天生我才未必會用

記得以前學校家長日，通常都係派發成績表嘅日子。

由小學至中學畢業，每個班主任都只係會同我亞娘講兩件事。


（一）

「晶媽，你個仔好多嘢講。無論我調佢去坐邊個位，佢同可以同前後左右啱傾。」

返到屋企之後當然係受刑。

直至中學畢業嗰年，嗰個班主任再補多句。

「晶媽，其實亞晶咁多嘢講未必係壞事。佢連有啲自閉嘅同學把口都撬得開，或者呢個係佢嘅長處，將來可以向呢方面發展。」

但當時萬萬估唔到，越來越自閉嗰個會係我。


（二）

對住幾乎「滿江紅」嘅成績表，班主任說。

「晶媽，其實亞晶一啲都唔蠢，係懶啲啫。」

我諗，都係客套話居多。

如果我係「聰明」，又點會「蠢」到連自己學業都荒廢呢．．．

趕甚麼

香港人每日都好趕。

但有幾多人認真諗過究竟自己每日響度趕啲乜？

其實又有冇需要咁趕？

要趕嘅原因又係咪因為先前嘅準備不足？

究竟每日咁趕，係得到嘅多還是失去嘅多？



每次坐地鐵過海轉車見到啲人衝過對面月台時我就會諗。

「幾乎每一分鐘就有班車，係咪真係要咁趕？」



我「唔趕」，其實係咪因為我無嘢想「追」？

一日之計在於「神」

由中學時期開始，我成日都會鬱鬱寡歡咁嘅樣。

當時有個同學同我講，佢話只要一個人由朝早起身開始保持心情好，咁之後全日都會心情好。

正正係「一日之計在於晨」嘅體驗版。

我唔知咁樣 work 唔 work，而我亦見唔到呢個理論響佢身上係 work.


有啲人，一早就會「拜神」祈求一日嘅平安。

而我就相反，係每晚臨瞓前祈求我當晚會瞓得好。


其實我覺得想每日開開心心。

最緊要係有「神」，「精神」個「神」。


已經唔記得有邊一日個人係精精神神嘅。

日日都咁眼瞓，沒精打采。

想開心都難．．．

不能說的秘密

唔係講套戲，係講份工。


以前，只有做臥底、間諜或者特務之類嘅人先唔可以透露自己嘅職業。

依家多咗一項，係 IT。


身邊嘅同行朋友都覺得，呢個係一個秘密。

因為只要你一同人透露，就肯定一身蟻。

對住相熟嘅朋友都還好，唔熟嘅就麻煩大了。

響教會聚會時公開更係一個大忌（朋友說）。


我唔太介意話俾人知我做 IT。

亦唔太介意幫人解決電腦問題，因為某程度上呢個係我嘅興趣。

不過將唔係電腦問題而納入為電腦問題嘅則另計，有好多人會將「電」同「電腦」劃上等號，好似只要件嘢係要插電嘅我就一定識整咁。

仲有一個大前提，就係我希望個用家聽聽話話。

不過，好多時都事與願違．．．

理想工作

有三份工我係好想做嘅。

1/. 揸電車

每日可以遊車河又可以望街望人而且出軌或嚴重交通意外相對較少。

2/. 大廈看更

每日可以望街望人望下訪客望下陌生人而且又可以同人吹下水撩下女仔。

3/. 7仔夜更

每晚可以望街童望夜遊人望下鮮為人知嘅深夜世界而且應該好睇過日頭。


其實都係諗下啫．．．

夜鬼

如果有得揀，我會選擇一份可以返夜班嘅工。

感覺上，時間好似比較見駛。

因為其實無論係返早定返夜，我都係一樣咁夜瞓。

最好嘅係當其他人返緊工而你又未開工嘅時候，做好多嘢都方便好多。


之前嘅一份工，係輪班制。

夜更係返 13:30~22:00。

返工之前，可以做好多嘢。

做 gym、打波、打機、飲茶、行街、睇戲、睇醫生 等等。

咁嘅生理時鐘，連個人都無咁眼瞓。

放工之後，都仲可以有好多活動。


自從轉咗工返 8:30~18:00 之後。

放工後太攰，基本上係咩都唔想做。

只想回家攤抖。

連生活都變得單調。

夢魘

討厭發夢。

多年來，發夢只會為我帶來痛苦。

而且，唔單單只係精神上。


甚少好夢。

往往睡醒以後仍然被夢境裡發生嘅事所纏繞。

徘徊於夢境與現實之間。

精神不振，導致身體負荷更大。

體力透支，又導致睡眠質素下降。

惡性循環。


最近經常發夢，瞓醒時感覺似冇瞓過一樣。


解決問題之前，先要了解問題所在。

我，開始想研究下「夢」呢樣嘢。

過眼雲煙

幾日前嘅返工途中，巧遇一個令我眼前一亮嘅女生。

已經好耐無發生過。


響短短三個地鐵站嘅車程時間裡面，我不斷望實佢。

好努力咁將佢嘅容貌記住並嘗試儲存到記憶入面。

因為我知道響正常情況之下，相隔一日之後。

我只會記得我曾經遇過呢個人，同望住呢個人時嘅嗰種感覺。

至於外貌，就會變得模糊。


曾經天馬行空咁諗，如果有一日科技可以發展到植入體內嘅話。

我一定會選擇植入數碼相機。


因為過往，實在錯過咗太多值得留低嘅片段。

唔係掛住影相冇親眼感受，就係親眼感受得嚟但趕唔切或唔記得拍低。

如果可以同步，就實在「太完美」。


人嘅記憶除咗有限，亦會衰退。

或者呢一種先天嘅「不完美」，才成就出人生嘅「遺憾美」．．．

王菲《懷念》

談起網友，就令我想起一個人。


早於 56k 時代，我已經接觸互聯網。

當年，應該係用緊 icq98 或更早期嘅版本。

我個號碼，得七個位。


唔記得係因為 icq 定 CyberCity, 認識咗一個女網友。
（應該是女的吧）

由最初嘅網上交談，到之後互相響對方 call 機落 call，到再之後互相寫信寄禮物。

一切一切，都來得美好。

直至，佢希望見面。

唔記得佢曾經提出過幾多次，而我又拒絕過幾多次。

甚至連佢嘅朋友都出口話我，我都仍然係拒絕。

已經忘記咗到最後係因為點樣而無再聯絡。

總之，就係不歡而散。


我唯一記得清楚嘅係，佢送過一首歌俾我。

當時嘅我，唔太能領略歌詞中嘅意思。

到今時今日聽返，又另有一番感受。

王菲《懷念》

關起滿室　不足的氧氣　點著煙蒂　回味你的呼吸
搜索腦裡　未完的齟齬　對著空氣　還擊著你的問題
推辭每次　真實的相聚　困著自己　渴望著你的消息
沾沾自喜　拒絕的魅力　不著痕跡　享受著與你的距離

也許喜歡懷念你　多於看見你
也許喜歡想像你　不需要抱著你

關起滿室　不足的氧氣　點著煙蒂　回味你的呼吸
散落一地　斷續的謎語　對著空氣　還擊著你的問題
推辭每次　真實的相聚　困著自己　渴望著你的消息
翻來覆去　甜蜜的懷疑　故作神秘　延續著你的好奇

也許喜歡懷念你　多於看見你
我也許喜歡想像你　不需要抱著你

ＡＨ.....

