年最黑,但好有可能入三甲。
幾件事一齊擁埋o黎,有點招架不住。

當你盡力去做一件事而未能成功時,無能為力o既感覺的確令人非常氣餒;更何況係我呢個甚少會盡力o既人。

他媽的人生,他媽的命運。

我唔想輸,但我冇把握贏。

冇覺好訓。

27 1月, 2006

乾塘

尋晚開o左台,唔記得點解會開台,應該係想開就開o個隻,結果開o左一個悶台,聽o左幾個鐘頭歌,說話很少,亦唔記得講過乜。

開台o既意慾已經越來越少,少到可以成個星期都冇打算去開一次台。
開台後o既快樂及滿足感都越來越少,導致開台意慾更加下降。
晶哥電台o既質素每況愈下,差到有時我開開下都想即時收o左佢。
由於質素下降,收聽人數亦越來越少,慘不忍睹。
因為收聽人數越來越少,就更冇心機開台,質素再度下跌。

有時我會諗,開電台都已經有一段時間。要播o既歌或可以播o既歌都幾乎已經播過,要講o既o野或可以講o既o野都幾乎已經講晒;下次再開台時,我仲可以播乜講乜?

呢個情況...唔知係咪叫 “乾塘” 呢...

26 1月, 2006

隱閉青年(定隱閉中年?!)

經過星期二,我忽然發覺...

我怕人多o既室內地方,但我每日都要返學。
我怕同人用英文交談,但我身處澳洲墨爾本。
我怕同人接觸,但呢個世界唔可能淨番我一個。
我怕...

呢個“怕”,係同以前作對比;“以前”,可以話係兩年前及再之前o既日子。原來,我已經收埋自己好一段日子。將自己收o係網上面。

我唔介意出街,某程度上我係鍾意出街睇人同睇o野o既,但有時我更喜歡留o係屋企。好多時出街,我都會帶起耳筒,聽住我喜歡o既歌或電台節目,建立起我自己o既世界。從我自己o既世界,望出去一個似乎同我冇乜關係o既外面世界,感覺既奇怪又舒服。

“兩年計劃”,我除o左要增值之外,我似乎更需要令自己重新融入呢個世界。

25 1月, 2006

影相

我唔鍾意影相,甚至可以用討厭o黎形容。

o係日常生活裡面影唔影相真係悉聽尊便,所以我盡量避免。但當你o既身份係一個學生o既時候,你就避無可避,因為有一樣o野叫做“學生證”。亦因為有“學生證”呢樣o野,所以我尋日被逼影o左兩次相;感覺就好似一日入面俾人插o左兩刀。

相片最令人討厭o既地方係,佢會將你外觀上o既一切定格地表露無遺,不能修改,不能遮掩。(Digital Photo 及 Photoshop 技術另作別論)

每次影完相,o係相片入面見到自己,見到自己天生o既“缺陷”,都莫名難受,不快o既回憶亦會o係腦入面極速 replay。我諗,呢個就係我討厭影相o既原因。
我從來都冇同爹娘提及過呢樣o野,因為我怕佢o地會比我更難受,或傷心。

有時我會諗,都已經廿幾年啦,我仍然接受唔到自己個樣(或接受唔到呢個天生o既“缺陷”),的確係幾滑稽同可笑。

24 1月, 2006

兩年計劃終於開始

今日係 Business Management Course o既 enrollment day,亦係英文班第一日上堂o既日子。呢兩件事,標誌住“兩年計劃”正式開始。“兩年計劃”,係上次返香港時同亞爹及契媽訂立o既一個協定(或約定)。“兩年計劃”大慨係咁:用兩年時o係澳洲增值自己之後返香港幫手。

點解將時間(限期)定為“兩年”?因為我仲有大約年半左右o既移民監要坐,坐完之後申請到批 citizenship 又要大約三個月至半年;Management Course 要讀年半,之後可能又讀下 Marketing;兩年時間,o岩o岩好。

我做人,一向都係冇計劃、冇方向、冇目標;廿幾年o黎都冇。呢一個“兩年計劃”,應該算係第一個計劃、方向、目標。上次返香港前我係一個完全迷失o既人,幾乎每日都係遊魂中渡過,行屍走肉;但自從o係香港定o左呢個計劃之後,心情同成個世界都變晒。

