又一個年紀比我輕嘅表親結婚。
早兩日嚟我屋企派帖,佢父親同行。
又再同長輩重複一啲已經唔知重覆過幾多次嘅對答。
「幾時到你呀?」
「冇咁快啦...」(你唔去催下你個大仔先?)
「要快啲喎!」
「急唔嚟...」(你估我唔想快?)
「最近有冇拖拍呀?」
「冇喎...」(有就唔會咁得閒星期日響屋企同你吹水啦!)
「有目標未呀?」
「冇喎...」(有都唔同你講啦!)
「揀啱就好結喇喎!」
「都要人哋肯嫁先得架...」(買菜咩依家?)
「畀心機賺錢囉!」
「畀緊...」(究竟係嫁我定嫁舊錢?)
「響公司有冇目標呀?」
「冇...」(句嘢咁熟嘅?)
「有目標就要去追囉喎!」
「係...係...」
就係咁。
一個下晝。
一個話題。
重複咗幾次。
想像得到到婚禮當日又要唔知重複多幾多次。
可唔可以放過我...