慘過死

有咩係慘得過死？

有好多。

因為其實死一啲都唔慘。

都已經死咗，仲有咩慘唔慘之分。

如果死咗之後仲有咩下一世咩輪迴咩上天堂咩落地獄之類。

咁死就真係慘喇，原來死咗都仲有排捱．．．

(曾經講過：http://hide-myself.blogspot.com/2009/03/blog-post_22.html）


今日響度諗，有咩事對我嚟係慘過死。

盲咗睇唔到戲。

聾咗聽唔到歌。


諗諗下，其實仍然生存響世上其實已經慘過死．．．

家家有求

我同我老豆都係「戲痴」。

我哋兩個每年睇戲嘅數目加埋應該過百部。

不過我睇「高清」，佢睇「低清」。

佢主力睇西片，任何戲種都啱，所以只會買西片嘅「ＶＣＤ」。
無錯，係「ＶＣＤ」。
用一部６５吋嘅大電視去睇係「ＶＣＤ」。

間中佢都會睇下大制作嘅港產片，係我買嘅。

我港產片、西片都睇，偏好港產片。
只有恐怖片我係唔會睇，因為我唔想「貼錢買難受」。
我多數都會買「ＶＣＤ」，因為依家啲戲嘅內容質素太無保證，一開始就買ＤＶＤ或者 Blu-ray 實在太冒險。
如果係一套好戲，我一定會買ＤＶＤ或者 Blu-ray 收藏。


我哋屋企有裝有線，有兩部機頂盒：
一部有高清、一部冇高清。

每次我都要睇「高清」英超，佢就話「高清」同「低清」睇落冇咩分別。

我心諗：你係包拗頸定你對眼有事？


好認同 李力持 講過嘅一句說話：有「高清」我做乜仲要睇「低清」呀！

記憶猶新

我成日覺得，人嘅記憶好多時都唔到自己去選擇。

記唔記得一個人、一件事，似乎都係無得揀。

好多時你想記得嘅嘢就點都諗唔起，想洗腦想忘記嘅嘢就偏偏好似刻咗響個腦度咁。
（例如 初戀/前度情人嘅生日日期）

但可能因為係曾經重要過嘅嘢，所以你想洗都洗唔走。


最近睇咗套戲《前度》，盒面寫住「給戀愛超過一次的人」。

都幾貼切。

一路睇，係一路會有回憶。


今日，係我前度生日．．．

身不由己

有冇試過坐監？

有時唔一定係入咗監房坐監先至有坐監嘅感覺。

因為當你成三十歲人仲同緊父母住時，都可能會有相同嘅感覺。

例如：

無人將你自己間房當成係你間房，會視之為另一個客廳將之共享。

你放假時嘅私人時間，唔知點解會被家人嘅時間表支配咗而你又無得反對從而令你無法做自己想做嘅嘢。

諸如此類。


有時我會覺得我係一隻被人養嘅雀住係一個雀籠入面．．．

初三 - 口不對心

幾乎每逢節日見到親戚，言談間都少不免會觸動到我嘅婚姻大事呢個話題。

響農曆年嘅時候就更甚，因為我仲收緊利是。

通常都係出現以下對白。


甲：「祝你快啲娶老婆，下年到你派喇。」
我：「哦！好呀！好呀！承你貴言。」之後收佢利是。
（心嗰句：「我連女朋友都未有。而且都唔打算結婚．．．」）


今年有個人仲搞嘢。

乙：「祝你快啲娶老婆，快啲生番個『兔仔』或者『兔女』等你亞媽抱孫。」
我：「下？急成咁？咁急都唔慌好嘢啦。」
乙：「車！有咩所謂呀？」
我：「下？哦．．．」之後都係收佢利是。


點解明知我冇女朋友，都仲硬係要撩嚟講．．．

初二 - 開口中

我娘親係一個口直心快，思想簡單嘅人。


話說聖誕節時我舅父話農曆年時會去佢哋個叔婆度拜年。

我娘親聽見之後就講：「叔婆未死咩？」

大家當場Ｏ晒咀。

娘親補充：「咁佢好老啦嘛！」

大家都明白我娘親唔係咒佢。


尋日初一同我舅父拜年時，我舅父同我娘親講：「你叔婆過咗身喇。」

大家目瞪口呆問係幾時嘅事。

舅父：「聖誕前」


我即時諗起我亞娘嗰句開口中嘅「問候」．．．

初一

對於農曆新年，我嘅抗拒感無咁大。

雖然我都係唔覺得俾人恭喜完發財，祝完身體健康之後會成真。

但點都好過新曆年時啲人覺得個鐘行前一秒之後個世界會忽然轉變。

而且又有利是收，現兜兜夠實際。


更重要嘅係，農曆年有一家人團圓嘅氣氛。

一家人開開心心聚埋一齊，千金難求。

女人味

周慧敏，我學生時代嘅「玉女獎門人」。

當年，我鍾意嘅唔係佢。


尋晚無線有個《周慧敏．最愛V25》嘅節目。

周慧敏 響入面唱嘅每一首，原來我都識。

今日嘅 周慧敏，仍然係咁靚。


早排睇咗《得閒炒飯》，響入面嘅 周慧敏，又係好有味道。

反而到咗今日，我先開始鍾意 周慧敏。

《再說一次我愛你》

道地星期日影院播《再說一次我愛你》

好鍾意呢套戲，於是唔打機，重溫一次。


當年一睇完呢套戲，立即上網訂咗ＤＶＤ，仲要係特別版。

因為隨碟附送戲中嗰條魔術鍊 - 明日環。


鍊，早送咗出去了。

碟，還在我家．．．

一首歌一個畫面一隻碟

有冇試過因為一首歌、一個畫面而買一隻ＣＤ、ＤＶＤ、又或者係一套戲？


依家啲碟舖做新碟 promote, 都會重複播住同一段不斷 loop...

