11 April, 2012

重新認識 - 達明一派

我係屬於 達明一派 嗰個年代嘅聽眾。

但當年唔熱衷佢哋嘅音樂。


最近睇咗兩個有關達明一派嘅節目。

先叫做真正認識呢隊樂隊。

同時我亦發現雖然我唔係佢哋嘅 fans 但都識唔少佢哋嘅歌。

TVB - 達明一派排名不分先後音樂會

RTHK - 音樂動起來:第二集 愛情以外


到今時今日,我先領略到《繼續追尋》《忘記他是她》《天問》《今夜星光燦爛》等嘅歌詞意思。

到今時今日,佢哋當年嘅歌都仍然啱依家聽。

到今時今日,我先迷上達明一派。


一於撲飛睇達明一派演唱會以示支持。

《盛女愛作戰》

呢兩日同朋友、同事嘅話題好多時都離唔開TVB個新節目。

《盛女愛作戰》


睇咗兩集。

我對嗰五位參加者嘅情況同遭遇不予置評。

反而覺得節目入面啲價值觀歪曲得幾好笑。

尤其係嗰啲所謂專家嘅理論同建議。

一句到尾都係啲為咗搵生意嘅花言巧語。


特別嘅係。

不少朋友、同事(男)睇過個節目之後都不約而同咁提議一齊去參加 speed dating.

當中不乏已經名草有主嘅男士。

話去玩下認識下朋友云云。


今日食晏遇著三個人撘我檯(兩男一女)。

個女嘅基本上由未坐低都已經開始口沬橫飛。

到坐低後就食咁耐講足咁耐未停過。

講講下又講到《盛女愛作戰》呢個節目。

三個人不斷講自己嘅「高見」同「妙計」。

最後個女士講咗呢段說話。

「我都認同有啲女人真係好難頂,把口講唔停嘅。
 有佢講就冇人講,又唔聽人解釋。
 唔好話你哋啲男人,連我係女人都頂唔順。」


我心諗。

「都算你有自知之明。
 好彩我唔識你。
 因為我真係頂你唔順。」