28 2月, 2006

點解...

點解要 group discussion/activity?
點解要埋堆?
點解要上堂一齊坐?
點解要一齊去廁所?
點解要同我傾偈?
點解要一齊食晏?
點解放 break 時要一齊活動?
點解放 break 時o係 library 用電腦又要一齊坐?
點解要一齊返學?
點解要一齊走?
點解要專登等埋我?
點解要一齊坐火車返出 city?

點解唔可以俾我靜靜地自己一個人?

27 2月, 2006

三日假期完畢

三日假期話咁快就完,老鼠仍未開始捉。

星期六、日兩日都係睇下戲睇下波打下機寫下 blog 咁就冇o左o的時間。
今日就去打下肝炎預防針去下超市做下功課同地產傾下電話開下電台吸下塵咁就已經旁晚六點半。

三日假期,但又好似冇休息過咁,仍然咁‘支力’。

老鼠?等下次三日假期先理。

晶哥電台 - 齋播歌一小時

感覺良好...

取消背景音樂

...

26 2月, 2006

網上電台討論區

我還未找到重開網電的理由...

加入背景音樂

加o左首歌做 blog o既背景音樂,但似乎不能在 Firefox 上執行。

唉...

25 2月, 2006

《天空小說》

最近翻聽 903廣播劇《天空小說》

呢個廣播劇應該係 94/95 左右o既作品(當然唔係195x年李我o個個),大大話話已經超過十年。
十年前聽o既時候只係當一個普通廣播劇o既故事o黎聽,冇乜特別;
十年後o既今日聽番呢個廣播劇卻感觸良多,幾乎聽到眼濕濕。
依家聽呢個廣播劇所帶到俾我o既感覺係...『悲哀』。

劇中穿插多首陳百強歌曲,亦係悲歌,悲上加悲。

快 樂 的 一 晚、一 式 兩 份、三 個 人 的 午 餐、生 於 四 月 四 日、五 星 級 大 酒 店、神 出 鬼 沒 錄 影 機、七 彩 蝦 條 姐 姐、大 話 西 遊 八 卦 精、我 愛 上 了 隻 狗、請 自 行 執 拾 行 李、孤 兒 流 浪 七 十 一、十 二 隻 杯 杯 碟 碟、筵 開 十 三 圍 酒 席、十 四 B 窗 口 位、少 年 十 五 寂 寞 時、公 家 病 房 床 位 十 六 號、At Seventeen、十 八 個 肚 臍、十 九 個 字 的 一 封 信、請 找 出 二 十 處 不 同 的 地 方、2100 起 飛、涉 谷 神 宮 前 二 十 二 町、沒 有 睡 眠 的 二 十 三 小 時、Twenty-four kiss 二 十 四 小 時 之 吻、二 十 五 年 朋 友、二 十 六 C 無 人 坐 o架 o番、八 月 二 十 七 日 東 京 國 際 機 場、我 二 十 八 號 出 世 o架、二 十 九 級 無 名 神 秘 之 火、三 十 集 大 話 大 結 局。

王天朗、翠碧、胡啟榮、趙家強、關茜蒙、尹芳玲、曾路得...
你記得幾多個?

林海峰 - 你我、王菲 - 一人分飾兩角、莫文蔚 - 到了晚上、黃偉文 - xxxx的快樂...
你又記得幾多首?

你,係咪我o個個年代?

晶哥電台

想開台但又唔可以開台原來真係幾辛苦...

我負擔唔起身份曝光之後o既後果。

三日假期

終於等到星期六放假,可以抖抖,我真係好需要抖抖。

今個星期除o左冇覺好訓忙於捉老鼠之外,亦要返學、做功課,亦有好多麻煩瑣碎火滾事發生。

人生就係咁,一係就日日百無聊賴無所事事,一係就所有麻煩事迫埋一齊接踵而來令你透不過氣 ;永冇中間平衡位。

雖然放假,但亦訓得唔好,因為尋晚好熱。

九點左右起身之後花o左兩個鐘頭時間將部電腦清潔同埋搬o左出廳,暫時將自己同書房分隔,我受夠了。今日應該會睇下戲睇下波打下機寫下 blog,聽日先執書房捉老鼠。

24 2月, 2006

十面埋伏失敗,唯有正面交鋒!