也許喜歡懷念你　多於看見你
我也許喜歡想像你　受不了真的一起

網友

我響網上認識嘅朋友，比現實中要多很多。


從前愛流連高登，認識了三班人。

一幫是「夜鬼」，另一幫是「玄緣全存」。

一幫笑鬼死，另一幫感性到死。

再加上我有開網上電台，又認識到另一班「知音人」。


事隔幾年，依家上高登，已經冇咩人識我。

大部份嘅朋友亦到脫離咗高登嘅圈子。

人大了，各有各忙，有工作有家庭仲邊有咁多時間上網 hea。


有時諗返以往響網上嘅開心日子．都不無感慨。

覺得如果一班志同道合嘅朋友就此失散，總有點可惜。

於是我最近嘗試搵返佢哋。

想像如果響現實都可以做到朋友嘅話，可能就會由感慨變為感恩。


雖則跟網友見面對我嚟講係一個好大嘅心理關口。

當人越大，應該係時候懂得珍惜。

聾

係 MP3 機個音量出問題定係我開始聾？

好似冇以前咁大聲。


習慣一出街就帶上 headphone 聽歌。

入耳式，將音量調較到再聽唔到外面嘅聲。

與世隔絕。


預科時嘅我並唔係讀書嘅。

上堂時照聽 Discman 將音量較大至聽唔到老師講書然後瞓覺。

當時嗰個覺得自己屈屈不得志淪落到要教我哋嘅班主任曾經響某一日指桑罵槐咁講咗句。

「有時見到人聽歌較到好大聲。傻仔嚟嘅。好明顯唔知聽覺受損係永久性唔會好得返啦。」

當時嘅我，當然係會當作耳邊風。


其實到咗今日，就算再有人同我講我咁樣係會損害聽覺將來會後悔之類。

我都仍然會係愛理不理。

因為我確定唔到我將來會唔會因為聽歌呢樣嘢而聾。

但我更確定唔到我會唔會下一秒就死。


任性地活在呢一刻．．．

癲瘋之城

社會會將人迫瘋，香港更甚。


由於我每日返工夜工都係坐交通工具。

辦公時間好多時亦都要四圍跑。

少不免會接觸到好多路人。

發覺真係越來越人精神有問題。

而且有年輕化嘅趨勢。


以往，我哋會見到嘅係「癲佬」，「癲婆」相對較少。

明顯地佢已經到咗一個「佬」嘅年齡層。

可能經歷過好多風風雨雨大上大落之後到達如此地步。


早幾年經濟環境唔好，你會見到好多藍領白領響度喃喃自語。

睇真啲先知原來唔係講緊 handfree.


到近來，響地鐵間中都會遇到啲忽然間大吵大嚷，彈來彈去嘅年青人。


係咩導致佢哋咁？

我唔清楚。

原因可能有好多，亦有異。


有時我會覺得，雖然我哋表面上看似正常。

但可能只係行為上仍然被大腦所約束。

實際上我哋可能內裡已經「癲癲哋」，只係未「發癲」而已。


或者，響香港生活，「癲咗」嘅話可能會過得比較快樂．．．

遲到論

我開始懷疑「返工遲到」係一種先天性基因缺陷。

如果唔係點解總係改唔到．．．

下廚

自從返咗香港之後，都已經好少下廚。

以前每晚煮兩餸一湯，依家頂多煮個出前一丁煎隻蛋。

由以前鍾意煮鍾意鑽研嘗試追求美味，到依家煮個麵都可能煮得勁難食。

變化確實不少。


記得其中一個前度女朋友同我講過，其實我老豆都幾期望食一餐我親手煮嘅飯。

不過恐怕佢老人家都再要等下了。


我希望到頭來不會太遲吧．．．

誰之過

每日都係有關日本地震嘅新聞。

每個朋友嘅 facebook status 都總會同地震有關。


地震發生原因各有各說法。

甚麼「超級月亮」，甚麼「瑪雅預言 世界末日」之類。

更有朋友轉牛角尖說，是否人類犯錯，個天要懲罰等等。


對我嚟講，今次只不過係地球歷史上其中一次因地殼板塊移動而做成嘅災難。

同個天無關，更同人嘅所作所為無關。


人嘅力量係好渺小嘅。

所以我唔明白點解有啲人可以講得出「人定勝天」嘅呢啲說話。


瑪雅人說過：「地球並非人類所有，人類卻是屬於地球所有」

《非誠勿擾》

重溫《非誠勿擾》，再看《非誠勿擾II》。

第一集依然吸引。

第二集雖然沒有第一集好但我亦喜歡。

看過後感覺良好。


朋友未拍過拖，說不知道何謂「戀愛感覺」。

看過電影後，我倒不知道「結婚感覺」是如何。

從未有結婚的衝動。

從未想過想娶誰。


隔天問老爸覺得《非誠勿擾II》好看嗎？

他說看了十五分鐘就悶得看不下去了，還補上一句「垃圾！」


電影，是很主觀的．．．

宿命論

Fatalism is a philosophical doctrine emphasizing the subjugation of all events or actions to fate.

宿命論指人生中早已註定的遭遇，包括生死禍福、貧富貴賤等或者相信一切事情都是由人無法控制的力量所促成的。相信宿命論的人認為人間發生的每一件事都是註定的，由上帝或上天預先安排，是人無法改變的。


某程度上我認同，因為人生入面太多嘢都唔到我哋控制。

例如：幾時死。


一向對死亡無咩感覺，亦都覺得隨時嚟都無咩所謂。

但原來我同我以為嘅有出入。


平時朝早坐小巴返工都係會合埋雙眼聽歌或者瞓陣。

但今日當架車去到某一個路口時好自然就睜開咗雙眼。

親眼目睹坐緊嘅小巴衝紅燈兼且見到對面線準備有車轉灣。

響嗰一刻，我真係有一絲恐懼。

之後我開始思考，究竟我係咪相信宿命。


有人講過。

「即使係宿命論者，過馬路時都總會左顧右盼。」

時光機

每晚都會睇《康熙來了》。

最近有個叫「時光機」嘅環節，係俾啲藝人講返自己某些難忘嘅過去，兼且幫佢搵返一啲當年嘅當時人。

例如 趙哥(趙正平)，佢就搵咗三個當年一齊打拚過捱過嘅「兄弟」。
有情有義有血有淚。

有啲藝人，就會搵返一啲曾經啟蒙過或者照顧過自己嘅老師。
幕幕感人。

至於 納豆，就搵返曾經有過初吻嘅初戀情人。
有笑有淚有溫馨。


我好認真咁諗過，如果換轉係我，我會想「回到」咩時間？
我會想搵邊一個人？

答案係：無。

家人？朋友？舊情人？

我重視嘅家人同朋友，大部份都仍然響我身邊。

舊情人，無咩需要見面吧。

其他人，都只係我生命中嘅過客。
相對亦然，都唔會有咩人會想見我。

而且我亦係一個甚少後悔嘅人，所以都無乜必要回到過去。

沒有甚麼精彩難忘日子，沒大上大落，一如往常，平平淡淡。

有時諗起都難免有點遺憾感．．．

相對論

即使一個女仔個樣幾靚都好，只要佢食煙，我真係完全唔會考慮。

就正如．．．

即使我嘅心地再好，只要啲女仔見到我個樣，就完全唔會考慮一樣。

夢想

自少沒有夢想，亦沒甚麼志願。

跟一條咸魚沒有甚麼分別。


但今年，有兩件想做嘅事。

沒有定下日期，沒有立定決心。

如果響死之前有機會做到便做，無機會就當係另一場白日夢。


拍一套戲，然後上畫。

寫一本書，然後出版。


內容：戲，是一套災難片。

內容：書，是一本訪問式紀錄。


即使我唔係導演，做個編劇或者有人用我大膽嘅橋段叫做有份參與就可以。

即使我唔係作者，做個資料搜集或者有人用我嘅題目叫做有份參與就可以。


要求唔高，亦不存奢望。

隨遇而安。


雖然半年前有癲過諗住去讀電影之後入行．．．

知音

曾經開過網上電台。

播到一啲聽眾滿意嘅歌，係最大嘅滿足感所在。


返到香港之後無再開台。

時常諗，假如有一日我做咗小巴或者的士司機。

我一定會揀好多好好聽嘅歌俾啲乘客聽。

唔會好似依家啲司機咁播噪音。


今日一上小巴，司機播《不羈的風》，勁亢奮。

點知下一首係 羅家英 嘅《Only You》，勁掃興．．．

天災

日本地震。


如果唔係一早買咗飛尋晚睇王菲演唱會。

好大可能尋日地震嘅時候我都係響日本旅行中。


無乜太大感覺。

因為一向覺得好多嘢都係整定嘅。


好多時，避得一鑊，下次可能仲大鑊．．．

王菲2011巡唱 - 香港站

點答

即使係成年人，即使係一個文明嘅社會。

有好多尷尬嘅問題其實都唔知應該點答好。

又或者換個角度去睇，其實可能係唔應該問。


以下嘅情況已經唔係第一次見到、聽到。


響商場嘅廁所門口，多數都係男等女。

因為先天同後天兩方面，女性一般需時比較耐。

而男人好多時等完都唔會問點解。


今日響 IKEA 買嘢，有個老婆響廁所門口等咗好耐。

一見老公就即刻好大聲咁問：「個廁所去咁耐嘅？」

當然，周圍嘅人包括我都好自然咁一齊望住人哋個老公等答案。

結果個老公係無答個老婆之後拖住佢絕塵而去．．．


唔希望我將來有個咁趣緻嘅老婆．．．

因愛成恨

呢一刻我響度諗：

如果響呢一刻遇到佢，佢會推我落去嗎 ... ?

