多

大陸，乜都多。

人多，車多，塵多，垃圾多，而且嘈好多。

o係大陸生活，空閒時間亦多。

多到可以晚晚都寫 blog。

因為我冇出去玩。

o係大陸，娛樂仲多！

妹妹妹妹

呢排，好鍾意聽９０３o既《妹妹妹妹》。

原因，可能係想搵番青春o既感覺。

同埋，想知道女仔諗乜。

知下，依家o既女仔係點。

因為，我已經脫節o左八年．．．

而且，個節目都幾好聽o丫！

悲？喜？

今日o係地鐵碰到一對年輕父母。

年齡，廿零歲吧。

個愛情結晶品，應該一歲左右，或者未夠。

女o既愁眉苦臉，男o既手足無措。

可能佢o地好愛對方，所以順理成章早結早生。

又可能係純粹意外，逼於無奈。

無論係邊個原因都好，我感受唔到佢o地係快樂。

無論係乜o野原因都好，佢o地o既生活已經因為個小朋友而徹底改變。


我望住個老豆o係度諗，如果我係佢，我o既生活又會變成點？

我又會唔會活得快樂？

最快樂的人

有冇見過大肚婆愁眉苦臉？

比較少吧。

多數大肚婆，都係笑面迎迎，一個甜蜜幸福樣。

同佢o地傾偈，更能感受到佢o地內心o既o個份喜悅。

所以，我最近好鍾意同大肚婆傾偈。

旺角

每個星期到呢個地方，都覺得我唔屬於呢度，格格不入。

因為我一o的都唔潮，仲有點柒。

而且，呢度好多痴男怨女，或者好多群體。

絕對唔適合我呢o的獨家村寡佬。

吹水男

好多男人，把口都係唔收o既。

唔收o既意思，唔係話把口衰，而係冇o野搵o野講。

唔識波扮識波講波，講女人講去滾，鳩o翕搞爛 gag，口沬橫飛。

幾個男人坐埋一齊食飯唔講o野的確係怪o的，但係都唔駛咁嘈，講唔停。

兜口兜面，應又唔係，唔應又唔係。

靜o的又唔駛死o既。

理想生活

七點起身

八點食早餐

八點十五分開工

一點食晏

兩點再開工

六、七點收工

八點幾食晚飯

九點幾沖涼

十點零時段上o下網睇o下電視

十一點幾訓覺


咁o既生活，仲唔係夢想成真？

中國咸魚

我發覺，原來o係邊度生活對我o黎講係冇分別o既．．．

我發覺，原來做邊份工對我o黎講係冇分別o既．．．

我發覺，原來冇人生目標對我o黎講係冇問題o既．．．

我發覺，原來咁o既生活態度對我o黎講係冇問題o既．．．


望望四周，我發覺，原來o係我身邊o既大部份大陸人都係咁．．．

漫無目的，渾渾噩噩，咁就一世．．．


「做人如果冇夢想，咁同條咸魚有咩分別呢！」

等

我最近經常諗，呢個世界有冇女仔會接受到我憂悠寡斷o既性格呢？

有o既話，呢個女仔又會唔會係靚女呢？

我，又會唔會咁幸運呢？

「莫道你在選擇人，人亦能選擇你．．．」

坐言起行

由今日開始，我要講得出做得到。

仲要係快手o個隻。

希望．．．

始束

到了今天，理應我係應該快樂的。

但到頭來，我卻鬱鬱不歡了一星期。

原因，我想我是清楚的。

既然已經結束了，我實在不應該再想太多。

是時候學習放開．．．

毒

今日放學之後，見有o的時間，行o左入一間玩具店睇o野。

齋睇，冇o野想買。

突然間，覺得自己好「毒」。

忽然間，覺得店內其他人都會覺得我好「毒」。

即閃．．．

一位，唔該。

一個人，連最鍾意食o既壽司都唔想食。

左諗右諗，行到去門口，結果都係冇入去。

其實唔係唔想食，已經想食o左幾日，只係唔想一個人去食。

由兩個人，變一個人，可能要時間適應。

以往習慣孤獨o既我，經過八年o既二人世界，已經失去獨處能力。

得番一個人，好多o野都唔想做．．．

雜念

我開始有o的猶疑，其實我應該交帶好所有o野遲o的先走。

依家好似好不負責任。

我開始有o的懷疑，其實我係為o左逃避問題所以先咁急走。

其它可能都只係藉口。


