30 11月, 2009

今日出去開會,如同俾人摑咗兩巴,醒晒。

終於知道點解工作時會唔開心、冇方向。

原因係原來我未完全投入,但以為自己已經瞓身。


我以往好少下定決心去做一件事,或者決定咗都會半途而廢。

不過今次唔同,我唔想再失敗。


我應承咗班細路,我唔會中途離場。

講得出,做得到。

25 11月, 2009

籃球火

還記得十年前,籃球曾經係我生命。

因為當時完全荒廢學業日日去咗打波。

唔敢講打得好,但亦唔算太屎。


十年後嘅今日,我再一次搵返我嘅生命。

每星期同班o靚仔去打波,令我終於搵返我團火。


打籃球嘅其中一個快樂之處,係可以暫時忘掉煩惱。

21 11月, 2009

答案

忽然收到一封佢寄嚟嘅信,有點愕然。

內容大致上係講一下近況,有好有壞。

還附帶一個問題...

「我曾經相信你會係全世界最愛我及最疼我嘅人,但如果係真,點解當時你要放手?冇任何行動?」


去年分手嘅時候,我只係好簡單咁順應佢嘅要求完結咗一段關係。

我,冇講過任何嘢,冇解釋過任何嘢。


問朋友我應唔應該回信,佢話我無謂俾人錯覺覺得會有咩機會復合。

我話我嘅回覆係唔會俾到佢有任何希望,只會係好坦白咁講出我放手嘅原因。

而相信呢個分手背後嘅原因,只會帶到傷心俾佢。


我唔想傷多佢一次。

但我相信如果佢呢一世都唔知道個答案,佢一樣過得唔好。


我想佢忘記我。

我亦唔想欠佢一個「答案」。


MP3 咁啱播到《少見不怪》,係攞境定贈慶?


而既然分開了 何必又想打擾 
為何愛人丟低了 才來明白對方緊要

13 11月, 2009

跳樓

一向都鍾意由高處向下望嗰種感覺。

唔知點解。

可以係因為由細到大都未試過住得高過六樓。


呢個星期心情極差。

因為工作,因為感情,因為家庭。


某晚嘅晚飯時段,去咗公司附近嘅天橋吹吹風企一粒鐘。

一路聽住頹歌,一路睇住啲車響腳下經過。

有一刻,真係驚控制唔到自己對腳。

其實我一直都好想試下跳樓嘅感覺...


11 11月, 2009

十一月十一號

又到呢個日子。

我相信,我呢一世都會俾四條一纏擾住...



08 11月, 2009

久別重逢

好怕響街撞到舊朋友。

非常怕...

07 11月, 2009

健康投資

從新開始運動,打籃球、做 gym.

因為之前只係齋節食去瘦,完全係唔健康嘅瘦。

會用一年時間去操。

為咗有強健嘅體魄,呢次真係健康有價...