排名

由中學階段開始，啲人都會經常談論一個話題。

就係「家庭、工作、愛情 三樣嘢你會點排？」

不過我估唔到，我有啲舊同學到依家成三十幾歲人都仲響度諗緊或改變緊呢三樣嘢嘅排名。

一失戀，就話將「家庭、工作」排番響前面，話要點要點重新做人照顧家庭專注事業。

到遲啲一拍拖，咪又係打回原形。


我大約響中三左右已經定好咗呢三樣嘢嘅排名，而且咁多年來都一直無變過。


「家庭」呢樣嘢根本唔駛排，或者講係無得排。

仲有咩嘢係可以排響屋企人之前？


「工作」呢樣嘢又係唔駛排。

有咩人與人之間嘅關係係可以次要到排響一件死物嘅後面？

就算係「事業」都係咁話。


所以咁多年以嚟，我最緊張亦都係唯一需要緊張嘅，就只有「愛情」。


其實，根本，就無嘢要排．．．

齋諗

個腦間中就會閃過一個諗法：

應該都係時候發奮做人喇！


之後我好快就會諗：

點解我要發奮做人？

我發奮做人係為其他人定係為自己？


之後諗下諗下，就會無咗件事。

呢個議題咁樣諗下諗下，就諗咗十幾年了．．．

自虐

大部份人都有一點自虐基因，尤其係響愛情方面。

無論係單身時或者係相戀時，都總有一啲行為係包含自虐成分。


例如拍拖時你愛嘅人對你越差或者唔多著緊。

又例如對方根本同你無任何感情瓜葛自作多情暗戀對方。

自虐基因都會令你繼續樁個頭埋去直至泥足深陷。


我最近嘅自虐行為只有一個。

就係逢星期日晚睇無線嘅節目－《心有靈犀》．．．

出走

最近又再浮現「出走」嘅念頭。


對上一次想「出走」，都應該係兩、三年前。

當時返香港無耐，事業同愛情都唔太順暢。


今次想「出走」，我諗係因為有個朋友過咗澳洲「體驗生活」。

見到佢講澳洲同貼澳洲嘅相，我又再次懷念呢個我曾幾可時已經淡忘咗地方。

我覺得我需要「放假」、我需要「自由」。


人就係咁，當無嘅時候就會恨有。


有一刻嘅衝動想掉低所有嘢一走了之。

但實際上係唔可能。


唯有希望可以盡量安排到假期返過去走一走抖抖氣．．．

時辰未到

我家附近有一個宗教團體。

每逢週末或者節日，都會有大批信眾到來集會。


對於一個無宗教信仰嘅我嚟講，我係完全唔理解嘅。

我係完全唔理解嗰種行為，而唔係唔理解嗰種宗教嘅理念。


好多人嘅心靈都會依賴響某一個宗教上面。

求神問卜，自求多褔。

我唔反對亦唔覺得有咩問題，只要唔好騷擾到我就可以。


有時我會覺得「宗教信仰」同「報應」都係一樣。

「時辰」到未嘅問題啫。

青蛙定王子

因為一單分手事件，就成為咗多份報卓雜誌嘅頭版或封面。


我冇追開呢單嘢。

但我只係好簡單咁諗。


與其慨嘆又一個灰姑娘夢碎，倒不如諗諗呢個世界有幾多個王子其實係青蛙．．．

做乜諗嘢

唔知由幾時開始「多咗」呢個詞語成為咗好多人嘅口頭禪。

而且好多時我都係聽到人對住我講「你諗多咗喇你」。


其實我好少「諗多咗」，我諗嘢好多時都係諗到啱啱好。
（對我自己而言）

而且我更唔會「諗多咗」期望對方會對我有任何「諗多咗」嘅情況發生。


所以有時過後我真係會諗。

究竟係「我諗多咗」定「對方諗多咗我諗多咗」。

無價無市

兩個互不相識嘅人要走埋一齊，始終要有「賣點」先可能吸引到對方。

不論外在抑或內在，不論大「賣」抑或細「賣」。

總之要有得「賣」。

局外人未必會明白個「賣點」響邊，所以你當係草時佢就當係寶。


當然，有「價」亦未必有「市」。

但若然連「價」都無，又點可能「賣得出」？


自問沒甚麼「賣點」。

問過身邊嘅異性朋友，佢哋都覺得我無咩可以「賣」。

但我偏偏又急於將自己「求售」。


假設我有「內在」，但個「外在」又吸引唔到人埋嚟望下我嘅「內在」，即係「有等於冇」。

正如一個再甜嘅橙但個表面係爛嘅我都未必會食一樣道理。


我唯一可以做嘅就係。

響唔型之中盡量扮型，響樣衰之中盡量唔太樣衰。


呢首歌其實真係好貼切。

歌名：好人
歌手：側田

作曲：Rob Lay(On Your Mark)
填詞：林夕
編曲：T.Lo
監製：雷頌德

若談樣子 不會叫好 不算最討好
但我的內在美 不夠味道 哪足以自豪
談為人 當然好 雙手也好抱
無奈獨有伴侶問前路
沒有想陪同鄰家男孩跳舞
唯獨當我師徒

人人親近我 無人爭奪我
無人關懷是誰大平賣親和
平凡像我路過 十個似我 情敵實在太多
人人鼓勵我 無人傾慕我
常常激勵別人盡情熱戀事後遺下我
像毒咒 無人愛我 別嚇我

並無自欺 所有老死 只配作知己
願意跟我細數戀愛挫折 抱住我會死
談完情 拖好手 都將我拋棄
從來沒理會我喜與悲
是那麼平凡仍可以來鬥氣
談情令我心死 由得我死

人人親近我 無人爭奪我
無人關懷是誰大平賣親和
平凡像我路過 十個似我
你管不到那麼多
天都不愛我 立心孤立我
平凡的人若提及情份便顯得不配麼
難道我看不到現況正是結果

由得我 無人爭奪我
無人關懷是誰大平賣親和
平凡像我路過 十個似我 情敵實在太多
天都不理我 令我想清楚
感情是來自由弱者所寫的悲歌
事實上為什麼不拍到拖 說穿了我不美 信我

Mission Impossible

她說：『Don't ever look back. 2010年，我立下十個目標，最後tick了六個，算不錯了。你也試試吧，像時間囊，好玩的，不過指標要清晰，比如「早上跑步一小時，一周兩次」這種。』

尋晚，我定咗一個小小的目標。

「準時返工！」


結果．．．


第一天已宣告失敗．．．

竹戰

好記得小學時作文寫「打麻雀」，老師糾正我正確寫法應該係「竹戰」。


由今年年初三開始，鍾意咗同屋企人打「大陸牌」。

齋碰唔準上、開槓即收錢。

人打唔食得一定要自摸。


「大陸牌」除咗可以打得快夠過癮之外，最好嘅就係「免傷和氣」。

因為冇咗上下家放牌扣牌互相磨擦嘅嗰個問題。


終於可以令到一響麻雀檯就嘈嘅屋企人打牌打得開開心心，一團和氣！

反效果

響工作上，我好怕做錯嘢。

一來唔希望其他人覺得我廢，二來做得好都可以求自己一個心安。

不過好多時，越怕做錯嘢就越易做錯嘢。

越小心翼翼就越會睇漏眼。

越緊張就越做錯、越做錯就越緊張．．．


真係唔知幾時先克服到．．．

舊地（三）－ 鰂魚涌站

讀預科嘅時候，好熟識 鰂魚涌地鐵站。


熟識嘅原因，係因為我當時每日返學放學都要響呢個站度轉車。

知道邊條通道最短，知道企邊個位邊度門上車係會對正出口同扶手電梯。
（當年地下係冇畫定車門位嘅）

之後暗戀嘅女仔又係響鰂魚涌站轉車。

再之後個女朋友又係響鰂魚涌站上落車。

所以知道邊個位明等暗等人係最方便。


今日重遊舊地，好多回憶浮現。


嘗試搵番邊度門邊個企位上落，可惜出現了偏差。

有點黯然．．．

大丸

「大丸」- 有幾多人仲記得呢個地方？


後生嘅一輩應該就唔會有咩印象了。

我除咗記得「大丸」響邊，亦都仲仍然好記得好細個嘅時候試過有一次響「大丸」嘅玩具部同媽咪走散然後喊到隻鬼咁。

到今時今日諗返嗰個情境都仍然歷歷在目會想喊。

呢啲就應該真係「童年陰影」了．．．


雖然「大丸」同「新大丸」都已經摺咗。

但依家啲紅色小巴「大丸」都仍然會掛住「大丸」個牌。

呢啲就真真正正係集體回憶了．．．


可惜，上網搵唔到「大丸」嘅相。

隨機

最近成日諗，究竟 random 有幾 random?