既然一切已定，有冇人可以教我問好再胡思亂想諗咁多？

獨家村

曾幾何時，我覺得我係一個唔需要朋友o既人。

最近，我發覺我未必係咁。

我以往習慣一個人，習慣孤獨。

其實，都係自己逼出o黎。

自己營造一個孤獨環境俾自己。

一直o係度逃避．．．

求變

我自返港後，似乎一直生活o係唔開心之中。

無可否認，我好多煩惱都係自尋。

唔開心，都係自己揀唔開心。

既然我仍然有得揀，我應該揀令自己開心。

要開心，我只有改變。

唔變，我只會原地踏步。

我唔想再唔開心。

封閉

我同網友講，我話不如遲o的出o黎見面。

佢話簡直要搵錄音機錄起我番說話。

我話我唔想再活o係自己個框度。

佢話我係一直活係個箱度。

轉變

今日，終於作了決定，行o左未必應該行o既一步。

我唔知我可唔可以堅持。

更加唔知唔知會唔會成功。

但係，至少我今日拿出o左我以往缺乏o既「勇氣」。

我要行我想行o既路！

喪禮

今日出席o左個喪禮。

咁大個人，第二次。

第一次，已經係十八年前o既事。

唔明點解o的人o係喪禮會：

1. 聚舊、相認
2. 高談闊論
3. 細聲講大聲笑
4. 嘻皮笑臉
5. 傾生意

等等．．．

似一個聚會，多過似一個喪禮。

我好靜，冇參與。

因為換轉係我，我都唔希望我個喪禮係咁。

中秋

舊年：
http://hide-myself.blogspot.com/2007/09/blog-post.html

天氣好、心情好

當頭棒喝

我老豆真係幾時都係o岩。

我o既諗法真係幾時都有問題。

不過，方向不變，目標不變。

至少達成共識。

去？留？

原本打算下年返澳洲，但因為昨天o既噩耗，令我猶豫起來。

我覺得我應該留o係香港陪陪父母。

因為父母年紀漸大。

因為我係獨仔。

因為我已經離開過八年。

一向只諗自己o既我，係時候為父母諗諗。

齊人

一個大家庭通常只會o係兩種情況下會齊人。

紅事、白事。

當一個人隨住年紀漸長，出席 "齊人" 聚會o既機會會越來越多。

而且以白事居多。

今日突然傳來一個噩耗，下個月，又會 "齊人" ．．．

九號烈風或暴風風力增強信號

風平浪靜 ...

鸚鵡

今日公司各同事 (老闆們冇份) 全日o既話題都係圍繞住呢隻雀。

全城期待過迎接奧運。

因為奧運開幕冇假放，隻雀飛到香港o既話就放假一天。

半途而廢

回想過去十年，似乎冇一樣o野係完完全全咁完成過。

無論學o野定做o野，都係半途而廢多。

最近下o左個決定，未十成，都定o左八、九成。

未知批唔批。

好多o野，都唔到自己話事。

但我想真真正正完成一件事，一件屬於自己o既事。

理想是 ... ?

理想是 ... ?

鍾意影相就去讀攝影？做攝影師？

鍾意睇戲就去讀電影？做導演？

鍾意睇波打 Winning 鍾意摩連奴就去讀足球？做教練？

鍾意砌機 set 機上網打機就去讀電腦？做 I.T.？

鍾意聽歌播歌講o野就去參加電台甄選？做 D.J.？

「唔知自己想點，淨係知道自己唔想點」

《戀愛起義》

記得《戀愛起義》中林海峰旁白o既其中一句：

「唔知自己想點，淨係知道自己唔想點」

切切實實表達到我目前o係工作同前途問題上o既心理狀態。

又記得：

最近我好鍾意一個人　自己一個人
一個人四圍去　一個開工一個人收工
一個人去食飯一個人去飲o野　一個人喱埋係屋企亂 "才禁" 個遙控
夜晚一個人上網　有時一個人跑步一個人打機
一個人去做 gym　一個人去卡拉OK　一個人去睇戲
間唔中一個人去砌下模型　星期六晚一個人去party
跟住一個人聽歌一個人跳舞一個人流汗一個人離開一個人上車跟住一個人返到屋企

