究竟．．．

究竟有幾多人睇？

究竟有邊個睇？

究竟有邊個係我識佢時佢又識我？

究竟有邊個係我識佢時佢唔識我？

究竟有邊個係我唔識佢時佢識我？

究竟有邊個係我唔識佢時佢又唔識我？

請留隻字話我知。

第六隻了．．．

墨爾本時間六月十四日晚上七時三十分發現第六隻老鼠被捕。

我開始懷疑我呢間已隔離o既密封房間係有一條不為人知o既對外通道．．．

一條行屍

只係短短o既三晚 11pm ~ 7am (睇波)，我已經開始覺得自己似一條行屍。

一晚踩三場的確唔易，通常睇到尾場半場時 6am 左右就會頂唔蒲訓著o左。

可能因為過去一、兩個月o既睡眠時間太正常o既關係，依家唔捱得。

聽日又要開始返學喇，又 test 又 report 又 presentation，真係連訓都冇時間訓．．．

讀書 同 世界盃，梗係 世界盃 重要。

覆留言

今日有朋友o係 msn 問我點解唔o係個 blog 度覆留言；其實o係開始寫 blog o既時候已經決定o左唔覆。

覆得一個，又要覆另一個，跟住大家又會留言覆番我個回覆，之後我又要覆番o的人回覆我個回覆o既留言．．．

慢慢，呢度就變o左大家聚腳o既討論區，再唔係 blog；更何況，有前科．．．



放心，大家每個o既留言我都會用心睇。

夜晚天堂 日頭地獄

世界盃終於展開，夜波，最早十一點，最遲凌晨五點，一直踩到七月十號，晚晚精采。

上個禮拜星期一至五每日交一份 written report 再夾一次 presentation，下個禮拜有三份 written report 再加五個 test 再夾一次 presentation，再下個禮拜又有三個 test；不如一鎗打死我。

點樣安排訓覺時間先至最麻煩．．．

還記得四年前世界盃英格蘭對巴西當日冇去考一個已定案o既科目o既考試。

號外！！！

墨爾本時間六月九日晚上八時發現第五隻老鼠被捕。

話口未完，又o黎．．．

捕鼠慨況

如果唔係 SIVOTS 問一問我捉老鼠捉成點，我都唔記得要同大家交代下捕鼠慨況。

到目前為止，已經捕獲四隻老鼠，而第四隻老鼠係o係大慨三個禮拜前捉到o既。

o係過去呢三個禮拜入面，都冇再發現老鼠o既蹤跡，撤係地上o既米同放係地上o既老鼠夾都原封不動，好有可能相信已經捉晒。

房間仍未解封，以防萬一。

報告完畢。

冷 - 全日最高１０.９℃

鳴謝：亞嬋 及 彎彎

重開《晶哥電台》

好耐冇試過開台開得咁『開心』；或者應該形容為『滿意』或『滿足』。

亦都好耐未試過咁夜訓；上個月多數十二點前已經上床訓覺。

呢次個電台係有準備o既，播o既歌、講o既o野，都係o係離開o既一個月入面聽o既、諗o既。

雖然收聽人數唔多，但做到一次自己想做o既電台，我已經好『開心』、『滿意』、『滿足』。

今朝重播尋晚呢次o既《晶哥電台》，都係冇乜人聽。

我自得其樂。

啪制

呢排訓得幾好，閒閒o地都訓十至十一個鐘，可能係因為天氣凍o既關係，唔願離開暖笠笠o既被竇。

前排病入膏肓o既時候就真係訓得好差，再之前都經常訓得唔好。

我唔係一個好鍾意訓覺o既人，亦唔係一個唔需要訓覺o既人；但每次訓唔到覺o既時候我都會好苦惱。

每次o係床上面訓唔著輾轉反側o既時候我就會諗，點解人入睡唔可以好似同熄燈一樣，一啪個制就掂；簡單快捷。

我真係好希望將來可以有人發明到一個令人入睡o既『啪制』。

〝啪〞．．．Z ... z ... Z ... z ...

咳到甩肺

我終於知道咳到甩肺係咩感覺。

前兩晚訓覺o既時候咳o左一o野勁o既，之後個胸口近心臟附近一陣劇痛，痛到出唔到聲，之後每一次咳，每一次郁都痛，好唔對路。

到第二朝訓醒時劇痛仍然持續，又唔似平時o的肌肉痛，行路o既時候仲會覺得胸口入面有o的o野甩下甩下咁，於是走去搵學校個醫生幫我 check check，反正唔駛錢。

初步診斷結果都係肌肉痛，不過如果到星期一都仲痛緊就可能係個肺有事，到時要覆診。
應該唔係咳穿肺，因為咳穿肺會呼吸困難云云。

所以，我覺得應該係咳到甩肺．．．

一個月

一個月．．．

冇返學三個禮拜；但仍然名列前茅

咳o左三個禮拜飲o左五支共四款咳水食o左二排藥丸；都仍然咳緊

《電視》
　高朋滿座
　15/16
　向世界出發
　細說名城
　故宮 帝皇秘傳
　星期二檔案
　新聞透視
　鏗鏘集
　獅子山下
　東張西望
　加：老馮日記

《電影@屋企》
　野蠻秘笈
　超班寶寶
　雀聖 2 - 自摸天后
　得閒飲茶
　打雀英雄傳
　我和我的女友
　獨家試愛
　BROKEBACK MOUNTAIN 斷背山
　MUNICH 慕尼黑
　SYRIANA 油激暗戰