十面埋伏失敗...



尋晚將新買o既三個 mouse trap 都放埋入房,總共五個,都係捉佢唔到。
算了,o黎緊有三日假期,決定開箱清理房間摷佢出o黎,正面交鋒!

23 2月, 2006

氣餒了...

尋晚變陣再佈陣。

見隻o野鍾意食米,於是我將兩個老鼠陷阱o既芝士及花生醬整走,之後用雙面膠紙黐o的米響老鼠陷阱入面,閂埋書房門。

結果,今朝起身睇車路士對巴塞隆拿時,兩個老鼠陷阱原封不動,再次宣佈捕鼠失敗。


下晝放學之後去o左 warehouse 買o左另外三款老鼠夾,非常舊式o個o的,十足十卡通片入面o個o的兒嬉o野。

如果今晚都再捉唔到,都唔知點算好...

報告

早上六點半。

報告:捕鼠計劃再次失敗。

唉...

22 2月, 2006

學校生活

其實呢幾日返學都有o的野發生,不過都係等捉完老鼠先寫。

搞錯,咀邊啦!!!

尋晚又佈陣。

今次閂埋書房門,書房地下近門口放米,兩個老鼠陷阱亦放o左o係書房入面,為o左吸引隻o野入老鼠陷阱食芝士及花生醬,所以我放o左少少米響陷阱入面近陷阱入口位。


六點半起身睇皇馬對阿仙奴,睇波之前入書房 check 下,地下o既米冇o左,意料中事。兩個老鼠陷阱原封不動,以為計劃失敗,點知,唔止失敗,係失敗中o既失敗;因為當我拎起兩個老鼠陷阱o既時候入面o既米已經不翼而飛,有冇搞錯。唉...可能放得太出;亦可以肯定芝士及花生醬唔o岩口味,亦可以肯定隻o野o係書房。

唉,今晚繼續,變陣。

過埋今晚都捉唔到,除o左搵隻貓,我真係冇其它辦法。

21 2月, 2006

老鼠愛大米?!

捕鼠失敗。

尋晚再佈陣,情形如下。





照樣閂埋房門訓,門外再加布頂住門罅,房內擺米。照樣用一個大紙皮箱分開 "客廳廚房" 同 "睡房書房廁所", 客廳、廚房門口擺o左米,廚房入面放o左一個老鼠陷阱。廁所門閂埋,入面擺o左米(事後唔肯定有冇擺米,好大件事)。書房門打開,門口只放兩個老鼠陷阱唔擺米,餌係花生醬同芝士。之後去訓。

又係四點起身痾尿,一切原封不動。唔記得廁所入面有冇米(好大件事)

到九點起身,一切仍然原封不動(爽身粉附近又好似有o的痕),除o左...廁所入面o的米冇o左。

反覆細想,始終唔能夠肯定廁所入面有冇擺米。如果冇擺,即係話個老鼠陷阱(花生醬同芝士)唔 work;如果有擺,即係話老鼠只愛大米,而且隻o野相當之細,可以捐過門底條罅(好彩尋晚睡房有攝布咋)。

如果真係咁細隻,老鼠又好其它o野又好,我都唔怕;
只怕,原來已經一家大細,細o既過到條罅...仲有隻大...

中午返學前決定再佈陣。

今次搵o野封住廁所門底條罅,廁所內擺米。書房門打開,兩個老鼠陷阱依舊,再加一堆米o係附近。以進一步確定獵物所在位置。

結果,夜晚放學返到o黎乜事都冇。

夜晚清潔廚房,發現門後同其中一個櫃入面都有好多類似老鼠o既屎物體,櫃入面有個窿,個窿係俾洗碗碟機o的電線通過,洗碗碟機後面仲有冇對外通道我真係唔知;但個櫃門係閂唔埋o既。用膠紙封o左個窿,再搵o野頂住,以防萬一。