一個人開心唔開心大笑大叫　連續好多日都係一個人
一個人有個好處就係唔駛有任何責任
唔駛有咁多包袱
每日二十四小時都係屬于自己
個世界幾時開始幾時停完全係我一個人話事
我鍾意去邊就去邊　做乜o野就做乜o野　諗乜o野就諗乜o野
我鍾意點就點　總之我鍾意就得
我鍾意　一個人

另一段，最能形容十二至二十歲之間，同最近o既我。

點解，我長唔大？

另一半

由中三左右開始，我就已經堅信我自己o既一個諗法。

「一個人一出世，上天已經安排o左命中注定o既另一半俾佢」

雖然上天已經安排o左命中注定o既另一半俾你，但唔代表上天會安排埋俾你遇到。

我總覺得好多長廂斯守的夫妻，身邊o既另一半都未必係命中注定o既另一半。

佢o地可以白頭到老，可以有好多原因。

一個人同另一個人o係埋一齊o既時候，未必可以肯定對方就係命中注定o既另一半。

但好多時當一個人同另一個人o係埋一齊o既時候，往往可以好肯定對方唔係命中注定o既另一半。

最近，我係後者。

一念天堂、一念地獄

由七月尾開始，西貢市日日都人山人海，暑假嘛。

每朝返工o既時候，都會見到一班一班o既年青男女或者係一家大小歡天喜地高高興興咁落車。

而我，就帶住沉重o既腳步同心情上車返工。

其他人坐車入o黎天堂；

而我，就坐車出去地獄。

能令我放鬆的歌聲

鄧麗欣

王菀之

謝安琪

衛蘭

(排名，應該已分先後)

王菲呢？

太耐冇聽了．．．

離家出走

朋友說，其實我大可一走了之。

無錯，我的確可以咁做。

即刻買張機票返澳洲，冇人吹得我脹。

但o係某程度上，對工作我還有些少責任心。

亦o係某程度上，我好享受我響香港o既半奢華生活。

又o係某程度上，我未清楚我返澳洲之後o既方向。

而且，我仍欠一個出走o既理由；或藉口。

如果可以發生好似 Janice 首《離家出走》o既情節就好了．．．

同類

我覺得我自己係某一類人但唔識形容係邊一類。

唔識形容自己係邊一類係因為我仍未遇到同類然後俾我去形容呢一類人。

我覺得我仍未遇到同類係因為似乎冇人完全明白、理解同接受我o既行為同諗法。

別人覺得我另類，我亦覺得我自己係個怪人。

究竟有冇人同我係同類？

我曾經認為我遇到一個，但我每次同呢個人傾偈到最後都係嗌交收場；所以應該唔係。

反反覆覆

上星期堅決地想離開，幾乎買機票咁滯。

今個星期又冇乜o野，只係變得懶懶散散。

仍然冇目標、冇方向；不過領會到一樣o野。

退一步即使未必海闊天空，但至少心情會變得輕輕鬆鬆。

身心受創

過去幾天，完全崩潰。

受不了，哭了．．．

eeeeeeeeeeeeeeeee!!!

原來好多男人去完廁所都唔洗手。

無論大定小。

呢堆男人，包括我老豆．．．

雜念

我．．．又想出走．．．

離開香港。

@28/07/2008 0:01

週末

星期六：
行旺角，睇波鞋、睇音響、睇影碟；有目標，但未行動。
去中環，睇專科，食麥奀記、蘭芳園。
返將軍澳，做 facial。
返屋企，食杯麵。
打機至凌晨五點。

星期日：
訓、食、打機、睇報紙、睇電視；全日一個人。

終於，有一個週末係真正有休息，有私人時間。

期待已久．．．

簡單、充實、滿足

Hello ... ?

無人來？

無人留言麼？

雲遊太虛

今日食o左藥，成個人都浮下浮下。

昏昏欲睡

因為病，因為藥。

失去，原來沒甚麼大不了

冷氣機漏水，書櫃水浸。

好多珍貴漫畫書報銷，例如：男兒當入樽，足球小將 全套等等。

好多中小學o既學生證、成績表、紀念冊等等亦報銷。

仲有中學階段o既日記、上堂傳o既紙仔等等，大部份都冇晒。

同初戀女友一齊寫o既記事簿、字條同信，都冇o左一部份。

有一o的已經忘記o左o既朋友送o既咭同信件，仍然保存到。

如果唔係因為水浸，都唔記得自己仲 keep 住呢o的o野。

發現o的o野濕晒報銷o個一刻，的確有一絲失落。

一陣之後，冇乜感覺。

豁然覺得可以放低過去，係一件好事。

或者，係因為不堪回首．．．

速成

由今日開始，每日都會打一篇 blog。

不為甚麼，只為練打字。

廿到尾

最後一年二字頭生日，下年就三張o野了．．．

暴飲暴食

每逢週末，我都會暴飲暴食。

係為舒緩壓力？

定因壓力而失控？

睇上癮

由買o左 HOUSE Season 1 ~ 3 o既 DVD o既o個一晚開始，每晚都至少煲兩集，實在太正了！！！

尤其喜歡 Dr. Cameron ...