即使係 random, 都總會有個 random 嘅 pattern 吧？

一有 pattern, 就唔係 random 啦！

咁即係，有冇 random?

何必有我

最近坐交通工具時多咗留意身邊嘅人。

發現原來香港真係越來越多有精神病嘅人，講白啲就係癲嘅，完全係後天環境下做成。

但亦發現原來香港都唔少弱能人士，先天嘅，好慘。


我一直好抗拒有下一代嘅其中一個原因，就係無人可以「寫包單」我個小朋友先天會係 100% 正常嘅。

無論醫學幾咁昌明，都唔擔保得到。

生出嚟如果係四肢唔健全已經夠慘。

如果係腦袋有缺憾就更可憐。


我唔怕養唔起，亦唔怕唔識教。

我只怕係我一生佢出嚟我就註定害佢一世。


有冇睇過《何必有我》同《肥貓流浪記》？

睇完之後可能你都會同我一樣咁諗．．．

兩個世界

睇微博，睇到以下呢一句說話。

"To the world you may be one person but to one person you may be the world"

驟眼讀完，好多人都會覺得呢句說話好有意思。

但對我嚟講，呢句說話實在太恐怖。

亦正正係我去完結上一段感情嘅背後原因。


當兩個人喺埋一齊之前，係各自來自兩個唔同嘅世界。

隨住感情慢慢增長，兩個人應該係會建立咗一個平衡嘅共同新世界。

又或者各自維持番原本嗰個世界。

但如果一段感情關係失衡，就會出現Ａ停留響自己嘅世界，而Ｂ將Ａ嘅世界視為自己唯一嘅世界。

即係一邊完全自我完全自由，另一邊就無晒自我完全迷失。


呢啲情況無論係發生響思想上或者係行為上最終都係會分手收場。


我仍然記得我上一次分手嘅理由：

「我無諗過我哋有將來，但你將我視為你嘅將來．．．」

澳門

又再遊澳門，兩年內第三次。

今次比較特別，係同屋企人去。

亦都專程睇咗《水舞間》


好鍾意澳門呢個地方，可能係因為某啲地方好似我細個時候嘅香港；有好多舊嘅嘢都保留到。

有寧靜嘅地段，有繁囂嘅地段。

地方細細，大部份我想去嘅地方都係響我嘅「步行範圍」之內。
（其他人係覺得要坐車嘅）


雖然每次去澳門都係行相同嘅地方，去相同嘅餐廳。

但總不覺得悶。

而且其實都仲有好多地方同食肆未去。


曾經問過公司嘅同事我哋條 team 係咪會派人過澳門駐守。

答案係「冇」。

如果將來真係有一個咁樣嘅職位，相信我一定會申請。

擇偶條件

記得響中學階段，我定咗５個擇偶條件：

1/. 唔肥
2/. 唔醜樣
3/. 唔食煙
4/. 唔搽指甲油
5/. 唔著涼鞋（唔露腳指嘅鞋）

齋講外形嘅話，其實即係當年清純嘅 梁詠琪。

唔好問點解會出現 (4) 同 (5) 呢兩個奇怪條件。

偏好，無解。


事隔十幾廿年，其實我嘅擇偶條件都仍然都係差不多：

1/. 要瘦
2/. 順眼（最好係靚啦！）
3/. 唔食煙
4/. 唔整水晶甲（女性搽指甲油幾乎已經無得避免）
5/. 香港女仔


如果我堅守以上５點，我相信我有排都未有女朋友．．．

爛燈盞

一向冇揀嘢運，亦好怕負責去揀嘢。


其中一樣好怕嘅就係買戲飛揀位。

由於我好唔鍾意臨急臨忙先走去戲院買飛入場。

所以預售兼揀位嘅重任好多時都係落喺我身上。

而每次坐低，都總係會俾人遮住。

同朋友睇嘅時間問題更甚。


如果同朋友食飯係由我揀新餐廳試。

好多時亦都會出事，唔好食幾乎已經係定律。


即使係去書報攤買雜誌咁小事，我都會「賴」嘢。

左揀右揀結果都係會買咗本俾人睇過、某頁摺咗又或者缺頁／未界頁嘅。


呢啲就係「命」．．．

畫玻璃

最近有次坐小巴返工途中，因為落雨再加上天氣寒冷，玻璃窗上面出現咗一層濛查查嘅水氣。

忽然醒起，我已經好耐無玩「畫玻璃」呢樣嘢。


記得細個嘅時候遇著雨天見玻璃濛咗，就一定響上面又寫又畫。

係好開心嘅一件事。


今日再見，都有想寫想畫嘅衝動。

但最後都無。


好似好污漕呢．．．

點死

有冇認真諗過你會點死？

唔係你「想」點死，係你「會」點死。

交通意外？空難？高空擲物？謀財害命？身患惡疾？
定係因年事已高響睡夢中安詳去世？


我經常諗我會點死。

當然係諗唔到個答案。

不過我覺得我係會死於意外／死於非命。


所以，由幾年前開始我已經做好「隨時死」嘅心理準備。

然後發覺我其實冇咩需要準備。

因為我冇嘢帶得走，亦冇咩可以留低或者要交帶。

亦冇咩留戀．．．

《告白》

新年前買嘅一套戲，一直到尋晚先有時間靜落嚟睇。

唔知係因為我少睇日本片，定本身日本片嘅風格係咁，總覺得套戲嘅過場同節奏都好似怪怪的。


幾震撼。

睇嘅時候不斷幻想．．．

究竟殺人係咪真係咁易？

殺人嘅感覺係點嘅呢？


歲月催人，松隆子 同 木村佳乃 兩個都開始要做媽媽嘅角色了．．．

情人節快樂不快樂

已經唔記得舊年嘅情人節係點過。

舊年係星期日，大概都係響屋企吧。


情人節，係好應該放假嘅。

就算唔係公眾假期，都應該好似父親節母親節咁，定響星期日發生。


咁樣，有情人嘅就可以盡情歡度情人節。

無情人嘅又可以唔駛出街屈響屋企。

女士們又唔駛自己買花俾自己送去公司扮有男朋友。

男士們又唔駛一收工就扮趕住有約會其實係急急腳返屋企食自己。


今年嘅情人節唔關我事。

假如我有情人陪我過情人節，就梗係唔會咁得閒諗上面呢堆無謂嘢．．．


愁人節快樂！

《127小時》

一套看似簡單，但實際上又幾震撼嘅電影。

最嚇人嘅係，個故事係由真人真事改編。


一向鍾意睇呢類型「個人表演」嘅電影。

場景簡單，主角一人獨挑大樑嘅戲，通常都會帶出好多反思。

觀眾往往可以響主角身上見到某部份嘅自己。


不透露劇情。

只想講我未必會或未必可以好似主角咁樣去決定自己嘅生死。


死唔難，生存先至需要勇氣．．．

公仔病

有一個名詞，叫「公主病」。

有「公主病」嘅女仔，我暫時未遇過。

但自問即使遇到有「公主病」嘅「港女」，我都應該頂得順。

因為我覺得女仔想俾人錫俾人呵護係好正常嘅事。

可能因為我未遇過，所以仍然可以咁口響。


但有一種女仔，我係頂唔順嘅。

我形容為「公仔病」。


病徵好容易察覺，因為個女仔無時無刻都會帶住隻公仔響身邊。

其實唔止帶響身邊咁簡單，佢仲會：

同隻公仔傾偈。

幫公仔搵個女朋友（或者男朋友）。

幫隻公仔影相兼配埋對白。

借隻公仔嚟講出自己嘅心聲。

等等．．．


我未遇過一個咁樣嘅人，只不過係響 微博 見到。

唔知點解我覺得好恐怖．．．

夢想、理想、妄想

自小已經無咩「夢想」、「理想」，所以次次作「我的志願」嘅時候都係一個Ｒ爆頭嘅大話。

亦唔記得曾經作過咩了，應該都係不外乎醫生、律師、警察、消防員之類。


到大咗，我嘅「夢想」同「理想」就係「唔駛做」。

中六合彩又好，娶個有錢女又好，總之就係「唔駛做」。

當然最後會發現其實呢個只係一個「妄想」。


但我呢類「妄想」，都總比其他嘅「妄想」好。


例如我最近見到一個可能係因為感情事而困擾嘅朋友響 Facebook 度寫 "If I can fly ..."

