Kate Beckinsale

想寫

返學o既日子，每日都一樣，冇乜特別。

唔駛返學o既日子，更加係每日都一樣，更加倒模，食痾玩訓，更加冇乜特別。

想寫，但冇o野寫。

就好似，想死，但死唔去咁。

不過我冇想死。

失策

失策，買唔到 Australian Open 2007 o既飛．．．

仲諗住離開澳洲前去現場感受下網球比賽o既氣氛。

因為如果 07 年唔去，都唔知幾時先再有機會。

Australian Open 2007

放假

由今日起，放暑假兩個月！

【更改日期】晶哥電台錄音將會停止提供下載

【更改日期】

《晶哥電台錄音下載》將於十一月二十號開始停止提供下載！

【取消】有冇人想租 web-hosting？

【取消】

有冇人想租 web-hosting？

約 US$1/month (webspace 100MB, bandwidth 2000MB)

聯絡：晶哥

icq: 3716974
msn: jinggor@iinet.net.au

PSP Games

Pro Evolution Soccer 6

PSP

Scarlett Johansson

由睇完《Lost in Translation》開始，就鍾意o左 Scarlett Johansson；
之後睇過《In Good Company》、《The Island》，
依家等緊《Match Point》正版碟同埋《Scoop》上畫。

講靚，佢唔算好靚o個隻，荷里活大把女明星靚過佢；
講氣質，佢又唔算好有氣質o個隻，荷里活大把女明星有氣質過佢；
講演技，佢亦都唔算好好，荷里活大把女演員好演技過佢；
但係偏偏我最鍾意就係佢。

合眼緣呢樣o野，係冇得解釋o既。


　　　

Scarlett Johansson

未婚爸爸

最近好想做老豆，唔係好肯定點解。

可能係因為前排見到o的 BB 好得意；
又可能係因為想o係平淡兼沉悶o既生活入面有轉變兼突破；
又有可能係因為我老豆響我呢個年紀o既時候已經做o左老豆，所以我都覺得我都係時候。

對於『結婚』，雖然我覺得承諾係講心而唔係靠張紙，但好讓女方有個名份兼安心，簽隻字，我冇所謂。

至於『影結婚相』、『行禮』、『接新娘』、『擺酒』等等呢類做俾人睇供人娛樂而自己又唔快樂o既『馬騮戲』，暫時真係免問，我接受唔到。

假期完畢

兩個星期o既假話咁快就放完。

冇乜做過乜，亦唔記得做過乜。

放第一個星期假o既時候好唔慣，日日都百無聊賴唔知做乜好，寧願有學返。

到第二個星期o既時候又已經習慣o左百無聊賴，日日數住剩番幾多日，希望個假永遠唔會完唔駛返學。

唉．．．

AFL

有朋自遠方來

今日有個朋友o黎o左墨爾本，公幹。

佢會留o係悉尼幾日，只係落o黎墨爾本開會，逗留幾個鐘。

收到佢電話時的確嚇o左一跳。

認識呢位朋友都應該有十年，冇見面都起碼有六年；
住o係香港而仲有聯絡o既非網上朋友應該只得呢位；
咁多年來真真正正了解我o既朋友應該亦只得呢位。

最終，我o地冇見面。

因為我。

《三國志十一日文威力加強版》

尋晚o係網上左摷右摷之後左搞右搞搞o左成晚終於成功 download 番《三國志十一日文版》兼 update 到最新 version 再升級到 《威力加強版》。

跟住再搞搞新意思拎埋隱藏歷史人物之後決定用 贏政 再戰江湖，手下有 岳飛、霍去病、蒙恬、鄭成功、劉邦、項羽、呂尚、張良、韓信、藺相如 等等，鬼五馬六(定 鬼五馬鹿？)！

其實《威力加強版》都冇乜特別，不過玩番《中文版》又悶，唔玩咩？仲悶；所以唯有悶住咁玩《威力加強版》。

昂坪 360

上星期偶然睇到亞視新聞講有關昂坪纜車開幕o既新聞。
(逢星期二至六 6:00am SBS 都會轉播前一晚o既六點鐘亞視新聞 - 中文)