晚餐？宵夜？

晚晚十點半先開餐，應該當 晚餐 定 宵夜？？？

三週、三天

一連三週冇放假，週末公眾假期照常工作，幾乎連短暫休息o既時間都冇；有點吃不消．．．

一連三天假期，連續三日都打麻雀，除o左食飯訓覺之外冇休息係咁打；仍然有點唔夠喉．．．

白行一趟

放假一天

同女朋友入東涌東薈城名店倉逛

空手而回

想坐 昂平360

但又唔夠時間



快快樂樂的一天

廿四圈

星期六及星期日

每日十二圈

已上癮．．．

聲沙

聲沙

唔知係因為開o左幾個鐘頭會

定沖涼唱歌唱得太勁

兜巴星

今日受o左兩巴掌。

上晝一巴、下晝一巴。

一巴係男，一巴係女。

一巴星醒o左我做事，另一巴星醒o左我做人。



犯賤，唔打唔醒神．．．

行屍走肉新體會

o係澳洲o既時候，曾經有一段頹廢o既日子。

冇返學，冇返工，冇出街，隱蔽中年一名。

自覺似一條行屍。



o係香港o既呢幾個月，有工返，有學返，有街出。

尤其係上個月，幾乎日日朝九晚九忙到嘔。

冇生活，冇思想，冇自己時間。

深深體會，原來咁先係一條行屍．．．

有幾何？

依家o既香港，有幾何會見到藍天白雲？

天氣好o既時候，人都會開朗o的。

難怪o係香港生活o既日子，我總係死氣沉沉．．．

特別眼訓的星期一

每逢星期一都特別眼訓

因為星期日晚唔願訓

越夜訓，越覺得個假期正在延長

尋晚又成三點幾先訓

睇o個套已經睇過兩次o既《旺角黑夜》

睇完，黯然去訓．．．唔想星期一來臨．．．

除夕

除夕，o係屋企同父母、女朋友食一餐家常便飯。

睇電視直播倒數、煙花。

就係咁靜，咁簡單。

---

今年除夕，o係香港過。

好耐未試過。

有得揀，我寧願唔試。

我想返過去。

笑

我已經諗唔起對上一次我無憂無慮咁開懷地笑係幾時

減壓

不自覺地，我養成o左兩個不太好o既減壓習慣。

1/. 打牌

打牌時，死做爛做挑戰最大番數，食出有無比快感及滿足感。

嬴幾多，輸幾多，我唔在乎。

2/. 購物

只求買，只求駛錢，感覺暢快。

有點病態。

大出血

HITACHI L37X01A 37-inch Full HD LCD TV


PANASONIC DMR-EH67 DVD-RECORDER


PLAYSTATION 3 40GB BLACK

簡單

用好簡單o既詞語，就可以形容呢兩個星期o既生活。

「疲倦」同「眼訓」

Update

想，但冇時間。

響公司唔方便，響屋企「支力」到連電腦都唔想開。

keep 住 update?