例如：葉問２甄子丹對洪金寶、黃子華棟篤笑中唱歌 等等。

早排響旺角返學時都會經過一間影碟舖，就播住以下呢一段。




我一向好少停步企響碟舖門口睇，呢次係第一次。

《飛女正傳》呢首歌一向識，但其實冇深究歌詞內容。

直至我見到 丁子高 對住 楊千嬅 情深款款咁唱呢首歌。

我終於了解歌詞嘅意思，同埋我見到「愛情」同「婚姻」。


最後因為一首歌，我買咗一隻碟．．．

請飲

又有朋友結婚，今年９月。

返香港三年，只係出席過兩個婚禮。

一次係堂妹結婚（之前講過），一次係知己結婚。

推不得。

其餘被邀請出席嘅婚宴，我全部推晒。

好怕呢啲場合。


我今日無聊響度諗，假如有一日我有幸結婚請飲，我個婚禮會係點。

諗到幾樣：

我想著中式禮服。（亞旺？）

班「兄弟」，應該真係會係我班「兄弟」，一班表兄弟。

會擺幾十圍，但我邀請嘅朋友應該會坐得一圍，其餘啲人我都係唔識嘅。

我自己做 MC。

我一定會上台唱歌俾老婆聽，逼其他一齊聽。

有早知就無乞兒？

間中都會留鬚，因為想「懶型」同「扮滄桑」。

每次亞媽見到我無剃鬚，都會講：「你去做乞兒啦」。

我諗唔通有咩關係。

唔通財爺又係乞兒？

雖然可能有啲人真係會咁形容佢。


有時響街見到乞兒，我都會諗起一句說話叫「有早知無乞兒」。

其實我一直都有一個疑問，點解啲人最終會做咗一個乞兒？

可能係佢嘅遭遇令到佢無得揀。

但我總覺得有啲乞兒係自己選擇做乞兒嘅。

所以即使「有早知」，都總會「有乞兒」．．．


啲《鏗鏘集》《新聞透視》《星期日檔案》唔知有冇做過「本地乞兒」嘅專訪呢？

唔係嗰啲由大陸輸入嘅全職乞兒同胞。

《Eyes On Me》

執屋時搵到一隻３吋ＣＤ，王菲 嘅《Eyes On Me》。

《Eyes On Me》，係遊戲《Final Fantasy VIII》嘅主題曲。

當年搵 王菲 唱，都可以算係經典。


立即放入 MP3 機．．．

王菲

王菲 開演唱會了。

我無睇任何相關報導，因為我想響一個完全「無知」嘅情況下去睇 王菲 嘅演出。

印象中，應該會係第一次見 王菲 嘅真人。


雖然撲飛方面失咗預算，但相信最終都會去得到。


我爹娘唔鍾意 王菲，唔鍾意佢個格云云。

我鍾意 王菲，係因為佢嘅歌、佢嘅戲、佢嘅演出。

佢私底下係一個點樣嘅人，與我無關。


王菲，係一個回憶。


喜歡 王菲，應該係由《Ｄｉ－Ｄａｒ》開始．．．１９９５年．．．

想聽

以往，幾乎由出街嗰一刻開始，只要係室外地方，我都會帶住 headphone 聽歌。

將音量較到聽唔到其他嘅聲音，與世隔絕。


雖然某程度上我已經唔將自己放響一個箱入面生活。

但有時我仍然鍾意困住自己嘅思緒，建立一個得自己嘅世界。


最近，因為唔記得帶 MP3 機，又或者係因為無電，所以聽多咗呢個世界嘅聲音。

或者叫做嘈音。


原來都幾有趣。

係啲人嘅對話好有趣。


不過我仍然比較鍾意我嘅音樂。


忽然記起幾年前 903 有個廣播劇叫《來不及聽你說愛我》

陳奕迅 + 楊千嬅，講一個失聰嘅人。


我有時都會諗，如果有一日我聾咗，無咗音樂，我嘅世界會變成點．．．

《妳太善良》

鍾意呢首歌好一段時間了，但從未睇過個 MV.

有一日響 Facebook 見到有朋友 share, 睇完之後更愛了。

雖然未完完全全經歷過 MV 入面相同嘅劇情，但暗戀人呢種悲情角色總係比較容易代入。

每日都睇，每日都唱．．．

《妳太善良》



歌手：張智霖
作曲：Shinji
填詞：李峻一
編曲：謝國維@Baron Pro

妳等他悔改 好不過妳鬆手放開
有一種固執 得不到喝彩
總擔任偉大角色 獻奉全部愛
寧願悉心灌溉 沒結果的錯愛

理想歸理想 得不到也等於妄想
原諒又原諒 他可有拍掌
諸多忍讓沒有獎 也沒誰人賣帳
難道妳夠情長 某某亦會同樣

他不配做對象 可惜妳太善良
他背叛妳 偏妳沒法睜開眼看真相
馴服就似綿羊 相戀太善良
大多打敗仗 受騙的那個比騙徒更混帳

我可等妳嗎? 可等到妳傷口結疤
我這種固執不比妳更差
好心地但運氣差 做壞人才耀眼
良善太過平凡 怕註定要陪跑

單戀也是正常 天生我太善良
早愛着妳 可怕是妳一早看透真相
馴服就似綿羊 相戀太善良
大多打敗仗 受騙的那個比騙徒更混帳
妳這樣情長 再等妳也是妄想

明明他不配做對象 可惜妳太善良
喜愛受騙 只怕共妳 努力亦沒回響
他不將妳放心上 即使再善良
未得到景仰 受騙的那個比騙徒更混帳
我也想騙妳 這句才算真相

《掛念好友》

雖然呢首歌已經出咗一段時間，但我到今日先開始鍾意。

《掛念好友》



歌手：JW
作曲：雷頌德
填詞：李峻一
編曲：雷頌德

這數天的我變得神經質
渴望看到你卻又不敢走近
每數分鐘來查閱這手機
我若錯過了你來電多可悲

這份掛念 要怎麼承受
你或許超過像好友
我向他方遠走 想請你等候
你或許只當我好友 (這樣分開那會足夠)
YES I BELONG TO YOU
IT MUST BE LOVE MY DEAR
日夜為你失眠
YES I BELONG TO YOU
都盼望你知道 我的心意
這客機灑脫從地平升空
載着搭客每個夢想多麼重
那次天台裡同坐啍的歌
某日再見你我仍未會淡忘
I TREAT U MORE THAN JUST A FRIEND
I GUESS THIS FEELING NEVER END
YES I BELONG TO YOU
IT MUST BE LOVE MY DEAR
日夜為你失眠
YES I BELONG TO YOU
只盼讓你猜到 我的心意

