30 6月, 2011

講就無敵

好多年前。

記得我亞媽講過話呢個後生女幾叻。

咁細個就思想成熟,做事說話有板有眼。

我當時只係諗。

佢所講嘅做人道理我都識講。

講啫。有幾難?


幾年後有一日呢個後生女自殺。

死唔去。

我更加肯定我嘅諗法。

做人道理人人都識。

講啫。有幾難?

做到先好講。


我明白我唔係當時人好難感受到佢嘅痛苦。

但我確實再無辦法去聽一個曾經放棄生命嘅人去同人講點樣做人。

29 6月, 2011

《只要為我愛一天》

忽然諗起一首舊歌的其中兩句歌詞。


《只要為我愛一天》

若你用我的心情過一天 定會明瞭我度日怎會如年

28 6月, 2011

灰底

一個剛認識無耐嘅朋友問我。

「講最慘又唔係你。講黑仔又唔到你。有個好屋企,有份好工作。真係唔明點解你要咁灰。」

我答佢,我都唔知點解。

其實,我略知一二。


可能係因為中學時嘅遭遇。

可能係因為感情路上嘅經歷。

又或者可能只係純粹因為長期嘅孤寂而造成。


佢見到嘅我係「灰色」。

證明我已經改變不少。

因為以前嘅我,係「黑色」的。


《打回原形》/《大開眼戒》

驚破壞氣氛 誰都不知我心底有多暗

27 6月, 2011

悲哀

響長輩心目中,我係一個「好仔」。

響新認識嘅朋友心目中,我亦係一個「好仔」。

俾人讚,應該係一件值得開心嘅事。


好多時呢兩班人都會問一個相同嘅問題/疑問。

「你咁好仔,無理由無女朋友架?」

俾人讚完之後補多呢句,一件開心嘅事就會變成好悲哀嘅事。


其實,我自己知個答案...

26 6月, 2011

《BEFORE SUNRISE》《BEFORE SUNSET》

終於睇咗一直想睇幾年但未睇嘅戲。


可能係期望越大失望越大嘅關係。

兩套戲唔係唔好,但冇我期待中咁好。


而相比之下,我亦覺得延續篇《BEFORE SUNSET》比第一篇《BEFORE SUNRISE》好。


終於明白點解我老豆會覺得呢兩奪戲悶爆。

佢份人邊有呢啲情懷丫。

25 6月, 2011

權力移交

記唔記得你細個扭計嘅時候。

你屋企人係點應付或者對付你?


可能係一粒糖或一杯雪糕。

可以係氹你或者鬧你。

甚至打你。


今日食晏見到兩對父母。

不約而同都係用一部 iPhone 去氹掂佢哋個小朋友。

響被迫之下。


其中一個小朋友係用尖叫去對付佢亞媽。

迫佢亞媽交出部 iPhone 俾佢玩遊戲。

玩至中途個小朋友想開大聲啲但個亞媽唔俾。

結果個小朋友又再利用尖叫呢招令佢亞媽就範。


另一個小朋友就因為唔肯坐BB櫈。

跟住不斷響度唔知扭乜大吵大嚷。

結果又係一部 iPhone 將佢降服。

一陣咁多。


點知由邊一代開始。

生活上嘅話事權已經由父母移交到小朋友手上。


我細個時真係唔係太敢扭計。

除非嗰日真係身痕...

24 6月, 2011

複製人

有時響街見到啲孖生兄弟/姊妹俾父母安排著住孖仔孖女裝。

總覺得好可憐。

明明係兩個獨立個體。

點解要迫佢哋一樣?


當佢哋仲係BB時都勉強可以話得意可愛。

有啲到升咗小學都仲打扮得一模一樣咁出街。

我真係接受唔到。


「我」呢個意識型態係非常重要嘅。

我從來無諗過我需要一個「我」嘅複製人。

而且日日對住。


所以我好肯定我呢一世都唔會著情侶裝。

拎支鎗指住我個頭我都係咁話。


有時響街見到一啲情侶著住情侶裝。

說實話實在有點覺得噁心。

23 6月, 2011

歲月不饒人

最近響 facebook 見到個朋友 add 咗一個我「曾經認識」嘅朋友。

「曾經認識」係解作,我識呢個人、唔熟、再無聯絡。

靚女,預科同學,我暗戀過佢一段時間。


見到佢張相時真係不得不輕嘆一聲。

不過都合理嘅。

因為佢同我同年。


有時候真係唔可以唔認老。

或者咁講,係年紀開始大。

記得早兩年為減肥去打波、健身。

體能都仲可以拍得住啲後生仔同有成效。

但相隔兩年都真係已經大不如前。

停咗幾個月無做運動之後想操返起但操極都操唔起。

受傷後復原需要嘅時間亦比以前耐得多。

想再減肥但偏偏越減越肥。


唉...