睇完之後好想坐，似一個遊客o既期待心情。

最後一仗

置頂：紅豆沙研究及討論

回 yume：要煲到唔見豆？唔會唔太沙？我今次煲o既時候其實o的紅豆已經爆到九彩。

回 sivots：o的紅豆要浸幾耐？

回 sius：我只會食凍o既紅豆沙，所以呢次明顯係太少水了。

p.s. 我懷疑我落得太多豆；我落o左成包紅豆，約一飯碗。

紅豆沙

第一次煲紅荳沙，味道、口感算唔錯，可惜太少水。

下星期再鑽研再煲過。

２８℃ → １８℃ → ２６℃

尋日最高２８℃，尋晚係咁依落一場雨就令今日最高得１８℃，
聽日又上番最高２６℃。

天氣反常，忽冷忽熱，唔多過癮。

通宵達旦、統一全國

由星期五晚開始，每晚都通宵達旦咁打《三國志11》。

由日文版到中文版，我都未打爆過機；
未打爆過機並唔係因為難玩打唔爆，而係冇耐性；
須知道《三國志》系列o既遊戲係相當消耗精神同時間；
我每次一玩到個國家強大知道贏硬我就冇心機玩落去而再開過一局。

o係今個假期內我一定要打爆一次，統一全國！！！

暫時總時間：26:37:15 (17/09/2006)

兩星期假

放假兩星期，仲要係冇功課，何其自在，盡情享受。

英超與我

由開咧以來已經想講下今季英超，可惜因為懶，一拖就拖o左幾個星期直至依家。

今季英超預計應該會相當精彩，因為大部份隊伍都積極擴軍，轉會市場臨閂之前o既轉會更加係意想不到o既震撼。

我冇裝 cable，唯有用 ppstream 睇。

第一週興高采烈咁睇 LIVE，仲 BT 煲埋一個鐘o既英超精華；
第二週 hea 住咁睇 LIVE，hea 住咁睇英超精華；
第三週唔睇 LIVE，BT o左英超精華冇睇。

坐o係電腦前面用 ppstream 個細 screen 睇波實在係太辛苦，興趣大減，寧願唔睇，再精彩都係咁話。

尋日有朋友約我今晚一齊去 Bar 睇波，雙料大戰，
Chelsea vs Liverpool + Manchester United vs Arsenal。

我循例都係是但搵個理由推o左佢，因為始終都係唔鍾意群體活動兼怕去人多o既地方。

結果，我都係一條友對住個細 screen 睇晒兩場波，仲幾 enjoy 添；
我原本以為我唔會睇，但始終敵不過骨子裡的那條波癮。

睇完波即手痕想踢番場 winning，可惜自上次 patch 完之後隻 winning 成日 hang，次次臨完場先跳 game 勁無癮。

期待 PES6，仲有一個月就出，等！！！

奇華 vs 榮華

由細到大食開 『奇華』，過到墨爾本轉食 『榮華』；
因為未見過有『奇華』賣。

由細到大食開 『奇華淨蓮蓉』，過到墨爾本轉食 『榮華雙黃蓮蓉』；
因為女朋友要食有黃。

尋日去 Box Hill (一個華人社區，全廣東話社群見華人多過見西人)，
駭然見到曾志偉奇華月餅海報，簡直係如獲至寶，
二話不說立即買番個回味一下。

左揀右揀之下結果買o左一個迷你蛋黃蓮蓉月，
細細個，又唔太貴，少食多滋味。

一盒四個標準裝實在太貴唔捨得買，而且隨時食唔晒浪費。

奇華迷你至尊月餅

高登死 server 之『第一收容所』

我好慶幸『網電』再唔係高登死 server 時o既難民『第一收容所』；
可能係因為好多人都唔知『網電』已經開番，
又或者依家o既 高登人 唔知咩係『網電』。

無論係咩原因都好，我都係高興o既。

我寧願『網電』齋擺冇人去，都唔想『網電』做後備；
正如我一向冇興趣做一群『觀音兵』入面o既其中一個，
又或者如果我係女人我冇興趣做『二奶』一樣。

做『情婦』或者可以諗下，性質唔同亦似乎比較高級。

高登死 server 之『遊魂野鬼』

每次高登死 server，網上就會出現一批『遊魂野鬼』無處容身；
有o的『遊魂野鬼』會去其它討論區寄居、暫住；
有o的『遊魂野鬼』就會o係 icq, msn 不斷呻悶兼問其他『遊魂野鬼』入得番高登未；
有o的『遊魂野鬼』就會化成『厲鬼』到處攪事、破壞；
有o的『遊魂野鬼』就會睇準個勢藉此上位想做『鬼王』，五花百門無所不用其極。

