今日無意中響報紙見到星期三有一個招聘會，心思思想去。
十五十六左諗右諗一大輪之後再經兄弟姊妹朋友們鼓勵之下，我決定踏出第一步。
要改變，第一步永遠比較難行。
成功與否，係未知數．．．
唔知點解，我對好多事都會有一個愛理不理o既態度。
好似上星期唔知邊日，我發覺我廁所入面其中一盞燈壞o左。
我抬頭望一望，心諗：哦，又壞！
曾經諗過換o左佢，不過呢樣o野平時唔係我做開，又唔係暗到沖唔到涼，之後就由佢。
過o左唔知幾多日，忽然間望下天花板先發覺，原來已經換o左個新燈膽。
都係好淡然咁心諗：哦，換o左！
跟住就冇o野。
可唔可以唔再係咁？
我有一對 Adidas「水鞋」。
唔知由幾時開始，我對 Adidas 波鞋不斷發出「唧唧」聲。
響公司做o野o既時候，由於環境比較靜o既關係，基本上我行到去邊，公司o既人一聽就知。
同同事傾偈，佢話個問題應該係因為我o係落雨天著過呢對鞋出街，入o左水導致。
由於對鞋實在太嘈o既關係，我決定將佢遣返大陸等落雨時先著。
已經唔係第一次。
無論我讀咩學咩都好，每次我一走堂都總係會 miss o左o的重要o野。
讀大學時係咁，舊年進修讀電腦課程時係咁，依家連讀興趣班都係咁。
做人，都係規規矩矩好o的．．．
我發覺，我個心依家係懸空o既。
冇伴，冇對象，冇目標。
以前有個習慣，總會響我活動o既圈子入面搵個寄託。
依家，連呢樣o野都冇埋。
公司冇，唱歌班冇，其他圈子入面都冇。
苦悶．．．
請o左兩日假。
尋日正日生日，晏晝去o左我最鍾意o既 峰壽司 同埋響 CWB shopping，夜晚返屋企同家人食飯。
今日就冇出街，響屋企睇戲打機。
可能好多人會覺得咁樣係浪費o左個假期。
但係咁樣静静地過我已經好滿足。
如果多個伴，當然更好．．．
子曰：「吾十有五而志於學，三十而立，四十而不惑，五十而知天命，六十而耳順，七十而從心所欲，不踰矩。」
三十歲了，但我仍然係戇烚烚。
十歲、十八歲、廿歲、廿一歲生日時，都唔覺有咩特別；可能係我已經唔記得o左。
到三十歲生日，就硬係覺得有o的唔同咁。
但又講唔出有咩唔同。
所以，我今年都煞有介事咁搞大o的。
雖然只係數字上加左一，但實際上其他人都唔會再當你係細路。
（廿九歲時都仲可以掹車邊扮下細）
三十歲了，係時候為人生打算下。
按照慣例，都係響生日前o既o個一個週末開「趴地」。
今年，都係同屋企人過。
原本打算 BBQ，因為天氣關係改為 大食會。
總括全日，係開心。
一早計劃好今晚出街食飯，星期日 BBQ，星期一、二放假 relax 下。
但睇個勢，呢幾日都係要響風雨中渡過。
今日同老細傾偈時講起一個響大陸一齊做o野o既香港同事。
聽完之後，諗起最近響高登見到o既一句說話。
「十個男人九個嫖，一個在動搖。」
真的嗎？
我老母話我講o野態度好差。
我立即聯想到我可能只係一塊鏡。
可能唔係反映佢，不過可能係反映緊我身邊o既另一個人。
好多時我o地都會響親戚朋友身上搵到自己。
其實都唔知係我o地影響緊對方，定自己已經俾對方影響o左．．．
因為一個網友提起一個我已經不太記得o既網友。
於是向其他網友詢問一下之餘順便講番起以前開電台o既日子。
跟住又去摷番其他人o的電台錄音o黎聽。
勾起好多回憶。
因為開台，令我認識到好多朋友（網友）。
因為開台，令我擁有一段快樂時光。