《電影@戲院》
　Eight Below
　M:i:III
　The Da Vinci Code

《電台》
　她他她打到o黎
　西崎公園
　最佳配樂

《足球》
　FA CUP
　UEFA CHAMPIONS LEAGUE FINAL
　AUSTRALIA vs GREECE

個 list 應該唔止咁少，記性唔好，一個月內o既o野都記唔晒。

離開一個月

離開一個月．．．

號外：發現第三隻老鼠

於晚上十二時發現有第三隻老鼠。

究竟仲有幾多隻？
我就o黎癲．．．

大魚大肉，飲飽食醉

過去o既一個星期冇乜特別，主要都係飽住咁渡過。

星期六至星期一，三日內打o左兩次邊爐，飽到嘔。

星期六、日，兩日內食o左兩餐日本o野，爽。

之後o個幾日都食得幾好幾開心，有雲吞牛腩麵、麥記做午餐，夜晚又出街食過梅菜扣肉飯、椒鹽雞扒，又煮下飯煲下湯咁，幾好。

另外，最近愛上食 上海小籠包，幾乎日日食。買時已包好及雪藏，買返屋企蒸又得、煎又得，打邊爐或煮麵時放湯亦得，好好味。

晚晚都飽住訓，好幸福。

號外：第二隻老鼠被捕

第二隻老鼠於今晨終於被捕。

重回舊地

今日山長水遠返去以前住 homestay 時住o左三年o既o個區去拜託一位 uncle 幫幫忙做一件事。
叫人幫忙的確係一件好難開口兼尷尬o既事，尤其係其實唔太熟。
好在 uncle 好人。

三年冇返去呢個曾經住o左三年o既地區，坐番成日坐o既電車，行番成日行o既路，都冇乜感覺。
仲急急腳咁走，因為落雨。

Gas 爐

買o左個 Gas 爐 o黎打邊爐，好o野！
想買好耐o架喇。

麥兜："Sh ~ ~ ~ ~ Sh ~ ~ ~ !"

幾日前的自問自答﹝三﹞

問：你每日o係度做乜？
答：唔知。

問：點解會唔知？
答：唔知點解唔知。

問：唔知點解唔知自己每日o係度做緊乜o既人係咩人？
答：廢人。

問：點解係廢人？
答：因為只有廢人先會唔知點解唔知自己每日o係度做緊乜。

問：咁廢人應該點做人？
答：應該唔好做人。

問：即係咩？
答：廢人應該死。

Greek Easter Bread (2)

係復活蛋。

Greek Easter Bread (1)

又有 Greek Easter Bread 食喇，好好味o架，自從幾年前食過之後立即愛上，跟住每年都買o黎食。 搽牛油，正！

Greece Easter 係比我o地o既 Easter 遲o既，所有到依家先賣，而且剩係 Easter 先有得賣。(廢話)

多謝 妹子！

p.s. 其實個味道好似港式牛油排包。

Oxo Smooth Edge Can Opener

有o左呢把罐頭刀，我再唔會界親手。
百幾蚊港紙，抵啦！！！
已買。

自問自答﹝二﹞

問：今日晏晝食乜o野？
答：海南雞飯。

問：好味麼？
答：一早知唔好味。

問：一早知唔好味又去食？
答：因為唔開心而又想開心番o的。

問：有開心番o的麼？
答：梗有，如果唔係點會去食唔好食o既海南雞飯。

問：食緊唔好食o既開心海南雞飯o既時間你諗到o的乜？
答：我o係度o徙緊米飯。

逃避

逃避、再逃避、不斷逃避．．．

可以逃到幾多歲？

我年紀已經唔細，而且睇怕我短期內都唔會死．．．

自問自答﹝一﹞

問：個 blog 係俾自己睇定俾人o地睇？
答：人o地。

問：點解要寫o野俾人o地睇？
答：唔知。

問：冇人o地o黎睇咁點？
答：摺o左佢。

Phillip Island

今日去o左睇 樹熊、袋鼠、袋熊、海豹、小企鵝。

（圖片後補）

寂寞的一群

沉迷網上世界、每日都花好多時間上網(鍾意上高登、鍾意上網識朋友、鍾意上網同人傾偈、鍾意玩 online game 等等)o既人，大慨都係寂寞的一群吧！

即使你有家人、即使你有伴侶、即使你有朋友；你也會感到寂寞。

時間

浪費時間很容易，善用時間卻很難。

開個電台播下歌、上高登睇下 post、玩下三國志ⅩⅠ、睇下 download 番o黎o既電視節目．．．

咁樣，好快就過o左十二個鐘；
咁樣，好快就過o左一日；
咁樣，好快就過o左一年；
咁樣，好快就一世．．．

咁樣樣，就浪費o左廿幾年o既時間；
而且，似乎，會繼續浪費．．．

Good Friday

冇心機，懶得寫。

待續．．．

Cold & Flu DAY & NIGHT

《第二十五屆香港電影金像獎》

等緊睇《第二十五屆香港電影金像獎》，希望到時個網站生生性性。

往年都好少睇金像獎，但今年特別想睇，因為我今年中o左電影毒，九成獲提名o既電影都睇o左。

期待．．．

半條命

連續幾晚唔夠訓，得番半條命。

隨時隨地都可能訓著。

講完

暫停兩天

趕緊o的死人 assignments，暫停寫 blog 兩天。

呢鋪大檸樂喇，原來唔止一隻老鼠！！！

三分鐘熱度

我份人好 “三分鐘熱度”。

仲記唔記得我之前介紹過一個我好鐘意聽o既電台節目叫《西崎公園 》？
我已經冇聽好耐了．．．

o個陣真係好鐘意聽，鐘意到要追番每一集“節目重溫”。聽呢個節目o既最大好處係可以一邊聽一邊思考，諗下自己同身邊o既人同事。

可惜我係一個冇耐性o既人，追追下已經冇再追。
有時一個人懶起上o黎，可以懶到連o野都唔想去諗。

reference: 《西崎公園 》Jessie

《獨家試愛》

導演: 葉念琛
演員：方力申、鄧麗欣、吳佩慈、侯莎莎、唐寧、王祖藍、關之彤、魏駿傑、Theresa、譚俊彥、陳秀珠
電影類型：愛情

今日睇o左《獨家試愛》o既預告片，以戲論戲，覺得呢套戲應該會幾好睇，期待。

但我唔想睇 吳佩慈。

官方網頁　預告片

《Wedding Crashers》﹙港譯：冒牌伴郎生擒姊妹團﹚

今日又睇o左另一套戲，《Wedding Crashers》﹙港譯：冒牌伴郎生擒姊妹團﹚，都算幾好笑。不過睇到中段已經估到個結局，太例牌。

連續兩日都睇到部得到歡樂同可以開懷大笑o既戲，都算係值得開心o既事。

應該買番隻 DVD(有英文字幕)去學下呢套戲入面o個o的尖酸刻薄o既英文，正！

返學好悶

返學好悶

講完

《春田花花同學會》

今晚係第二次睇呢套戲，仍然笑死我。
第一次睇o既時候係因為聽完電台亞三姑(吳君如)個節目之後等唔切所以 download o左個大陸戲院國語版o黎睇，o個陣睇已經覺得好好笑；今次呢個係粵語正版 DVD，聽番廣東話仲好笑，而且亦比大陸版多o左幾段小故事。