我就好坦白咁同佢講腳踏實地做人唔好諗咁多啦。

但有啲人就偏偏會覆一啲好鬼勵志但又好不切實際嘅說話「Stretch your wings and fly away
沒有夢想便沒有未來，呢樣係每個人基本擁有既野」。


我只係諗，唔該搞清楚「夢想」同「妄想」嘅分別之餘。

你叫一個受感情困擾嘅人去飛，佢只會走去跳樓然後趺Ｑ死．．．

期望、希望、奢望

唔記得由幾時開始，我就抱住「無期望就無失望」嘅態度去做人。

可能係因為以前失望過太多次，個腦好自然就出現咗一個保護機制去保護自己。

與其話係自我保護，倒不如話係自我思想封閉。


我亦好少去「希望」某一啲嘢，可以係因為我對自己同對人生都無咩所求。

而且我亦都覺得，「希望」嚟都係無咩用。

與其坐響度「希望」，倒不如起身嘗試去做。

就好似你「希望」中六合彩，但你都要行去買架。


至於「奢望」，我就經常有；其實比有「期望」仲大鑊。

但由於「奢望」係無可能會發生嘅，所以亦唔會有「失望」嘅出現，某程度上係比「期望」還好。

正如一開始你已經被判死刑，審訊過程係點根本就唔會影響你嘅心情。


當一個人有「奢望」但對人生無「期望」無「希望」嘅時候，其實真係同條咸魚無咩分別．．．

慘過死

有咩係慘得過死？

有好多。

因為其實死一啲都唔慘。

都已經死咗，仲有咩慘唔慘之分。

如果死咗之後仲有咩下一世咩輪迴咩上天堂咩落地獄之類。

咁死就真係慘喇，原來死咗都仲有排捱．．．

(曾經講過：http://hide-myself.blogspot.com/2009/03/blog-post_22.html）


今日響度諗，有咩事對我嚟係慘過死。

盲咗睇唔到戲。

聾咗聽唔到歌。


諗諗下，其實仍然生存響世上其實已經慘過死．．．

家家有求

我同我老豆都係「戲痴」。

我哋兩個每年睇戲嘅數目加埋應該過百部。

不過我睇「高清」，佢睇「低清」。

佢主力睇西片，任何戲種都啱，所以只會買西片嘅「ＶＣＤ」。
無錯，係「ＶＣＤ」。
用一部６５吋嘅大電視去睇係「ＶＣＤ」。

間中佢都會睇下大制作嘅港產片，係我買嘅。

我港產片、西片都睇，偏好港產片。
只有恐怖片我係唔會睇，因為我唔想「貼錢買難受」。
我多數都會買「ＶＣＤ」，因為依家啲戲嘅內容質素太無保證，一開始就買ＤＶＤ或者 Blu-ray 實在太冒險。
如果係一套好戲，我一定會買ＤＶＤ或者 Blu-ray 收藏。


我哋屋企有裝有線，有兩部機頂盒：
一部有高清、一部冇高清。

每次我都要睇「高清」英超，佢就話「高清」同「低清」睇落冇咩分別。

我心諗：你係包拗頸定你對眼有事？


好認同 李力持 講過嘅一句說話：有「高清」我做乜仲要睇「低清」呀！

記憶猶新

我成日覺得，人嘅記憶好多時都唔到自己去選擇。

記唔記得一個人、一件事，似乎都係無得揀。

好多時你想記得嘅嘢就點都諗唔起，想洗腦想忘記嘅嘢就偏偏好似刻咗響個腦度咁。
（例如 初戀/前度情人嘅生日日期）

但可能因為係曾經重要過嘅嘢，所以你想洗都洗唔走。


最近睇咗套戲《前度》，盒面寫住「給戀愛超過一次的人」。

都幾貼切。

一路睇，係一路會有回憶。


今日，係我前度生日．．．

身不由己

有冇試過坐監？

有時唔一定係入咗監房坐監先至有坐監嘅感覺。

因為當你成三十歲人仲同緊父母住時，都可能會有相同嘅感覺。

例如：

無人將你自己間房當成係你間房，會視之為另一個客廳將之共享。

你放假時嘅私人時間，唔知點解會被家人嘅時間表支配咗而你又無得反對從而令你無法做自己想做嘅嘢。

諸如此類。


有時我會覺得我係一隻被人養嘅雀住係一個雀籠入面．．．

初三 - 口不對心

幾乎每逢節日見到親戚，言談間都少不免會觸動到我嘅婚姻大事呢個話題。

響農曆年嘅時候就更甚，因為我仲收緊利是。

通常都係出現以下對白。


甲：「祝你快啲娶老婆，下年到你派喇。」
我：「哦！好呀！好呀！承你貴言。」之後收佢利是。
（心嗰句：「我連女朋友都未有。而且都唔打算結婚．．．」）


今年有個人仲搞嘢。

乙：「祝你快啲娶老婆，快啲生番個『兔仔』或者『兔女』等你亞媽抱孫。」
我：「下？急成咁？咁急都唔慌好嘢啦。」
乙：「車！有咩所謂呀？」
我：「下？哦．．．」之後都係收佢利是。


點解明知我冇女朋友，都仲硬係要撩嚟講．．．

初二 - 開口中

我娘親係一個口直心快，思想簡單嘅人。


話說聖誕節時我舅父話農曆年時會去佢哋個叔婆度拜年。

我娘親聽見之後就講：「叔婆未死咩？」

大家當場Ｏ晒咀。

娘親補充：「咁佢好老啦嘛！」

大家都明白我娘親唔係咒佢。


尋日初一同我舅父拜年時，我舅父同我娘親講：「你叔婆過咗身喇。」

大家目瞪口呆問係幾時嘅事。

舅父：「聖誕前」


我即時諗起我亞娘嗰句開口中嘅「問候」．．．

初一

對於農曆新年，我嘅抗拒感無咁大。

雖然我都係唔覺得俾人恭喜完發財，祝完身體健康之後會成真。

但點都好過新曆年時啲人覺得個鐘行前一秒之後個世界會忽然轉變。

而且又有利是收，現兜兜夠實際。


更重要嘅係，農曆年有一家人團圓嘅氣氛。

一家人開開心心聚埋一齊，千金難求。

女人味

周慧敏，我學生時代嘅「玉女獎門人」。

當年，我鍾意嘅唔係佢。


尋晚無線有個《周慧敏．最愛V25》嘅節目。

周慧敏 響入面唱嘅每一首，原來我都識。

今日嘅 周慧敏，仍然係咁靚。


早排睇咗《得閒炒飯》，響入面嘅 周慧敏，又係好有味道。

反而到咗今日，我先開始鍾意 周慧敏。

《再說一次我愛你》

道地星期日影院播《再說一次我愛你》

好鍾意呢套戲，於是唔打機，重溫一次。


當年一睇完呢套戲，立即上網訂咗ＤＶＤ，仲要係特別版。

因為隨碟附送戲中嗰條魔術鍊 - 明日環。


鍊，早送咗出去了。

碟，還在我家．．．

一首歌一個畫面一隻碟

有冇試過因為一首歌、一個畫面而買一隻ＣＤ、ＤＶＤ、又或者係一套戲？


依家啲碟舖做新碟 promote, 都會重複播住同一段不斷 loop...