遺傳

每次我父母批評我，我都會話係遺傳。

當然之後會鬧得更勁，仲會話「啲好嘢又唔見你遺傳到？」

只係遺傳到啲衰嘢我都無辦法，又唔到我控制。


其實好多時仔女都係父母塊鏡，只不過多數父母都唔願照一照。

無論係好定壞，我唔似你哋仲可以似邊個丫？

暗串

同一間車仔麵檔同一餐晏。

起身埋單時聽到有個應該係熟客嘅男人同一個響度做嘢嘅亞姐吹水。


亞姐：「呢排好少見你喎！食完咁急走嘅？」

男人：「係呀。近農曆年好忙。」

亞姐：「咁你呢啲老細搵大錢嘛。」

男人：「哈！我都好想好似你咁屈響度有錢收呀！」


聽到呢句，我真係耳都側埋．．．

是天生一對？還是臭味相投？

一直覺得我父母係「天生一對」，但我鍾意形容佢哋係「臭味相投」。

尤其係當佢哋兩個響同一陣線一齊批評我嘅時候。


今日響鵝頸橋食車仔麵遇到一對夫婦，我又有相同感覺。

個老公由坐響我隔離嗰一刻開始已經口不停，呢樣嗰樣意見多多。

煩完一大輪落完單之後又到個老婆「咦咦哦哦」，煩到抽筋。

之後又一唱一和唔知批評啲咩。


我只好帶上 headphone 繼續食我嘅麵。

響我眼中，佢哋兩個人中我任何一個都頂唔順。

而佢哋完全係接受對方。

我唔知佢哋一齊幾耐，但我覺得唔離開已經好利害。

我諗除咗「愛」，相信無嘢可以將兩個咁嘅人扣埋響一齊。


當然，都可以係其實頂唔順不過已經習慣咗。

又或者係因為無處可逃．．．

崩口人忌崩口碗

間中都會同茶水亞姐吹下水，當無其他同事響附近嘅時候。

茶水亞姐成人話我份人幾好笑，唔係我識講笑嗰隻好笑，而係我好無稽嗰隻好笑。

又成日話想識我亞媽，因為覺得我亞媽好另類。


今日寒暄兩句，之後佢忽然問：「情人節又到喇喎，有女朋友未呀？」（佢明明知我無）

我答：「未有．．．」（我已經想完結呢個話題逃之夭夭）

點知佢接住問：「咁有咩節目？」

我答：「情人節都唔關我事啦，無情人」

問：「你亞媽無催你快啲搵返個女朋友然後結婚咩？」

答：「無」（放過我啦）

問：「咁都要快啲喇，我想睇下你會搵個點樣嘅女朋友！」

答：「．．．」


好怕同人傾呢個話題，非常怕．．．

嚇大

話說今日下晝無嘢做於是離開公司出去行下逃避周公嘅召喚。

行到某一盏紅綠燈附近嘅時候見到一宗已經發生咗嘅交通意外。

一個年約初中左右嘅學生被一架保母車撞到坐響地上按住隻腳叫痛。

地上有一部唔知係 PSP 定 NDS 嘅物體。

我除咗對 headphone 打算睇下有冇嘢需要幫手。

與此同時一位亞媽嘅聲音響我身邊響起，佢指住路中心對自己拖住嘅仔好勞氣咁講：

「嗱！你睇下喇，平時過馬路叫你拖住我就係咁解喇。下次你唔拖住就可能會被車車死你！知唔知呀？車死你呀！」


我見有途人已經拎起電話報警，於是我又帶返好我嘅 headphone 離開現場。


搖搖頭，心諗：究竟有幾多小朋友係嚇大嘅？

舊歌重溫（一）

最近好多時夜晚瞓唔著，都會拎部住電話上 youtube 搵下歌聽。

務求聽完一啲好鍾意但又已經遺忘咗嘅歌之後可以瞓得好。

無意間，搵番呢首《at17 - 才女》。

曾經響 2006-02-15 號都介紹過。



歌手：At 17 作曲：林二汶@At 17
填詞：于逸堯@人山人海 編曲：梁基爵@人山人海

世界不知不覺無情地轉　勞碌找一個救生圈
靠美德博學還離岸很遠　用美色多勝算

可惜我只配談文字戀　強項得書信對白婉轉
講曲線體態自然落選　憑面相難完心願

蕭伯納　王爾德　但丁
莎士比亞　馬奎斯　小仲馬
請指點我去用情書將心扣住
辛棄疾　矛盾　魯迅　蘇軾
求可體恤我筆尖的計算
長話盼　盡說短　人海中等惜字緣

交心的戀愛漸成歷史　唯獨我堅信愛像種子
悉心栽花卻換來白紙　才用眼淚來寫字

伊索　屠格涅夫　狄更斯
歐威爾　艾可　卡爾維諾
幾本書的背後埋藏著我心事
張愛玲　曹禺　老舍　冰心
如果早幫我寫命運情節
從未怕　命太短　惟恐寫不好那段緣
盼成全

再黑啲

之前已經講過「黑」呢個問題。


間房裝修好。

所有傢俬以黑色為主打。

床、櫃、枱 甚至連 百葉簾 都係黑色。


呢次仲唔係挑戰運氣嘅極限？

《Inception》

前排睇咗套戲。

《Inception》

























睇完之後嗰一日諗咗好多嘢。


其實我一直都抱住嘅一個疑問：

會唔會有一日我突然瞓醒，然後發現我原來仲係一個BB。過去嘅３０年其實只係我發嘅夢？

明窺

無論係行街時抑或係響朋友屋企，如果對面有大廈，我都會好鍾意望。

主要，當然係因為八卦。

亦都係因為我由細到大，屋企啲窗望出去嘅地方，都係無嘢昅嘅。

《九因歌》

話說有一日搭地鐵，見到有人拎住本簿。

已經唔記得佢係不斷寫嘢定係佢身邊有個細路唸唸有詞所以令我留意到。

重點本簿嘅後面大大隻嘅三隻字《九因歌》。


原來我已經忘記咗「乘數表」有另外一個名．．．

後悔

人總會為某些事而後悔或遺憾。

可能係因為做咗，亦可能係因為無做。


因為做咗而後悔嘅事，我暫時諗唔到有。

可能係因為我響未做之前已經諗得太多而好少一時衝動或魯莽行事。


若果係因為無做而後悔，又或者可以講成為遺憾嘅事倒有兩件。

1/. 著住校服拍拖

2/. 響香港體驗大學生活


因為，已經返唔到轉頭．．．

又執到

今日食晏，聽見三個亞姐響度吹水。

甲：成日嚟個鬍鬚佬好似幾好人喎。
乙：係呀！我家姐個老公好好人。我家姐執到啦。
甲：佢好似好「淋」喎。
乙：係呀！俾我家姐食到實一實。對佢好好，對我哋屋企人又好。佢執到啦。
丙：平時嚟嗰個係佢家姐個老公？好似幾好人喎。
甲：係呀！佢家姐執到啦。