今晚會再佈陣。

20 2月, 2006

佈陣

尋晚決定佈陣,要搵出隻o野o係邊。

計劃第一部:
照常閂埋睡房門但打開書房及廁所門訓覺,照樣o係廚房相同位置擺堆米,廚房門打開但閂窗。書房、廁所同廚房門口位地毯洒滿爽身粉,希望有腳印可以捕捉到隻o野o既蹤跡。

半夜四點痾夜尿時,發覺廚房堆米有郁過,即係代表隻o野o係屋內。

計劃第二部:
閂埋廚房門,書房及廁所門照樣打開,閂埋睡房門訓(唔閂唔敢訓),每個門口位內外位置都各放十五粒米(真係數過o架),以捕捉佢o係屋內o既活動範圍。

九點起身,見到睡房內o既米仲o係度,即係代表佢冇同我訓。打開睡房門,睡房外o既米都o係度,但o係隔離(成九十度角位置)o既書房門內外o既米都唔見o左(爽身粉有少少痕跡)。
書房門對面o既廁所門內外既米都o係度;再行去廚房門外睇睇,o的米亦唔見o左。 打開廚房門睇睇,廚房內o既米原封不動。即係話,隻o野o既行動途徑係由我書房去廚房。 我一日o係書房至少十個鐘o架喎。

急忙打電話俾親戚朋友世叔伯商討對策(電話o係書房),借唔到貓,唯有出去買老鼠夾(先假設隻o野係老鼠)。出街前,先用一個大紙皮箱封住主要通道,分開 "客廳廚房" 同 "睡房書房廁所",再閂埋書房門兼放米o係入面,以進一步確認目標身處位置。

去到o的 warehouse,發覺冇老鼠籠賣,得一款老鼠陷阱,同大量老鼠藥。老鼠藥不在考慮之列,因為到時唔知佢死o左o係邊仲麻煩。唯一選擇,老鼠陷阱,設計係 v 字型,拱橋原理,隻老鼠一入去食o野就會閂門,好似好掂,HK$12一個,老老實實我冇乜信心(聽日有時間我先 upload 相)。

返到屋企,書房內o既米原封不動,可能因為尋晚已經食飽。大清理客廳,一無所穫,但有好多類似老鼠屎o既物體,更確定隻o野好大機會o係書房匿藏。今日全屋o的門都閂晒(一開即入即閂),屋內每處o既米都原封不動,證明佢日頭唔會蒲頭。

寫呢篇 blog 用o左我好多時間,o係書房,總係覺得隻o野望住我上網。



今晚會再佈陣。

到依家都未見過隻o野,如果唔係老鼠,會係o的咩呢?!

19 2月, 2006

米奇?!

尋晚煮飯時發現米袋被咬穿,似係老鼠所為,於是收好米袋,唔執起地下o既米粒試一試佢,點知...訓醒o既時候o的米粒真係冇晒。



今晚再試多次...

18 2月, 2006

一輪咀

水泡大師最近人氣急升,將『八字』熱潮推向高峰!
精算師因為沉迷鑽研『八字』而導到考試不合格,正正係人算不如天算。
你問佢近幾個月至五年內o既電視劇電影佢幾乎一慨不知,搭唔到嗲;
講五至十五年前o既電視劇電影佢又可以如數家珍,滔滔不絕。
鑽研『八字』推測未來,人卻活在過去,兩者更不斷影響著現在。


到處都有可憐蟲,高登尤甚。
我好有可能係別人眼中o既可憐蟲,但我眼中亦有好多可憐蟲。
低處未算低...


有冇見過麥當勞叔叔同肯德基伯伯合照?
你去望下高登o的電台 post 就會見到。
互相吹捧、拉攏、巴結、做勢;『支持』、『純推』、『友台』。
友誼萬歲但個個背脊都‘孑貝’住把刀隨時開拖劈瓜對手。
咪笑撚死我啦!


