21 7月, 2011

書展

每年嘅書展都係喺差唔多時候搞。

好多時又會撞正我生日。

所以中學階段時有兩三年嘅生日都係去書展度過。


當年嘅書展仲有漫畫賣。

依家諗返都唔知辛辛苦苦排個幾兩個鐘頭隊迫入去買漫畫同漫畫精品然後一袋二袋山長水遠咁抬返屋企係為乜。

因為明明書展之後過一個星期就周圍都有得賣。

不過後生仔就係咁戇居架啦。


近年已經冇再去書展。

因為人太多睇唔到咩書之餘買完仲要拎餐死。

所以寧願繼續悠悠閒閒間中去下書局好過。


響地鐵站見到有廣告介紹今年書展有 王司馬 嘅《牛仔》。

我唔知往年有冇。

不過我細個時就睇好多。

因為我姑丈響 博益 做印刷。

成日拎書同漫畫俾我睇。

包括《牛仔》同《成語動畫廊》。