我冇睇黃巴士，我冇睇過麥兜o既書；我有睇麥兜電影，第一套都還可以，笑到下，第二套就差o的悶到訓著，我係以一個睇笑片搵開心搵娛樂o既心態去睇；我唔屬於o個個世界，我亦冇打算去領悟，我唔係麥兜 fans。

今次睇《春田花花同學會》係因為有一班我好鍾意o既演員，而且擺到明係笑片，哈哈哈！而且今次卡通部份都好好笑，全靠一班小朋友聲，哈哈！個故事都唔錯，有共鳴，哈！

睇呢套戲o既最大發現係 周筆暢(超級女聲亞軍)，估唔到佢可以咁懵，又懵得幾可愛。

放完假

話咁快，兩個星期o既假就放完。

放假，就係應該放假，唔做o野。
如果放假做o野，就會失去放假o既本意。
但係，每位老師都鍾意o係放假前俾功課學生等佢o地o係放假時可以有時間做。
痴痴地，放假做功課，咁算係咩假？
所以o係兩個星期o既假期入面，我都冇乜掂過o的功課。
因為，我要放假。

話說聽日有份 group assignment 要交(今日 dayoff)，我o係上星期二已經做好晒自己o個 part，仲差一份 report 要四個組員一齊埋尾。結果，約o左佢o地一個星期，始終都係攪到最後一日先一齊返學做(全世界學生都一樣，不論國藉)。做o左八成左右，大家又開始搵藉口閃，想返屋企先埋尾。結果，真係未完成就閃晒。夜晚，收到 email 話聽日o個堂 postpone 到下星期；份 assignment 都延至下星期交。如無意外，又會拖到下星期交之前先埋尾。

《Ｋｉｎｇ Ｋｏｎｇ》

今晚終於睇o左《King Kong》。

套戲爛到呢．．．差o的訓著。

記得上畫開頭o的人都係有彈冇讚，後期o的人又話三粒鐘有特技有猩猩有恐龍抵睇，我就話好彩我當時冇入場慳番幾廿蚊。

成套戲唯一可取之處係拍得 Naomi Watts 幾靚。

– 完 –

三國志ⅩⅠ(之二)

呢集真係唔係咁好玩，亦好易玩，失望。

雖然唔好玩，但仍然繼續玩，因為冇其它o野好玩。

玩 三國志，通常一玩就幾個鐘，坐o係度 ‘才禁’ ‘才禁’ ‘才禁’，o的時間就會無聲消逝。

浪費時間o既好方法。

掛靴

短期內都唔會再玩 Winning，轉攻 三國志ⅩⅠ。

純粹搞笑

【好想去呀！！！】個 post 純粹搞笑，毋須認真。

哈哈哈！！！

三國志ⅩⅠ(之一)

三國志ⅩⅠ(日文版) 已經出o左一個禮拜左右，見過o的圖片同網友o既討論之後，似乎唔太好玩，install 又麻煩，又話要拔 CD-ROM 先玩到云云。而我又唔曉日文，於是極力忍手唔 download 住，等中文版(雖知我係三國志遊戲o既忠實 fans，由第二代已經開始玩了)。

不過由於太悶o既關係(上回已交代)，玩 Winning 已經悶到冇可再悶，又咁o岩今日俾我見到隻 “三國志ⅩⅠ硬碟版免安裝正接玩”；所以，於是，結果．．．我再忍唔住。

下載中，熱切期待！

悶死人

最近悶死人。
悶死人o既原因係最近冇乜新 CD，亦冇乜新 VCD。

繼 Eason《 Life Continues》之後，終於等到隻 張敬軒《春．夏．秋．冬》，可算係望穿秋水。另外期待o既仲有 楊千嬅 同 At17。雖然 側田 都出o左新碟，不過真係冇乜興趣。o黎緊仲有隻 鄧麗欣，這個嘛．．．

電影方面，最近手頭上有四套戲，包括係《霍元甲》、《最愛女人購物狂》、《小企鵝大長征》、《親切的金子》。 《霍元甲》只係一般，令人失望；《最愛女人購物狂》都笑到下o既，總好過《喜馬拉雅星》；反而《小企鵝大長征》幾好睇，幾感人；《親切的金子》？完全冇興趣。

其實仲有隻《King Kong》(尋日到手)，都算係期待之一，可惜 Disc C 睇唔到(落唔到 CD-R 響 DVD 機度播)，唯有再等下添。

已經三月尾，舊年聖誕檔期o的戲應該出碟o架啦，點解等極都冇o架。

唉，悶死人．．．

好想去呀！！！

哎呀

呢輪講得最多o既一句說話係『哎呀』，因為經常呢度痛o個度痛。

繼身痕手痛肚痛手指痛之後，今日又多兩樣頭痛同腳板底痛。

可能係因為訓得唔好o既關係，個頭近後腦o既位置今日隱隱作痛，忽然之間拮你一下o個隻，又痛又討厭，又冇 panadol 喎。忽然，『哎呀』、忽然又『哎呀』。

可能係因為今日行得多企得多o既關係，回家途中腳板底抽筋，行下痛下，『哎呀、哎呀』。

又因為隻左手仲未完全康復，一擺錯位，一用錯力，又會『哎呀、哎呀』。

發雞瘟

唔記得之前有冇提過，近呢幾個月都『發雞瘟』。如果之前已經提過，就當潮文睇多次啦。

『發雞瘟』o既意思其實係近排愛上o左一種食品 - 海南雞飯。

過澳洲之前，我o係香港係冇食過 海南雞飯 o既。o係澳洲o既呢幾年，都係同 uncle 一家去食過幾次；我自己一個人係唔會去食o既，因為興趣不大。

不過近幾個月唔知攪乜鬼，非常鍾意食 海南雞飯，幾近瘋狂。瘋狂o既程度係我日日都想食，當然我冇日日食，不過我相信我真係可以日日食。周圍去搵邊度有 海南雞飯 食，city 每一間有 海南雞飯 o既餐廳都幾乎試勻，冇間掂；其它 suburb o既都有去食，又係一般；屋企附近o個間明知唔好食，都仍然經常買o黎食。