例如：葉問２甄子丹對洪金寶、黃子華棟篤笑中唱歌 等等。

早排響旺角返學時都會經過一間影碟舖，就播住以下呢一段。




我一向好少停步企響碟舖門口睇，呢次係第一次。

《飛女正傳》呢首歌一向識，但其實冇深究歌詞內容。

直至我見到 丁子高 對住 楊千嬅 情深款款咁唱呢首歌。

我終於了解歌詞嘅意思，同埋我見到「愛情」同「婚姻」。


最後因為一首歌，我買咗一隻碟．．．

請飲

又有朋友結婚，今年９月。

返香港三年，只係出席過兩個婚禮。

一次係堂妹結婚（之前講過），一次係知己結婚。

推不得。

其餘被邀請出席嘅婚宴，我全部推晒。

好怕呢啲場合。


我今日無聊響度諗，假如有一日我有幸結婚請飲，我個婚禮會係點。

諗到幾樣：

我想著中式禮服。（亞旺？）

班「兄弟」，應該真係會係我班「兄弟」，一班表兄弟。

會擺幾十圍，但我邀請嘅朋友應該會坐得一圍，其餘啲人我都係唔識嘅。

我自己做 MC。

我一定會上台唱歌俾老婆聽，逼其他一齊聽。

有早知就無乞兒？

間中都會留鬚，因為想「懶型」同「扮滄桑」。

每次亞媽見到我無剃鬚，都會講：「你去做乞兒啦」。

我諗唔通有咩關係。

唔通財爺又係乞兒？

雖然可能有啲人真係會咁形容佢。


有時響街見到乞兒，我都會諗起一句說話叫「有早知無乞兒」。

其實我一直都有一個疑問，點解啲人最終會做咗一個乞兒？

可能係佢嘅遭遇令到佢無得揀。

但我總覺得有啲乞兒係自己選擇做乞兒嘅。

所以即使「有早知」，都總會「有乞兒」．．．


啲《鏗鏘集》《新聞透視》《星期日檔案》唔知有冇做過「本地乞兒」嘅專訪呢？

唔係嗰啲由大陸輸入嘅全職乞兒同胞。

《Eyes On Me》

執屋時搵到一隻３吋ＣＤ，王菲 嘅《Eyes On Me》。

《Eyes On Me》，係遊戲《Final Fantasy VIII》嘅主題曲。

當年搵 王菲 唱，都可以算係經典。


立即放入 MP3 機．．．

王菲

王菲 開演唱會了。

我無睇任何相關報導，因為我想響一個完全「無知」嘅情況下去睇 王菲 嘅演出。

印象中，應該會係第一次見 王菲 嘅真人。


雖然撲飛方面失咗預算，但相信最終都會去得到。


我爹娘唔鍾意 王菲，唔鍾意佢個格云云。

我鍾意 王菲，係因為佢嘅歌、佢嘅戲、佢嘅演出。

佢私底下係一個點樣嘅人，與我無關。


王菲，係一個回憶。


喜歡 王菲，應該係由《Ｄｉ－Ｄａｒ》開始．．．１９９５年．．．

想聽

以往，幾乎由出街嗰一刻開始，只要係室外地方，我都會帶住 headphone 聽歌。

將音量較到聽唔到其他嘅聲音，與世隔絕。


雖然某程度上我已經唔將自己放響一個箱入面生活。

但有時我仍然鍾意困住自己嘅思緒，建立一個得自己嘅世界。


最近，因為唔記得帶 MP3 機，又或者係因為無電，所以聽多咗呢個世界嘅聲音。

或者叫做嘈音。


原來都幾有趣。

係啲人嘅對話好有趣。


不過我仍然比較鍾意我嘅音樂。


忽然記起幾年前 903 有個廣播劇叫《來不及聽你說愛我》

陳奕迅 + 楊千嬅，講一個失聰嘅人。


我有時都會諗，如果有一日我聾咗，無咗音樂，我嘅世界會變成點．．．

《妳太善良》

鍾意呢首歌好一段時間了，但從未睇過個 MV.

有一日響 Facebook 見到有朋友 share, 睇完之後更愛了。

雖然未完完全全經歷過 MV 入面相同嘅劇情，但暗戀人呢種悲情角色總係比較容易代入。

每日都睇，每日都唱．．．

《妳太善良》



歌手：張智霖
作曲：Shinji
填詞：李峻一
編曲：謝國維@Baron Pro

妳等他悔改 好不過妳鬆手放開
有一種固執 得不到喝彩
總擔任偉大角色 獻奉全部愛
寧願悉心灌溉 沒結果的錯愛

理想歸理想 得不到也等於妄想
原諒又原諒 他可有拍掌
諸多忍讓沒有獎 也沒誰人賣帳
難道妳夠情長 某某亦會同樣

他不配做對象 可惜妳太善良
他背叛妳 偏妳沒法睜開眼看真相
馴服就似綿羊 相戀太善良
大多打敗仗 受騙的那個比騙徒更混帳

我可等妳嗎? 可等到妳傷口結疤
我這種固執不比妳更差
好心地但運氣差 做壞人才耀眼
良善太過平凡 怕註定要陪跑

單戀也是正常 天生我太善良
早愛着妳 可怕是妳一早看透真相
馴服就似綿羊 相戀太善良
大多打敗仗 受騙的那個比騙徒更混帳
妳這樣情長 再等妳也是妄想

明明他不配做對象 可惜妳太善良
喜愛受騙 只怕共妳 努力亦沒回響
他不將妳放心上 即使再善良
未得到景仰 受騙的那個比騙徒更混帳
我也想騙妳 這句才算真相

《掛念好友》

雖然呢首歌已經出咗一段時間，但我到今日先開始鍾意。

《掛念好友》



歌手：JW
作曲：雷頌德
填詞：李峻一
編曲：雷頌德

這數天的我變得神經質
渴望看到你卻又不敢走近
每數分鐘來查閱這手機
我若錯過了你來電多可悲

這份掛念 要怎麼承受
你或許超過像好友
我向他方遠走 想請你等候
你或許只當我好友 (這樣分開那會足夠)
YES I BELONG TO YOU
IT MUST BE LOVE MY DEAR
日夜為你失眠
YES I BELONG TO YOU
都盼望你知道 我的心意
這客機灑脫從地平升空
載着搭客每個夢想多麼重
那次天台裡同坐啍的歌
某日再見你我仍未會淡忘
I TREAT U MORE THAN JUST A FRIEND
I GUESS THIS FEELING NEVER END
YES I BELONG TO YOU
IT MUST BE LOVE MY DEAR
日夜為你失眠
YES I BELONG TO YOU
只盼讓你猜到 我的心意

