30 September, 2006

27 September, 2006

有朋自遠方來

今日有個朋友o黎o左墨爾本,公幹。

佢會留o係悉尼幾日,只係落o黎墨爾本開會,逗留幾個鐘。

收到佢電話時的確嚇o左一跳。

認識呢位朋友都應該有十年,冇見面都起碼有六年;
住o係香港而仲有聯絡o既非網上朋友應該只得呢位;
咁多年來真真正正了解我o既朋友應該亦只得呢位。


最終,我o地冇見面。

因為我。

24 September, 2006

《三國志十一日文威力加強版》

尋晚o係網上左摷右摷之後左搞右搞搞o左成晚終於成功 download 番《三國志十一日文版》兼 update 到最新 version 再升級到 《威力加強版》。

跟住再搞搞新意思拎埋隱藏歷史人物之後決定用 贏政 再戰江湖,手下有 岳飛、霍去病、蒙恬、鄭成功、劉邦、項羽、呂尚、張良、韓信、藺相如 等等,鬼五馬六(定 鬼五馬鹿?)!

其實《威力加強版》都冇乜特別,不過玩番《中文版》又悶,唔玩咩?仲悶;所以唯有悶住咁玩《威力加強版》。



23 September, 2006

昂坪 360

上星期偶然睇到亞視新聞講有關昂坪纜車開幕o既新聞。
(逢星期二至六 6:00am SBS 都會轉播前一晚o既六點鐘亞視新聞 - 中文)

睇完之後好想坐,似一個遊客o既期待心情。



22 September, 2006

21 September, 2006

置頂:紅豆沙研究及討論

回 yume:要煲到唔見豆?唔會唔太沙?我今次煲o既時候其實o的紅豆已經爆到九彩。

回 sivots:o的紅豆要浸幾耐?

回 sius:我只會食凍o既紅豆沙,所以呢次明顯係太少水了。

p.s. 我懷疑我落得太多豆;我落o左成包紅豆,約一飯碗。

紅豆沙

第一次煲紅荳沙,味道、口感算唔錯,可惜太少水。

下星期再鑽研再煲過。

20 September, 2006

28℃ → 18℃ → 26℃

尋日最高28℃,尋晚係咁依落一場雨就令今日最高得18℃,
聽日又上番最高26℃。

天氣反常,忽冷忽熱,唔多過癮。

19 September, 2006

通宵達旦、統一全國

由星期五晚開始,每晚都通宵達旦咁打《三國志11》。

由日文版到中文版,我都未打爆過機;

未打爆過機並唔係因為難玩打唔爆,而係冇耐性;
須知道《三國志》系列o既遊戲係相當消耗精神同時間;
我每次一玩到個國家強大知道贏硬我就冇心機玩落去而再開過一局。

o係今個假期內我一定要打爆一次,統一全國!!!

暫時總時間:26:37:15 (17/09/2006)

18 September, 2006

兩星期假

放假兩星期,仲要係冇功課,何其自在,盡情享受。

17 September, 2006

英超與我

由開咧以來已經想講下今季英超,可惜因為懶,一拖就拖o左幾個星期直至依家。

今季英超預計應該會相當精彩,因為大部份隊伍都積極擴軍,轉會市場臨閂之前o既轉會更加係意想不到o既震撼。

我冇裝 cable,唯有用 ppstream 睇。

第一週興高采烈咁睇 LIVE,仲 BT 煲埋一個鐘o既英超精華;
第二週 hea 住咁睇 LIVE,hea 住咁睇英超精華;
第三週唔睇 LIVE,BT o左英超精華冇睇。

坐o係電腦前面用 ppstream 個細 screen 睇波實在係太辛苦,興趣大減,寧願唔睇,再精彩都係咁話。

尋日有朋友約我今晚一齊去 Bar 睇波,雙料大戰,
Chelsea vs Liverpool + Manchester United vs Arsenal。

我循例都係是但搵個理由推o左佢,因為始終都係唔鍾意群體活動兼怕去人多o既地方。

結果,我都係一條友對住個細 screen 睇晒兩場波,仲幾 enjoy 添;
我原本以為我唔會睇,但始終敵不過骨子裡的那條波癮。

睇完波即手痕想踢番場 winning,可惜自上次 patch 完之後隻 winning 成日 hang,次次臨完場先跳 game 勁無癮。

期待 PES6,仲有一個月就出,等!!!

