31 7月, 2011

可一不可再

契仔今日嚟咗我屋企。

三個月大了。


佢係一個好好笑容嘅B。

尤其係瞓醒覺嗰陣。


我亞媽話。

當我仲係BB嗰陣都係一瞓醒就笑。


點估到依家「瞓覺」反而成為咗我最大嘅煩惱...

30 7月, 2011

遺照

我好憎影相。

最近一次影相可能已經係兩年前生日嘅時候。


今日忽然響度諗。

將來我香咗嘅時候如果啲後人要幫我搵張車頭相或者靈堂相都應該算係 mission impossible.


或者係時候影定張...

29 7月, 2011

1000

原本諗住響第1000篇時嚟個回顧。

點知寫下寫下都冇咗件事。

到 check 返嘅時候原來已經過咗。


「已發佈 - 共 1020 個」@Blogger


一千篇唔係一個小數目。

我亦無諗過我會維持寫 blog 維持咁耐。


記得寫第一篇 blog 嘅時候係 31/12/2005 ...

28 7月, 2011

不勞而獲

如果想祝福我將來會好有錢。

唔好同我講「祝你搵多啲」或者「祝你發達」。

因為「搵多啲」然後「發達」隨時做到趴街。

真係要祝福我嘅。

就祝我「中一注獨得嘅六合彩頭獎」啦。

實際好多。

27 7月, 2011

失眠

最近只有響呢兩個情況下至會瞓得比較好。

1)飲咗酒

2)食咗敏感藥


正確啲嚟講。

係昏迷...

26 7月, 2011

食飯小插曲(一)

話說某晚去幫襯《何洪記》。

叫咗個 雲吞牛腩撈。


我:亞姐!漏咗蠔油喎,俾啲蠔油我丫!

亞姐:蠔油要加錢架喎!

我:乜撈麵唔係有蠔油嘅咩?

亞姐:雲吞撈就有蠔油。你雲吞牛腩撈就無。

我:‧‧‧‧‧‧‧‧‧‧加幾錢?

亞姐:三蚊。

我:咁‧‧‧加‧‧‧啦‧‧‧

25 7月, 2011

理智地衝動

每次坐船都會想跳海。

每次去摩天大廈又會想跳樓。


今日坐渡輪過海時又閃過一下衝動。

可惜我份人太理智。


連衝動都理智過人...

24 7月, 2011

《回到過去》

MP3 機響起《回到過去》


以前好鍾意呢首歌。

因為我以前好鍾意回憶同緬懷過去。

依家。

我就打死都唔想時光倒流。

因為人會重蹈覆轍。

而且往事不堪回首。


《回到過去》

作詞:劉畊宏
作曲:周杰倫
編曲:邁可林

一盞黃黃舊舊的燈 時間在旁悶不吭聲
寂寞下手毫無分寸 不懂得輕重之分
沉默支撐躍過陌生 靜靜看著凌晨黃昏
妳的身影 失去平衡 慢慢下沉

黑暗已在空中盤旋 該往哪我看不見
也許愛在夢的另一端 無法存活在真實的空間

想回到過去 試著抱妳在懷裡 羞怯的臉帶有一點稚氣
想看妳看的世界 想在妳夢的畫面 只要靠在一起就能感覺甜蜜

想回到過去 試著讓故事繼續 至少不再讓妳離我而去
分散時間的注意 這次會抱得更緊
這樣挽留不知還來不來得及 想回到過去

思緒不斷阻擋著回憶播放 盲目的追尋仍然空空盪盪
灰濛濛的夜晚睡意又不知躲到哪去
一轉身孤單已躺在身旁

想回到過去 試著抱妳在懷裡 羞怯的臉帶有一點稚氣
想看妳看的世界 想在妳夢的畫面 只要靠在一起就能感覺甜蜜

想回到過去 試著讓故事繼續 至少不再讓妳離我而去
分散時間的注意 這次會抱得更緊
這樣挽留不知還來不來得及 想回到過去

(沉默支撐躍過陌生 靜靜看著凌晨黃昏
妳的身影 失去平衡 慢慢下沉...想回到過去)

23 7月, 2011

思覺失調

我經常胡思亂想。

而且無辦法令自己個腦停落嚟唔諗。


為咗唔再俾紊亂嘅思緒影響到我。

於是我揀咗一款要動腦筋嘅 iPhone game 嚟玩。


用專心玩 game 所佔用嘅腦力嚟令自己分心唔再諗無謂嘢...