原來呢個世界咁多人喺其他人眼中／口中係「執到」。

我真係好想知，幾時先到我「執到」．．．

黑

記得舊年響舊公司坐電梯時有個亞姐忽然同我個當日著黑色衫嘅女上司搭訕。

亞姐（語重心長）：著黑色衫唔好架。我之前成日著黑色，著咁耐就衰足咁耐。又行衰運又病。依家唔著喇。著黑色真係唔好。唔好著呀。

當時我哋只係 Ｏ晒咀。


依家諗返，可能亞姐呢個驚天大理論係成立嘅。


皆因，我幾乎每日都係著黑色。

衫褲鞋襪底褲同揹袋都係以黑色為主打。

最近甚至連睡衣都係黑色。

遲啲我間房嘅新傢俬，全部都係黑色．．．

行

我好鍾意行。

如果要由一個地方去另一個地方而又係響一般人認定嘅步行距離之內嘅我一定會行。

好多時甚至係一般人認定非步行距離之內嘅我都會行。

例如一至兩個地鐵站。


而且有啲開始包拗勁。

其他人越話行咁遠辛苦或者坐車會快啲嘅距離我越偏要行。

難答

有時有啲人為咗避免尷尬而勉強去開一個話題反而會令到個氣氛／情況仲尷尬。


有日坐小巴返屋企時見到有兩個人一男一女應該係鄰居又唔係太熟嗰啲認得樣但又唔知大家姓咩嘅喺臨落車嘅時候互相發現對方。

女：Hi! 咁啱呀！（熱情地夾硬搵嘢講 feel）
男：係呀。（無乜語氣 feel）
女：好少響呢啲時段坐車遇到你喎。
男：係。啱啱收工。
女：哦！做邊行呀？
男：（沉默２秒）做．．．郵差。
女：（停頓１秒）睇你似做會計師嗰啲。

之後靜晒．．．


話說我屋企個夜晚看更，無論我７點返、９點返定半夜２點返，佢都會問我同一個問題。

「食飯未？」

我：（即答，有時差啲快到佢未問我已經答）食咗．．．．．．．．．

責任感

有時我會覺得自己係一個有責任感嘅人。


於工作方面，對好多人嚟講我可能係責任感太重。

除咗份內事會做之餘有時為咗幫人仲會做多咗。


於感情方面，由於責任感太重，重得好多時都想選擇不去負感情上嘅責任。

人怕出名豬怕肥

自從申請咗 微博 帳戶日日去八卦我「關注」嘅人嘅嘢之後，一直都心癢癢想用 晶哥 呢個名響嗰度寫下嘢。

其實即係將呢度嘅嘢抄一份過去。


如果我「關注」嘅人會「關注」返我又或者響我度留個言，我諗我會開心死。


反正呢度已經無乜人嚟，而 微博 又鬼咁多（無聊）人。

相信收視率應該會好啲。

不過更怕嘅係如果連 微博 都無人「關注」我嘅話就．．．


（諗多咗 mode ）

萬一如果響 微博 出咗名嘅話就．．．

執到

今晚響旺角行緊嘅時候聽到一個女仔講電話講咗以下嘅呢兩句說話：

「佢都話咗你肯減肥就一定同你一齊啦！大佬呀！」


聽佢嘅語氣，似係同一個姊妹傾緊電話。


我心諗，如果一個男仔會開出一個咁嘅條件，究竟佢係「偉大地犧牲小我去接受一件瘦咗嘅豬扒」定「明知件豬扒減唔到所以空頭支票唔怕開」？


之後我又諗番個女仔嘅語氣，我相信其實個佢響心裡面應該仲有兩句說話未講出口：

「你執到啦！你仲想點呀？」

舊地（二）－丼吉日本吉列專門店餐廳

足足有十年無嚟過呢間餐廳。

記得我以前食嘅時候佢未係咁出名。

依家就預早一個月訂都未必有位。


無預期中咁好味。

或者係其實已經一早變到無以前咁好味。

另外，我真係好憎啲侍應響我一路食嘢時一路收碟！

2011

２０１１年１月１日

今年，無慶祝，亦無出街。

電視，依舊係直播煙花。

新聞，依舊係播映萬人空巷嘅慶祝場面。

彷彿人人都好似覺得踏入新嘅一年就真係好似新嘅一年咁。


其實，一切都無變．．．

個個都只係響度自己呃自己。

欠債嘅仍然欠債、病嘅仍然病、不快樂嘅仍然不快樂。


好多人都會有新年願望。

如果真係有「願望成真」呢回事，一早就成真咗又駛乜鬼等到新年。


其實今日只係2010年12月31號之後嘅另一日。

同平時一樣一覺瞓醒之後一切如常嘅另一日。


如果今日係12月32日或者係13月1日又或者係 A.D.734018日。

仲邊有人會慶祝？

聖誕歌

今朝響大家樂食早餐時聽到聖誕音樂。

都唔為意原來聖誕好快到。


如果要數聖誕歌，我只係諗到兩首：

《Lonely Christmas》同《今年沒聖誕》

感謝神？

有位朋友係好虔誠的基督教信徒，因為隻腳有事而入咗醫院住幾日。

出院第一日佢響 facebook 度寫：「出院了！感謝神！」之類多謝神令佢痊癒云云。


我心諗：你唔諗下係邊個唔保佑你令你隻腳出事？

可能我係過份偏激或者過份抗拒宗教。

但我確實諗唔通點解有事就係「神安排嘅考驗」而無事時就係「神嘅眷顧」．．．

坦誠

收工答地鐵時，有位女士逼上車之後打電話俾人。

劈頭第一句說話係：「唔好意思！我完全唔記得覆你。」


「完全」、「唔記得」

我真係好想知對方聽到呢句說話時係咩感受．．．

大叔識建築

有冇留意到好多時啲大叔都係博學多才通天曉？

無論社會上發生咩事佢哋都可以參與討論埋一份。


好似我今朝返工時見到一個大叔對行人路上面一個掘咗個大窿嘅工程不斷研究咁。

而好多時你亦都會見到好多大叔會圍住啲建築地盤左望右望指手劃腳好似識咁。


可能我將來都會係咁．．．

星期八

我覺得一個星期應該有八日。

返三日工就放一日假。

合理好多．．．


都唔知邊氣茂利設定一星期有七日。

就算係一星期七日，都應該有兩日公眾假期。

逢星期三、星期日放假。

美女與野獸

好多時同男性朋友去街，少不免都會一齊留意身邊嘅人兼評頭品足。

而最常出現嘅相同觀點會係：

「嘩！搞錯！條仔咁柒都竟然有個咁得嘅女朋友？」

之後一齊慨嘆上天不公平云云。


其實個天係好公平嘅。

由於個天見個男仔生得唔英俊，所以欣賜一個標緻嘅女仔俾佢以作補償。


若然我呢個假設係成立嘅話。

咁我好應該乖乖地靜心等待上天「欣賜」俾我嘅人。

相信個樣都唔會差得去邊．．．

賣旗

每逢星期六上晝出街都要同啲小朋友、學生哥講「唔好意思」兼左閃右避。

唔係我唔想買旗，而係朝早時段我唔會有「大餅」喺身。

因為我一向唔袋多餘「大餅」出街，朝早坐車要用幾多就袋幾多。

而我又唔會有心到記住要袋定「大餅」買旗。


小朋友，你唔係想哥哥用「軟嘢」買支旗仔卦？

命運

我無宗教信仰，但我一向相信呢個世界係有主宰。

可能係神、可能係魔鬼、可能係任何嘢。

每當我響工作上不停面對難題同阻滯時，我就會覺得我嘅命運係操控響嗰個主宰嘅手中。

而我唯一可以做嘅，就只有「硬食」...