遺傳

每次我父母批評我，我都會話係遺傳。

當然之後會鬧得更勁，仲會話「啲好嘢又唔見你遺傳到？」

只係遺傳到啲衰嘢我都無辦法，又唔到我控制。


其實好多時仔女都係父母塊鏡，只不過多數父母都唔願照一照。

無論係好定壞，我唔似你哋仲可以似邊個丫？

暗串

同一間車仔麵檔同一餐晏。

起身埋單時聽到有個應該係熟客嘅男人同一個響度做嘢嘅亞姐吹水。


亞姐：「呢排好少見你喎！食完咁急走嘅？」

男人：「係呀。近農曆年好忙。」

亞姐：「咁你呢啲老細搵大錢嘛。」

男人：「哈！我都好想好似你咁屈響度有錢收呀！」


聽到呢句，我真係耳都側埋．．．

是天生一對？還是臭味相投？

一直覺得我父母係「天生一對」，但我鍾意形容佢哋係「臭味相投」。

尤其係當佢哋兩個響同一陣線一齊批評我嘅時候。


今日響鵝頸橋食車仔麵遇到一對夫婦，我又有相同感覺。

個老公由坐響我隔離嗰一刻開始已經口不停，呢樣嗰樣意見多多。

煩完一大輪落完單之後又到個老婆「咦咦哦哦」，煩到抽筋。

之後又一唱一和唔知批評啲咩。


我只好帶上 headphone 繼續食我嘅麵。

響我眼中，佢哋兩個人中我任何一個都頂唔順。

而佢哋完全係接受對方。

我唔知佢哋一齊幾耐，但我覺得唔離開已經好利害。

我諗除咗「愛」，相信無嘢可以將兩個咁嘅人扣埋響一齊。


當然，都可以係其實頂唔順不過已經習慣咗。

又或者係因為無處可逃．．．

崩口人忌崩口碗

間中都會同茶水亞姐吹下水，當無其他同事響附近嘅時候。

茶水亞姐成人話我份人幾好笑，唔係我識講笑嗰隻好笑，而係我好無稽嗰隻好笑。

又成日話想識我亞媽，因為覺得我亞媽好另類。


今日寒暄兩句，之後佢忽然問：「情人節又到喇喎，有女朋友未呀？」（佢明明知我無）

我答：「未有．．．」（我已經想完結呢個話題逃之夭夭）

點知佢接住問：「咁有咩節目？」

我答：「情人節都唔關我事啦，無情人」

問：「你亞媽無催你快啲搵返個女朋友然後結婚咩？」

答：「無」（放過我啦）

問：「咁都要快啲喇，我想睇下你會搵個點樣嘅女朋友！」

答：「．．．」


好怕同人傾呢個話題，非常怕．．．

嚇大

話說今日下晝無嘢做於是離開公司出去行下逃避周公嘅召喚。

行到某一盏紅綠燈附近嘅時候見到一宗已經發生咗嘅交通意外。

一個年約初中左右嘅學生被一架保母車撞到坐響地上按住隻腳叫痛。

地上有一部唔知係 PSP 定 NDS 嘅物體。

我除咗對 headphone 打算睇下有冇嘢需要幫手。

與此同時一位亞媽嘅聲音響我身邊響起，佢指住路中心對自己拖住嘅仔好勞氣咁講：

「嗱！你睇下喇，平時過馬路叫你拖住我就係咁解喇。下次你唔拖住就可能會被車車死你！知唔知呀？車死你呀！」


我見有途人已經拎起電話報警，於是我又帶返好我嘅 headphone 離開現場。


搖搖頭，心諗：究竟有幾多小朋友係嚇大嘅？

舊歌重溫（一）

最近好多時夜晚瞓唔著，都會拎部住電話上 youtube 搵下歌聽。

務求聽完一啲好鍾意但又已經遺忘咗嘅歌之後可以瞓得好。

無意間，搵番呢首《at17 - 才女》。

曾經響 2006-02-15 號都介紹過。



歌手：At 17 作曲：林二汶@At 17
填詞：于逸堯@人山人海 編曲：梁基爵@人山人海

世界不知不覺無情地轉　勞碌找一個救生圈
靠美德博學還離岸很遠　用美色多勝算

可惜我只配談文字戀　強項得書信對白婉轉
講曲線體態自然落選　憑面相難完心願

蕭伯納　王爾德　但丁
莎士比亞　馬奎斯　小仲馬
請指點我去用情書將心扣住
辛棄疾　矛盾　魯迅　蘇軾
求可體恤我筆尖的計算
長話盼　盡說短　人海中等惜字緣

交心的戀愛漸成歷史　唯獨我堅信愛像種子
悉心栽花卻換來白紙　才用眼淚來寫字

伊索　屠格涅夫　狄更斯
歐威爾　艾可　卡爾維諾
幾本書的背後埋藏著我心事
張愛玲　曹禺　老舍　冰心
如果早幫我寫命運情節
從未怕　命太短　惟恐寫不好那段緣
盼成全

再黑啲

之前已經講過「黑」呢個問題。


間房裝修好。

所有傢俬以黑色為主打。

床、櫃、枱 甚至連 百葉簾 都係黑色。


呢次仲唔係挑戰運氣嘅極限？

《Inception》

前排睇咗套戲。

《Inception》

























睇完之後嗰一日諗咗好多嘢。


其實我一直都抱住嘅一個疑問：

會唔會有一日我突然瞓醒，然後發現我原來仲係一個BB。過去嘅３０年其實只係我發嘅夢？

明窺

無論係行街時抑或係響朋友屋企，如果對面有大廈，我都會好鍾意望。

主要，當然係因為八卦。

亦都係因為我由細到大，屋企啲窗望出去嘅地方，都係無嘢昅嘅。

《九因歌》

話說有一日搭地鐵，見到有人拎住本簿。

已經唔記得佢係不斷寫嘢定係佢身邊有個細路唸唸有詞所以令我留意到。

重點本簿嘅後面大大隻嘅三隻字《九因歌》。


原來我已經忘記咗「乘數表」有另外一個名．．．

後悔

人總會為某些事而後悔或遺憾。

可能係因為做咗，亦可能係因為無做。


因為做咗而後悔嘅事，我暫時諗唔到有。

可能係因為我響未做之前已經諗得太多而好少一時衝動或魯莽行事。


若果係因為無做而後悔，又或者可以講成為遺憾嘅事倒有兩件。

1/. 著住校服拍拖

2/. 響香港體驗大學生活


因為，已經返唔到轉頭．．．

又執到

今日食晏，聽見三個亞姐響度吹水。

甲：成日嚟個鬍鬚佬好似幾好人喎。
乙：係呀！我家姐個老公好好人。我家姐執到啦。
甲：佢好似好「淋」喎。
乙：係呀！俾我家姐食到實一實。對佢好好，對我哋屋企人又好。佢執到啦。
丙：平時嚟嗰個係佢家姐個老公？好似幾好人喎。
甲：係呀！佢家姐執到啦。


原來呢個世界咁多人喺其他人眼中／口中係「執到」。

我真係好想知，幾時先到我「執到」．．．

黑

記得舊年響舊公司坐電梯時有個亞姐忽然同我個當日著黑色衫嘅女上司搭訕。

亞姐（語重心長）：著黑色衫唔好架。我之前成日著黑色，著咁耐就衰足咁耐。又行衰運又病。依家唔著喇。著黑色真係唔好。唔好著呀。

當時我哋只係 Ｏ晒咀。


依家諗返，可能亞姐呢個驚天大理論係成立嘅。


皆因，我幾乎每日都係著黑色。

衫褲鞋襪底褲同揹袋都係以黑色為主打。

最近甚至連睡衣都係黑色。

遲啲我間房嘅新傢俬，全部都係黑色．．．

行

我好鍾意行。

如果要由一個地方去另一個地方而又係響一般人認定嘅步行距離之內嘅我一定會行。

好多時甚至係一般人認定非步行距離之內嘅我都會行。

例如一至兩個地鐵站。


而且有啲開始包拗勁。

其他人越話行咁遠辛苦或者坐車會快啲嘅距離我越偏要行。

難答

有時有啲人為咗避免尷尬而勉強去開一個話題反而會令到個氣氛／情況仲尷尬。


有日坐小巴返屋企時見到有兩個人一男一女應該係鄰居又唔係太熟嗰啲認得樣但又唔知大家姓咩嘅喺臨落車嘅時候互相發現對方。

女：Hi! 咁啱呀！（熱情地夾硬搵嘢講 feel）
男：係呀。（無乜語氣 feel）
女：好少響呢啲時段坐車遇到你喎。
男：係。啱啱收工。
女：哦！做邊行呀？
男：（沉默２秒）做．．．郵差。
女：（停頓１秒）睇你似做會計師嗰啲。