幾年o黎都係咁，冇乜點變；
唯一變o左o既，可能係我已經由『鬼』變番做『人』。

『遊魂野鬼』恥笑『高登 admin.』，
但放眼一望，『高登 admin.』應該係笑得最開心o個個。

一日貨仔之杯

話說尋日行超級市場，俾我發現到下面o個隻可樂杯孤單單咁o係個架上面，一見即愛上，仲要係減價，AUD$4.95，即買，因為一向都想擁有一隻 FREEZE MUG 。

滿心歡喜咁返屋企將隻杯洗乾淨之後放入冰格準備今日飲冰鎮可樂。

點知今朝訓醒一打開冰格時發現隻可樂杯凍到裂開o左，將佢溶雪之後仲滲o個o的唔知咩液體出o黎；好彩有 keep 住張單，可以拎返去換。

拎到返去超級市場，一 check 之下發覺原來真係剩番一千零一隻，唯有無奈地 refund。

之後返屋企上 eBay check，亦搵唔到有人賣呢隻可樂杯；
有o的失落．．．

COCA COLA EZY FREEZE MUG

希望工程

希望會成功o既工程．．．

經歷、見證

相比起亞爺亞麻亞爹亞娘，我o地呢一輩所經歷o既o野可能唔算多，但我o地都見證o左好多歷史時刻。

97回歸、千禧年、911、金融風暴、沙士、禽流感、南亞海嘯、Bali bombing、英國巴士及地鐵炸彈爆炸、穿梭機升空爆炸、各國戰亂、名人去世、曼聯三冠王、Japan & Korea World Cup、Zidane headbutting 等等。

雖然好多事我o地冇機會參與，但有幸見證每件事件發生都算係一件幸福o既事； 因為歷史過o左去就唔會再返黎亦冇辦法改變。

我o地o既下一代，好有可能會見證『世界末日』o既發生，到時人類亦都會變成歷史。

後補：六四事件

911

尋晚睇o左一個有關 911 o既電視節目。

呢個電視節目主要係將 911 發生時o既世貿中心入面o既情況拍番出o黎；
架機點撞、撞邊層、撞完對世貿中心結構有咩影響、撞擊時o的人做乜、撞擊後o的人做乜、o的人點走、o的人點唔走、o的人點被困、o的人點救人、o的人點逃生、o的人點死、訪問生還者、訪問死者家屬、訪問消防員．．．等等。

唔講唔知，原來有好多人為o左救其他人而犧牲；
唔講唔知，原來有好多人執番自己條命之餘亦同時救o左好多其他人；
唔講唔知，原來有好多人o既一個錯誤決定而害死好多其他人。

睇完呢個電視節目o既時候我o係度諗，
其實呢類咁o既災難又何必要成日回顧重提丫，
回顧重提只會為人帶o黎唔開心o既回憶，
唔開心o既o野，收埋o係心又或者忘記佢咪算囉。

Steve Irwin vs John Howard

呢兩日三個主要電視台都係咁播 Steve Irwin o既o野。

Steve Irwin o既死，可以話係令澳洲舉國哀傷。

由尋日朝早六點開始，已經不斷有來自澳洲唔到地方o既人去到 Steve Irwin o既動物園出面獻花；o係動物園外面大大細細喊唔停o既人更加係多不勝數。

睇見呢o的場面，真係有o的黯然．．．
我諗就算 Prime Minister John Howard 死都唔會令咁多人傷心。

對於 Steve Irwin，我冇乜特別感覺，我亦冇睇過佢o既電視節目，只知道佢係一個癲癲o地o既鱷魚先生；可能o係九年前去 Queensland 旅行o既時候睇過佢表演都未定，不過我已經忘記o左。