有點走火入魔，雞瘟入骨之勢。

朋友們，知唔知香港邊度有好味o既 海南雞飯？
介紹o黎丫。

p.s. 一講食o野，我就興奮。暫時o黎講，我覺得人生最快樂o既時間莫過於係食好o野之時。
遲下再寫下『食』。

蝴蝶效應 + 隨時暴斃

話說尋日去屋企附近買 lunch - 海南雞飯，天色非常之好，風和日麗。所以，有好多漂亮o既蝴蝶到處飛舞。

而我平生最怕o既昆蟲就係蝴蝶；冇錯，你冇睇錯，係蝴蝶。其次係青蜓同飛蟑螂；我的確怕蝴蝶多過飛蟑螂。唔知點解，o的蝴蝶硬係會向住你飛，而且飛行路線極不規則，你越避，佢地就越向你飛，好恐怖。飛蛾都還好，因為飛蛾多數唔會亂飛向你或者只會飛向燈，第二朝訓醒仲會離奇消失。

如是者，o係我行去買飯o既短短十零分鐘路程，我會行行下忽然左閃右避。

另外，行去買飯o既時候，只係一段短短o既斜路，我都可以行到胸口痛 + 胃痛。相信遲早有一日我會忽然暴斃。

呢輪個身體不斷發出警報，真係應該係時候做番下運動喇。
不過呢句說話我都已經講o左幾年。

p.s. 唔好以為我唔知咩係 "Butterfly Effect"

界手

唔知點解成日開罐頭都界親手，仲要次次都係見血界到手指主要關節位郁親都會痛死o個隻；今日仲要係俾有拉葉o個隻罐頭界親(毋須使用罐頭刀)，可惡！！！

我一定要買o個把開完罐頭之後免界口o既罐頭刀。
百幾蚊港紙就可以免再見紅，抵！！！

"開罐頭界親手" 呢個情況好鬼上一代甚至上一世紀 feel，唔似會係今時今日出現。

我真係好鬼老乜土。

冇耐性

越來越冇耐性，對好多事都係(即使以前曾經好有耐性)；開台係，聽電台又係，甚至o係高登睇 post 都係。

次次開台開到大約一個鐘左右就唔想再開落去草草收場冇耐性再安排節目內容。
次次聽台聽到大約十零廿分鐘左右就唔想再聽落去冇耐性等到有o野o岩聽。
次次o係高登見到o的 post 有兩三頁即使有興趣都冇耐性追落去。

反而踢 Winning 又好好耐性每日踢幾粒鐘都樂此不疲。

唔暢快

最近個 PS2 手制虧虧o地(可能係因為我成日掉佢落地o既關係)，踢起 Winning 上o黎極之唔暢快，成力大減，連續兩場輸俾曼聯(歐聯 + 英超)，為本球季唯一輸o既兩場波，可惡。

好，上 eBay 平平o地 bid 番個新手制先。

奇怪心態

o係墨爾本時我唔鍾意遇到香港人，
o係香港時我好鍾意遇到外國人。

甚麼心態？

M 痛

忽然肚痛，似足“M 痛”，雖然我冇可能有“M 痛”，但我見過其他人“M 痛”o既情況，所以我大慨估計得到有幾痛有幾辛苦。

六點左右，忽然肚痛，嘗試去廁所但又冇得痾；肚痛但冇得痾乃係人生一大慘事(其實我都覺得唔似係要痾o個隻肚痛)。沖個涼，諗住加速血液循環，點知之後仲大鑊。沖完涼，個肚痛到幾乎行唔郁，唯有上床攤抖下。痛到訓唔到，痛到手腳冰冷，痛到標冷汗，又谷住谷住。
係咪好似“M 痛”呢？

輾轉反側一輪痛住訓o左一陣之後決定起身食 dinner 啪粒止痛藥。

其實我唔知點解會肚痛。

晚上八點半。

楊過？獨臂刀方剛？

隻左手已經痛o左兩個禮拜有多，o係 biceps 頂端近膊頭位置。

我唔肯定係因為咩事整親，最大機會係兩個禮拜前拆解廁所天花盞燈時屈親。隻手唔係成日都痛，係做某o的動作或郁到某o的方向時先會隱隱作痛。小心翼翼o左兩個禮拜，都已經差不多好番，點知尋日去超市同做家務時再次觸傷呢個位置，呢次就大濟了。之後成晚都痛，幾乎任何動作甚至一遞(逮)起隻手就已經痛；又痺，連訓覺時將隻手平放都痺下痺下。

呢濟o野相信冇多一個月都好唔番。

今日，成個楊過一樣，又或者可以係王羽演o既獨臂刀方剛。

下午四點。

繼續痕

仍然繼續痕，今日o既重災區主要係小腿，之前冇出過o既地方，又痕又紅又一撻撻；似乎要出勻全身先會好。

決定唔睇醫生唔會去藥房，頂多日。

好似劉建明話齋：『過埋今日就無事o架喇！』

沖個蘆薈浴之後食個午餐先。

下午一點半。

身痕

無端端出疹，唔知咩疹，可能係皮膚敏感，總之痕死人。

由前晚凌晨一點開始，當時我爬起身煮個出前一丁做消夜，見涼涼地，著番件睡衣，著o左冇幾耐對手臂開始痕，一睇發現對手臂開始起粒粒，即刻唔著件睡衣，當時已經覺得個情況唔似皮膚敏感，似出疹。食完個麵，攪下呢樣攪下o個樣到三點時發覺連大脾都開始痕同起粒粒，我就知道大鑊，拿拿臨用蘆薈露沖個涼潤一潤之後去訓。如我所料，到尋日訓醒o既時候已經慢延到個身，但對手o個o的已經開始退。由於好多o野要做，唯有照出街；亦因為比預計中小事，所以冇打算睇醫生，相信一兩日內會自然好。

