31 7月, 2012

公私分明

放工之後,基本上我係唔會同同事有任何聯絡。

響工作時間入面傾偈,我亦都好少過問人哋嘅私人嘢。

所以對於同事嘅私事我幾乎一無所知。

相對地,佢哋都唔多清楚我嘅嘢。


我唔八卦係主因。

其次係我亦唔方便俾其他人知我嘅家庭背景。


每次傾偈,我都係講下以前嘅嘢或者人哋嘅嘢。

甚少「現在式」嘅資訊。

全部無關痛癢。


而且每次轉職離開一間公司。

我都唔會再同「舊同事」聯絡。


所以,我只有同事。

冇朋友。

30 7月, 2012

洗底

冇過去,就冇將來。

要有好嘅將來,就要抺掉過去。

29 7月, 2012

兩條麻甩佬的一天

第一站 - Mos Burger















第二站 - 睇蝙蝠俠






















第三站 - Burger King





















第四站 - 睇波


















第五站 - 波士頓 据扒



















最後,宵夜 - 菠蘿油


28 7月, 2012

《The Matrix》

尋晚見到明珠台播,於是今日就拎返出嚟重溫。

一口氣睇晒一至三集。

當係全日 OT 工作過後嘅一點調劑。


記得之前睇完《The Matrix》都對套戲著咗迷搞到忽然好多嘢思考。

諗咩係真咩係假,諗究竟選擇嘅時候係咪真係選擇之類。


但今次睇,真係咩都唔想諗。

睇第三集時仲睇到瞓著。


最近成日揀一啲時間唔去用腦。

係令自己處於一個無思想嘅狀態去放鬆自己。


21 7月, 2012

下年應該識同契老豆講「生日快樂」喇卦。


20 7月, 2012

三三不盡

生日。

同屋企人食餐飯。

就係咁多。


特別少少嘅係。

我太飽食唔到蛋糕。

切一刀之後佢哋食先。

然後留返一份同埋個牌俾我。

哈!


19 7月, 2012

短短工作二十日。

已經將旅行帶返嚟嘅快樂完全摧毀。


今日因工作關係去到機場禁區。

望住飛機不斷升降。


我急不及待想再去旅行。

即刻走嗰隻。


15 7月, 2012

彈性~ 彈性~

最近好鍾意嘅一個廣告。


14 7月, 2012

入場

最近有啲衝動想入場睇戲。


第一套想睇嘅係《吸血鬼獵人:林肯》

當然最後都係冇去。


另一套比較之下更想捧場嘅係《蝙蝠俠:夜神起義》

雖然唔知最終會唔會去。

但去睇之前,點都要溫下書先。


對上一次入場睇,都已經係半年前了...


13 7月, 2012

唔駛用腦

一向少睇電視劇。

最近 TVB 響深夜翻做《怒火街頭》。

聽聞幾好睇,於是錄起打算望望。


工作上忙碌完一星期。

星期五夜晚無嘢做於是就播嚟睇。

一睇就睇咗四集。


我終於知道點解咁多人追劇。

12 7月, 2012

何必趕盡殺絶

每朝返工坐地鐵都冇拎免費報紙嘅習慣。


公司附近地鐵站內嘅出口通道每日都會有一對老夫婦回收人哋睇完嘅報紙。

每次老夫婦收到報紙都會對每一個人講句「多謝」。


有一日我見到有個地鐵職員企響原本老夫婦每朝都企嗰個位。

對老夫婦就閃閃縮縮咁企響另一個好遠嘅位置收報紙

而且仲要隨時走鬼。

如是者一直維持咗幾日對老夫婦先返到原位。


就由嗰日開始。

我每次出閘前都會行去拎一份報紙。

然後交俾對老夫婦。


我同自己講。

如果地鐵職員再趕佢哋。

我以後會拎夠兩份,甚至更多。

11 7月, 2012

中蕉

有朝坐小巴。

隔離個乘客食蕉做早餐。

嗰陣蕉味。

又令我諗返起細個時候醫生開嘅一種藥水。

嗰隻藥水好似係止嘔用。

但嗰陣味令我飲完之後更加想嘔。


依家邊寫 blog 邊諗起都已經想嘔...

10 7月, 2012

01001101 01100101

我鍾意我份工。

因為要對住電腦。

而電腦最好嘅地方係。

佢唔識講大話。

簡單、直接。

一就一。

零就零。


09 7月, 2012

人肉錄音機

最近無論我同亞媽講咩,佢都會問同一個問題。


我:媽,我去旅行。

媽:又一個人呀?



我:媽,我去睇戲。

媽:又一個人呀?




我:媽,我聽晚唔返嚟食。

媽:又一個人呀?