做人有計劃、有方向、有目標相信係一件好事,但對我o黎講可能唔係。
即使依家有呢個“兩年計劃”,但有時我仍然係好迷惘。
呢個計劃冇得取消,而我暫時亦冇呢個計劃以外o既其它路可以揀。
我好唔習慣有計劃、有方向、有目標o既生活;係機械人,多過似個人。


其實,我好怕兩年後達唔到目標。

23 1月, 2006

《西崎公園 》Jessie

叱吒 903

《西崎公園 》
主持:Jessie

Sat 19:00 - 21:00 (由2006年1月開始)
Sun 17:00 - 19:00

西崎是一個遙遠的地方,它就在你裡面,沉睡。西崎公園沒有花朵,也沒有樹,沒有形式,也沒有確實地點,只有文字、影像和聲音帶來白蘭一樣刺激記憶的氣味與風一樣稀薄實在的觸感。被麻木的神經末梢,回復了知覺。夕陽無限,腦海盪漾,想像和現實像一見如故的陌生人般在長椅上交談。自在,因為回到心靈。


2005年年尾某個百無聊賴的星期日晚上,o係網上到處搵o野聽搵o野睇,俾上遇上呢個節目,《西崎公園 》。
o岩聽o既音樂,o岩聽o既歌,o岩聽o既節目內容,o岩聽o既聲線;自此,喜歡上。


我係一個無記性o既人,經常錯過收聽時間;錯過收聽星期六晚新時段節目尤甚。 想 join 881903.com,咁就可以“節目重溫”,但左計右計之下覺得物非所值。 膽粗粗去高登問有冇人可以幫我去 now.com 下載節目重溫,有好多人都樂意幫忙,更有一位朋友主動借我 now.com account;令我發覺原來『晶哥』o既人緣並非我想像中咁差。


經過一輪研究之後終於可以重溫節目並下載收藏,好開心;更開心o既係可以將 .asf 轉 .wma 再轉 .mp3 之後放落電話可以出街時聽。
快樂,有時就係可以咁簡單。

在此,多謝網友『援助膠際』,感激萬分。

22 1月, 2006

世上最偉大發明

自從過o左o黎澳洲之後,就個人而言,我覺得世上最偉大o既發明係冷氣機。
天氣咁熱,冇冷氣都唔知點訓,吹住風扇都頂唔順。
連續又熱又曬咁多日,即使入夜都仍然係暖風陣陣。

埋單計數,溫度比預期中高。
35℃ - 35℃ - 40℃ - 43℃

尤其係今日,簡直想死。
有段時間我要走去廚房打開晒雪櫃門涼涼冷氣。

天氣預告:
28℃
26℃
33℃
40℃

天啊 ~ 又o黎 40℃

p.s. o黎o左六年,我住o既每一個地方都係冇冷氣o既;下次搬屋(找地方中),一定要有冷氣,一定要。

21 1月, 2006

《CRASH》及《雀聖2自摸天后》

《CRASH》(台譯:衝擊效應)

 今晚睇o左呢齣戲,絕對係意外收穫。台灣版 VCD,我唔清楚有冇o係香港上畫。VCD 其實已經到手好一段時間,因為未聽過呢齣戲,所以一直扔在一旁冇興趣睇。直到睇 Golden Globe Awards 見到 Matt Dillon 有提名 Best Performance by an Actor In A Supporting Role in a Motion Picture 先令到我有興趣去睇睇呢部戲。
 參與呢部戲o既人大部份都熟口熟面,但當然講唔出佢o地係咩名,除o左 Sandra Bullock。
 呢部戲由好多個不同的小故事組成,每個小故事都有連繫,有時係靠一個角色去連貫,有時係靠一件事。所有小故事都有一個共通點,一個共同題目:種族歧視。
 睇完呢套戲之後覺得領略到o的o野但又講唔出領略到o的乜;亦唔識寫出睇完呢套戲之後o既感受,太複雜,睇到個心實晒。
 面對種族歧視問題,似乎“無奈”多於一切。種族歧視,係一個惡性循環。
 我強烈推薦各位去睇呢齣戲,我可以 upload,如果你需要。