如果一個人對你差可能係佢有偏見;
如果兩個人都對你差好有可能係巧合;
如果三個人都對你差時好有可能係佢o地夾埋整你;
如果全世界都對你差咁好有可能真係全世界都有問題。

你埋怨第一個男朋友對你差,可能係佢有問題;
你埋怨第二個男朋友都對你差,好有可能係巧合;

你埋怨第三個男朋友都對你咁差,好有可能你真係咁唔好彩;
當你埋怨第四、第五、第六個男朋友都係對你咁差,開始懷疑全世界o的男人都係變態衰人冇好o野o既時候...麻煩你照一照鏡。


我以後只會同你講『sorry』,『對唔住』呢三個字你再冇份聽。
中文與英文係有階級分別的。

17 2月, 2006

如果我有錢...

今日無聊o係度諗,如果我有錢,我會點。

如果我有錢...我會每半年至一年換部新手提電話;
如果我有錢...我會買好多電腦產品;
如果我有錢...我會收購高登;
如果我有錢...我會用網電去搞一個電台革命;
如果我有錢...我會年年去旅行;
如果我有錢...我會平均每兩年換一部車;
如果我有錢...我會請司機、管家、廚師同花王;
如果我有錢...我會將間屋重新裝修;
如果我有錢...我會用天價買埋隔離間屋。
如果我有錢...

如果我要做齊以上o既o野,我真係要好有錢...

努力!!!

16 2月, 2006

集體逃學

繼尋日將 15mins break 變做 45mins break 之後今日又有新攪作,集體逃學。
哈哈!無端端多o左大半日假放。
呢班後生o既同學仔(十七八歲)有時真係幾搞笑。
雖然我呢位老人家好多時都同佢o地格格不入,但佢o地的確帶到好多歡樂俾我。

詳細情形係點唔寫喇,懶。

15 2月, 2006

最近一首幾有意思o既歌

at17 - 才女

http://s9.yousendit.com/d.aspx?id=0QWW1OVYLUC73KWMWBUA4CT3H

歌手:At 17 作曲:林二汶@At 17
填詞:于逸堯@人山人海 編曲:梁基爵@人山人海

世界不知不覺無情地轉 勞碌找一個救生圈

靠美德博學還離岸很遠 用美色多勝算

可惜我只配談文字戀 強項得書信對白婉轉
講曲線體態自然落選 憑面相難完心願

蕭伯納 王爾德 但丁
莎士比亞 馬奎斯 小仲馬
請指點我去用情書將心扣住
辛棄疾 矛盾 魯迅 蘇軾
求可體恤我筆尖的計算
長話盼 盡說短 人海中等惜字緣

交心的戀愛漸成歷史 唯獨我堅信愛像種子
悉心栽花卻換來白紙 才用眼淚來寫字

伊索 屠格涅夫 狄更斯
歐威爾 艾可 卡爾維諾
幾本書的背後埋藏著我心事
張愛玲 曹禺 老舍 冰心
如果早幫我寫命運情節
從未怕 命太短 惟恐寫不好那段緣
盼成全

14 2月, 2006

大檸樂,晶哥從此要o係高登潛水

大檸樂了...

上星期,我見我o個兩個香港同學上 2000fun,諗住今次安心啦,唔會俾人認出。上星期五朝早開台時仲大大聲話唔鍾意群香港學生云云。點知...今日俾我見到佢o地上高登。

放 break 傾偈時我見到佢o地上高登,我唯有扮視而不見完全冇反應眼尾都唔望一下。

到放學時,佢o地問我拎電話號碼同 msn,我初時都唔為意,講完電話號碼之後差o的順口o翕埋 jinggor.iinet.au ... 好彩收得切口,話我唔用 msn 只用 icq 仲要係俾另一個 a/c。差o的瀨o野...


有朋友話我把聲咁易認,好有可能已經俾人起o左底。

為安全起見,晶哥都係從此o係高登潛水比較好。

我真係唔想身份曝光,會很困擾的...

晶哥電台?真係有緣先再見...