---

「命運」係無得選擇嘅，只有「認命」同「唔認命」之分。

當你自以為自己掌握「命運」之時，往往就人算不如天算，發覺原來自己只係主宰者手中嘅一隻「棋」，然後整鑊「杰」嘢你嘆。

就正如，我嚟到呢個世界唔係我嘅安排同決定，我無得揀 ...

---

人生嘅有趣之處係經常發生「一啖沙糖一啖屎」嘅情況。

而通常，「啖屎」都係比較大啖 ...

十二類人

好多女士都會相信「星座／生肖運程」。

更多嘅男士會相信如果識「星座／生肖運程」會更易識到女仔。

眼見不少男性朋友都會用呢招嚟同異性打開話題，之後再打蛇隨棍上。

我唔反對無所不用其極，各施各法啫。


以前我一聽見人講「星座／生肖」，我都會諗：「用十二種嘢去介定全世界嘅人嘅運程，唔通全世界得十二類人咩？同一類人又會遇到同一類情況？咪咁天真！」


我當然知道，用「星座／生肖」去預測一個人嘅運程，要準確嘅話都仲要計埋周邊好多嘅數據。

但我任你點計點配搭，都總有一個數額去規範咗係有幾多類人。


相同嘅運程響同一時段發生響某一批同類人嘅身上？

咁主宰我哋命運嘅嗰個主宰都幾易處理人嘅命運。

講講下，我諗起 Martix．．．


雖則我唔太信，但每逢見到呢啲預測，我仍然都係會八卦望一望．．．

雙重標準

坐小巴時遇到一家四口，父母＋家姐＋細佬。

兩個小朋友都應該係小學生。

分兩行坐，爸爸同家姐坐前，媽媽同細佬坐後。

我坐佢哋左面啲單丁位。


未開車前，爸爸同家姐玩 iPad，媽媽同細佬各自玩手提。

甫開車，個媽媽就收起自己部電話，亦命令細佬都要收起。

細佬問點解，媽媽答「坐車玩會壞眼」。

作為媽媽嘅以身作則，細佬亦只好乖乖聽從。

但，爸爸同家姐並沒有收起 iPad 嘅意圖。


再過多一段時間，爸爸同家姐仍然係玩得興高采烈。

於是細佬終於忍唔住開口問媽媽「點解家姐唔駛收起嘅？」

媽媽就答咗一個可能連佢自己都覺得荒謬嘅答案「家姐大個嘛！」

我相信響嗰一刻我同細佬都Ｏ晒咀。

正當細佬想繼續問嘅時候，媽媽電話響。


之後媽媽傾完電話，並沒有打算收起嘅意圖，而係繼續玩遊戲。

坐前面嘅爸爸同家姐仍然係 iPad 中。

我見到細佬嘅不忿同無奈．．．


之後係點，印象中係個仔開始嘈之後亞媽開始鬧然後老豆同個女啋你都傻。


當時我只係諗兩樣嘢．．．

１．呢個世界公平在於唔公平

２．會偏心同唔識教小朋友嘅唔該唔好生兩個或以上

順理成章

最近，連續兩個男性長輩都響失驚無神嘅情況之下問我一個類似嘅問題。

整整下電腦時．．．
「點呀？唔細囉喎！唔諗住結婚呀？」

食食下飯時．．．
「點呀？幾時先正正經經搵番個女朋友結婚生仔呀？」

平時好少同呢兩位長輩傾呢啲嘢，
我除咗學謝天華答「無呀～」之外，
我都唔知覆佢哋咩好．．．

年紀開始大，結婚生仔組織家庭就會變成一件好順理成章嘅事。

我以前好抗拒，對結婚生仔堅決說「不！」

但最近，我確實有咁嘅打算．．．多幾年之後先．．．

溫馨提示

我好懷疑，如果唔係有 facebook．．．

有幾多人嘅生日係仍然會俾人記得．．．？

手痕定口痕？

我無咬手指嘅習慣。

但我身邊同埋響街都見到好多人有。

其實我都有一個疑問。

咬手指嘅人究竟係手指想俾嘢咬定係個口想咬嘢?