Steve Irwin 1962 - 2006

澳洲鱷魚先生被「魔鬼魚」襲擊身亡

(星島) 09月 04日 星期一 01:41PM

澳洲國寶之一、聞名於世的鱷魚先生艾榮（Steve Irwin），不幸在澳洲東北岸海域遭到刺魟(俗稱魔鬼魚)襲擊死亡。

當時艾榮正在大堡礁拍攝一部水底紀錄片，但遭刺魟刺中胸口喪生。

事發於周一，艾榮在道格拉斯港附近的大堡礁拍攝一套水底紀錄片期間，突然受到刺魟襲擊，被刺中心臟。

雖然一架直升機曾為他送來藥物，但他最後仍返魂無術。

44歲的艾榮是 Discovery動物星球頻道節目主持人，也是昆士蘭省境內的澳洲動物園園長。

他在澳洲可以說是當地的國寶級人物，一下澳洲機場，往往會發現他的海報及人物招牌。

艾榮以「徒手捕鱷」打響名堂，早在十多年前，已開始為電視頻道主持有關捕捉鱷魚的節目，更奪得「2004年昆士蘭澳洲風雲人物大獎」，在澳洲可算無人不識。

修身齊家治國平天下 之『修身』

『修身齊家治國平天下』，我o係好細個o既時候已經聽過呢句o野，亦都知道呢句o野點解。

話說尋晚幫o個個已經掉埋一二邊好耐o既電子磅換電，換完電就當然係順便上去磅一磅o架啦。

唔磅由至可，一磅就連自己都嚇一跳。

原來我體重o既數值已經升到同我o既身高一樣！！！

肥斯大隻唔願郁，又點可能『齊家治國平天下』呢？

我真係要開始『修身』了．．．

變變變，冇生命力

爹娘o係好多年前已經同我講話我要變下；
身邊o既人o係好多年前已經同我講話我要變下；
身邊o既朋友o係好多年前已經同我講話我要變下；
我o係好多年前都已經自己同自己講話我真係要變下。

卒之，三年之後又三年，三年之後又三年．．．無論我應承過幾多次都好，結果我都係冇變過。

我o既解釋兼藉口係，如果我變o左，咁我咪再唔係我？！

變，似係滿足他人，多過滿足自己。

其實，我真係冇諗過去變；
但我似乎又真係有需要去變．．．

又再強項

1. 拖
2. 食

再強項

1. 小器
2. 小家
3. 記仇

強項

1. 偷懶
2. 搵藉口
3. 變卦

第七隻老鼠

呢隻老鼠可以毫無動靜咁足足捱o左兩個半月先出現，認真利害。

點解仲有．．．

呀 ~

又係功課測驗一齊o黎o既日子，
會持續兩個禮拜，
齋諗都已經想死。

61082

去睇一個朋友o既日記o既時候忽然記起呢堆數字，應該冇記錯．．．

HD & PSU

等o左足足一個月，隻 250GB HardDisk 終於有得拎；
雖然可以換到隻新o既 HardDisk，但今次o既服務質素就認真麻麻。

次次遇到呢o的情況o既時候劉德華又會o係腦中浮現兼講句：『今時今日咁既服務態度．．．』

尋日收到電話，今日一放學就急不及待去拎番隻 HardDisk；
再順路o係屋企附近兩個街口之隔間電腦雜貨鋪買埋隻新火牛。

之前可能係因為隻牛唔夠力而影響到隻 HardDisk 有問題；
事後經計算我發現我部機最少要行 380W，但我用緊隻 300W o既火牛．．． 勁哩！

兩個街口之隔間電腦雜貨鋪o既服務態度認真一流，
但返到屋企上網一 check 之下先發覺今次隻火牛可能買貴o左o的(平時佢o的野係比出面平的)，太心急之過；
平時買電腦o野我會四圍格價的，非常『師奶』。

不過，我心急買唔心急砌，
因為醒起下星期同再下個星期有好多功課交，
萬一整瓜o左部機冇得用就『大檸樂』了。

但唔砌，每晚都要將新 download o既 files o係 HardDisk 之間搬o黎搬去騰空o的位先可以再 download 新o野，又非常煩．．．

o的 HardDisk 加加埋埋成 500GB 都唔夠用，我諗我梗係有o個o的咩咩 download 症候群。

又《三國誌十一》

最近又瘋狂咁玩《三國誌十一》，今次係中文版。

中文版比日文版好，唔關睇唔睇明o的字事，
而係中文版已經 update o左，冇日文版咁易玩；
雖然都係好易玩。

再玩《三國誌十一》o既另一個原因係因係踢 Winning 已經踢到好悶，
裝o左 patch 之後又間中跳 game，重裝都係咁；
有時一場波要踢幾次，勁冇癮。
PES6 又要等到 20 Oct 先出．．．