13 2月, 2006

八小時極限

每日淨係訓到八個鐘,唔係冇時間俾我訓,而係我一訓到八個鐘左右我就再訓唔到落去。依家即使係星期六、日、一呢o的唔駛返學o既日子,我晨早八、九點就起o左身。

但其實我仲係好眼訓,其實我雙眼仲係好‘支力’的。

而且好多時都訓得唔好,成日發夢,天馬行空,夢見死o左o既大姑媽,又夢見我扮女人做臥底去捉o個個爭我屋企錢o既五叔。


真係人都癲...

12 2月, 2006

求甚麼?

唔係求咩名留青史,但都不至於要淪落至此卦?

方龍就 話我o既行為反映出可能係我自覺已經付出得太多所以先會咁諗。

我都唔知...

唉...電台...

多謝 方龍就。

11 2月, 2006

煲戲

終於等到放假,仲要係 long weekend (Monday dayoff),當然要煲一煲戲,relax relax。

《如果.愛》
《Flight Plan》(高凶三萬尺)
《xXx 2: The Next Level》(3X 之特種叛變)
《Doom》(毀滅戰士)

聽日仲有套《情癲大聖》

10 2月, 2006

Floppy Disk

你有幾耐冇用過 Floppy Disk?

星期日先聽見個朋友話個 Floppy Disk Drive 再冇用,偏偏我今個星期就要用 Floppy Disk 去 update 個 BIOS。

原來依家要買 Floppy Disk 都唔易,學校附近o個兩間電腦舖都冇得賣。學校 book shop 有得賣,只有一盒五隻或一盒十隻,賣o既價錢可以食到餐飯;而我只要兩隻,當然唔幫襯。

返出 city 再搵,有 CD-R 或 DVD-R 賣o既舖頭都冇 Floppy 賣,貪就腳,唯有幫襯一間我好唔鍾意o既電腦舖。有 Floppy 賣,一盒十隻或散賣,散賣每隻 AUD$0.7 (我買隻 CD-R 都係 AUD$0.35 咋)。

返到屋企,發覺呢兩隻 Floppy format 唔到;莫非 Floppy Disk 太耐冇用壞o左?拎去另一部機試,都係 format 唔到。頂你個肺丫,決定以後唔再幫襯,一定。諗住拎返去 refund,先發覺原來我冇單,而且其中一隻 Floppy 已經唔知俾我飛o左去邊,搵唔番。

最後,我發現原來 BIOS 都可以 online update。

09 2月, 2006

走堂

今日走堂,仲要係走兩堂。

第一堂係朝早 Management Course o既 Manage Effective Workplace Relationships,原因係我記錯時間表。返 8:30am 我以為返 9:30am,9:30am 那堂是 Group C 的,而我,讀 Group B;記錯,都係因為之前打算轉組之過。一堂兩個半鐘,返到去已經遲o左成粒鐘,決定唔入去。費事太觸目之餘亦費事留個壞印象俾 teacher,反正第一堂都係講下 subject outline 同每位同學介紹下自己(今個星期已經做o左幾次,悶到嘔,我o地已經互相認識,其他人o既資料我已經背得出,只係o的 teachers 唔識我o地)。計o岩時間落堂之後去 staff room 搵番個 teacher say 個 sorry 解釋番點解冇返,贏番晒印象分;反而佢俾我o既行為嚇親。


下晝,其實應該計夜晚,6:00pm ~ 8:00pm,但九點先天黑;走埋英文班唔鬼返。
原因:懶、‘支力’、悶。

08 2月, 2006

擔泥?

從來未經歷過或想像過返學可以咁‘支力’,可能我以前真係太懶。
依家每日都‘支力’到成 pat 泥咁,救命...
八點幾九點已經頂唔順要爬上床訓,簡直係天方夜譚。

07 2月, 2006

開學

今日正式開學,感覺良好。

見晒所有同學,似乎呢 group 都唔錯。

所以決定唔轉組。

06 2月, 2006

一路順風

有一位朋友去日本北海道旅行;
有另一位朋友去西班牙馬德里公幹。

祝佢兩位一路順風。

去旅行o既玩得開開心心;
去公幹o既...佢唔會做得開開心心o架喇...祝佢事事順利啦。

呢位朋友去o左公幹,咁就會有一段好長o既時間冇人o係下晝同我 msn 傾偈了...

