27 8月, 2008

當頭棒喝

我老豆真係幾時都係o岩。

我o既諗法真係幾時都有問題。

不過,方向不變,目標不變。

至少達成共識。

24 8月, 2008

去?留?

原本打算下年返澳洲,但因為昨天o既噩耗,令我猶豫起來。

我覺得我應該留o係香港陪陪父母。

因為父母年紀漸大。

因為我係獨仔。

因為我已經離開過八年。

一向只諗自己o既我,係時候為父母諗諗。

23 8月, 2008

齊人

一個大家庭通常只會o係兩種情況下會齊人。

紅事、白事。

當一個人隨住年紀漸長,出席 "齊人" 聚會o既機會會越來越多。

而且以白事居多。

今日突然傳來一個噩耗,下個月,又會 "齊人" ...

22 8月, 2008

21 8月, 2008

鸚鵡

今日公司各同事 (老闆們冇份) 全日o既話題都係圍繞住呢隻雀。

全城期待過迎接奧運。

因為奧運開幕冇假放,隻雀飛到香港o既話就放假一天。

19 8月, 2008

半途而廢

回想過去十年,似乎冇一樣o野係完完全全咁完成過。

無論學o野定做o野,都係半途而廢多。

最近下o左個決定,未十成,都定o左八、九成。

未知批唔批。

好多o野,都唔到自己話事。


但我想真真正正完成一件事,一件屬於自己o既事。

18 8月, 2008

理想是 ... ?

理想是 ... ?

鍾意影相就去讀攝影?做攝影師?

鍾意睇戲就去讀電影?做導演?

鍾意睇波打 Winning 鍾意摩連奴就去讀足球?做教練?

鍾意砌機 set 機上網打機就去讀電腦?做 I.T.?


鍾意聽歌播歌講o野就去參加電台甄選?做 D.J.?

「唔知自己想點,淨係知道自己唔想點」

17 8月, 2008

《戀愛起義》

記得《戀愛起義》中林海峰旁白o既其中一句:

「唔知自己想點,淨係知道自己唔想點」

切切實實表達到我目前o係工作同前途問題上o既心理狀態。

又記得:

最近我好鍾意一個人 自己一個人
一個人四圍去 一個開工一個人收工
一個人去食飯一個人去飲o野 一個人喱埋係屋企亂 "才禁" 個遙控
夜晚一個人上網 有時一個人跑步一個人打機
一個人去做 gym 一個人去卡拉OK 一個人去睇戲
間唔中一個人去砌下模型 星期六晚一個人去party
跟住一個人聽歌一個人跳舞一個人流汗一個人離開一個人上車跟住一個人返到屋企

一個人開心唔開心大笑大叫 連續好多日都係一個人
一個人有個好處就係唔駛有任何責任
唔駛有咁多包袱
每日二十四小時都係屬于自己
個世界幾時開始幾時停完全係我一個人話事
我鍾意去邊就去邊 做乜o野就做乜o野 諗乜o野就諗乜o野
我鍾意點就點 總之我鍾意就得
我鍾意 一個人

另一段,最能形容十二至二十歲之間,同最近o既我。

點解,我長唔大?

16 8月, 2008

另一半

由中三左右開始,我就已經堅信我自己o既一個諗法。

「一個人一出世,上天已經安排o左命中注定o既另一半俾佢」

雖然上天已經安排o左命中注定o既另一半俾你,但唔代表上天會安排埋俾你遇到。

我總覺得好多長廂斯守的夫妻,身邊o既另一半都未必係命中注定o既另一半。

佢o地可以白頭到老,可以有好多原因。

一個人同另一個人o係埋一齊o既時候,未必可以肯定對方就係命中注定o既另一半。

但好多時當一個人同另一個人o係埋一齊o既時候,往往可以好肯定對方唔係命中注定o既另一半。

最近後者。

15 8月, 2008

一念天堂、一念地獄

由七月尾開始,西貢市日日都人山人海,暑假嘛。

每朝返工o既時候,都會見到一班一班o既年青男女或者係一家大小歡天喜地高高興興咁落車。

而我,就帶住沉重o既腳步同心情上車返工。

其他人坐車入o黎天堂;

而我,就坐車出去地獄。

14 8月, 2008

能令我放鬆的歌聲

鄧麗欣

王菀之

謝安琪

衛蘭

(排名,應該已分先後)

王菲呢?

太耐冇聽了...

13 8月, 2008

離家出走

朋友說,其實我大可一走了之。

無錯,我的確可以咁做。

即刻買張機票返澳洲,冇人吹得我脹。

但o係某程度上,對工作我還有些少責任心。

亦o係某程度上,我好享受我響香港o既半奢華生活。

又o係某程度上,我未清楚我返澳洲之後o既方向。

而且,我仍欠一個出走o既理由;或藉口。

如果可以發生好似 Janice 首《離家出走》o既情節就好了...

12 8月, 2008

同類

我覺得我自己係某一類人但唔識形容係邊一類。

唔識形容自己係邊一類係因為我仍未遇到同類然後俾我去形容呢一類人。

我覺得我仍未遇到同類係因為似乎冇人完全明白、理解同接受我o既行為同諗法。

別人覺得我另類,我亦覺得我自己係怪人。

究竟有冇人同我係同類?

我曾經認為我遇到一個,但我每次同呢個人傾偈到最後都係嗌交收場;所以應該唔係。

11 8月, 2008

反反覆覆

上星期堅決地想離開,幾乎買機票咁滯。

今個星期又冇乜o野,只係變得懶懶散散。

仍然冇目標、冇方向;不過領會到一樣o野。

退一步即使未必海闊天空,但至少心情會變得輕輕鬆鬆。

03 8月, 2008

身心受創

過去幾天,完全崩潰。

受不了,哭了...