媽,其實我有兄弟同朋友架。

08 7月, 2012

《桃姐》

有一日我問我亞姨:「睇唔睇《桃姐》?」

亞姨答:「駛乜睇呀?我咪係囉!」

我會心微笑。


我呢個亞姨,湊大咗我同我表弟。


當年我父母要努力搵錢。

於是由小學時期開始,我亞姨就搬咗嚟我屋企照顧我。

照顧我之餘,仲負責我哋屋企嘅家務同起居飲食。

同時又做「外發」賺下錢,一直到我升中。

之後我亞媽「退休」,舅父母要努力搵錢。

我表弟就嚟咗我哋度住,由我亞姨湊 。

一湊就湊到我表弟升大學。


對於我亞姨嚟講,我同表弟都差不多已經係佢親生仔。

除咗父母之外,我最錫嘅都係我呢個亞姨。


我亞姨未婚,早幾年又中風。

康復之後仍然繼續工作。

我同自己講。

遲啲到佢退休,就到我照顧返佢等佢享下福。




07 7月, 2012

禮拜六 無節目

星期六返半晝。

收工前左諗右諗約下呢個約下嗰個。

最終。

都係返歸瞓覺。

06 7月, 2012

反面教材

望住一班高官嘅新聞。

我終於知道「光明磊落」呢四隻字係點解。

就係唔好好似佢哋咁。

05 7月, 2012

瞓醒無事

我同自己講。

唔可以俾一個煩惱困擾自己超過十二小時。


希望做到。


04 7月, 2012

Live in Peace, Sleep in Peace.

眼瞓。

足以摧毀一個人嘅心情...

03 7月, 2012

Over

由響日本嘅時候開始到返嚟之後,我都一直處於一個亢奮狀態。


我唔知道我係因為真係開心而咁開心。

定係我唔俾自己再唔開心所以咁開心。


我只係想一直咁樣開心落去。


即使今日係長假之後第一日開工。

我都仍然係笑唔停。


心情愉快、心境平靜。

嘻嘻哈哈,簡簡單單。

沒煩惱。

02 7月, 2012

十日大假 - 第十日(一次旅行一本書)

平時買埋買埋好多書冇睇。

但每次旅行我都會帶本書。

而每次都會睇得完。

可能係因為個人比較平靜而且冇咩其他嘢分散注意力。


上次去台灣睇咗本《死後四十種生活》

令一向對死後世界嘅我對死有另一種睇法。


今次去日本睇咗本《去年的秘密》

令我對愛情同做人都有啲新嘅諗法。


《去年的秘密》係一個一開始睇就唔想停落嚟嘅故事。

個感覺有啲似當年一口氣咁睇完《達文西密碼》


睇故事,聽故事,說故事。

好多時就係會有一種魔力。


越來越欣賞 杜緻朗。

越來越喜歡佢編嘅電影、佢寫嘅故事。


01 7月, 2012

十日大假 - 第九日(十個男人九個嫖)

原本「十個男人九個嫖」呢句說話係講人總有例外。

但唔知由幾時開始,啲人響後面加咗句。

「十個男人九個嫖,還有一個在動搖。」

即時全世界嘅男人都全部唔係好人。


今次旅行我住新宿,訂完先知間酒店同歌舞伎町只係一街之隔。

到埗當晚我已經感受到紅燈區拉客係幾咁誇張。

因為返酒店沿途都不斷要耍手兼擰頭。

好煩。


響 whatsapp 同一班朋友講起,無一個男人唔鼓勵我去試下。

軟硬兼施咩口術都出齊,仲話唔試下即係白去日本云云。

由嗰一刻開始,我真係懷疑究竟呢班人係咪朋友。


最後我當然能夠繼續堅持我做人嘅底線。

連半點動搖都無。

響第二晚開始更加專登兜個圈行返酒店免被騷擾。


記得早前去一個女性朋友屋企食飯。

席間講起佢老公出咗埠去打高爾夫球。

同檯嘅人即時七嘴八舌話個男人實會去滾之類。

啲人講真又好,講笑又好。
(講笑都搵第二樣丫吓話?)

我冇加把口。

因為我唔覺得全世界嘅男人都係一樣。

雖則依家唔好嘅男人遠遠多於好嘅。


我相信無一個女人會唔介意自己個男人去召妓。

無論個行為係過去式、現在式抑或係將來式。


我冇權批評其他男人咁樣係唔好、係唔啱。

因為每個人畫嘅嗰條底線都係響唔同位置。

而我,但求自己做人無愧於心。


假如將來我女友或老婆問起我有冇曾經嫖妓。

我會為我理直氣壯嘅一句「無」而感到驕傲。


人,總有例外。