能醫不自醫

作為一名（自認）專業嘅 IT Support, 我可以解決好多人嘅電腦問題。

但偏偏我自己屋企嗰兩部機就玩到我透。


先講我部 notebook.

今晚響度清理電腦垃圾時發現有兩個 files 無論我用咩方法都開唔到、改唔到、delete 唔到。

最後唯有放棄。

等到直至 format 部機嘅一日先解決。


另一部「蠱惑的 desktop」就仲搞嘢。

除非我響每廿四小時之內著一著佢，如果唔係佢就會罷工。

試過好多次唔記得開著佢超過兩日。

結果要呵要氹甚至拳打腳踢搞一大輪佢先會重新正常運作。

好有性格。

死前審判

我相信，個天安排你遇上一個人，總有其背後意思。


嗰個人。

可以係天使，可以係魔鬼。

可以令你逃出生天，可以令你萬劫不復。

可以令你變得樂觀，可以令你更為悲觀。

可以陪你一世，可以消失於一秒。


無論嗰個人對你做過啲乜。

或者你對佢做乜佢都仍然無動於衷。

一個眼神、一句說話、一啲行為都始終會響你嘅人生入面留低一啲色彩。

可能係紅橙黃綠青藍紫，又可能係黑白灰。


每個人響世上嘅存在意義可能就係要響別人嘅生活入面「搞亂檔」。

充實或拖垮另一個人。


唔到你「埋單」嗰日，你都唔可能下到定論。

遇到佢，究竟係好事定壞事。

天生一對

睇過唔少戲，當中不乏愛情片。

愛得轟烈、愛得死去活來、愛得可歌可泣嘅愛情故事多得數之不盡。

但要數響電影入面表達出夫妻恩愛嘅電影。

我鍾意嘅有三套，排名絕對分先後。


三. 《天下無賊》

當 劉若英 大住個肚知道老公 劉德華 已經死咗之後。

「要食多一點．．．」













二. 《龍鳳鬥》

當 鄭秀文 發現 劉德華 失蹤之後開始懷疑佢老公可能真係有絕症。

「老公，你喺邊呀？」














一. 《大內密探零零發》

當 劉嘉玲 每次激嬲老公 周星馳 想氹返佢嘅時候就會用柔情嘅眼神同聲線講。

「老公，你肚唔肚餓呀？不如我煮個麵你食丫？」

小事大意義

我父母間中都會撳電視、錄影機、有線電視等等嘅遙控撳到唔知點還原。

當佢哋研究一大輪再將個問題惡化之後佢哋就會使出最厲害嘅一招。

嗌個仔，即係我。


好多時我三兩下手勢之後就會將部嘢回復正常。

唔係我叻。

只係因為佢哋唔識英文所以唯有亂撳結果越撳越亂。

我亦無怪佢哋。


今日又發生相同嘅事。

搞掂之後我問我亞媽一句：如果我死咗，咁你哋點算？
（我係認真問，亦有啲擔心。）

佢聽完之後當然反應好大話我亂噏廿四。

於是我轉一轉個問法：如果我去咗外地長時間公幹咁你哋點算？打電話問？

我亞媽答得好爽快：係呀。

我心諗：你點打落地府呢？


我冇再同亞媽深究呢個問題。

因為佢已經開開心心咁睇返佢嘅電視。


我好認真咁諗咗一陣。

可能我嘅存在意義就係要好好咁照顧父母。


或者亦係時候考慮下點樣珍惜一下我自己嘅生命．．．

孤單的人孤單一個 感覺不到夜美好

黎明《孤單的人孤單的我》

孤單的人孤單一個　感覺不到夜美好

孤單的人孤單一個　失去感覺是最好



「光棍節」呢個名稱真係第一次聽。

聽完之後我第一個諗法係：

都唔知係邊條粉腸諗出嚟嘅。


返到屋企睇到《時事百科》，先知原來「光棍節」仲有以下細分。

真係唔得你死．．．




上 維基 查一查「光棍節」嘅出處，廣為認可嘅起源係：

南京大學「名草無主」寢室四個大四學生每晚舉行「臥談」，一段時間臥談的主題都是討論如何擺脫光棍狀態，臥談中創想出了以即將到來的11月11日作為「光棍節」來組織活動。


