一個人去咗日本四日三夜。
原本只係諗住出去走走抖抖氣。
結果得著遠比預期中多。
一個人去旅行最好嘅係「自由」。
最唔好嘅,都可能只不過係「寂寞」同「孤獨」。
旅途中睇咗一本書,書入面有以下一段對話。
她問:「有人不怕寂寞嗎?」
他答:「我不怕。因為寂寞是可以習慣的。」
她說:「那很可怕呢。」
無錯。
寂寞係可以習慣嘅。
而我早在十幾年前就已經習慣咗。
只不過去到一個言語不通嘅國家,迫住啞埋啫。
幸好今次旅行有得上網,可以同朋友分享下旅行嘅情況。
未至於與世隔絕。
一個人旅行,行程可以隨時因應情況而改動。
因天氣關係取消去富士山、夜媽媽去魚市場食魚生、順路去影東京鐵塔夜景、中午行到攰就返酒店恰一恰、響明治神宮一坐就幾個字聽下風聲樹葉聲、行半個鐘去搵一個景點或餐廳等等。
一個人旅行,可以唔跟大路行。
每次旅行,我都鍾意走入人哋嘅社區睇睇。
感受一下外國嘅生活係點。
而每次當然都係羨慕,始終隔離飯香。
一個人旅行,亦可以有好多時間思考。
反省一下過去,打算一下將來。
最記得係每一次走入日本嘅神舍或御苑。
心境都會特別平靜,頭腦亦特別清晰。
如果可以,我真係想唔走坐足一日。
今趟旅程令我知道我以後應該點去做人。
點樣可以令自己快快樂樂咁生活。