我好怕出疹，因為初中時試過出過一次大大鑊o既，成個星期返唔到學，仲要打類固醇。

我一向冇對食物敏感，所以百思不能其解。

前日食過o既o野得三樣：
午餐係放o係雪櫃幾日o既 Pizza
五點半點食o左杯 椰子雪糕 + 芝麻雪糕
七點食o左 fish & chips

之後七點半左右忽然肚痾、凌晨一點開始出疹。
椰子雪糕 + 芝麻雪糕，係我第一次幫襯，可能就係呢杯o野出事；不過好番之後我會食多次睇下關唔關事。

尋日病情反反覆覆，時好時壞，到尋晚臨訓前已經好得七七八八，結果訓覺時又出，但比前晚少得多，算係好轉卦。仍未打算睇醫生，或者下晝去藥房睇下有冇o的咩幫到下。

今日依然好痕。

早上十點十分。

心頭好

連續三日貼o左三樣心頭好，係時候講講。

Lexus IS250 - 呢架係計 Lexus SC430、Nissan Z350、Mazda3 同 Volkswagen GOLF 之後最鍾意o既一部車。我本身唔係一個好車之人，亦對汽車o既o野一竅不通；所以過o左澳洲六年，拎o左車牌五年，我都未買車。雖知響外國生活，一部私家車幾乎係必需品，但我就寧願搬屋搬近o的返工返學o既地方坐交通工具都唔願買車，可想而知我對車o既興趣有幾大。幾年前諗過買 RAV4，舊年又差o的買得成 Mazda3，如果唔係改變計劃年半後返香港，相信我已經‘才查’緊；始終，響澳洲“長住”o既話就真係需要一部車。如果有得揀，我將來返到香港之後都唔打算買車；有數得計，香港o的車咁貴，隨時成世坐的士都未必坐到個車價出o黎。不過o的 uncle 成日話，做老闆，在公在私點都要有番部車；“需要”多過“想要”。

BMW C1 - 其實對電單車更冇興趣，不過自從見過 BMW C1 之後就改變o左。幾日前o係街見到架 C1，眼前一亮，覺得佢好鬼 cute、好鬼型。返到屋企幾乎上齊全世界所有 BMW offical 網頁都搵唔到有得賣，唔知型號又用唔到 Google search；結果去 eBay 就 search 到，eBay 真係乜都有。發現原來 C1 已經係 01/02 年間o既產品，亦似乎再冇新款再冇生產。如果仲有得賣，真係去考番個電單車牌買番架過下癮都好。唔知香港仲有冇呢？唔知仲有冇得訂架新o既呢？

Powerdesk - 睇雜誌發現o既一張電腦檯，一張真真正正o既電腦檯；因為電腦同檯二合為一。呢張檯o既主要賣點係冇電腦電線外露。真係幾型，其實又可以話係懶型。雖然電腦硬件係藏於張檯入面，但 config. 可以自由配搭，之後亦可 upgrade，Windows 又得，Mac 又得，唔錯唔錯。英國製造；唔知可唔可以訂張去香港呢？

Powerdesk

Powerdesk - http://www.powerdesk.com/

BMW C1

LEXUS IS250

↑
點擊上圖到 Lexus IS250 網頁

高登死 server

高登前晚至尋日死 server，好似係，時間我唔肯定。

以前每次高登死 server，我 icq 總會收到十零廿個 message，例如：『高登死o左？』、『高登咩事？』、『你上唔上到高登？』等等。之後無論我答乜o野，o的人都會質問我高登出事原因，如果我答唔知，佢o地就會覺得我刻意隱瞞事實，當正我係高登 admin 好似乜都會知一樣，吹脹。

到o左依家情況終於有所改變，o的人再唔會問我高登係咪死o左、高登發生咩事；可能係因為晶哥已經好少o係高登蒲頭，又可能係因為我已經冇咁常開 icq & msn。

無論因為邊個原因都好，我都樂得『耳根清靜』。

有時，被人遺忘絕對係一件好事。

老鼠被捕

離開四日，老鼠被捕。

坎培拉、悉尼

坎培拉、悉尼四日超值遊

11/3 ~ 14/3

四日，遊一遊。

進入另一個世界的方法．．．

你係咪一個咁樣o既人？

你係咪一個本身唔鍾意講o野但係又因為身邊o既環境而導致你每日都不停講o野o既人？

又或者．．．

你係咪一個本身唔鍾意聽人講o野但係又因為身邊o既人每日都滔滔不絕而導致你每日都不能耳根清靜o既人？

STFU

暴風雨o既前夕通常都係風平浪靜，果然沒錯。

我今日講得最多o既一句說話係『Shut The Fuck Up！』

一切還好

放o左四日假，今日回歸校園。

感覺不錯，而且，竟然有點快樂，奇怪．．．

可能係因為冇我預期中o既衰o野發生吧。

止痾

肚痾停止，終於見番o的有形狀o既屎。

不過，今日手軟腳軟全身乏力．．．

劣質睡眠

唔駛返早學o既日子(一星期得兩朝返早 8:30am/9:30am)，平均每晚大約都訓足八個半鐘(0:00~8:30)，正如之前講過，即使想訓多o的都訓唔到。從數字上睇，訓八個半鐘應該好夠，但我發覺我每次訓醒o既時候我都會覺得我好似冇訓過咁。原來，我每晚都只係 physically 休息，mentally 冇休息過；已經一個月，每晚訓覺o既時候個腦都仲係不停咁思考或發夢，從未放鬆過，好‘支力’。

