30 11月, 2008

Where the hell is Matt?



http://www.wherethehellismatt.com/

今日無意中睇到呢段片,眼前一亮。

我都好想好似佢咁可以四圍去。

我年紀大,要流浪已經冇乜可能。

都係努力買六合彩,中o左頭獎就有行了!

29 11月, 2008

耐人尋味

唔知咩事,最近好似有渴睡症咁。

無時無刻,都可以訓著。

巴士,小巴,地鐵,一啪就得。

日頭響屋企,又可以快叉一兩粒鐘。

但偏偏夜晚就訓得唔好。

28 11月, 2008

毒男集中營

我每個星期返學o既地方,係一個毒男集中營。

中年o既又有,後生o既又有。

要幾毒,有幾毒。

o係呢個地方,我會覺得我都唔係咁差o者。

你話幾可悲丫...


另外,呢間學校專登搵個靚女做接待,認真可惡!

27 11月, 2008

王貽興

原來我同 王貽興 係校友,同屆唔同班。

我o地學校係一條龍服務,小一至中五冇走雞,除非你考第尾。

其實我o地可能同過班,不過我冇印象。

有相同o既朋友,但互相唔認識。

每次聽 <嘩嘩嘩> 聽見佢講學校o野o既時候個感覺都好怪。

佢講o既 人/物 我都 識/知。

既熟識,又陌生。

因為,由過澳洲開始,我冇再同任何一個中小學同學聯絡。

我唔知所有人變成點,佢o地亦可能以為我已經客死異鄉。

聽見 王貽興 講其他人o既近況。

突然間,我覺得好寂寞...

26 11月, 2008

鬧交的意義

今晚放學o既時候,o係旺角,遇到一對情侶。

企係路中心,互相怒啤,冇出聲,應該已經嘈完。

我飲住我o既豆漿,望o左佢o地大約五分鐘。

佢o地亦都冇郁咁互啤o左五分鐘。

我睇唔到個結局,因為要上車走人。


我覺得,佢o地好 sweet。

我亦都覺得佢o地好快無事。


回想番,我從未試過同女朋友咁。

其實連鬧交都少之又少。

某程度上,係一件唔健康o既事。

冇鬧過交,就好似冇經歷過、冇溝通過一樣。

o係戀愛o既過程中缺少o左一o的野...

25 11月, 2008

睡在大陸

o係大陸工作o既日子,唔知點解會特別眼訓。

通常十二點前就訓,七點起身,應該足夠。

可能係因為睡眠質素,張床褥硬過木板,一晚醒幾次。

可能係因為坐 office 由朝坐到晚,坐到吽。

總之全日口擘擘。

24 11月, 2008

後遺

過去o個幾日,係咁駛錢。

飲飲食食,衫褲鞋襪。

完全唔考慮價錢。

原來,揮霍都可以係心靈慰藉o既一種。

終於明白點解有o的女人失戀後會瘋狂購物...

23 11月, 2008

PERFECT MATCH

誰是理想伴侶?

答案:自己

22 11月, 2008

黑白灰

不約而同,幾個新認識o既朋友都話我o既生活同人生毫無色彩可言。

似乎只有黑、白、灰。

衣著係,行為係,思想都係。

其實,識到你o地,已經增添o左唔少色彩。

21 11月, 2008

幸福但悲哀

經過尋日同個來自同一世界o既朋友傾偈之後,更加認清自己現有o既生活。

肯定的,係我o地都活在幸福之中。

但另一方面,我o地o既人生,似乎好悲哀...

20 11月, 2008

同一世界

今日,我終於遇到一個同我生活o係相同世界o既人。

可能唔係完全一樣,但已經好近似。

十幾年以來,都未試過如此有共鳴。

有點相逄恨晚o既感覺。


不過我唔知對方係咪一樣咁覺得。

哈哈哈!!!

19 11月, 2008

恍然大悟

我終於知道,點解我咁鍾意睇電視夜夜都唔願訓。

美大學研究:愈不快樂愈看電視

(明報)11月18日 星期二 05:10

【明報專訊】美國 一項研究顯示,愈不開心的人愈愛看電視,快樂的人則較熱中從事閱讀和社交活動。研究人員指出,看電視雖給人們帶來短暫快樂,長遠來講影響卻不正面。

這次研究選取了兩套從1975至2006年收集的數據進行分析,涉及3萬名成年人。第一套是關於時間管理的研究,要求人們記錄一天24小時進行的活動,然後再指出每項活動帶來的快樂程度;第二套是對人們生活模式改變的調查研究,從深度剖析人們在數年間的情緒變化及支配時間模式如何改變。

快樂人多愛閱讀

研究發現,自稱非常「快樂」的人在社交上更為活躍,他們參加更多的宗教服務活動、更積極投票、更愛讀報。相反,不快樂的人把大量空閒時間用來看電視。研究估計,這些人看電視的時間比快樂的人要多20%。

負責研究的馬里蘭大學社會學家羅賓遜(John P. Robinson)推斷,隨着經濟在未來數月持續惡化,看電視的人數和時間可能會顯著增加:「人們可控制的時間愈來愈多,看電視的時間也相應增加。」

研究人員無法明確斷定不快樂與看電視之間的因果關係。但羅賓遜警告﹕「電視並不會令人獲得真正、長久的滿足。看電視令人更被動,並帶來逃避藉口,尤其是當電視新聞和經濟形勢一樣令人絕望的時候。數據顯示,看電視這一習慣會在短期內提供快樂,代價卻是長期的心神不安甚至抑鬱。」這項研究成果刊登在12月出版的《社會指數研究》(Social Indicators Research)上。

18 11月, 2008

愛與被愛

一向,都係我愛對方多過對方愛我。

想有個佢愛我,多過我愛佢o既人。

或者,至少大家愛o既程度接近。


被人愛,應該比愛人幸福。

未試過,好想知道個感覺係點...