22 7月, 2011

勇氣

我一向唔鍾意自己個樣。

甚至有點憎。

相信呢個亦係我無自信嘅其中一個原因。


有時響街見到一啲有失天缺憾或者後天毀容嘅人。

我都好配服佢哋可以繼續面對自己面對人。


活著需要嘅勇氣遠遠大於了結自己生命...

21 7月, 2011

書展

每年嘅書展都係喺差唔多時候搞。

好多時又會撞正我生日。

所以中學階段時有兩三年嘅生日都係去書展度過。


當年嘅書展仲有漫畫賣。

依家諗返都唔知辛辛苦苦排個幾兩個鐘頭隊迫入去買漫畫同漫畫精品然後一袋二袋山長水遠咁抬返屋企係為乜。

因為明明書展之後過一個星期就周圍都有得賣。

不過後生仔就係咁戇居架啦。


近年已經冇再去書展。

因為人太多睇唔到咩書之餘買完仲要拎餐死。

所以寧願繼續悠悠閒閒間中去下書局好過。


響地鐵站見到有廣告介紹今年書展有 王司馬 嘅《牛仔》。

我唔知往年有冇。

不過我細個時就睇好多。

因為我姑丈響 博益 做印刷。

成日拎書同漫畫俾我睇。

包括《牛仔》同《成語動畫廊》。

20 7月, 2011

三十有二

今年嘅生日。

係快樂嘅。


由星期六開始同屋企人聚會。

到星期一、二都約咗朋友食飯。

再到今日同父母兼帶埋堂細佬細妹一齊食飯。

每日都排得密密麻麻。

我諗。

我係刻意唔俾自己空閒落嚟。


原本。

約咗今日同「佢」去海洋公園。

最後。

我決定取消。

因為。

我單方面覺得我同「佢」唔應該繼續落去。


今日忽然間多咗出嚟嘅時間。

我一個人去咗行街。


記得以前中學時。

每次生日我都會「懶瀟灑」咁一個人四圍去。

機場、東涌、青衣、荃灣。

諸如此類。

一個人「懶憂鬱」咁過一個孤單嘅生日。


今年,又打回原形。

不過,今年係心情輕鬆咁享受一個人獨處嘅時間。


越來越覺得。

相對於愛情。

家人同朋友都係同等重要。

以前嘅我。

忽略咗。


舊年生日做過咩已經唔記得因為無寫低。

亦唔想再記起...

19 7月, 2011

明日何其多

我好鍾意定一啲期限俾自己。

例如。

邊月邊日開始做某啲嘢。

邊月邊日開始唔做某啲嘢之類。

而到頭來多數都係做唔到。

我唔知其他人會唔會都係咁。


定呢啲咁嘅日子確實係無咩意義。

其實都係俾個藉口自己再拖下先。

係有心做或者唔做就會即刻坐言起行啦。

仲等?


不過人係會不斷重複犯錯嘅。


聽日生日。

我定咗幾件事響過埋聽日之後開始實行。

一:唔再搵佢。

二:俾3年時間自己去做個好人、好仔。

三:再開始返做運動減肥。


下年生日時檢討。

一定。

18 7月, 2011

昏迷

最近瞓得唔好。

原因我係知道嘅。


上星期某日去買魚生嘅時候。

貪得意買咗幾支米酒同梅酒。

與其講得貪得意。

倒不如講為借酒澆愁仲貼切。

對於一個平日滴酒不沾嘅我嚟講。

一支14度嘅米酒都足以令我不省人事。


飲酒。

彷彿可以將我同佢嘅距離拉近。


連續飲兩晚。

連續借酒昏迷兩晚。

17 7月, 2011

不愛 3D 愛 HD

依家好多大片都會加入3D效果。

我好唔鍾意。


3個原因:

啲3D唔係好3D。

貴。

我四眼。


我睇戲係睇故事睇演技。

就算睇畫面都係求清求靚而唔係求立體。

另外帶住副眼鏡再帶多副3D眼鏡睇戲真係一件好辛苦嘅事。


由於有3D版嘅戲好少會有戲院上2D版。

就算有2D版都會係響一啲質素唔太好嘅戲院。

所以間接導致我少咗入場。


我寧願等耐少少等到出碟安坐家中睇 Blu-ray 好過。

16 7月, 2011

犯賤

我嘅工作係幫人解決問題。


雖然係打份工有糧出。

但幫完人清高到唔想聽到人哋嘅一句「唔該」就呃你嘅。


呢兩日分別有唔同嘅人同我講。

「有你喺度真係好」

「你真係好人」


我相信係佢哋嘅真心話。

試問呢個世界仲有幾多個我呢啲咁盡心盡力做嘢嘅戇居仔丫。

但聽完之後開心完之後我又開始唔係好信。


然後我又會諗。

如果唔係同事向我講而係我鍾意嘅女仔同我講你話幾好...