之後靜晒．．．


話說我屋企個夜晚看更，無論我７點返、９點返定半夜２點返，佢都會問我同一個問題。

「食飯未？」

我：（即答，有時差啲快到佢未問我已經答）食咗．．．．．．．．．

責任感

有時我會覺得自己係一個有責任感嘅人。


於工作方面，對好多人嚟講我可能係責任感太重。

除咗份內事會做之餘有時為咗幫人仲會做多咗。


於感情方面，由於責任感太重，重得好多時都想選擇不去負感情上嘅責任。

人怕出名豬怕肥

自從申請咗 微博 帳戶日日去八卦我「關注」嘅人嘅嘢之後，一直都心癢癢想用 晶哥 呢個名響嗰度寫下嘢。

其實即係將呢度嘅嘢抄一份過去。


如果我「關注」嘅人會「關注」返我又或者響我度留個言，我諗我會開心死。


反正呢度已經無乜人嚟，而 微博 又鬼咁多（無聊）人。

相信收視率應該會好啲。

不過更怕嘅係如果連 微博 都無人「關注」我嘅話就．．．


（諗多咗 mode ）

萬一如果響 微博 出咗名嘅話就．．．

執到

今晚響旺角行緊嘅時候聽到一個女仔講電話講咗以下嘅呢兩句說話：

「佢都話咗你肯減肥就一定同你一齊啦！大佬呀！」


聽佢嘅語氣，似係同一個姊妹傾緊電話。


我心諗，如果一個男仔會開出一個咁嘅條件，究竟佢係「偉大地犧牲小我去接受一件瘦咗嘅豬扒」定「明知件豬扒減唔到所以空頭支票唔怕開」？


之後我又諗番個女仔嘅語氣，我相信其實個佢響心裡面應該仲有兩句說話未講出口：

「你執到啦！你仲想點呀？」

舊地（二）－丼吉日本吉列專門店餐廳

足足有十年無嚟過呢間餐廳。

記得我以前食嘅時候佢未係咁出名。

依家就預早一個月訂都未必有位。


無預期中咁好味。

或者係其實已經一早變到無以前咁好味。

另外，我真係好憎啲侍應響我一路食嘢時一路收碟！

2011

２０１１年１月１日

今年，無慶祝，亦無出街。

電視，依舊係直播煙花。

新聞，依舊係播映萬人空巷嘅慶祝場面。

彷彿人人都好似覺得踏入新嘅一年就真係好似新嘅一年咁。


其實，一切都無變．．．

個個都只係響度自己呃自己。

欠債嘅仍然欠債、病嘅仍然病、不快樂嘅仍然不快樂。


好多人都會有新年願望。

如果真係有「願望成真」呢回事，一早就成真咗又駛乜鬼等到新年。


其實今日只係2010年12月31號之後嘅另一日。

同平時一樣一覺瞓醒之後一切如常嘅另一日。


如果今日係12月32日或者係13月1日又或者係 A.D.734018日。

仲邊有人會慶祝？

聖誕歌

今朝響大家樂食早餐時聽到聖誕音樂。

都唔為意原來聖誕好快到。


如果要數聖誕歌，我只係諗到兩首：

《Lonely Christmas》同《今年沒聖誕》

感謝神？

有位朋友係好虔誠的基督教信徒，因為隻腳有事而入咗醫院住幾日。

出院第一日佢響 facebook 度寫：「出院了！感謝神！」之類多謝神令佢痊癒云云。


我心諗：你唔諗下係邊個唔保佑你令你隻腳出事？

可能我係過份偏激或者過份抗拒宗教。

但我確實諗唔通點解有事就係「神安排嘅考驗」而無事時就係「神嘅眷顧」．．．

坦誠

收工答地鐵時，有位女士逼上車之後打電話俾人。

劈頭第一句說話係：「唔好意思！我完全唔記得覆你。」


「完全」、「唔記得」

我真係好想知對方聽到呢句說話時係咩感受．．．

大叔識建築

有冇留意到好多時啲大叔都係博學多才通天曉？

無論社會上發生咩事佢哋都可以參與討論埋一份。


好似我今朝返工時見到一個大叔對行人路上面一個掘咗個大窿嘅工程不斷研究咁。

而好多時你亦都會見到好多大叔會圍住啲建築地盤左望右望指手劃腳好似識咁。


可能我將來都會係咁．．．

星期八

我覺得一個星期應該有八日。

返三日工就放一日假。

合理好多．．．


都唔知邊氣茂利設定一星期有七日。

就算係一星期七日，都應該有兩日公眾假期。

逢星期三、星期日放假。

美女與野獸

好多時同男性朋友去街，少不免都會一齊留意身邊嘅人兼評頭品足。

而最常出現嘅相同觀點會係：

「嘩！搞錯！條仔咁柒都竟然有個咁得嘅女朋友？」

之後一齊慨嘆上天不公平云云。


其實個天係好公平嘅。

由於個天見個男仔生得唔英俊，所以欣賜一個標緻嘅女仔俾佢以作補償。


若然我呢個假設係成立嘅話。

咁我好應該乖乖地靜心等待上天「欣賜」俾我嘅人。

相信個樣都唔會差得去邊．．．

賣旗

每逢星期六上晝出街都要同啲小朋友、學生哥講「唔好意思」兼左閃右避。

唔係我唔想買旗，而係朝早時段我唔會有「大餅」喺身。

因為我一向唔袋多餘「大餅」出街，朝早坐車要用幾多就袋幾多。

而我又唔會有心到記住要袋定「大餅」買旗。


小朋友，你唔係想哥哥用「軟嘢」買支旗仔卦？

命運

我無宗教信仰，但我一向相信呢個世界係有主宰。

可能係神、可能係魔鬼、可能係任何嘢。

每當我響工作上不停面對難題同阻滯時，我就會覺得我嘅命運係操控響嗰個主宰嘅手中。

而我唯一可以做嘅，就只有「硬食」...

---

「命運」係無得選擇嘅，只有「認命」同「唔認命」之分。

當你自以為自己掌握「命運」之時，往往就人算不如天算，發覺原來自己只係主宰者手中嘅一隻「棋」，然後整鑊「杰」嘢你嘆。

就正如，我嚟到呢個世界唔係我嘅安排同決定，我無得揀 ...

---

人生嘅有趣之處係經常發生「一啖沙糖一啖屎」嘅情況。

而通常，「啖屎」都係比較大啖 ...

十二類人

好多女士都會相信「星座／生肖運程」。

更多嘅男士會相信如果識「星座／生肖運程」會更易識到女仔。

眼見不少男性朋友都會用呢招嚟同異性打開話題，之後再打蛇隨棍上。

我唔反對無所不用其極，各施各法啫。


以前我一聽見人講「星座／生肖」，我都會諗：「用十二種嘢去介定全世界嘅人嘅運程，唔通全世界得十二類人咩？同一類人又會遇到同一類情況？咪咁天真！」


我當然知道，用「星座／生肖」去預測一個人嘅運程，要準確嘅話都仲要計埋周邊好多嘅數據。

但我任你點計點配搭，都總有一個數額去規範咗係有幾多類人。


相同嘅運程響同一時段發生響某一批同類人嘅身上？

咁主宰我哋命運嘅嗰個主宰都幾易處理人嘅命運。

講講下，我諗起 Martix．．．


雖則我唔太信，但每逢見到呢啲預測，我仍然都係會八卦望一望．．．

雙重標準

坐小巴時遇到一家四口，父母＋家姐＋細佬。

兩個小朋友都應該係小學生。

分兩行坐，爸爸同家姐坐前，媽媽同細佬坐後。

我坐佢哋左面啲單丁位。


未開車前，爸爸同家姐玩 iPad，媽媽同細佬各自玩手提。

甫開車，個媽媽就收起自己部電話，亦命令細佬都要收起。

細佬問點解，媽媽答「坐車玩會壞眼」。

作為媽媽嘅以身作則，細佬亦只好乖乖聽從。

但，爸爸同家姐並沒有收起 iPad 嘅意圖。


再過多一段時間，爸爸同家姐仍然係玩得興高采烈。

於是細佬終於忍唔住開口問媽媽「點解家姐唔駛收起嘅？」

媽媽就答咗一個可能連佢自己都覺得荒謬嘅答案「家姐大個嘛！」

我相信響嗰一刻我同細佬都Ｏ晒咀。

正當細佬想繼續問嘅時候，媽媽電話響。


之後媽媽傾完電話，並沒有打算收起嘅意圖，而係繼續玩遊戲。

坐前面嘅爸爸同家姐仍然係 iPad 中。

我見到細佬嘅不忿同無奈．．．


之後係點，印象中係個仔開始嘈之後亞媽開始鬧然後老豆同個女啋你都傻。


當時我只係諗兩樣嘢．．．

１．呢個世界公平在於唔公平

２．會偏心同唔識教小朋友嘅唔該唔好生兩個或以上

順理成章

最近，連續兩個男性長輩都響失驚無神嘅情況之下問我一個類似嘅問題。

整整下電腦時．．．
「點呀？唔細囉喎！唔諗住結婚呀？」

食食下飯時．．．
「點呀？幾時先正正經經搵番個女朋友結婚生仔呀？」

平時好少同呢兩位長輩傾呢啲嘢，
我除咗學謝天華答「無呀～」之外，
我都唔知覆佢哋咩好．．．

年紀開始大，結婚生仔組織家庭就會變成一件好順理成章嘅事。

我以前好抗拒，對結婚生仔堅決說「不！」

但最近，我確實有咁嘅打算．．．多幾年之後先．．．