05 February, 2011

初三 - 口不對心

幾乎每逢節日見到親戚,言談間都少不免會觸動到我嘅婚姻大事呢個話題。

響農曆年嘅時候就更甚,因為我仲收緊利是。

通常都係出現以下對白。


甲:「祝你快啲娶老婆,下年到你派喇。」
我:「哦!好呀!好呀!承你貴言。」之後收佢利是。
(心嗰句:「我連女朋友都未有。而且都唔打算結婚...」)


今年有個人仲搞嘢。

乙:「祝你快啲娶老婆,快啲生番個『兔仔』或者『兔女』等你亞媽抱孫。」
我:「下?急成咁?咁急都唔慌好嘢啦。」
乙:「車!有咩所謂呀?」
我:「下?哦...」之後都係收佢利是。


點解明知我冇女朋友,都仲硬係要撩嚟講...