15 7月, 2011

如果 ... 陽光

我好少聽開心嘅歌。

所以好少可以聽歌聽到個人開心。

呢次。

可能係第一次。


早幾日睇鄭伊健演唱會聽見馮曦妤唱呢首歌嘅時候。

我竟然會輕鬆同開心。

響演唱會入面嘅歌聲同表情。

的確令人感到好舒服。


鍾意嘅係演唱會版。

可惜 youtube 得盜錄版。


http://www.youtube.com/watch?v=q6aC5ItyPUc

如果 ... 陽光

歌手:馮曦妤

作曲:林慕德
填詞:葉偉琪
編曲:陳光榮

當初相遇時回頭在笑 望著笑臉感覺像似首詩
每次見他將心意合成字句 偷偷的Say "Hello"

如陽光伴我 清新笑迎面
願照遍我心 自視每天快樂過
如陽光伴我 心中更明亮
在細細說聲 但願每天也望見

14 7月, 2011

寂寞先生

呢首歌,真係可以聽到個人極頹。


http://www.youtube.com/watch?v=gsU2HPQzk9Y

寂寞先生

主唱:曹格
作曲:曹格
填詞:小寒

你的笑容是恩惠 世界難得那麼美
於是追 要你陪 可惜本能終會將美麗汗水化成淚水

黑夜之所以會黑 叫醒人心里的鬼
在游說 在縈回 在體內是什麼 在把我摧毀在傷痕累累

我可以無所謂 寂寞卻一直掉眼淚
人類除了擅長頹廢 做什麼都不對 Oh…I’m Not Okay

我假裝無所謂 才看不到心被擰碎
人在愛情裹越殘廢 就會越多安慰 無論多虛偽

空虛並非是詞匯 能夠形容的魔鬼
它支配著行為 能擺脫寂寞我什麼都肯給 就像個傀儡

我可以無所謂 寂寞卻一直掉眼淚
人類除了擅長頹廢 做什麼都不對 Oh…I’m Not Okay

我假裝無所謂 才看不到心被擰碎
人在愛情裹越殘廢 就會越多安慰 
我也無所謂 (我假裝無所謂) 才看不到心被擰碎
人在愛情裹越殘廢 就會越多安慰 無論有多虛偽

13 7月, 2011

古老當時興

記得細個時好多小朋友都好鍾意落雨著水鞋。

因為點玩水點踢水都唔怕。


我好唔鍾意著水鞋。

因為好熱好焗腳。

跟住會出汗會腳臭。


依家女士們響雨天著水鞋已經成為一種 fashion。

最近經常落雨。

所以一街都係水鞋。


由朝早返工開始一路著住十幾個鐘。

我無法想像佢哋返到屋企之後一除鞋...

12 7月, 2011

自然美

唔明白點解啲女仔明明眉清目秀。

但硬係要化個濃妝。


係真係覺得自己化咗個濃妝會靚啲?

定純粹係順應潮流依家興?


同朋友去街時。

如果佢講:喂!個女仔幾得喎!

我依家多數會答:落咗妝先講。


我成日同我啲女仔朋友講:唔化妝清清地咪幾好。

多數得到嘅回覆都係:你識咩丫!


各花入各眼。

11 7月, 2011

為買而買

最近有點失控地購物。

心情不太好時總會這樣。


主打四樣物品。

戲、書、衫、玩具。


當然不是胡亂購買。

但志在發洩比實際需要為多。

10 7月, 2011

充實還是頹

今朝一早就去咗「中坑籃球聚會」。

成個幾月無郁。

幾個「中坑」都係抖多過打。

吹吹水、食食飯。


中午過後返到屋企。

就一直攤響床度睇碟。

《Beatiful Day 鄭伊健演唱會 2011》

《C+ 偵探》

《B+ 偵探》


跟住瞓覺。


都唔知點去形容今日係咩生活狀態...