無論點樣「以仍是單身一族為傲」或不斷「舉辦交友聚會活動慶祝」都好。

就到底，其實都係唔想孤單一個．．．


講起孤單，我一定會諗起呢首歌。

小角色

朋友組織咗一班人搞 project 拍片。

佢知我有興趣於是叫埋我一齊玩。


有日我問佢：你有冇諗過安排我負責啲咩？

佢反問：你有興趣做咩位丫？

我諗咗一陣之後答：場務。

佢笑完之後問：點解？

我答：我咩都唔識，得個腦，想學下嘢先。
　　　林雪 都係場務出身。

朋友話：你得個腦，做編劇啦！


就係咁，我分配到一個崗位。


老實說，我真心欣賞一眾幕後出身嘅幕前演員。

林雪、田雞、李力持、谷德昭、士巴拿 等等。

另外仲有 劉鎮偉、馮小剛 等等都經常客串。

戲分雖少，但非常搶。


響電影世界又好、響現實世界又好。

無可能每一個人都可以做主角。

有啲人天生已經係一個表演者、主角命。

我知我唔係亦自問無本事。

所以我一直樂於做配角。


我唔係一個好高騖遠或者想一步登天嘅人。

循序漸進安份守己已最令我感到舒服。


響人生入面做最佳男配角，係一個遠大嘅理想。

渺小的自大

響地鐵站睇到一套電影預告。

又係嗰啲咩神魔人大戰之類嘅戲。


我經常都有個疑問。

點解人類要睇得自己咁重要？

連電影題材都要以人為中心兼且搞到神魔大戰咁巴閉。


人響地球可能真係最高智慧嘅生物。

但對於一個宇宙嚟講，人係微不足道得可憐。


最近睇咗《變形金剛３》，其中一幕係講狂派嚟侵略地球攞資源走。

有人問：狂派嚟地球攞嘅資源究竟係咩？

唔知邊個答：係人類。捉返去做奴隸。


我覺得好貼切。

因為大部份地球人嘅正職確實係一名奴工。

不自量力

好多男人自信自己可以拯救一個女人。

好多女人自信自己可以改變一個男人。

結果最後都係兩敗俱傷分手收場。


曾經響 微博 睇過一段說話。

你以為我刀槍不入，
我以為你百毒不侵。


應該都係咁上下意思。

縱貫線《LIVE in TAIPEI》

週末砌模型嘅時候亦邊砌邊聽呢個演唱會。

很讚！


李宗盛 x 羅大佑 x 周華健 x 張震嶽


比較熟悉嘅其實只有 周華健 和 張震嶽 嘅歌。

誰人像我一個人 誰人沒氣力談情

林一峰《今天應該更高興》

誰人像我一個人 誰人沒氣力談情
避免感觸太多感覺太亂難清醒


又因為上 YouTube 搵 林一峰 首《不要重播》嘅ＭＶ.

俾我搵返呢首歌。


聽到 down 晒。


歌詞，要三段一齊先有層次夠意思。



誰人像我一個人 誰人沒氣力談情
避免感觸太多感覺太亂難清醒
成全幸福的拼圖　人潮中我漸忘形
滿天燈飾照閃　假使你在旁
今天應該更高興

仍然懼怕一個人　仍然沒氣力談情
夠膽翻開記憶　不敢正視旁人高興
成全幸福的拼圖　人潮中我漸忘形
這天燈飾照閃　即使碰著誰
都不知怎去反應

為何懼怕一個人　為何太急於相戀
就算只得兩手雙緊扣著仍能溫暖
尋求幸福的過程　原來自己不清醒
每當穿起暖衣將心跳記住

《東亞華星演唱會》

兩年前當呢個演唱會出碟嘅時候我已經第一時間買咗 Blu-ray.

為嘅係一幕 鄭秀文 主唱加上 許志安 和唱o既《唯獨你是不可取替》


早兩日砌模型時播返呢隻碟嚟睇。

又因為另一幕，我今日專登去搵呢隻ＣＤ。

我要將佢放落ＭＰ３。

林一峰《不要重播》

悲觀頭樂觀底

當一個人悲觀到一個最低點時其實佢已經變到好樂觀。


點都好過情況倒轉．．．

羅漢齊飯

羅漢齊飯

爭拗定爭抝

爭拗定爭抝？

修理門

響頭頂嘅修理門

Dry

淋雨嘅感覺真好。

如果之後唔病嘅話．．．

嫌命長

飲奶茶利尿。

飲咖啡心跳。

今日飲咗人生第一杯鴛鴦。

離晒譜

每次屋企有藍罐曲奇，都會出現呢個情況。

所有「提子」不翼而飛。


另一個情況係。

牛奶公司三色雪糕一公升家庭裝。

一打開會無晒朱古力味淨返雲尼拿同士多啤梨。


邊有啲咁咀刁嘅父母架．．．

《東風破》

我就是喜歡這些簡簡單單又可以令人深思的電影。


故事簡介：

常說香港人不重視歷史，但我們總有方法知道自己是從什麼地方過來的。

一個濫用藥物命不久矣的女孩(官恩娜飾)，由三藩市出走香港找一個素未謀面的網友，卻碰上避世於東華義莊、與棺材為伴的臭脾氣老伯(泰廸羅賓飾)。一個幾十年沒出遠門的舊金山女中醫(苗可秀飾)，因為一份速遞屋契決定重返香港。
一個討厭家族生意的上環南北行藥材鋪少主(周俊偉飾)，因為三個女人找回自己的位置。

• 世界轉變很快，許多熟悉的東西，不知不覺間忽地消失。
• 不相識的人走在一起，卻為對方的生命帶來不一樣的風景。
• 無論任何年紀，你都會學會新生活。
• 只要你相信。

這是個有關「家」、回家的故事(家是自己的地方、一個人的歸宿)。
我們要知道自己及上一代是如何活過來的，才會明白和溝通，才有關心和愛。
年青人要愛自己、相信自己，才有更美好的生活、進而有更美好的世界。
面對生死，人人平等；面對笑容，人人平等。

《觀音山》

好少睇 范冰冰。

唔係話佢唔靚。

只不過唔係我杯茶。

至於套戲就．．．

無咩好講。