我好想可以正正式式舒舒服服咁訓一覺好o既休息下。

一條拉得好行的橡筋

我o既精神狀態，就好似一條拉得好行o既橡筋，隨時會斷。

p.s. 究竟係應該用 “行”、“恆”、“衡” 定其它字呢？

倒下了．．．

唔知係心理影響生理，定生理影響心理，抑或係心理加上生理；總之，我今日病o左返唔到學。

尋日朝早六點半起身返學直踩到下晝四點半，放學o既時間已經‘支力’到 pat 泥咁。晚餐食完o個幾條自己煎o既牛肉、豬肉香腸已經唔多妥，反胃。訓覺o既時候個肚不斷咕嚕咕嚕，半夜醒o左又好似魂不附體咁。朝早一起身就要大解放係咁痾，痾完我已經知我今日返唔到學。下晝o既時候又好多胃氣成日想嘔想嘔咁，直到夜晚先好番o的。

肚痾，好大機會係生理因素因為食錯o野。

至於個胃，我自己覺得好大機會係因為心理(曾經有過胃潰瘍o既經驗話到俾我知)。
原因：緊張、擔心、憂慮同壓力。

歷史重演

曾經o係中學階段發生過o既事又再歷史重演，可能係因為我依家o既同學大部份都係十七、八歲o既中學畢業生o既關係，年青人特別麻煩。雖然佢o地今次談論o既係另一樣o野，但我一樣唔好受。
試問邊個有興趣成為別人開玩笑o既話題呢？

由香港走到澳洲都避唔到，
莫非呢o的叫宿命？

有時我會覺得我依家咁幸福，可能係上天俾我o既補償；
但補償還補償，間中都仍然要娛樂一下玩你兩o野，咪等你幸福得咁過癮。

究竟係因為前世種善因今世嘆世界？
定係前世遺留落黎o既報應今世還？

忽然記起我朋友話我今年犯太歲．．．

都唔係路o既．．．

我已經唔係o的咩好o野，但原來其他人更加唔撚係路。

離撚晒譜！！！



心情唔好o既時候，講粗口特別暢快。

點解．．．

點解要 group discussion/activity？
點解要埋堆？
點解要上堂一齊坐？
點解要一齊去廁所？
點解要同我傾偈？
點解要一齊食晏？
點解放 break 時要一齊活動？
點解放 break 時o係 library 用電腦又要一齊坐？
點解要一齊返學？
點解要一齊走？
點解要專登等埋我？
點解要一齊坐火車返出 city？

點解唔可以俾我靜靜地自己一個人？

三日假期完畢

三日假期話咁快就完，老鼠仍未開始捉。

星期六、日兩日都係睇下戲睇下波打下機寫下 blog 咁就冇o左o的時間。
今日就去打下肝炎預防針去下超市做下功課同地產傾下電話開下電台吸下塵咁就已經旁晚六點半。

三日假期，但又好似冇休息過咁，仍然咁‘支力’。

老鼠？等下次三日假期先理。

晶哥電台 - 齋播歌一小時

感覺良好．．．

取消背景音樂

．．．

網上電台討論區

我還未找到重開網電的理由．．．

加入背景音樂

加o左首歌做 blog o既背景音樂，但似乎不能在 Firefox 上執行。

唉．．．

《天空小說》

最近翻聽 903廣播劇《天空小說》

呢個廣播劇應該係 94/95 左右o既作品(當然唔係195x年李我o個個)，大大話話已經超過十年。
十年前聽o既時候只係當一個普通廣播劇o既故事o黎聽，冇乜特別；
十年後o既今日聽番呢個廣播劇卻感觸良多，幾乎聽到眼濕濕。
依家聽呢個廣播劇所帶到俾我o既感覺係．．．『悲哀』。
劇中穿插多首陳百強歌曲，亦係悲歌，悲上加悲。

快 樂 的 一 晚、一 式 兩 份、三 個 人 的 午 餐、生 於 四 月 四 日、五 星 級 大 酒 店、神 出 鬼 沒 錄 影 機、七 彩 蝦 條 姐 姐、大 話 西 遊 八 卦 精、我 愛 上 了 隻 狗、請 自 行 執 拾 行 李、孤 兒 流 浪 七 十 一、十 二 隻 杯 杯 碟 碟、筵 開 十 三 圍 酒 席、十 四 B 窗 口 位、少 年 十 五 寂 寞 時、公 家 病 房 床 位 十 六 號、At Seventeen、十 八 個 肚 臍、十 九 個 字 的 一 封 信、請 找 出 二 十 處 不 同 的 地 方、2100 起 飛、涉 谷 神 宮 前 二 十 二 町、沒 有 睡 眠 的 二 十 三 小 時、Twenty-four kiss 二 十 四 小 時 之 吻、二 十 五 年 朋 友、二 十 六 C 無 人 坐 o架 o番、八 月 二 十 七 日 東 京 國 際 機 場、我 二 十 八 號 出 世 o架、二 十 九 級 無 名 神 秘 之 火、三 十 集 大 話 大 結 局。