16 September, 2006

奇華 vs 榮華

由細到大食開 『奇華』,過到墨爾本轉食 『榮華』;
因為未見過有『奇華』賣。

由細到大食開 『奇華淨蓮蓉』,過到墨爾本轉食 『榮華雙黃蓮蓉』;
因為女朋友要食有黃。

尋日去 Box Hill (一個華人社區,全廣東話社群見華人多過見西人),
駭然見到曾志偉奇華月餅海報,簡直係如獲至寶,
二話不說立即買番個回味一下。

左揀右揀之下結果買o左一個迷你蛋黃蓮蓉月,
細細個,又唔太貴,少食多滋味。

一盒四個標準裝實在太貴唔捨得買,而且隨時食唔晒浪費。

14 September, 2006

奇華迷你至尊月餅



高登死 server 之『第一收容所』

我好慶幸『網電』再唔係高登死 server 時o既難民『第一收容所』;
可能係因為好多人都唔知『網電』已經開番,
又或者依家o既 高登人 唔知咩係『網電』。

無論係咩原因都好,我都係高興o既。

我寧願『網電』齋擺冇人去,都唔想『網電』做後備;
正如我一向冇興趣做一群『觀音兵』入面o既其中一個,
又或者如果我係女人我冇興趣做『二奶』一樣。

做『情婦』或者可以諗下,性質唔同亦似乎比較高級。

13 September, 2006

高登死 server 之『遊魂野鬼』

每次高登死 server,網上就會出現一批『遊魂野鬼』無處容身;
有o的『遊魂野鬼』會去其它討論區寄居、暫住;
有o的『遊魂野鬼』就會o係 icq, msn 不斷呻悶兼問其他『遊魂野鬼』入得番高登未;
有o的『遊魂野鬼』就會化成『厲鬼』到處攪事、破壞;
有o的『遊魂野鬼』就會睇準個勢藉此上位想做『鬼王』,五花百門無所不用其極。

幾年o黎都係咁,冇乜點變;
唯一變o左o既,可能係我已經由『鬼』變番做『人』

『遊魂野鬼』恥笑『高登 admin.』,
但放眼一望,『高登 admin.』應該係笑得最開心o個個。

12 September, 2006

一日貨仔之杯

話說尋日行超級市場,俾我發現到下面o個隻可樂杯孤單單咁o係個架上面,一見即愛上,仲要係減價,AUD$4.95,即買,因為一向都想擁有一隻 FREEZE MUG 。

滿心歡喜咁返屋企將隻杯洗乾淨之後放入冰格準備今日飲冰鎮可樂。

點知今朝訓醒一打開冰格時發現隻可樂杯凍到裂開o左,將佢溶雪之後仲滲o個o的唔知咩液體出o黎;好彩有 keep 住張單,可以拎返去換。

拎到返去超級市場,一 check 之下發覺原來真係剩番一千零一隻,唯有無奈地 refund。

之後返屋企上 eBay check,亦搵唔到有人賣呢隻可樂杯;
有o的失落...

09 September, 2006

希望工程

希望會成功o既工程...

08 September, 2006

經歷、見證

相比起亞爺亞麻亞爹亞娘,我o地呢一輩所經歷o既o野可能唔算多,但我o地都見證o左好多歷史時刻。

97回歸、千禧年、911、金融風暴、沙士、禽流感、南亞海嘯、Bali bombing、英國巴士及地鐵炸彈爆炸、穿梭機升空爆炸、各國戰亂、名人去世、曼聯三冠王、Japan & Korea World Cup、Zidane headbutting 等等。

雖然好多事我o地冇機會參與,但有幸見證每件事件發生都算係一件幸福o既事; 因為歷史過o左去就唔會再返黎亦冇辦法改變。

我o地o既下一代,好有可能會見證『世界末日』o既發生,到時人類亦都會變成歷史。

後補:六四事件

07 September, 2006

911

尋晚睇o左一個有關 911 o既電視節目。

呢個電視節目主要係將 911 發生時o既世貿中心入面o既情況拍番出o黎;
架機點撞、撞邊層、撞完對世貿中心結構有咩影響、撞擊時o的人做乜、撞擊後o的人做乜、o的人點走、o的人點唔走、o的人點被困、o的人點救人、o的人點逃生、o的人點死、訪問生還者、訪問死者家屬、訪問消防員...等等。