書局一遊

間中鍾意行下書局。

我鍾意買書，但永無恆心去睇完一本書。


今日行書局時經過一個旅遊書嘅書架，忽發奇想。

「如果隨手攞起一本旅遊書然後就去嗰度旅行都應該幾過癮」

當然，發下白日夢就得．．．

或者等一注獨得六合彩頭獎仲要係金多寶。


「書中自有黃金屋 書中自有顏如玉」呢句說話真係幾中。

因為原來書局都幾多靚女。

法國雙飛人藥水

一直存在一個疑問。

點解隻藥可以外敷，又可以內服？


想知，但唔想試．．．

錯過

話說好多時坐小巴出九龍，都會經過新清水灣道一個天橋位。

由嗰度遠望，可以望到荃灣起緊嘅「如心廣場」。


天氣好嗰陣，個境都幾靚。

一直想帶部相機去嗰度影相。

結果拖下拖下、拖下拖下，拖到依家天橋下面都已經起咗幾棟新嘅大廈遮晒個境我都未去影。


依家想影嗰個境，已經再冇機會。

除非搬入嗰棟新嘅大廈入面住高層啦．．．

男人與貓

我甚少睇電視劇。

前陣子放工返到屋企之後開著電視，望咗兩嘢《天天天晴》。

當時講緊個有婦之夫鍾意咗公司入面嘅一個後生女。

拖拖拉拉糾纏不清咗好耐，最後都係冇事發生；懸崖勒馬。

我有啲身同感受。

而且亦都諗，換轉我係個男人，可能一早把持不住了。


今晚同朋友出去食飯，咁啱有電視又係播緊《天天天晴》。

結果係，個有婦之夫終於出軌。


忽然間諗起，「邊有貓係唔食魚架」．．．

舊地（一）－信德中心

以前老豆公司響上環，所以經常會行信德中心。

今日去澳門旅行喺信德上船。

大大話話，都可能有成十幾年冇嚟過。

記得以前呢度有間機舖，亞媽成日同我去玩，有不少回憶．．．


機舖，當然已經冇咗。

連原本個位置響邊，我都已經唔記得咗．．．

地鐵（三）－紋身＋面子

今日搭地鐵，留意到兩件事。


有個恤衫友入地鐵。

摺起衫袖之後全手紋身，型！

其實我一直都想紋身，不過好似同我唔多夾。

同埋會被爹娘殺死．．．


有個大叔應該係去探朋友。

講完個電話之後好努力咁撕去紅酒上面嘅貼紙。

「百佳超級市場－特價貨品」

明白，但唔理解．．．

報應

總覺得係「報應」．．．

雖然「工作」同「愛情」冇乜直接關係。

但做人做得唔好，係會有「報應」。

就當係俾自己嘅一個藉口．．．

出書

我唔係一個「好書」之人，但間中都會行下書局。

今日又去行下。

見到好多古靈精怪嘅書，好多唔識嘅作者。

忽然間諗，唔知出書係咩感覺嘅呢？

唔知出書有幾艱難呢？

如果我出本書，寫咩好呢？

會唔會有人買呢？

想想而已．．．

瞓棺材

我瞓覺時，需要三個枕頭。

一個用嚟枕住個頭。

另外兩個平放兩邊，一左一右旁住我。

左攬又得，右攬又得。

要咁先覺得有安全感。

似「瞓棺材」．．．

佩服

今日做咗一件事。

然後真心佩服嗰啲「一腳踏兩船」嘅人。

點可能分配到時間？

點可能對得住自己個良心？

唔驚嘅咩？

三十有一

如果唔係睇番，我都已經唔記得咗我舊年嘅生日係點過。

「三十而立，四十而不惑」

我相信我真係仲要多九年先會不惑。


重寫 blog，總有原因。

有機會慢慢講．．．


生日快樂～

更新

懶惰得不想更新．．．

十二月

十二月，係忙到癲咗嘅一個月。

亦都係心情起伏得頗大的一個月。

總結如下：

發展了一段「兄妹」情。

5號同「妹妹」去咗睇東亞運動會開幕煙花。

打波時唔見咗由十八歲開始一直帶住嘅十字架頸鍊。

認清咗一個長輩嘅真面目。

24號出咗去飲酒，成十年未試過。暢快！！！

26號屋企搞 party, 成十幾年未試過。開心！！！

27 ~ 30號因為好多不同嘅事簡直生不如死。

31號達成願望唔喺香港過除夕。快樂的一天！！！


2009年，係變化最大嘅一年。

亦係快樂嘅一年。

醒

今日出去開會，如同俾人摑咗兩巴，醒晒。

終於知道點解工作時會唔開心、冇方向。

原因係原來我未完全投入，但以為自己已經瞓身。


我以往好少下定決心去做一件事，或者決定咗都會半途而廢。

不過今次唔同，我唔想再失敗。


我應承咗班細路，我唔會中途離場。

講得出，做得到。

籃球火

還記得十年前，籃球曾經係我生命。

因為當時完全荒廢學業日日去咗打波。

唔敢講打得好，但亦唔算太屎。


十年後嘅今日，我再一次搵返我嘅生命。

每星期同班o靚仔去打波，令我終於搵返我團火。


打籃球嘅其中一個快樂之處，係可以暫時忘掉煩惱。

答案

忽然收到一封佢寄嚟嘅信，有點愕然。

內容大致上係講一下近況，有好有壞。

還附帶一個問題．．．

「我曾經相信你會係全世界最愛我及最疼我嘅人，但如果係真，點解當時你要放手？冇任何行動？」


去年分手嘅時候，我只係好簡單咁順應佢嘅要求完結咗一段關係。

我，冇講過任何嘢，冇解釋過任何嘢。


問朋友我應唔應該回信，佢話我無謂俾人錯覺覺得會有咩機會復合。

我話我嘅回覆係唔會俾到佢有任何希望，只會係好坦白咁講出我放手嘅原因。

而相信呢個分手背後嘅原因，只會帶到傷心俾佢。


我唔想傷多佢一次。

但我相信如果佢呢一世都唔知道個答案，佢一樣過得唔好。


我想佢忘記我。

我亦唔想欠佢一個「答案」。


MP3 咁啱播到《少見不怪》，係攞境定贈慶？

而既然分開了　何必又想打擾　
為何愛人丟低了 才來明白對方緊要

跳樓

一向都鍾意由高處向下望嗰種感覺。

唔知點解。

可以係因為由細到大都未試過住得高過六樓。


呢個星期心情極差。

因為工作，因為感情，因為家庭。


某晚嘅晚飯時段，去咗公司附近嘅天橋吹吹風企一粒鐘。

一路聽住頹歌，一路睇住啲車響腳下經過。

有一刻，真係驚控制唔到自己對腳。

其實我一直都好想試下跳樓嘅感覺．．．

十一月十一號

又到呢個日子。

我相信，我呢一世都會俾四條一纏擾住．．．

http://hide-myself.blogspot.com/2009/08/1111.html

久別重逢

好怕響街撞到舊朋友。

非常怕．．．

健康投資

從新開始運動，打籃球、做 gym.

因為之前只係齋節食去瘦，完全係唔健康嘅瘦。

會用一年時間去操。

為咗有強健嘅體魄，呢次真係健康有價．．．

甚麼關係

我越來越唔清楚我究竟將佢放響一個乜嘢位置。

係朋友？
係兄妹？
係父女？
定只係我嘅一個心靈寄託？

陪我食早餐、食晏、食晚飯、食糖水、坐車、行街、坐公園、每日每晚不斷 sms 傾偈等等。

但我好清楚嘅係，佢只會當我係佢眾多個哥哥之中嘅其中一個哥哥。

亦唔會係特別嘅一個．．．

神乎其技

每之坐交通工具見到啲女士們響車上面化妝我都覺得嘆為觀止。

我有時想響車上面瞓下其實都唔係咁易，又搖又震。

而佢地又可以好淡定咁化好一個妝。

利害．．．

再遇龍鬚糖

終於，俾我遇見番龍鬚糖。

仲要係夜更收工時間。

當然係第一時間買番盒嚟食。


可惜，難食到極．．．

失望到極．．．

精神自虐

我依家每個工作日嘅心理狀態都極之不平衡。


由離開屋企返工嗰一刻開始聽頹歌，心情趺至谷底。

返到公司見到班同事之後又發始 hyper.