下星期再開始．．．

空殼

行返工o既時候，諗：

「時間真係過得快，終於捱到星期五，我之前o個四日做過o的乜？」

諗唔起詳情。

當然記得做過咩 project，記得有咩 project 未完成，等等。

只記得係埋頭苦幹咁做，缺乏思考。

只記得係只有工作，沒有生活。

每日都係做、做、做，唔知做乜，亦唔知為乜。

身心疲累

除o左『支力』同 眼訓 之外，我咩都感受唔到．．．

全日最 relax o既時段，係 沖涼 同 睇《HOUSE》o個陣。

一星期的心情

星期一：唉，又星期一喇，仲有五日，點捱？！

星期二：唉，捱完一日，捱第二日！

星期三：唉，好喇，捱o左一半，努力！

星期四：哈，咁就捱到第四日，真係快，仲有一日捱埋就放假！

星期五早：咁就第五日，都唔知之前o個四日點捱過o既！

星期五晚：好o野，終於放假！

星期六早：放假，真好。

星期六晚：唉，得番聽日．．．

星期日早：今日可唔可以係星期六？！

星期日午：如果一星期有三日假就好啦．．．

星期日晚：唉，又放完假．．．

浮誇

陳奕迅 - 浮誇

作曲／編曲：C.Y.Kong
填詞：黃偉文

有人問我　我就會講　但是無人來
我期待到無奈有話要講　得不到裝載
我的心情　猶像樽蓋等被揭開　咀巴卻在養青苔
人潮內愈文靜愈變得不受理睬　自己要搞出意外

像突然地高歌　任何地方也像開四面台
著最閃的衫　扮十分感慨
有人來拍照要記住插袋

你當我是浮誇吧　誇張只因我很怕 　
似木頭似石頭的話　得到注意嗎 　
其實怕被忘記　至放大來演吧 　
很不安　怎去優雅 　世上還讚頌沉默嗎　
不夠爆炸　怎麼有話題　讓我誇　做大娛樂家

那年十八　母校舞會　站著如嘍囉
那時候我含淚發誓各位　必須看到我
在世間　平凡又普通的路太多　屋村你住哪一座
情愛中工作中受過的忽視太多　自尊已飽經跌墮

重視能治肚餓　未曾獲得過便知我為何
大動作很多　犯下這些錯　搏人們看看我算病態麼

你當我是浮誇吧　誇張只因我很怕 　
似木頭似石頭的話　得到注意嗎 　
其實怕被忘記　至放大來演吧 　
很不安　怎去優雅 　世上還讚頌沉默嗎　
不夠爆炸　怎麼有話題　讓我誇　做大娛樂家

幸運兒並不多　若然未當過就知我為何
用十倍苦心　做突出一個　正常人夠我富議論性麼
你　叫我做浮誇吧　加幾聲噓聲也不怕
我在場有悶場的話　表演你看嗎
夠歇斯底里嗎　以眼淚淋花吧
一心只想你驚訝　我舊時似未存在嗎
加重注碼　青筋也現形　話我知　現在存在嗎

凝視我　別再只看天花　
我非你杯茶 也可盡情地喝吧　
別遺忘有人在　為你聲沙

面具

王菀之 - 面具

作曲：王菀之
填詞：王菀之
編曲：褚鎮東
監製：金培達

路太遠　試試兜圈　望更遠　智慧的開端
沿途或虧損　傷心會遠　心愛需要挑選

若怕痛　試試婉轉　並永記　愛侶鋪的磚
從前是相戀　現在計算
為何明明共聚　問候沒半句　太過心酸

曾挽手避開幾多次雨水　仍記得那天掌心印在這裡
熱情漸褪去　才明瞭全是沒有火花的允許
若說穿　其實當初不登對　流盡多少的眼淚　活得幾歲
若必須面對　面具掩飾空虛

在這晚　吃了一餐　望兩眼　慣性的餐單
然後望清水　靜默以對為何明明共聚
問候沒半句　太過唏噓

曾挽手避開幾多次雨水　仍記得那天掌心印在這裡
熱情漸褪去　才明瞭全是沒有火花的允許
若說穿　其實當初不登對　流盡多少的眼淚　活得幾歲
若必須面對　面具掩飾空虛

會習慣以一世相許

無論曾避開幾多次雨水　還承認幸福根本不在這裡
任全部過去　來重頭尋覓最愛　讓痴心寄居
若說穿　其實不捨得失去　才學懂分開去睡　活於堡壘
命注定的一對　最後各有所取