又諗起張柏芝o既一首歌o既其中一句歌詞,『你何知時差的最壞處...』

05 2月, 2006

Blogger 定 Yahoo! BLOG?

o係正式寫 BLOG 之前都花o左好一段時間去決擇用邊一間公司o既 BLOG service,左度右度之後只剩番 Blogger 同 Yahoo! BLOG 兩者之間揀其一。

無可否認 Blogger 一定比 Yahoo! BLOG 完善,但 Yahoo! BLOG 有一點非常吸引我o既係佢有得統計“瀏覽次數”。即使冇人留言,但至少你會知道有冇人睇,總好過 Blogger 冇人留言時你亦唔會知究竟有冇人睇;正如我第一篇 BLOG 所講,BLOG 係俾人睇o既。但當我試過用 Yahoo! BLOG 之後,佢唯一吸引我o既地方都留我唔住,因為佢o係後補 BLOG o既日期設定上面o既功能滿足唔到我,所以最後都係揀o左 Blogger。

Xanga? 一早 foul o左出局。

經過今日o係 BLOG 度加o左個鐘之後,我更加滿意我o既選擇;因為聽聞 Yahoo! BLOG 係加唔到的。嘻嘻。

個鐘顯示o既係香港時間...我越來越掛住香港。

04 2月, 2006

《The Da Vinci Code》

一口氣睇晒成本《The Da Vinci Code》達文西密碼中文版,517頁。

唔知用o左幾多個鐘,只係記得由食完晚飯開始一直睇到第二日朝早。

個故事的確幾好睇,相比中斷o既震撼(我係一個讀教會開校長大被不停灌輸天主教思想o既非教友),後段同結局略嫌悶。

依家我終於知道點解呢本小說會引來咁大迴響。

兩年前用十個鐘一口氣睇晒三集《教父》,
半年前用五個鐘一口氣重溫晒三集《無間道》,
聖誕前用十幾個鐘分二日睇晒三集《魔界》加長版 DVD,
今日用十幾個鐘一口氣睇晒成本小說。

有時我真係覺得自己癲癲地。

02 2月, 2006

Orientation Day

Orientation Day - Matters to be discussed include:
course structure, method of assessment, employment opportunities, location of classrooms and facilities, computer usage, attendance requirements, RPL applications, student services and language assistance.

Orientation Day 係好悶o既一件事,唔鍾意返但一定要返。話會講o既事大約有三份一冇講,餘下o既三份二其中有一半又話留o係下星期正式上堂至講,即係o徙氣。所以今日變為主要係俾o的同學見見面,將接近一百人分成三組分配三個 timetables;我發現到我o的組員似乎唔多掂而且我呢組個 timetable 係最差o既,撞正我上英文班o既時間。我打算星期一要求轉組,希望成功。全日花最多時間係個 campus tour,又因為我而令大家行左好多冤枉路;都係快快轉組為妙。Orientation Day 最後一個項目係 lunch,一間房入面屈幾十人飲飲食食行行企企傾傾偈o個隻;我入到去見到 course coordinator 問佢兩個無聊問題知道可以唔駛留低食那個把鬼 lunch 之後我就逃之夭夭,始終唔鍾意呢類 group activity。跟住一條友去食餐麥記都不知幾快活。

夜晚又去上英文班,嘻嘻哈哈又兩個鐘。

雜亂無章的一篇 blog,皆因訓未醒,思緒混亂。

01 2月, 2006

楊千嬅

發夢夢見楊千嬅。

夢入面o既情況同上次夢見 Stephy 差不多。

行車中,楊千嬅睡在我身邊,頭放在我膊頭上。
個夢帶出一個好明確o既訊息(感覺)係我身邊o既呢個楊千嬅好需要被愛,而我又好喜歡我身邊o既呢個楊千嬅。

上次個 Stephy 我知係代表『佢』,但今次呢個楊千嬅我真係唔知,毫無頭緒。

點解會係楊千嬅?!

奇怪...

其實我都幾鍾意楊千嬅。