《雀聖2自摸天后》

 尋晚都睇o左另一套戲,《雀聖2自摸天后》。
評語,很簡單的兩隻字:把鬼。

20 1月, 2006

大汗淋漓

不想長篇大論。刪掉三分二。

35℃冇冷氣o既情況之下去幫一個朋友手,算是苦力,全身濕晒,好耐未試過出咁多汗,亦發現原來我真係好潺。

19 1月, 2006

天氣預告



19/1 - 35℃
20/1 - 33℃
21/1 - 36℃
22/1 - 41℃

天啊 ~

18 1月, 2006

一月三號的新年願望及新年目標

一月三號,本來係有一篇關於我對新年願望及新年目標o既一o的睇法,諗o左好多歪理去證明新年願望及新年目標係無謂兼不設實際。
到我諗好晒應該點寫之後o係日期上已經 out 晒,所以冇 post。
今日都唔打算寫番出o黎,因為經過尋日之後,我o既諗法已經改變o左。
06年o既目標我就冇喇,新年願望倒有一個,就係:身體健康。
唔止我,我希望大家都身體健康。

17 1月, 2006

虛脫

對上一次有虛脫感覺o既時候係八月返港前感冒喉嚨發炎加高燒,仲記得當日打o左支針病到瘟瘟燉燉聽住師兄電台休息訓覺。
今朝,又虛脫多次。
尋晚開始食新藥,臨訓食,冇幾耐就開始肚痛,痛到唔知幾點,邊痛邊訓,邊訓邊痛,總算捱到天光訓左幾個鐘。
訓醒o既時候,五臟六腑好似唔屬於自己咁,痛後虛脫。
醫生未開工唯有上網 search 下隻藥o既資料,發現原來初時食有肚痛係 uncommon side effect,到身體適應o左隻藥之後就唔會再痛。
醫生冇同我提過;頂,驚o左成晚。
攤抖o左一日。

16 1月, 2006

佔有慾

 其實個 topic 唔應該用“佔有慾”,應該用“擁有”或其它詞語o岩o的,無奈我識字唔多。

iMac,另一樣冇「物盡其用」o既o野。

一直都好想“擁有”一部 Mac 機,想o左好幾年,奈何每一個型號o既 Mac 機都好貴,買唔落手,因為知道買返o黎其實真係冇乜用。我只係想“試玩”同“擁有”。

05年九月尾,打算入部 mini Mac 玩玩,HK$3990,尚算化算。
誰不知05年十月,知道相熟o個個收買佬識人有部 iMac 放,AUD$750(約 HK$4500),仲要係最 top o個款 model。毫不猶疑,決定接收。(反正有朋友話我買o左返黎之後唔想要可以賣俾佢,有後著,更加冇有怕)
05年十一月,我終於一嘗心願擁有一部 Mac 機。

部機返o左o黎之後,我足足用o左一星期先可以令到佢正常運作。部機返o黎o既時候係冇跟任何 CD o既(其實部機係來歷不明o既,冇跟任何碟,咁平o既價錢但最 top 個 model,唔慌好o野),我要用 Windows download o的 Mac o既 OS/software,burn 落 DVD-RW,再 copy 落 iMac 再 install,重複又重複;而我又唔識操作 Mac 機,搞到一頭煙,不過呢個過程又好開心。

自從 setup 好部 iMac o個個星期之後,我都好少再開著佢,因為真係用唔著亦用唔慣。
依家,部 iMac 已經變成我食飯時o既良伴,因為我只會o係食飯o既時候開著佢用o黎睇 download o左o既香港電視節目;或者我遲o的都會用佢o黎做功課。

賣o左佢?唔會喇,我鍾意“擁有”,即使冇用。

我記得有一日,部機返o左o黎之後冇耐,我望住部 iMac,笑o左一笑,好滿足,好開心,因為我終於“擁有”到一件我恨o左好耐o既o野。但幾秒之後,我又好失落,因為我發覺我得到o左呢件渴望已久o既物件之後我失去o左一個目標,失去o左渴望擁有o既呢一種感覺。如事者,我空虛o左一個禮拜...