22 6月, 2011

嘥口水

好多時一個人搵另一個人傾訴。

其實並唔係想尋求意見或者另一個答案。

而係想藉著討論嘅過程去肯定自己心目中早有嘅定案。


老實講。

即係「多舊魚」。


若果係一個好朋友搵我傾訴。

當我發覺佢心中早有嘅決定係會害死佢嘅話。

我仍然會好語重心長咁盡量希望可以改變到佢嘅諗法。

但若然係一件無傷大雅嘅小事唔死得人。

我一般都會「盲從附和」我個朋友。

等佢快快樂樂咁隨心而行。

又或者我會刻意唱反調同佢搞對抗。

等佢響爭拗中更堅定自己嘅立場。


由於我睇得咁通嘅關係。

所以我好少搵人傾訴。

多數都係搵人「分享」我自己同自己傾完之後嘅結論。

21 6月, 2011

限額

我相信每個人都要面對「quota」呢個問題。

即係「搵幾多、食幾多、著幾多」都係整定嘅。


以 倪匡 為例,據佢自己講。

忽然之間有一日再寫唔到嘢。

原因係 quota 用完。


響我身上最明顯有 quota 限制嘅。

莫過於係朋友嘅數量。

雖然朋友係貴精不貴多。

但以正常人嚟計,我嘅朋友可以算係少得出奇吧。

當然,我承認我唔係正常人...


好多時我都會莫名其妙咁失去咗一啲朋友。

當然多數都係因為我會無故忽然玩失蹤。

但間中都會係因為對方嘅緣故。


就好似最近。

識咗個新朋友。

忽然間就接近冇咗個老朋友...

20 6月, 2011

存在

入職以來,印象中從未試過咁忙。

由放完大假之後嘅第一日開始。

一直忙足兩星期。

不停走。不停做。


響工作上,我係唔會怕辛苦嘅。

因為無論做咩都好,「工作」已經係辛苦。

要唔辛苦,只有係「唔駛做」。


我終於知道。

「吊頸都要抖吓氣」係咩意思。


有嘢做其實我係開心嘅。

因為可以感覺到自己「存在」嘅意義。

19 6月, 2011

《讓子彈飛》

精彩!

好戲!

我覺得。


近年難得睇到我非常投入同雀躍嘅戲。

偏偏我老豆就覺得一般。

18 6月, 2011

免費快樂

我好容易唔開心。

相對地我亦好容易開心。


有一次去汽水機撳嘢飲。

攞嘅時候,發現多咗兩盒375嘅檸檬茶。

我唔知係咩原因會多咗兩盒飲品。

但我就開心到癲。

亞媽話我傻嘅,咁少事都咁開心。


又話說最近響台北買鳳梨酥做手信。

買咗好多盒之後俾完錢。

招呼我嗰個妹妹額外送咗兩個鳳梨酥俾我食。

我咁又可以樂上半天。

17 6月, 2011

早餐百態

好多時朝早食早餐。

我都會放低 handphone 一段時間聽下呢個世界嘅嘈音。

有時都會聽到啲有趣嘢。


有一次搭一個亞婆檯。

亞婆面前係冇早餐嘅,我以為佢響度涼冷氣。

由我坐低開始,佢就不斷喃喃自語。

我懷疑佢係唔滿意我搭佢檯。

但又唔見佢望我表示不滿。

大約十分鐘左右,亞婆起身埋去櫃檯。

原來係啲人應承幫佢遞餐但忘記咗。

於是佢就坐咗響度「咦咦哦哦」咗十分鐘。


同一次早餐。

隔離檯個大嬸不斷話佢身邊個大叔係死蠢無Q用。

事緣係大嬸之前成日打唔通大叔個手提。

大嬸:你個死蠢成日講完電話唔收線搞到我打唔通又不斷扣錢。

大叔:一合埋就自動收線架啦。

大嬸:梗係唔係啦。邊得你咁蠢架?你要熄咗個電話收咗條線咁下一個人先打得通架嘛。

我心諗:!@#$%^&*

大嬸,你以後真係唔駛旨意打得通了。

(當時,我有打算過開聲幫嗰個一臉無奈嘅大叔。但,我怕潑婦。)


又有一次。

四個學生妹坐我隔離檯。

其中一個話佢半夜起身左邊面痛。

開頭擔心生痄腮,之後就擔心係生腫瘤生癌。(?!)

跟住另外三個都話擔心過自己生腫瘤生癌。(?!?!)

即係頭痛就腦癌,有感冒徵狀就鼻咽癌。

真係得啖笑。

16 6月, 2011

你老闆

你老闆係一個點樣嘅老闆?