一收工又繼續聽頹歌直至返到屋企。


點解我要虐待自己？

《不問自戀》

《不安的快樂》之後，又記起呢首．．．

《不問自戀》

歌手：梁漢文
作曲：陳輝陽
填詞：林夕
編曲：陳輝陽

說說笑　也就可以　看看戲　已極寫意
甚麼心態狀況　不要在意
句句怎會何以　太過沒有意思
吻吻臉　也是真摯　其餘思心想法我不要知
你要給我愉快　我也不要會錯你好意

＃從來不刻意問你貪戀甚麼
　從來不敢去問你想不想我
　從來沒趣也因知道太多
　歡喜的東西不要看太清楚

　從來不忍細問你心想甚麼
　從來不敢發掘你某晚怎過（從來不敢發你某天怎過）

　朦朦是最美的一個結果
　彼此開心比苦笑多　已不錯　決不容有錯
　（畢境一起比分隔多　愛不愛也不用答我）

見見你　算是心意　吻吻你　發自真摯
這些親切玩意　總有下次
暗裡怎對待你　你也沒有法子
我愛你　也就可以　但你須不須要你知我知
我永不試驗你　你也得接受我好意

Repeat　＃（）

《不安的快樂》

聽完《兄妹》同《大哥》，就諗起呢首歌．．．

《不安的快樂》

歌手：陳曉東

曲：劉志遠
詞：林夕

擁抱你和親吻　真想感受
無奈越了界　就像覆水難收
需要你而不要你　繼續做朋友
如浪漫過去　便是一生摯友

＋想見你而不見你　多麼荒謬
　難道越見你　便越不可長久
　想愛你而不愛你　我但願能夠
　情若用錯了　用甚麼可挽救 +

＊寧願沒回答　寧願放在心
　如若已經是愛情　為何要問
　從來未曾愛上過別人　沒法肯定絕望或可能
　還是這種不安的快樂 才顯得吸引 (才誘惑人)