15 1月, 2006

手提電話、長途電話、寬頻電話


手提電話
 我有一部“撞啞”o既手提電話(既然有“撞聾”呢個詞語,也可以有“撞啞”吧),係上次回港o既時候買o既。
o係香港o既時候佢仍然會呱呱叫,返到澳洲之後都嘈過一排,跟住越來越靜,到最近直頭啞o左。
其實買之前都預o左有咁o既一日,因為搵我o既人一向唔多;可能係因為上次o係香港o既時候太過熱鬧,所以今次回澳之後特別唔習慣o個種靜。

「物盡其用」,亞爹成日教訓我o既說話。冇記錯o既話,01年回港時買o左部 8250,03年再回港時賣o左 8250 又買o左部 X70,04年年中簽 contract 時又有部 E700。換轉以前,爹娘一定唔會俾我轉電話。不過自從我過o左澳洲之後o係呢方面佢o地通融o左好多;可以叫錫,亦可以叫縱...

買 w800i o既時候我有幾個理由:
1/. 部 E700 簽 contract 時俾o左 HK$400 但用o左一年之後仍然可以賣到 HK$800,有賺
2/. 部 E700 唔 support 中文
3/. w800i 可以聽歌
等等...

其實講乜理由都係假,我只係“貪新”同埋想“擁有”,即係我知道我唔可以「物盡其用」。

長途電話
 間中都會有o的朋友由香港打長途電話過o黎俾我,但每次我都會犯同一個錯講o左一句唔應該講o既說話而令到對方好無癮。接電話o既時候其實我係好開心o既,但隨即我又會替對方荷包擔心而講一句『打過o黎好貴o架喎』;我呢句說話一出,通常換o黎o既回應就會係『咁我收線囉(啦)』;之後我又要解釋一番其實我好開心好想傾云云。之但係我一路傾o既時候其實仍然係一路擔心住對方荷包的...
我同自己講過好多次,人o地打電話俾你之前梗係考慮過個價錢先打o架啦,又或者佢根本唔會考慮價錢呢個問題。但無論我同自己講幾多次都好,我仍然會犯同一個錯誤。
有時,我真係攪唔清自己o既性格、行為同心態...

寬頻電話
 寬頻電話 2b 試用期即將完結,香港寬頻問我續唔續期,費用為 HK$48 一個月,一簽就三個月。如果續期o既話,上面「長途電話」o既問題就會解決,因為我會有一個可以o係澳洲接聽o既香港家用電話號碼。不過,我都係決定唔續期,因為會搵我o既人真係唔多,萬一申請完之後真係電話都冇個,又係o徙錢。雖然 HK$48 一個月係一個少數目,但用唔著o既話即使係 HK$1 一個月都係浪費;只要望一望部 手提電話 就知...

14 1月, 2006

遊魂

唔知點解成個星期都好似遊魂咁。
唔係成個星期都唔知自己做緊乜o個隻遊魂,係成個星期都知自己做緊乜但又好似遊魂咁o個隻遊魂。
今個星期預先安排好要做o既o野大部份都已經做妥,從未如此有條理及積極。
例如:剪髮、報 course、申請 credit card、confirm credit card、申請新 saving a/c、執屋、睇醫生、驗血、準時食藥、set wireless network、整 laptop、整 iMac、shopping、寫 BLOG、同埋睇o左兩套戲。
做每件事o既時候都係全神貫注認真冇拖慢冇拖懶,但一做完一件事之後就好似魂不附體咁一舊雲直至另一件事開始。
好似尋日返屋企行行下o既時候我忽然停響路中心問自己o係度做緊乜(當時條路冇車),醒起自己係返緊屋企之後再數下今日有冇o野做漏之後又繼續行又繼續遊魂。
如果0個日下晝o係屋企o既話多數一到四、五點個人就總會好似漏電咁好「支力」好眼訓要上床叉叉電。
搞乜?