《真?三國無雙４ Special》又只係漫無目的咁斬斬斬，又係悶到暈。

雖然玩《三國誌十一》都係悶，但總好過上面兩隻同冇o野玩。

寓興趣於搵錢

自從討論區重開之後，再加上近日高登o既動態，
我腦入面沉寂o左好耐網上電台計劃又再死灰復燃。

越諗就越有趣、越諗就越大規模、越諗就越大野心、越諗就越覺得可行。

好多人話，如果你o既興趣即係你o既工作就真係三生有幸；
我越諗就越覺得如果我o既興趣可以搵大錢就更加係冇得頂。

不過乜都係假，點都要等到返o左香港先有得搞；
求神拜佛希望唔會有人o係我返香港之前搞o左個計劃就得喇。

斷正

從 口水堅 口中得知最近高登所發生o既事。
(佢都算係夜鬼之中碩果僅存仍然活躍於高登o個個)


以我所知借電台或討論區過橋『媾女』而最後『斷正』o既正式增至第四人。

暗啞底蠢蠢欲動或明目張膽流晒口水o既『觀音兵』更加係數之不盡。

一眾饑民浮出水面只待『觀音』反轉豬肚之時。


呢o的事，聽見都真係得啖笑．．．

過客

今日上堂時望住班同學，發覺人與人之間的確好容易產生誤解；
尤其係唔同種族唔同國藉唔同文化。

通常我都懶得嘗試解釋去化解誤解，
因為我知道我身邊大部份o既人都只不過係一o的過客。

今日同佢拗或解釋，可能由聽日開始你就呢世都唔會再見到佢；
咁又何必o徙口水。

今日有人對你有誤解，可能佢到下星期都仲會對你有誤解；
一個月後佢可能只記得你呢個人而唔記得誤解呢件事；
一年後佢可能連你係邊個都已經唔記得。

一生人入面o既過客，多到數唔晒，亦記唔晒；
當你唔記得佢時，佢亦唔會記得你。
所以一切關於過客o既事，又何必去記去著緊；
慳番啖氣好過。

當我唔夠訓時．．．

當我唔夠訓時．．．我會遊魂

當我唔夠訓時．．．我會木口木面甚至黑口黑面

當我唔夠訓時．．．我會脾氣暴燥

當我唔夠訓時．．．我會變啞或變得更串

當我唔夠訓時．．．生人勿近

夜鬼

差不多死晒．．．

眼花、頭暈

有三個朋友o既 Blog 都不約而同咁用黑底白字

每次睇完再睇其它網頁時都會眼花

如果一口氣睇晒三個 Blog 之後再睇其它網頁仲會有o的頭暈o既感覺．．．

ICQ：N/A MSN：Away

知唔知 ICQ:N/A 同 MSN:Away 有咩用？
唔o知既話可以按個 Help 睇下
再唔掂o既話就查埋字典

唔該唔好再投訴我響 N/A 或 Away o既時候唔覆你 message

人o地響 N/A 或 Away o既狀態之下覆你 message 係人o地o既事
o的人鍾意裝假狗掛羊頭賣狗肉玩另類係人o地o既事
唔好套落我身上

當全世界大多數o既人都將歪理當成道理o既時候唔代表歪理已經變成o岩

戇居

好多人都鍾意作出假設同估計
尤其係鍾意假設同估計自己o係其他人心目中所佔o既位置

假設同估計對方討厭自己
假設同估計對方對自己有好感
假設同估計對方好鍾意自己
假設同估計自己好重要

通常呢o的假設同估計十居其九都同事實不符
而且知道真相之後往往令自己失望而回
非常戇居

曾幾何時，我都戇居過
依家，其他人點睇我點諗我重視我與否覺得我重要與否我都唔會再理
理少一樣、煩少一樣

我，係為我自己而活

所以，唔該你唔好假設同估計你o係我心目中所佔o既係咩位置
因為，冇意義
更何況，你估我唔到

公平、破例

張文 o係 msn 鬧鬼我『衰人』話我唔 send message 話佢知我開台
以前有另一個 hkgolden user 又係成日咁話我，叫 Den佬仔
我已經同佢o地講o左八千幾次(電影《暗戰》對白)我開台唔會響 icq 同 msn 狂 send message 大肆宣傳話俾人知我依家開台喇
不過佢o地每次都重覆又重覆咁鬧
而我又重覆又重覆咁講多次