o個段日子，真係好開心。
由於今年比較黑仔o既關係，好多o野都唔敢亂o黎。
話說都上o左o黎大陸半年有多，但個煤氣熱水爐一直都同我過唔去。
由一開始，未有煤氣錶顯示剩餘煤氣量o個陣，次次都係到我就冇煤氣沖涼。
到加o左煤氣錶之後，又到條熱水喉有事。
最大鑊o個次係沖沖下涼條喉頭尾接駁位置忽然間亂嚇熱水，縮遲o的都真係死得人。
跟住不斷搵人修理都整唔好，整好又壞，再整好又再壞。
我o的同事就壞都照用，我就知自己黑仔，唔敢博。
所以，我已經沖o左一段時間凍水涼。
最奇o既係，o的同事響o個度住o左幾年一直都冇事．．．
我記得我曾經同好多人好大聲兼拍晒心口咁講話我會響三十歲前減到肥。
結果，當然係唔得。
唔係因為冇嘗試過，而係依家o既工作同生活時間唔容許我實行我個減肥 plan。
所以，我決定放肆任食一星期。
之後再應承多自己一次。
由三十歲o個日起，我會開始減肥。
一定！！！
聽住先．．．
一直都好鍾意呢套戲。
鍾意 桂綸鎂，鍾意 曾愷玹。
2007/10/15 睇第一次，到今日入埋 Blu-ray 版再睇多次，感覺依舊都在。
問堂妹借o左隻雜錦碟聽，無意中聽到呢首歌。
首歌o既o個種悲，一聽之下，立即愛上。《老了十歲》
歌手：張敬軒
作曲：伍仲衡
填詞：林夕
情緒 死了 元氣 散了
力氣 未夠令愛移調
和你 夢醒了 第三者彷佛必要
而你 樂意 被纏繞
＊怎想到我像被人隨便拋低的玩具
還不知應要怪誰 難道我豁得出去
怎想到你被別人狂追便成為伴侶
善變沒有罪 卻是壯舉
良心可一敲即碎 女人開始使我恐懼
遺失了你才明白我會消失了生趣
連心肝都可失去 然後犧牲我的眼淚
讓我 為你難堪下去 (像老了十歲)＊
難以 慘叫 唯有 苦笑
時間 為紀念你停掉
和你 避不了 指尖鬆脫的一秒
就似 自我 被焚燒
REPEAT＊
巴不得一飲即醉 至少不必恐怕進睡
為一個你難承受痛苦是我的不對
消失的擺於心裡 然後花光我的眼淚
便會 累到無知睡去
睇《康熙》睇到 蔡依林 同 S.H.E.
之前冇睇過佢o地o既訪問，冇睇過任何有佢地o既節目。
原來 蔡依林 都 OK 喎，唔係響雜誌、CD 封面、海報、MV 出現o個陣。
響《康熙》簡簡單單普普通通咁幾好幾吸引。
至於 S.H.E.，都幾好。
不過冇一個係我鍾意o個種 type。
雖然 Hebe 係靚女。
唔，「台毒」發作．．．
一直都好想離開公司，越快越好。
可惜因為自己同其他外在因素，所以遲遲未走到。
每次知道要延期，我就會唔知點咁。
又基於某程度上o既責任心，我唔想咁不負責任一走了之。
想走又走唔到又好想快o的走o既呢個心理狀態令我每日都好苦惱。
今日有個朋友同我講：
「仲有幾個月，你不如疊埋心水搞埋佢，都唔爭在啦。」
有道理。
何必為難自己．．．
今朝大陸天朗氣清，萬里無雲。
抬頭一望，仲咁o岩見到有架飛機飛過。
七個月以o黎，第一次。
我相信我係一個貪新鮮o既人，而且有o的病態購物問題。
好似我o個部只係用o左半年o既手機，我已經想換o左佢。
又好似我o個部用o左兩年仍然操作正常o既相機，我又想換埋佢。
買o左部 Amp 之後，又想買 Netbook。
成日都好想買呢樣買o個樣。
連 VCD、DVD、Blu-ray 都可以無端端掃一大堆。
每次駛完錢，都會心情舒暢．．．