13 1月, 2006

《殺破狼》

《殺破狼》

 導演:葉偉信、甄子丹

 主演:甄子丹、洪金寶、任達華、
    廖啟智、夏韶聲、 智堯、
    惠天賜、洪天明、吳京

 故事內容:有財勢的主犯一直巧妙地逃避法律的制裁,高級督察就算面對革職,誓要將他繩之以法;與此同時,武術高手即將接手指揮重案組。然而,在一個特別的節日——父親節,一場腥風血雨的江湖對峙在黑白兩道之中一觸即發。

另一套期待已久o既電影(出 VCD),今晚終於睇到;果然亦沒有令我失望。

用一個字總括套戲:勁
用一個字總括甄子丹:型

如果以一套武打片去睇,略嫌唔夠喉;
如果以一套劇情片去睇,則o岩o岩好。

甄子丹表演的確相當好,睇佢o既動作片係一種享受;快狠勁。
有幾幕,我覺得佢有o的似李小龍上身一樣,但比李小龍更好睇。
最鍾意甄子丹對吳京一幕,睇到目定口呆,之後拍爛手掌。
我唔係甄子丹迷,但都好欣賞佢o既動作片;記得幾年前o係澳洲專程買票睇一套有甄子丹o既西片,片名已經唔記得了,o係戲入面佢算係第二男主角。

吳京,第一次睇佢演出(聽聞佢之前係唔知武術定體操隊之後又拍過下武俠劇云云),都覺得佢好掂,一個超型o既殺手。

洪金寶,上一次睇《猛龍》o既時候覺得佢寶刀未老,但今次又覺得佢已經老了;可能係因為對手係甄子丹o既關係啦,表演給比下去。

另一個不得不提o既係廖啟智,臨死一幕o既演技的確拍案叫絕。
近年好多電視台老牌演員都轉拍電影;許紹雄、張兆輝等等。
廖啟智 智叔,係我最欣賞o既一個。

全套戲我最欣賞o既係個結局,真係意料之外,讚嘆不絕。

女孩子看o既時候要有心理準備,因為o有的場面都幾血腥。


非常期待甄子丹下一齣o既電影,但一諗到下一齣係《龍虎門》帶住假髮再諗起佢o的拍擋,心裡不禁一沉...

12 1月, 2006

死穴

同朋友傾偈,佢話我有兩個死穴;

1/. 結婚
2/. 生仔

無可否認,呢兩個話題的確係我o既死穴。
以前想收我皮,傾呢兩樣o野就肯定已經得。
不過最近有o的改變,因為我已經將o的混凝土倒o左入呢兩個死穴入面,只要佢o地一乾,o的血再唔由穴位流出,咁我呢兩個死穴就會好似“八萬五”咁,“已經唔存在喇”。
而且,唔結婚唔生仔呢兩個諗法會更加鞏固。

但係,當我寫緊呢篇o野o既時候,我發現到我o既另一個死穴...

11 1月, 2006

《THE ISLAND》

《THE ISLAND》(港譯:謊島叛變)

 一套期待已久o既電影(出 VCD),今晚終於等到;果然沒有令我失望。

好耐之前睇o左 trailar,已經好期待,好想睇。
澳洲上畫時冇去睇,怕聽唔明;上次返香港時仲上緊畫,又冇去睇,因為都知就出碟。結果 DVD 好快出o左但偏偏 VCD 要等到依家。

故事好值得深思;戲中亦有不少對白發人深省。

有靚人(Scarlett Johansson)、有靚境、有動作、有鎗戰、有爆炸、有血有淚。
不容錯過。

遲o的 on sale 時去買番隻 DVD 先。




← DVD 版另一個封面, 我較喜歡上面o個個。










← poster








Scarlett Johansson

10 1月, 2006

你們有 BLOG 嗎?

各位有來看我這個 BLOG 的朋友,你們也有寫 BLOG(或網上日記)嗎?
我也很想看看你們的那個呢。

有些朋友在以前已經將他們的 BLOG(或網上日記)的網址給了我,
但早陣子意外地洗掉了 bookmark,很多也找不回,可以再給我嗎?