其實好簡單
只要我 send 一個簡單 message
事情就可以解決

不過，我唔想『破例』
因為一『破例』，就會出現『不公平』
而且，通常一『破例』，就會有好多麻煩事接踵而來
只要望下全世界o既政府同你自己試過『破例』你就會知

如果我由依家開始『破例』每次開台都 send message 俾 張文
就即係構成過去兩年對 Den佬仔 o既『不公平』
雖然呢個世界本身都冇乜『公平』可言
但我都唔想參與踩多腳

你可以話『你唔講，Den佬仔 點會知』
唔好意思
有我自己知已經夠
打破原則已經夠唔好受

你又可以話『張文 係你好朋友喎，點同』
唔好意思
我好一視同仁
o係某些層面上面，個人原則較為重要

我曾經試過『破例』，所以，依家怕了．．．

11:11

呢排成日都見到四條一
床頭個鐘，微波爐個鐘，Windows 個鐘
係巧合

我每次見到四條一o既時候個人都會定一定
因為，我第一次追o既女仔o既生日係十一月十一號

已經過o左十幾年
佢係咩樣我已經冇乜印象
o係街撞到都唔會認得o個隻

但人對某o的代表某o的o野o既o野係刻o左o係個腦度唔會忘記o既
例如：四條一
又例如：麥香雞、凍檸茶、凍奶茶
每樣o野都係代表一個人
唔會忘記，刻o左入腦，直到死o個日

《North Country》

《North Country》(譯：對抗性侵犯)

又一套真人真事電影
又一套想睇好耐o既電影
冇令我失望，但亦冇預期中咁好睇
去得太慢兼略嫌唚氣

查理絲花朗(Charlize Theron) 演得好好，影后真係影后
片中唔靚女，但仍有魅力



劇情介紹：
由查理絲花朗飾演的女主角艾祖絲，婚姻失敗後帶著兩個兒女回到明尼蘇達州的老家，為了讓兒女有更好的生活環境，她希望能到鐵礦場謀生。
在窮鄉僻壤中，這樣的礦場幾乎主宰了整個地方社區的經濟命脈，甚至影響著千絲萬縷的人事網絡。艾祖絲在好友歌莉的幫助下終在礦場找到了工作，並已作好了心理準備，接受所有皮肉折磨的危險性工作。
但在一向由男性主宰的礦場裡頭，女性地位從來低微，在粗獷性的男人圈子內，女性備受歧視欺凌，甚至性騷擾亦只屬平常。
祖絲在不平等的環境下企圖強忍，但最後終於燃起引爆點，決定向龐大的礦工集團挑戰，作出有史以來對性侵犯名義的最大控訴。
但她的舉動將令她眾叛親離，甚至連至愛的人亦會受到傷害。一個弱質女子與橫蠻力量的對抗，將徹底改變美國的性騷擾法例，影響震撼深遠。

G2G網上電台討論區

G2G網上電台討論區

G2G網上電台討論區 係 G2G討論區 同 網上電台討論區 o既合併版
討論區重開o既主要原因係俾 G2G 同 網電 o既會員有一個地方再次聚頭吹水

我冇任何計劃
就算有都等下年返香港先搞
重開討論區只為一班朋友
無它

日式牛肉炒烏冬

我開始找到煮o野食o既樂趣．．．

失眠夜無里晶神是但搵哥播電台

把乜鬼，都唔知做乜

失望、失落、無癮，但又有邊個知？

其實只要我自己同關心o既人知就夠

唔關心o既人，關我叉事

詩萊雅 重點淨白黑頭導出液

久仰呢支o野大名

終於空運到墨爾本，兩盒連郵費 HK$105.5

唔該晒 亞蟬 (BusyBee)