郭富城舞林正傳演唱會 2007

過山車

每週一星期五日響公司o既心情都好似坐過山車咁，就快癲。

係 一念天堂一念地獄？！

定 一啖沙糖一啖屎？！

為乜？

見到其他人份工，就會諗究竟我係咪揀o岩條路。

做 7-eleven，McDonald's，甚至做百佳、惠康o既後生仔都可能活得比我快樂。

其它行業o既人，又可能比我多私人時間。

當然，我收入比佢o地高，生活環境比佢o地好。

但如果你問我，我會答你我寧願收入減少到夠駛，換返o的私人時間同快樂。

有錢但不快樂，為乜？

時間表

一直都想幫自己編一個星期一至五o既工作兼休息時間表。

想生活比較有規律。

想自己似一個機械人多過似一個人。

可惜，遲遲未動手。

所以，生活一片混亂。

安睡

兩個人一齊睡比自己一個人睡好。

攬住，好有安全感。

睡得較穩。

無腦

依然係呆呆滯滯，唔識思考。

開始懷疑我係太耐冇用所以唔郁，
抑或係我唔識去用，
定係我根本無腦。

無鬼用

即使係一封簡單o既 email。

即使係一個再簡單不過o既電話。

今日無論係做咩都可以o岩唱 容祖兒 呢首歌o既呢句歌詞。

「甚麼都怯．．．」

無力感

工作上o既考驗終於來了，完全無晒方向，不知從何入手。

暈

bo po mo fo de te ne le ge ke he ...

真係讀到頭都暈 @@

夾心餅

覺得自己似一塊夾心餅。

夾o係中間，左右（或上下）受壓，扁晒，變晒形。

外人望落夾心餅o的夾心都會覺得夾心係最重要最好味o既一 part，實情係夾心有苦自己知。

有o的人仲會只嗒夾心，留返兩塊餅乾，唯有夾心壯烈犧牲．．．

靚仔！靚女！

好怕人叫「靚仔」（或「靚女」），無論係叫我或者叫其他人。

因為我唔係，而好多時其他人都唔係。

一句「靚仔」（或「靚女」）一出，o的人就會望；無論係我畀人望，或者我去望人。

通常反應都係，「靚仔（靚女）？唔係卦．．．」


今朝，買早餐，忽然間，好大聲，「靚仔，係咪餐蛋治、凍奶茶外賣？」

我口回了一句「係，唔該。」

心裡回了另一句「你老鹵丫＃＆＊※§？！」

寄托？！

唔知由幾時開始，我會響一o的經常性去o既地方入面搵到一個人去留意。

例如：
中學階段每朝坐巴士都會見到o既一個女仔。
中學階段每次去補習班都會見到o既一個女仔。
中學階段居住屋苑範圍內鄰居會一齊玩o既一個女仔。
中學預科階段同班o既一個女仔。
Icq、討論區、msn．．．諸如此類。

今日，第一堂普通話班．．．

久違了的感覺。

悶位

返 office，座位好緊要。

好似我咁，依家坐「六筒」中間偏右位，完全係弊。

當悶爆冇乜o野做o既時候，想上網消磨時間都唔得，俾人“目及”到實。

明明係請我返o黎“目及”住佢o地，點知依家掉轉。

體育堂？！

今朝返工o既時候，見到兩、三個著住運動衫褲o既學生響行人路度跑。

心諗，遲到乎？！

當架車行前o的，又見到幾個。

當架車再行前o的，又再見到幾個。

當架車又再行前o的，就見到一大班學生響度跑。

我估，應該係上緊體育堂。

呢個情況，係咪香港先有？！

痛苦的星期一

星期一，一開眼，腦入面第一句說話係，「唉，點解今日唔係星期五」。

苦．．．

點解？！

點解？！
點解星期六、日o既時間特別短？！

我已經煲電視煲到凌晨四、五點，都硬係覺得冇乜私人時間用。

如果一個星期可以放五日假返兩日工就好 lu．．．

衫

今日去o左買衫，被迫的。

一﹚天氣轉涼。我由澳洲返o黎之後一直都係買短袖衫同著短袖衫，即使 office 凍到似雪櫃，即使傷風感冒o左幾個禮拜，我連長袖外套都冇件。

二﹚老豆老母「詐型」。話我衫都唔多件，話我著來著去
o個幾件，話我唔小心身體冷親云云。

上星期去o左 ELEMENTS 圓方，當然係乜都買唔到．．．選擇少之餘，亦貴到買唔起。

今個星期行 IFC，唔係因為買得起，而係因為未去過。雖然最後都非常肉赤地響 A｜X 買o左件衫，不過如果唔係趕住買o的秋冬衫，唔會咁傖促，唔會咁捨得。其實響 Burberry 同 Bally 都睇中一、兩外套，不過我一望到個價錢牌就講句「唔岩呀，唔該！」轉頭走人。