如果你們不介意公開的話,就在留言裡寫下網址吧;
如果介意,就 icq(3716974) 或 msn(jinggor@iinet.net.au) 告訴我吧,甚至 email 也可,謝謝。

另外,多謝各位的留言,很感激。

09 1月, 2006

短髮

今日做o既呢件事,絕對可以列入人生所做十樣大事名單入面;
今日,我剷短o左o的頭髮,短到o既程度係,比 Juno 現時o既髮型長o的o的。
相信係自有頭髮以來剪得最短o既一次!(我BB仔o既時係光頭o既)
至於點解我會剷短個頭咁大犧牲(我係一個好注重儀容髮型又好姿整o既人),梗係有我o既原因,不過我唔打算講。
短髮,真係爽好多,我好鍾意。
我係一個唔適合剪短髮o既人,唔好睇;上次返香港之前剪短少少o者,都俾亞娘彈唔好睇似傻仔。

今次剪之前,個髮型師再三問清楚係咪真係剷短,因為佢都覺唔好睇,我作o左個大話話係非剷不可佢先肯落剪;不過佢一路剷一路笑,真 HIHI。

其實望多兩望,照多兩照,短髮都 OK 丫;
不如以後都係咁短啦。

等遲o的o的頭髮長番o的,就可以有劉華呢個髮型喇,好o野!!!

08 1月, 2006

一星期炒飯

一星期炒飯

材料:
放o係雪櫃超過一星期o既食剩叉燒幾舊
放o係雪櫃剛好一星期o既冷飯一兜
放o係雪櫃接近一星期o既切好蔥粒一咋
放o係雪櫃接近一個月o既雞蛋兩隻

煮法:
炒埋一碟

飯後感:
可能o的飯放o係雪櫃太耐,好乾好硬,感覺就好似食石仔咁;
畫面寫照可以參考電影《黑社會》入面張家輝食碎匙羹一幕。

07 1月, 2006

Shopping

前日同尋日都去o左 shopping,你冇睇錯,我真係去o左 shopping。熟我o既朋友都應該會知道我係一個冇興趣亦冇耐性 shopping o既人,但我連續去o左兩日而且每日都行幾個鐘。我以前有段時間唔鍾意 shopping o既程度係幾乎去到o的衫褲著到爛再冇衫可著o既情況下先會去買新(連底褲都係,所以上次返香港時俾亞娘掉o左好多舊底底);最長時間冇買過任何新衣物應該係兩年,就係留o係墨爾本冇返過香港o個兩年。

依家每次返到香港o既其中一個“任務”就係 shopping,衫褲鞋襪 CD VCD DVD MP3機 手提電話 電腦配件 雜誌等等一律大小通殺買買買。幾個月前返o左香港一個月,衣食住行吃喝玩樂購物埋單總計接近用o左一萬蚊HK$。
駛錢容易...

講返呢兩日o既 shopping 先...
唔知點解呢兩日 shopping 時o既心情異常興奮,可能係有目標同去新地方o既關係。
前日就去o左睇樓(shopping?)同 IKEA 買傢私,買o左張檯同一o的廚具;近兩三年 IKEA 已經成為我o既御用傢私舖,成屋都係 IKEA。
尋日就去o左一個好大o既 Factory Outlets,有成百間不同牌子o既商舖,真係幾個鐘頭都行唔晒。由於我冇車o既關係,去呢個 Factory Outlets 要坐半個鐘頭電車再步行多半個鐘先到;以前o既我就真係打死都唔會去,但尋日就開開心心咁行去。Outlets 隔離係一個機場,不過好似已經荒廢因為入面冇建築物亦冇飛機;但就有一個一望無際o既 view 再加上藍天白雲,心中不禁一句『外國真好』。
全日結算只係買o左一頂帽同一條運動褲(去打羽毛球或訓覺時著),雖然收穫係少o的,但冇損我o既心情。 不過返到屋企時就『支力』成 pat 泥咁...

當我今日回想番我過去兩日 shopping 時o既情況同心情,感覺就好似我未過澳洲之前o係香港成日一個人行街睇戲食飯o個種感覺一樣,悠然自得,悠哉悠哉...

我發覺,踏入二零零六年之後,我變o左...

03 1月, 2006

祝娘親生日快樂,身體健康!