Repeat ＋＊

誰願讓愛意不經證實但憑感覺　但為何又眷念這忐忑的快樂
無奈面對你彷彿遠再無涯海角　但是寧願獨享溫馨的罪惡

Repeat　＊

《大哥》

《大哥》

歌手：衛蘭
作曲：Robert Lay @ On Your Mark
填詞：林夕
編曲：Robert Lay @ On Your Mark

如果　兄妹相稱太多　醒不起喜歡我
快研究和我這異性　拍拖

訛稱　知己的真太多
當女共男未變愛侶　不吻過自然沒結果

＊沒有好感怎會相親相愛大哥只是掩飾
　能做對愛侶　墮落成朋友　誰心息

　我要愛情不需要登對不需得你允許
　兄妹真有趣　不需要分居　忘記輩份再追

　我要愛情摧毀世交也不失一個創舉
　相戀的證據　假使要爭取　唯有約定和大哥喝醉＊

曾經　雙手執一杆槍　
想逼供你一趟　我和你無愛　誰沒有智商

如果　戀愛必須創傷
想你亦明白到我倆　需開心都也受夠傷

Repeat＊

《兄妹》

《兄妹》

歌手：陳奕迅

作曲:徐偉賢
填詞:林夕
編曲:劉志遠
監製:Jim Lee

對我好　對我好　好到無路可退
可是我也很想　有個人陪
才不願把你得罪　於是那麼迂迴

一時進　一時退　保持安全範圍
這個陰謀讓我好慚愧
享受被愛滋味　卻不讓你想入非非

＊就讓我們虛偽
　有感情　別浪費
　不能相愛的一對
　親愛像兩兄妹

　愛讓我們虛偽
　我得到　於事無補的安慰
　你也得到　模仿愛上一個人的機會
　殘忍也不失慈悲
　這樣的關係你說　多完美＊

眼看你　看著我　看得那麼曖昧
被愛愛人原來一樣可悲
為什麼竟然防備　別人給我獻媚

不能推　不能要　要了怕你誤會
讓我想起曾經愛過誰
我所要的她不給　好像小偷一樣卑微

REPEAT＊

夢

日有所思，夜有所夢。


日頭見到一個鍾意嘅人，夜晚發一個快樂但不真實嘅夢。

瞓醒之後到日頭見返呢個人，快樂盡失然後心情又回到谷底。


究竟係日頭嘅思想影響夢境，定係夢境影響日頭嘅思緒同心情？

青山黛瑪

今日坐巴士返工時遇到一個「傻佬」。

其實我唔知佢係弱智定係痴線。

不過一般人都會形容佢係一個「傻佬」。


不斷換位，左指右指，大呼小叫。


我留意咗佢一段時間。

每次望住佢，我都會會心微笑。

係因為我覺得佢好快樂，凳佢高興。


佢嘅笑容，令我覺得佢比巴士上嘅任何一個正常人都要快樂。


《青山黛瑪》旁人話你悲哀 不過在你眼中清醒才悲哀 繁忙才悲哀．．．

買樓

我一向都覺得喺香港買樓係一件好戇居嘅事。

無端端好地地做乜揹住一個幾百萬嘅債喺身？

成日都同人拗呢個話題。

可能係因為我係一個唔想負責任嘅人．．．


今日聽見老豆同亞叔傾個樓市。

之後亞叔同我講：香港人，點都要揸番層樓；點跌都好，總會上番去，之後就賺。


諗諗下，又有啲道理。

可能係因為我最近等錢駛，想賺番筆。

龍鬚糖

每日放工返屋企，都會經過彩虹邨。

返早更放六點嘅話，經常都會見到一個叔叔賣龍鬚糖。

之前冇買，病咗嗰個星期唔食得。

到呢兩個星期想買時已經唔見咗佢。


又一次唔把握時間同機會去得到自己想要嘅嘢，結果．．．

目標體重

不知不覺，原來已經到達目標體重。

有幾日，仲輕過十年前嘅體重。

一上磅一望，自己都驚一驚。


工作頭一個月，因為真係太忙同食得少，已經輕咗好多。

體重跌得最快嘅時候，應該係上星期病一病。

一星期，差不多輕咗五磅。


終於得到想得到嘅嘢，咁之後又點呢．．．

鬧鐘

尋覓咗幾個月。

終於．．．

買到一個鍾意嘅鬧鐘。

《少見不怪》

諗起呢首歌，又響 mp3 機裡不斷重播。

不斷重播．．．


《少見不怪》

歌手：陳奕迅
作曲：張佳添
填詞：黃敬佩
編曲：張佳添

hey!
這邊的天氣漸回暖　而你可否開心似我所願
當你話給我成全　要跟她好好去戀　無謂繼續去周旋

怎麼今天總要在埋怨　和她一起都想你太心亂
假設什麼也還原　難道會是大團圓　還是惡夢再開端

＊而既然分開了　何必又想打擾　
為何愛人丟低了 才來明白對方緊要

＃而既然分開了　問好亦不必要　原來我仍想知你
與情人近況　可會對我懷愐（可懷念我）

好！

即使他跟你鬧情變　而我會否即刻到你身邊
不會吧　很心照了　如昨天這麼要好　隨便也敵過驚險

Repeat ＊＃

hey!
這邊的天氣漸回暖　而你可否開心似我所願

《自知之名》

班細路好鍾意跟我做嘢。

令我諗起呢首歌。


藍奕邦 《自知之名》

沒有可愛面孔　不懂嘩眾取寵
未太懂去用言語誇張掩人耳目
一早知道沒那種資格
營造氣氛欺騙觀眾
但那青蛙亦有公主包容

沒有趣緻賣相　只得一對手掌
一邊唱一邊彈　平凡變得漂亮
沒有那個大志去當萬人迷
當了還覺得牽強

沒有想怎麼討好所有人
只知道安守我小小本份
不愛用半句埋怨博取一個憐憫
唯有專心做個知足的人

沒有咋舌技倆　都不必太緊張
醜小鴨跟天鵝　同樣發光發亮
沒有興趣為某君裝扮模樣
堆砌盛世來鋪張

沒有想怎麼討好所有人
只知道安守我小小本份
不愛用半句埋怨博取一個憐憫
從未厭棄過自己身份

就算我知音只一個人
給他去欣賞過仍是有幸
自己都知道還有那一些我沒有
唯有專心做個知足的人

我也不稀罕討好世人
之所以不需多修飾缺陷
不要護蔭更何況我不需要憐憫
從未怕看到這麼逼真

就算我知音只得這鋼琴
都不要緊反正我很開心
自己都知道沒有法子可以完美
唯有安心做個簡單的人

沒法逼你欣賞　給我尖叫鼓掌
但至少我就此發表清楚我立場

重視／被重視

今日我響度諗，點解我會對佢咁好。

我關心佢，我好錫佢，當佢細妹一樣。

究竟我係真係一個好人對人好？

定只不過係自私地想有人關心返我錫返我？

新工作

返咗呢份新工之後，基本上每日都係響快樂之中渡過。

主要原因，係因為一班細路。


辛苦咩？

有時確實係幾辛苦。


但得到嘅快樂可以抵消每日面對嘅困難都疲累。


試用期已過，希望我會順利完成一年嘅合約。

《有病呻吟》

生病嘅日子，特別容易胡思亂想，或者係特別多愁善感．．．

《有病呻吟》

歌手：張學友
作曲：林健華
填詞：林夕
編曲：林健華

想喝水　給我水
或者高燒可勉強減退
然後鎮靜情緒
忘掉我這裡應該　有誰

不要想　只管睡
肉體安好不要怕心碎
無謂繼續麻醉
期待你會賜給我　藥水

#如果失戀註定逃不過
逃到病床前　才明白更多
和你分手都也捱得過
然而這夜為何
無能力退燒　多麼錯#

不要緊　請辜負
或者傷風比你更可惡
從病榻上回顧
其實愛你太辛苦　何苦

Repeat #

如果失戀註定逃不過
逃到病床前　才明白更多
和你分手都也捱得過
然而這夜為何
難承受痛楚

誰說失戀總會捱得過
捱到病床前　才承受最多
和你分手都也捱得過
為何徹夜難眠
良藥就算苦　請給我

回頭太難

今日收到佢嘅短訊。

佢話佢終於明白、理解同感受到我當日響工作上嘅情況同苦況。

佢已經遲咗職。


佢話佢最近生活得不太如意。

亞媽又入咗醫院，好似好運滯。


我嘅回應，都係循例嘅一些鼓勵說話。

同埋話佢知，我響過去嘅十個月，我過得很好。


無錯，我係專登講嘅。

我要佢知道，沒有佢嘅日子，我比以前快樂。


我唔知佢點解會搵我，可能佢真係冇其他人可以傾訴。

我哋一向都冇咩朋友。

又或者，係其他原因。


不過無論係咩原因都好，我都叫自己唔好諗得太多。

我，肯定唔會回頭。

一切，都已經太遲．．．

喊

響短短嘅一個星期，已經見到佢喊咗兩次。

一次係因為我同佢玩時整親佢。

一次係今日有同事窒親佢。

不過事後發現，原來佢係因為其他事而唔開心。


每次見到佢喊，我都會唔開心。

其實我唔知係因為係佢丫，定係任何女仔響我面前喊我都會唔開心唔知點咁。


見到佢咁易就喊得出，我好感慨。


因為，我已經有好耐喊唔出。

即使係睇愛情片，我最多都只係流淚。

而我知道，我其實係有需要大哭一場．．．

不知不覺

如果唔計上次嗰三個星期嘅短暫「錯誤」。

唔經唔覺，我已經單身咗十個月。

過去嘅十個月，個人、生活、工作嘅都轉變唔少。

尤其係個人心理、心態、行為上；有變好、有變差。


身邊出現過而令我胡思亂想嘅人又有幾個。

但始終，唔係嗰一回事。

我其實都未係好知自己想要啲乜。


每一件令我有新鮮感嘅事，我都會鍾意去做。

每一個令我有新鮮感嘅人，我都會鍾意去諗。


秤一秤，呢十個月以嚟嘅我確實係比以前快樂。

但係，缺少愛情生活嘅人生，又確實係枯燥．．．

後知後覺

搬咗嚟呢間屋都將近十年。

我返咗嚟定居都已經兩年，日日都用同一個廁所沖涼。

如果唔係上次沖涼時俾呢件嘢嚇一嚇。

我都真係唔知原來呢度有個水制位。

我，有點過份．．．

《姊妹情深》

因為一首《仍能情深愛上》，搵番呢套戲嚟睇。

又因為呢套戲，搵番首《仍能情深愛上》劇場版嚟聽。

《雙城故事》

陳可辛 第一部導演作品。

一直都好想睇，於是買咗碟。

冇預期中好，可能因為已經 out 咗，又可能因為我本身冇 mood ...


一連兩套戲都係 張曼玉，發覺佢真係好得．．．

《甜蜜蜜》

原來呢套戲都已經十三年了。

最近買番 VCD 重溫了一次。

一樣o既感動．．．

HOUSE M.D.

終於等到出碟，用咗一星期睇晒成輯。

沉迷 + 上癮．．．

CD again

屎忽痕想搵嘢買。

行過 HMV, 入咗去搵 張懸 嘅 CD.

自從響《康熙來了》聽過見過呢個歌手之後，鍾意咗。

拍檔

公司終於請到我個 partner 同我亞頭。

今日第一次見面兼開會。


Business 人同社福界嘅人，思想／理念真係好唔同。

好明顯，我同佢哋唔夾．．．

聽

平時出街，我都會聽住 mp3 將自己與世隔絕。

今日刻意唔帶，想聽吓呢個世界。

兩程車，聽到嘅都係廢話連篇。

有人話人狗眼看人低。

有個師奶講高清不過錯晒。

有個人同一個住院嘅病人傾電話。

有個小巴司機聽 Rock 'n' Roll.


由聽日開始，我決定聽番 mp3．．．