17 11月, 2008

點解大陸特別嘈?

因為個個都鍾意鬧人。

o係大陸o既香港人鍾意鬧大陸人。

o係大陸o既大陸人又鍾意鬧其他大陸人。

俾人鬧o個個大陸人又鍾意鬧返鬧人o個個大陸人。

大陸人一般傾偈o既語氣都似鬧交。

由朝到晚就係o係度吵吵鬧鬧。

16 11月, 2008

化妝?喬裝?

今日行將軍澳,見到一個人好面善。

諗o左一陣,望多兩望,打o左個突。

全靠個髮型,我先認得佢原來係每朝o係TVB見到o既新聞主播。

嘩!落o左妝,o的眼耳口鼻唔同晒,真係幾乎認唔出...

呢o的,應該就係黃子華口中o既「喬裝」。

14 11月, 2008

最近鐘意聽o既兩首歌。

《謝安琪 - 十字架》

彷彿背上十字架捨我救贖未算好 愈奉獻得到結局愈殘酷
教我為免傷勢再會變更槽 圍牆變更高
圍住要自己的去路 防護罩終變成墳墓
將真的我埋葬下去 哀悼裡獨個漸漸老

多想光陰退後到舊時 童年重度
多斬釘截鐵共處 態度
我對你好所以你會對我好
心裡沒墳墓 無奈這幸福的國度
已飽經災劫無寸草
今天只得我野地裡在獨舞
要怎麼的上路 祈望一天我能知道

《古巨基 - 眼睛不能沒眼淚》

微笑吧 容我把天真留下
相機證明曾經欣賞過大家
離去吧 忘記永久這童話
想找快樂何不飛奔抱住他
一起 開心 留下
不再 開心 由它

願你記住 結束感情沒有罪
變心不是你不對
假使背著良心一起太傻女
願我記住 眼睛不能沒眼淚
只因沙石要洗去
真心愛人無非想她有人可登對

12 11月, 2008

今日,我做o左一件我從來都唔打算做o既事。

我以前堅持唔會做o既一件事。

我都唔知點解。

係求變?

定失常?

11 11月, 2008

大陸,乜都多。

人多,車多,塵多,垃圾多,而且嘈好多。

o係大陸生活,空閒時間亦多。

多到可以晚晚都寫 blog。

因為我冇出去玩。

o係大陸,娛樂仲多!

10 11月, 2008

妹妹妹妹

呢排,好鍾意聽903o既《妹妹妹妹》。

原因,可能係想搵番青春o既感覺。

同埋,想知道女仔諗乜。

知下,依家o既女仔係點。

因為,我已經脫節o左八年...

而且,個節目都幾好聽o丫!

09 11月, 2008

悲?喜?

今日o係地鐵碰到一對年輕父母。

年齡,廿零歲吧。

個愛情結晶品,應該一歲左右,或者未夠。

女o既愁眉苦臉,男o既手足無措。

可能佢o地好愛對方,所以順理成章早結早生。

又可能係純粹意外,逼於無奈。

無論係邊個原因都好,我感受唔到佢o地係快樂。

無論係乜o野原因都好,佢o地o既生活已經因為個小朋友而徹底改變。


我望住個老豆o係度諗,如果我係佢,我o既生活又會變成點?

我又會唔會活得快樂?

08 11月, 2008

最快樂的人

有冇見過大肚婆愁眉苦臉?

比較少吧。

多數大肚婆,都係笑面迎迎,一個甜蜜幸福樣。

同佢o地傾偈,更能感受到佢o地內心o既o個份喜悅。

所以,我最近好鍾意同大肚婆傾偈。

07 11月, 2008

旺角

每個星期到呢個地方,都覺得我唔屬於呢度,格格不入。

因為我一o的都唔潮,仲有點柒。

而且,呢度好多痴男怨女,或者好多群體。

絕對唔適合我呢o的獨家村寡佬。

06 11月, 2008

吹水男

好多男人,把口都係唔收o既。

唔收o既意思,唔係話把口衰,而係冇o野搵o野講。

唔識波扮識波講波,講女人講去滾,鳩o翕搞爛 gag,口沬橫飛。

幾個男人坐埋一齊食飯唔講o野的確係怪o的,但係都唔駛咁嘈,講唔停。

兜口兜面,應又唔係,唔應又唔係。

靜o的又唔駛死o既。

05 11月, 2008

理想生活

七點起身

八點食早餐

八點十五分開工

一點食晏

兩點再開工

六、七點收工

八點幾食晚飯

九點幾沖涼

十點零時段上o下網睇o下電視

十一點幾訓覺


咁o既生活,仲唔係夢想成真?

04 11月, 2008

中國咸魚

我發覺,原來o係邊度生活對我o黎講係冇分別o既...

我發覺,原來做邊份工對我o黎講係冇分別o既...

我發覺,原來冇人生目標對我o黎講係冇問題o既...

我發覺,原來咁o既生活態度對我o黎講係冇問題o既...


望望四周,我發覺,原來o係我身邊o既大部份大陸人都係咁...

漫無目的,渾渾噩噩,咁就一世...



「做人如果冇夢想,咁同條咸魚有咩分別呢!」

03 11月, 2008

我最近經常諗,呢個世界有冇女仔會接受到我憂悠寡斷o既性格呢?

有o既話,呢個女仔又會唔會係靚女呢?

我,又會唔會咁幸運呢?

「莫道你在選擇人,人亦能選擇你...」