尋日(一月三號)係亞娘o既生日

話說今晚o係電腦面前食食下飯,忽然間想知今日係幾月幾號(我真係冇記日子o既),移隻 mouse 埋去一睇,一月四號,個人呆o左幾秒,之後大叫:『仆街喇,尋日亞娘生日,唔記得o左添!』,之後定一定神先諗番起,除夕o個晚香港屋企開 BBQ Party o既時候已經打o左電話番去講o左句『生日快樂』;好彩,如果唔係就真係“大檸樂”...

記憶中,好似由細到大都冇送過生日禮物俾亞娘,好似連咭都冇張(真係唔肯定);反而亞爹生日都送過下o野畫過下咭(我讀小學時期)。其實我一直都覺得自己大細超係好唔o岩,亦都有諗過究竟亞娘有冇呷醋呢?不過多數都係諗完就算。既然一向冇送開,就無謂打破呢個局面啦,送開就年年都要送,好煩o既。只要我生生性性咁做人,就係我送俾亞娘最好o既生日禮物啦,你話係咪?嘩哈哈哈哈哈...

寫到呢到,忽然又回想起以前我曾經講過一o的令亞娘傷心o既說話,仲攪到亞娘喊。
其實事隔多年,我一直都耿耿於懷,未有機會亦未有勇氣去講出一句『對唔住』;唯有暫時繼續內疚下去...

我依家對 mon. 發誓,由兩年後我回港發展搵錢開始,我每年都會送生日禮物俾我娘親。只要我負擔得起,要咩送咩(要娶新抱要抱孫除外),如有違背,就...就罰我...就罰我生日冇生日禮物啦。就咁決定。

至於亞爹生日o個方面...遲o的再諗。遲o的,即係十一月十七號。

02 1月, 2006

“新年”一月一號做過o的乜?

講講尋日新曆新年一月一號做過o的乜先...

搭正零晨零時零分,身在墨爾本市中心睇煙花。
好熱,因為一月一號下晝o既最高溫度為42℃,所以入夜之後仍然好熱。
好嘈,近睇放煙花真係好嘈,下下都好似係我附近爆咁,下下震到入心;
身邊o既人又嘈,we嘩鬼叫,係又叫唔係又叫,仲嘈過o的煙花。
我份人又怕熱又怕嘈又怕迫,出去睇煙花真係唔知為乜...

睇完煙花之後返歸沖個靚涼之後準備開台,
搭正香港時間零晨零時零分開台,一開就係四粒鐘,暢快。
成個幾兩個月冇開台,起初真係有o的生疏;歌又揀唔切,講o野又1999,遊魂咁,差不多要成粒鐘先定番落o黎。今次仲要係一邊流汗一邊開台,死未。

以前開埋開埋好多『休息唔開台』o既宣言,次次都係空頭支票;
偏偏今次乜都冇講一抖就抖左咁耐,連我自己都覺得奇怪。
又好似原本諗住二零零六年全面潛水,相反依家又全面復出;
我份人真係太反覆了。

記得以前批評過一位好朋友點解佢次次都好似揀o的唔開心o既日子先o黎開台,我依家終於知道個答案;因為開完台真係會開心番...o的o的...

開完台都已經天光,天氣總算叫涼番o的;
墨爾本時間早上七點幾先休息,訓醒都已經係下晝兩點。
訓醒之後o既生活一如以往,食晏、上網、打機(三國志Ⅹ威力加強版,最近冇玩 PES5,因為部機虧虧地)、聽下歌、睇下BT番o黎o既香港電視節目、食過晚飯之後就聽叱吒頒獎典禮之後早抖。

根本上“新年”o既生活就同“舊年”o既生活一模一樣,沒甚麼特別,沒甚麼值得慶祝;
變o左o既只係年曆上面o既年份加o左一。
其實我唔係好明點解o的人“新年”要慶祝,仲要普天同慶喎。
係慶祝大家都有一日公眾假期?
定係慶祝番“舊年”自己死唔去而又可以o係新o既一年入面玩多年呢?

01 1月, 2006

二零零六年一月一號

花o左少少時間o係網上面搵o左一o的世界各地慶祝新年o既煙花圖片,
偏偏搵唔到墨爾本,吹脹。