之後去o左 時代廣場，我o既御用 Shopping Center，唔知點解次次都響呢度買到衫，今次亦唔例外，滿載而歸。

記得之前同 大王 傾過下，我o地呢o的尷尬年齡好難買衫。一係太 young 格格不入，一係又太老餅老成死氣沉沉。

我本身唔太注重衣著，求求其其舒服就得，響澳洲時可以一、兩年唔買新衫褲。返到香港之後，身不由己，因為要返工，因為要見人。

要我去行街買衫，係一件好痛苦o既事。

要減輕痛苦，甚至將痛苦變成快感，當然有辦法–––錢。

有錢，的確可以減少好多煩惱，例如響買衫方面。

因為單係去搵錢，已經係一件令人好煩惱o既事。

書

﹙圖片後補﹚

黃金俠

﹙圖片後補﹚

釋懷

有人關心、得人鼓勵、做返自己，就自然開心有返笑容。

急

欲速不達，深深體會到。

越急進，反而距離目的地越來越遠．．．

越小心翼翼，反而越錯漏百出．．．

「我」在哪裡？

今日刻意改變同同事相處時o既一o的細節。

結果，苦了自己，完全迷失。

深深感受到如果做人唔能夠做返自己，不如唔好做人，因為咁做人根本就唔會開心。

杞人憂天

因為一件事，煩足成個 weekend，左諗右諗，冇覺好訓。

今日返到公司，怕會發生o既結果冇發生，安然渡過。

唉．．．多舊魚．．．

獨處

返香港之後，幾乎冇獨處o既時間。

任何時候任何日子，我亞媽都會響我房打機，直至我話要訓覺。我亞媽腦入面冇「私人時間」「私人空間」呢回事，因為佢日日日頭都自己一個人，佢夠晒「私人時間」，唔會諗到其他人都要。

放假去街，一係同爹娘一齊，一係同女朋友一齊。

返工放工，同老豆一齊。

公幹出差o既時候，又會同同事一齊。

所以一有機會獨處，我就會好珍惜；戴起耳筒，聽住歌，完全抽離。

獨處時，我比較快樂。

香港人的生活？！

返o左香港差不多兩個月，返o左工已經個幾月，已經領略到香港人o既生活–就係冇生活。

朝九晚七，通常都八，有時甚至八點半；返到屋企九點幾；食完飯都十點；沖個涼抖一抖吹埋頭之後都可以準備上床訓覺；最好十二點半前訓著，如果唔係會唔夠精神，因為第二朝七點半又要爬起身。

一至五都係咁，機械式；好在我星期六、日都放假。

星期六、日放假，其中一日留俾女朋友；即係一星期我得一日私人時間留響屋企抖抖．．．仲要分一半時間俾屋企人。

我好佩服某o的香港人，放工之後仲可以行街睇戲食飯，夜夜笙歌。我俾埋條命你好過！！！

好多香港人o既生活即使望落好似多姿多采，但始終都係行屍走肉居多，得個殼，麻木咁吃喝玩樂嘻嘻哈哈，皮笑肉不笑。

香港人o既生活，算甚麼生活？！

唉．．．悲哀的地方．．．

p.s. 都仲未講收工之後要去自我增值去進修．．．

曝光

為免身份曝光，所免要轉 URL。

俾同事們睇到我個 Blog 就真係死得人。

啞

星期一開始，我需要變「啞」嗎？

姓「賴」

呢幾日都吽下吽下，好唔清醒，唔知同食o左藥有冇關呢？！

唔．．．應該都係．．．

硬食兩o野

一早返到公司，就硬食o左同事兩o野，星o左兩巴應o既。

呢兩巴，打醒o左我。

令我知道我係幾咁白痴。

令我知道原來我成個星期都冇乜真正去用腦諗o野。



之後全日都鬱鬱不歡，好唔忿氣，嬲自己白痴兼冇腦。

另一方面，我好多謝我同事醒o左我兩o野，令我上o左都幾寶貴o既一課。

洗腦

如果可以o既話，我希望世界上有一種藥可以洗腦。

因為，我需要替自己洗腦．．．

洗走以往做人o既陋習．．．

洗走以往o既思考模式．．．

甚至洗走我本身o既性格．．．

我要，由零開始。

吃不消

工作模式由今日開始有所改變，一時間有o的吃不消。

忽然間太多資訊入腦，迫爆。

原來，要成功，真係唔簡單。

人都癲．．．

新電車

之前好似坐過，唔記得，唔肯定，就當係第一次坐。

倒下了一半

圖片鳴謝：彎彎