唔講唔知,原來有好多人為o左救其他人而犧牲;
唔講唔知,原來有好多人執番自己條命之餘亦同時救o左好多其他人;
唔講唔知,原來有好多人o既一個錯誤決定而害死好多其他人。

睇完呢個電視節目o既時候我o係度諗,
其實呢類咁o既災難又何必要成日回顧重提丫,
回顧重提只會為人帶o黎唔開心o既回憶,
唔開心o既o野,收埋o係心又或者忘記佢咪算囉。

06 September, 2006

Steve Irwin vs John Howard



呢兩日三個主要電視台都係咁播 Steve Irwin o既o野。

Steve Irwin o既死,可以話係令澳洲舉國哀傷。

由尋日朝早六點開始,已經不斷有來自澳洲唔到地方o既人去到 Steve Irwin o既動物園出面獻花;o係動物園外面大大細細喊唔停o既人更加係多不勝數。

睇見呢o的場面,真係有o的黯然...
我諗就算 Prime Minister John Howard 死都唔會令咁多人傷心。

對於 Steve Irwin,我冇乜特別感覺,我亦冇睇過佢o既電視節目,只知道佢係一個癲癲o地o既鱷魚先生;可能o係九年前去 Queensland 旅行o既時候睇過佢表演都未定,不過我已經忘記o左。

05 September, 2006

Steve Irwin 1962 - 2006

澳洲鱷魚先生被「魔鬼魚」襲擊身亡

(星島) 09月 04日 星期一 01:41PM

澳洲國寶之一、聞名於世的鱷魚先生艾榮(Steve Irwin),不幸在澳洲東北岸海域遭到刺魟(俗稱魔鬼魚)襲擊死亡。

當時艾榮正在大堡礁拍攝一部水底紀錄片,但遭刺魟刺中胸口喪生。

事發於周一,艾榮在道格拉斯港附近的大堡礁拍攝一套水底紀錄片期間,突然受到刺魟襲擊,被刺中心臟。

雖然一架直升機曾為他送來藥物,但他最後仍返魂無術。

44歲的艾榮是 Discovery動物星球頻道節目主持人,也是昆士蘭省境內的澳洲動物園園長。

他在澳洲可以說是當地的國寶級人物,一下澳洲機場,往往會發現他的海報及人物招牌。

艾榮以「徒手捕鱷」打響名堂,早在十多年前,已開始為電視頻道主持有關捕捉鱷魚的節目,更奪得「2004年昆士蘭澳洲風雲人物大獎」,在澳洲可算無人不識。

04 September, 2006

修身齊家治國平天下 之『修身』

『修身齊家治國平天下』,我o係好細個o既時候已經聽過呢句o野,亦都知道呢句o野點解。

話說尋晚幫o個個已經掉埋一二邊好耐o既電子磅換電,換完電就當然係順便上去磅一磅o架啦。

唔磅由至可,一磅就連自己都嚇一跳。

原來我體重o既數值已經升到同我o既身高一樣!!!

肥斯大隻唔願郁,又點可能『齊家治國平天下』呢?

我真係要開始『修身』了...

03 September, 2006

變變變,冇生命力

爹娘o係好多年前已經同我講話我要變下;
身邊o既人o係好多年前已經同我講話我要變下;
身邊o既朋友o係好多年前已經同我講話我要變下;
我o係好多年前都已經自己同自己講話我真係要變下。

卒之,三年之後又三年,三年之後又三年...無論我應承過幾多次都好,結果我都係冇變過。

我o既解釋兼藉口係,如果我變o左,咁我咪再唔係我?!

變,似係滿足他人,多過滿足自己。

其實,我真係冇諗過去變;
但我似乎又真係有需要去變...

02 September, 2006

01 September, 2006

再強項

1. 小器
2. 小家
3. 記仇