王天朗、翠碧、胡啟榮、趙家強、關茜蒙、尹芳玲、曾路得．．．
你記得幾多個？

林海峰 - 你我、王菲 - 一人分飾兩角、莫文蔚 - 到了晚上、黃偉文 - xxxx的快樂．．．
你又記得幾多首？

你，係咪我o個個年代？

晶哥電台

想開台但又唔可以開台原來真係幾辛苦．．．

我負擔唔起身份曝光之後o既後果。

三日假期

終於等到星期六放假，可以抖抖，我真係好需要抖抖。

今個星期除o左冇覺好訓忙於捉老鼠之外，亦要返學、做功課，亦有好多麻煩瑣碎火滾事發生。

人生就係咁，一係就日日百無聊賴無所事事，一係就所有麻煩事迫埋一齊接踵而來令你透不過氣 ；永冇中間平衡位。

雖然放假，但亦訓得唔好，因為尋晚好熱。

九點左右起身之後花o左兩個鐘頭時間將部電腦清潔同埋搬o左出廳，暫時將自己同書房分隔，我受夠了。今日應該會睇下戲睇下波打下機寫下 blog，聽日先執書房捉老鼠。

十面埋伏失敗，唯有正面交鋒！

十面埋伏失敗．．．



尋晚將新買o既三個 mouse trap 都放埋入房，總共五個，都係捉佢唔到。
算了，o黎緊有三日假期，決定開箱清理房間摷佢出o黎，正面交鋒！

氣餒了．．．

尋晚變陣再佈陣。

見隻o野鍾意食米，於是我將兩個老鼠陷阱o既芝士及花生醬整走，之後用雙面膠紙黐o的米響老鼠陷阱入面，閂埋書房門。

結果，今朝起身睇車路士對巴塞隆拿時，兩個老鼠陷阱原封不動，再次宣佈捕鼠失敗。

下晝放學之後去o左 warehouse 買o左另外三款老鼠夾，非常舊式o個o的，十足十卡通片入面o個o的兒嬉o野。

如果今晚都再捉唔到，都唔知點算好．．．

報告

早上六點半。

報告：捕鼠計劃再次失敗。

唉．．．

學校生活

其實呢幾日返學都有o的野發生，不過都係等捉完老鼠先寫。

搞錯，咀邊啦！！！

尋晚又佈陣。

今次閂埋書房門，書房地下近門口放米，兩個老鼠陷阱亦放o左o係書房入面，為o左吸引隻o野入老鼠陷阱食芝士及花生醬，所以我放o左少少米響陷阱入面近陷阱入口位。

六點半起身睇皇馬對阿仙奴，睇波之前入書房 check 下，地下o既米冇o左，意料中事。兩個老鼠陷阱原封不動，以為計劃失敗，點知，唔止失敗，係失敗中o既失敗；因為當我拎起兩個老鼠陷阱o既時候入面o既米已經不翼而飛，有冇搞錯。唉．．．可能放得太出；亦可以肯定芝士及花生醬唔o岩口味，亦可以肯定隻o野o係書房。

唉，今晚繼續，變陣。

過埋今晚都捉唔到，除o左搵隻貓，我真係冇其它辦法。

老鼠愛大米？！

捕鼠失敗。

尋晚再佈陣，情形如下。





照樣閂埋房門訓，門外再加布頂住門罅，房內擺米。照樣用一個大紙皮箱分開 "客廳廚房" 同 "睡房書房廁所"， 客廳、廚房門口擺o左米，廚房入面放o左一個老鼠陷阱。廁所門閂埋，入面擺o左米(事後唔肯定有冇擺米，好大件事)。書房門打開，門口只放兩個老鼠陷阱唔擺米，餌係花生醬同芝士。之後去訓。

又係四點起身痾尿，一切原封不動。唔記得廁所入面有冇米(好大件事)。

到九點起身，一切仍然原封不動(爽身粉附近又好似有o的痕)，除o左．．．廁所入面o的米冇o左。

反覆細想，始終唔能夠肯定廁所入面有冇擺米。如果冇擺，即係話個老鼠陷阱(花生醬同芝士)唔 work；如果有擺，即係話老鼠只愛大米，而且隻o野相當之細，可以捐過門底條罅(好彩尋晚睡房有攝布咋)。

如果真係咁細隻，老鼠又好其它o野又好，我都唔怕；
只怕，原來已經一家大細，細o既過到條罅．．．仲有隻大．．．

中午返學前決定再佈陣。

今次搵o野封住廁所門底條罅，廁所內擺米。書房門打開，兩個老鼠陷阱依舊，再加一堆米o係附近。以進一步確定獵物所在位置。

結果，夜晚放學返到o黎乜事都冇。

夜晚清潔廚房，發現門後同其中一個櫃入面都有好多類似老鼠o既屎物體，櫃入面有個窿，個窿係俾洗碗碟機o的電線通過，洗碗碟機後面仲有冇對外通道我真係唔知；但個櫃門係閂唔埋o既。用膠紙封o左個窿，再搵o野頂住，以防萬一。

今晚會再佈陣。

佈陣

尋晚決定佈陣，要搵出隻o野o係邊。

計劃第一部：
照常閂埋睡房門但打開書房及廁所門訓覺，照樣o係廚房相同位置擺堆米，廚房門打開但閂窗。書房、廁所同廚房門口位地毯洒滿爽身粉，希望有腳印可以捕捉到隻o野o既蹤跡。

半夜四點痾夜尿時，發覺廚房堆米有郁過，即係代表隻o野o係屋內。

計劃第二部：
閂埋廚房門，書房及廁所門照樣打開，閂埋睡房門訓(唔閂唔敢訓)，每個門口位內外位置都各放十五粒米(真係數過o架)，以捕捉佢o係屋內o既活動範圍。

九點起身，見到睡房內o既米仲o係度，即係代表佢冇同我訓。打開睡房門，睡房外o既米都o係度，但o係隔離(成九十度角位置)o既書房門內外o既米都唔見o左(爽身粉有少少痕跡)。 書房門對面o既廁所門內外既米都o係度；再行去廚房門外睇睇，o的米亦唔見o左。 打開廚房門睇睇，廚房內o既米原封不動。即係話，隻o野o既行動途徑係由我書房去廚房。 我一日o係書房至少十個鐘o架喎。

急忙打電話俾親戚朋友世叔伯商討對策(電話o係書房)，借唔到貓，唯有出去買老鼠夾(先假設隻o野係老鼠)。出街前，先用一個大紙皮箱封住主要通道，分開 "客廳廚房" 同 "睡房書房廁所"，再閂埋書房門兼放米o係入面，以進一步確認目標身處位置。

去到o的 warehouse，發覺冇老鼠籠賣，得一款老鼠陷阱，同大量老鼠藥。老鼠藥不在考慮之列，因為到時唔知佢死o左o係邊仲麻煩。唯一選擇，老鼠陷阱，設計係 v 字型，拱橋原理，隻老鼠一入去食o野就會閂門，好似好掂，HK$12一個，老老實實我冇乜信心(聽日有時間我先 upload 相)。

返到屋企，書房內o既米原封不動，可能因為尋晚已經食飽。大清理客廳，一無所穫，但有好多類似老鼠屎o既物體，更確定隻o野好大機會o係書房匿藏。今日全屋o的門都閂晒(一開即入即閂)，屋內每處o既米都原封不動，證明佢日頭唔會蒲頭。