非常感激 ~

麻煩晒 維他仔 幫我找數

Thank you so much ~

Community Shield - Liverpool vs Chelsea

社區盾 - 利物浦 vs 車路士

利物浦 - 賓尼迪斯 的確有料，今季買o既人每個位置都恰到好處，為個陣同戰術而買人，買o岩駛而唔係買大牌，後備兵源充足，相信今季可有一番所為，聯賽再唔係 車路士 o既獨腳戲。

車路士 - 摩連奴 都係有料，可惜老闆有水可以大聲過佢，今季買o既人每個都係名牌，買大牌而唔係買o岩駛，因為買o左o既人而要變陣同戰術，後備兵源過份充足(左後衛 除外)，相信 摩連奴 都要一段時間先可以執正隊波；聯賽冠軍尚算穩陣，歐聯嘛．．．今季再拎唔到 摩連奴 隨時執包袱。

今晚 利物浦 贏係應該o既。

夢境成真？！

呢排成日發夢，每次o既內容都好震撼好迫真。

例如：跌落山、斷o左手．．．同埋一o的人際關係故事性轉變之類．．．

次次發夢發到扎醒o既時候都分唔到究竟係事實定發夢；
o個種真實感真係前所未有。

原來，夢境成真可以好恐怖。

更多《The Assassination of Richard Nixon》

Website:
http://movie.grouppower.com.tw/nixon/

劇情介紹：
1974 年， 44 歲的山姆畢克（西恩潘）過得並不順遂。他敬重他的兄長，兩人卻因理念不同而鬧翻；他深愛分居的妻子瑪麗（娜歐蜜華茲），但瑪麗對他的態度越來越冷淡；他生平最痛恨說謊，新工作卻是以誇大欺瞞為家常便飯的銷售員。換句話說，在家庭與職場上，山姆都是個不折不扣的失敗者。

唯一讓山姆感到未來還有一絲光明的，是他與黑人好友邦尼（唐奇多）的創業計畫。山姆將所有的希望都寄託在這個計畫上，他相信只要貸款申請一通過，他便能順利開店當老闆，實現誠實經商的理想，與別人一同享有美國夢，並挽救他已經破碎了一半的婚姻。

然而貸款審核的緩慢，令山姆越來越焦躁不安。他越來越憤世嫉俗，越來越不滿他目睹的許多現象。終於，離婚通知書與貸款申請駁回通知書相繼寄達，對山姆的人生宣判了死刑。一切都是體制的錯，是這個體制長了瘤。要改變這個生病的體制，唯有將它連根拔起。而做法則是…

山姆想起了他的老闆口中「史上最厲害的推銷員」－ 美國總統尼克森。

1974 年冬天，山姆畢克決定在歷史上留下痕跡，他將以一個前所未有的驚人之舉，消滅這個世界上所有的不公不義。

Torrent:
http://www.yousendit.com/transfer.php?action=download&ufid=41CEB8AE22A7A8CC

《The Assassination of Richard Nixon》

《The Assassination of Richard Nixon》（譯：謀殺尼克遜）

今晚睇o左呢一套於 2004 年有份參與康城影展由 Sean Penn (辛潘)、Naomi Watts (妮奧美華絲) 主演o既電影，非常掂。

我唔知香港有冇上畫或會唔會上畫。

套戲係取材於真人真事，講美國好多年前o既社會狀況，例如：越戰、種族歧視等。

我對美國o既政治同社會狀況所知不多但略有所聞；睇o既時候雖然冇身同感受但都心受感染。

另外，Sean Penn o既演技真係無得頂，拍爛手掌；
Naomi Watts o係兩年前真係好平凡，紅o左之後真係連樣都變埋。

頹

頹廢中．．．

Final Destination 1, 2, 3

《死神來了》《死神又來了》《死神再3來了》

睇《死神再3來了》之前，為o左增加連貫性，所以重溫先《死神來了》同《死神又來了》。
因為我已經完全忘記晒第一、二集o既故事內容，淨係記得o的人逐個死。

其實除o左第一、二集o既人有些少連繫之外，第三集完全係另一個故事；
而且一集不如一集，非常失望。

第一集入面o既死亡設計真係冇得頂。