我啲同事形容我哋呢度啲大老闆好難服侍。

成日黑口黑面嚴肅到死。

凡事都要即刻答即刻做。

諸如此類。


同事話我入嚟無耐就服侍得啲老闆貼貼服服真犀利。

我心諗,有幾難。

我訓練有素。


皆因我晚晚響屋企都對住你老闆。

因為我老豆晚晚都係用同一個老闆模樣對住我。

15 6月, 2011

理想工作(二)

話說曾經講過我嘅「理想工作」有三樣。

http://hide-myself.blogspot.com/2011/03/blog-post_9784.html

原來數少咗一樣。


「地鐵月台職員」

以前好多地鐵月台都有呢個職位,唔知依家取消晒未。

可以坐響月台個玻璃箱入面有冷氣涼又有得望人真係正。


當然好多人會覺得其實係佢俾人望...

14 6月, 2011

《單身男女》

響台北返嚟之後嘅第二晚已經急不及待睇碟。


好鍾意。好鍾意。

鍾意在於,夠寫實。


愛情就係咁。

明知有一個更好但偏偏仍舊依戀一個唔值得依戀嘅。


不過我亦理解。

程子欣 同 張申然 係互生情素所以欲斷難斷難捨難離。

程子欣 對 方啟宏 只係因為感動而萌生愛意所以猶豫不決。


感受最深嘅兩幕分別係「煮青口」同「蛙兄死」。


一路睇一路怕個結局係 程子欣 揀 張申然 而唔揀 方啟宏。


睇完套戲之後同「佢」傾偈。

我好想話「佢」知,其實我都係一個「火星人」...

13 6月, 2011

下次下次

近年好少出門,長線坐飛機嗰隻。

今次一個人去台灣,決定咗三樣嘢。


1/. 有得揀,唔再夏天去旅行。

2/. 假如屋企人唔一齊去,繼續一個人去或者最多同情人去。雖然一條友去旅行時搵地方食飯係一件幾困擾嘅事。

3/. 下一站 - 北京。

12 6月, 2011

遊台黑仔事件簿

一向都唔係一個運氣好嘅人。

或者咁講。

宏觀是順暢,微觀多枝節。


遊台一星期,都有不少小插曲。

例如:

連續兩日鬼揞眼搵餐廳食飯行過都見唔到,好像共3次。

自助洗衣入錯硬幣搞到一鑊泡。

專程去動物園睇熊貓團團圓圓點知改咗休館日白行一趟。

專登去搵兩間舖頭諗住買手信俾堂細佬妹同契仔點知一間執咗一間搬咗唔知去邊到頭來一東一西白行兩趟。

專程去搵間日本餐廳食定食點知即將搬遷只賣料理不賣定食而且份料理貴夾唔啱食於是要另覓地方開飯。

民宿上唔到網似係 modem 有事屋主唔識搞打去 customer service 問之後話聽朝先有人嚟整咁我話我識 set router 不如手動自己打 IP & DNS 之後佢唔制咁我就算啦出街食嘢去 Cafe 上網。響 Cafe 買咗張上網卡 login 完要用 SMS 收驗證碼點知我張廢卡收唔到結果要打上 customer service 搞一輪之後終於響 9:30pm 連到線但 Cafe 11:00pm 就打烊。

將部 iPhone 放褲嘅側袋,可以撼到膝頭又痛又瘀。


可能仲有其他好笑事不過記唔到。

「好笑」,無錯。

因為對住呢啲運滯嘢,我依家都會一笑置之。

人生,都係為啖笑,都係得啖笑啫。


今次遊台,最大得著可能係訓練EQ...

11 6月, 2011

遊台北的二三事

台北地下街,感覺似室內嘅深水埗。


響台北街頭好難搵到垃圾桶。
定係我唔認得啲垃圾桶呢?


台灣的公民教育很好。
不論年少老幼坐捷運、坐電梯,都會排隊。


假期時國父紀念館門外會圍滿練舞嘅年青人。


台灣人大部份都很有善。
男女老幼都好樂意幫助遊客指路。


有香港人去台北旅行時都不忘去電腦展/電腦商場。
響香港仲行唔夠?


台北到處都係補習社補習班。


夜市對我嚟講吸引力不大。
可能係因為我唔鍾意買嘢。
同熱到唔想食嘢。


覺得蚵仔煎好一般,我寧願食潮州蠔餅。

10 6月, 2011

台北的七天

 
 
 
 
 
 
 
 
 
 

04 6月, 2011

台北

台北,我來了!

03 6月, 2011

自問自答 - 奇蹟

奇蹟會出現在人的身上嗎?


會。

不過唔好意思無你份...


我跟自己說。

02 6月, 2011

自問自答 - 後悔

後悔有甚麼用?


沒有。

所以才會後悔...

01 6月, 2011

棄械投降

投降。

我放棄了。


雖不至於「一失足成千古恨」。

但都算係「一子錯滿盤皆落索」。


我冇怪任何人。

我只係怪我自己又再次太急進。

重複犯錯。


結果今晚真係見佢唔到。

彷彿一切都係整定...