寫呢篇 blog 用o左我好多時間，o係書房，總係覺得隻o野望住我上網。


今晚會再佈陣。

到依家都未見過隻o野，如果唔係老鼠，會係o的咩呢？！

米奇？！

尋晚煮飯時發現米袋被咬穿，似係老鼠所為，於是收好米袋，唔執起地下o既米粒試一試佢，點知．．．訓醒o既時候o的米粒真係冇晒。



今晚再試多次．．．

一輪咀

水泡大師最近人氣急升，將『八字』熱潮推向高峰！
精算師因為沉迷鑽研『八字』而導到考試不合格，正正係人算不如天算。
你問佢近幾個月至五年內o既電視劇電影佢幾乎一慨不知，搭唔到嗲；
講五至十五年前o既電視劇電影佢又可以如數家珍，滔滔不絕。
鑽研『八字』推測未來，人卻活在過去，兩者更不斷影響著現在。

---

到處都有可憐蟲，高登尤甚。
我好有可能係別人眼中o既可憐蟲，但我眼中亦有好多可憐蟲。
低處未算低．．．

---

有冇見過麥當勞叔叔同肯德基伯伯合照？
你去望下高登o的電台 post 就會見到。
互相吹捧、拉攏、巴結、做勢；『支持』、『純推』、『友台』。
友誼萬歲但個個背脊都‘孑貝’住把刀隨時開拖劈瓜對手。
咪笑撚死我啦！

---

如果一個人對你差可能係佢有偏見；
如果兩個人都對你差好有可能係巧合；
如果三個人都對你差時好有可能係佢o地夾埋整你；
如果全世界都對你差咁好有可能真係全世界都有問題。

你埋怨第一個男朋友對你差，可能係佢有問題；
你埋怨第二個男朋友都對你差，好有可能係巧合；
你埋怨第三個男朋友都對你咁差，好有可能你真係咁唔好彩；
當你埋怨第四、第五、第六個男朋友都係對你咁差，開始懷疑全世界o的男人都係變態衰人冇好o野o既時候．．．麻煩你照一照鏡。

---

我以後只會同你講『sorry』，『對唔住』呢三個字你再冇份聽。
中文與英文係有階級分別的。

如果我有錢．．．

今日無聊o係度諗，如果我有錢，我會點。

如果我有錢．．．我會每半年至一年換部新手提電話；
如果我有錢．．．我會買好多電腦產品；
如果我有錢．．．我會收購高登；
如果我有錢．．．我會用網電去搞一個電台革命；
如果我有錢．．．我會年年去旅行；
如果我有錢．．．我會平均每兩年換一部車；
如果我有錢．．．我會請司機、管家、廚師同花王；
如果我有錢．．．我會將間屋重新裝修；
如果我有錢．．．我會用天價買埋隔離間屋。
如果我有錢．．．

如果我要做齊以上o既o野，我真係要好有錢．．．

努力！！！

集體逃學

繼尋日將 15mins break 變做 45mins break 之後今日又有新攪作，集體逃學。
哈哈！無端端多o左大半日假放。
呢班後生o既同學仔(十七八歲)有時真係幾搞笑。
雖然我呢位老人家好多時都同佢o地格格不入，但佢o地的確帶到好多歡樂俾我。

詳細情形係點唔寫喇，懶。

最近一首幾有意思o既歌

at17 - 才女

http://s9.yousendit.com/d.aspx?id=0QWW1OVYLUC73KWMWBUA4CT3H

歌手：At 17 作曲：林二汶@At 17
填詞：于逸堯@人山人海 編曲：梁基爵@人山人海

世界不知不覺無情地轉　勞碌找一個救生圈
靠美德博學還離岸很遠　用美色多勝算

可惜我只配談文字戀　強項得書信對白婉轉
講曲線體態自然落選　憑面相難完心願

蕭伯納　王爾德　但丁
莎士比亞　馬奎斯　小仲馬
請指點我去用情書將心扣住
辛棄疾　矛盾　魯迅　蘇軾
求可體恤我筆尖的計算
長話盼　盡說短　人海中等惜字緣

交心的戀愛漸成歷史　唯獨我堅信愛像種子
悉心栽花卻換來白紙　才用眼淚來寫字

伊索　屠格涅夫　狄更斯
歐威爾　艾可　卡爾維諾
幾本書的背後埋藏著我心事
張愛玲　曹禺　老舍　冰心
如果早幫我寫命運情節
從未怕　命太短　惟恐寫不好那段緣
盼成全

大檸樂，晶哥從此要o係高登潛水

大檸樂了．．．

上星期，我見我o個兩個香港同學上 2000fun，諗住今次安心啦，唔會俾人認出。上星期五朝早開台時仲大大聲話唔鍾意群香港學生云云。點知．．．今日俾我見到佢o地上高登。

放 break 傾偈時我見到佢o地上高登，我唯有扮視而不見完全冇反應眼尾都唔望一下。

到放學時，佢o地問我拎電話號碼同 msn，我初時都唔為意，講完電話號碼之後差o的順口o翕埋 jinggor.iinet.au ... 好彩收得切口，話我唔用 msn 只用 icq 仲要係俾另一個 a/c。差o的瀨o野．．．

有朋友話我把聲咁易認，好有可能已經俾人起o左底。

為安全起見，晶哥都係從此o係高登潛水比較好。

我真係唔想身份曝光，會很困擾的．．．

晶哥電台？真係有緣先再見．．．

八小時極限

每日淨係訓到八個鐘，唔係冇時間俾我訓，而係我一訓到八個鐘左右我就再訓唔到落去。依家即使係星期六、日、一呢o的唔駛返學o既日子，我晨早八、九點就起o左身。

但其實我仲係好眼訓，其實我雙眼仲係好‘支力’的。

而且好多時都訓得唔好，成日發夢，天馬行空，夢見死o左o既大姑媽，又夢見我扮女人做臥底去捉o個個爭我屋企錢o既五叔。


真係人都癲．．．

求甚麼？

唔係求咩名留青史，但都不至於要淪落至此卦？

方龍就 話我o既行為反映出可能係我自覺已經付出得太多所以先會咁諗。

我都唔知．．．

唉．．．電台．．．

多謝 方龍就。