09 7月, 2011

唔換好過換

換咗 iPhone 保護貼。


我知我麻煩。

又要防偷窺。

又要磨沙面。

所以選擇唔多。


我黑仔。

換第一張有牌子嘅就出現問題。

換第二張無牌子嘅就質素唔好。


可能係我奄尖。

換咗之後。

完全感受到咩叫新不如舊...

08 7月, 2011

搵命博

唔記得由幾時開始鍾意咗飲珍珠奶茶。


未出現「塑化劑事件」之前,一星期大約飲兩至三杯。

出現咗「塑化劑事件」之後,一星期都仍然最少飲一杯。

反正,又唔會死。


早幾日響屋企食晚飯嘅時候聽爹娘講。

原來珍珠奶茶入面係冇奶茶嘅成份。

我反而驚一驚。

決定唔再飲。


就響我決定唔再飲珍珠奶茶嘅第一日。

老細忽然請飲嘢。

珍珠奶茶...

07 7月, 2011

《愛很簡單》

由今朝瞓醒開始。

個腦就不斷播住呢首歌。

同時亦出現電影《單身男女》嘅畫面。


返工嘅時候。

不斷聽不斷聽不斷聽呢首歌。

不下十次。

個腦亦不斷重溫電影《單身男女》嘅畫面。


感覺良好。


諗起佢。


明顯地。

我係響度自製浪漫...

06 7月, 2011

生人勿近

好唔鍾意響返工或放工途中遇到同事。


一般嘅早上。

未返到公司之前基本上我都仍然係處於一個唔清醒嘅狀態。

帶住 headphone,與世隔絕。

好多時甚至會因為聽歌而導致心情欠佳木無表情。

但一遇到同事,就要無奈地離開呢一個我自己建立嘅小小空間。


除低 headphone,強裝笑容,夾硬迫出幾句說話寒暄一下。

何等痛苦。

相信對方都一樣係咁諗。


放工時嘅情況亦差不多。

若果遇到一個同車同路嘅一齊走。

個過程簡直係煎熬...

05 7月, 2011

劉建明

最近晚晚都瞓得唔好。

經常發夢。

瞓咗好似無瞓。

精神差過未瞓。

所以,我好憎發夢。

遲早,我會好憎瞓覺。


我一向都會抑制自己嘅情緒。

唔會響任何人面前做出一啲好瘋狂嘅行為。

或者係因為咁。

響尋晚發嘅夢入面。

我從未試過咁歇斯底里。


已經唔太完全記得個夢嘅內容。

記憶中係我做好人。

結果俾人誤解,俾人屈。

最記得我響夢入面歇斯底里咁大喊。

「我只係想好人做好自己啫。點解你哋咁都唔信我?」

之後,我醒咗。


對句白好熟。

個態度、個精神狀態。

好似似曾相識。


哦!

無間道 - 劉建明...

04 7月, 2011

無魂

今早返工遇到一個眼神非常空洞嘅男人。

當你望住佢對眼。

你會感覺到呢個人入面係無嘢嘅。

就好似無靈魂一樣。


係因為眼瞓?

係因為失落?

定係本身佢天生就係咁?


睇佢衣著,恤衫西褲。

明顯地係去返工但佢又兩手空空。


忽然間好想知佢嘅工作係咩。

想知佢係一個咩人。


更想知嘅係。

見到一個佢咁樣嘅人。

咩人會請佢。

03 7月, 2011

LOST IN ...

今朝瞓醒嘅一刻。

我終於感覺到、意會到。

原來我最近瞓得唔好嘅原因。

係因為。

我好迷失...

02 7月, 2011

假期工

尋日七一,今日七二。

都係響工作中渡過。


我好鍾意響公眾假期開工。

第一。
因為 double paid.

第二。
反正假期都係冇節目,不如開工。


今次假期工作。

成 team 手足聚首一齊開開心心咁做嘢之後去打邊爐吹水嘻嘻哈哈。

確實有賺。


難得的快樂。

01 7月, 2011

做人老豆甚艱難

某日經過港島西區。

地點忘記了。


見到行人路欄杆上掛住一張標語。

應該係母親節時留到依家都未拆。

上面寫住「世上只有媽媽好」。


我心入面即時諗到。

「哦!爸爸唔好...」