從未試過去旅行去到咁唔捨得返香港。
令我再次渴望可以長期離開香港生活。
但由於已過可以申請 Working Visa 嘅年齡。
所以已經再無可能實現。
不過妄想下都好。
如果十年幾前識諗。
每兩年去一個地方。
可能我依家已經遊咗半個地球。
以往去旅行我都好少購物。
但今次，幾近失控。
最誇張嘅係。
我要買多個喼。
你應該比我過得好吧？
我也不知道自己算不算過得好。
話說拜山時同長輩講。
如果見到邊度有未雪嘅細樽裝可樂賣就通知我。
等我買返幾支得閒過下癮。
結果 ...
我舅父好錫我。
喺灣仔一間茶餐廳幫我訂咗。
一箱廿四支。
要自取。
仲要「按樽」同還箱。
而我，住西貢 ...
醫生：去日本你唔驚咩？
我：吓？
醫生：輻射喎！
我：好耐啦。
醫生：未散架。你未結婚又未有小朋友。
我：無擔心咁多喎。
醫生：知你性格啦！
我：哈！
其實俾醫生講一講之後我真係有啲驚。
不過唔理咁多。
因為我已經期待咗半年。
我媽間中都會整春卷我哋食。
一整，就整 48 條。
但我屋企，得三個人。
我問，點解每次都整咁多？
媽答，因為一包春卷皮有 48 塊。
我再問，冇少啲咩？
媽說，有 24，但整 48 條易預啲。
吓？
當你返工做嘢做到唔知時間轉眼食晏。
當你將星期一當做星期五然後等放假。
拜山時見到一對長輩。
睇住佢哋依家嘅相處方式。
我真係想問一句佢哋當初結婚究竟為乜。
怎樣認識。
怎樣相處。
怎樣溝通。
其實都不重要。
我問自己。
有心動嗎？
我答自己。
沒有。
還是算吧。
經過數天 whatsapp 後相約午飯。
我：去日本時部電話換咗上網卡咪無人打到電話搵你？
你：有 whatsapp 嘛！好少人會打俾我，我亦唔太鍾意傾電話。
我：但係 whatsapp 靠打字無語氣有時好易出事喎！
你：唔覺有咩問題丫。
我還是喜歡直接對話多一點。
不想對著一部電話裡的文字談戀愛。
沙士，十年。
張國榮，亦離開了十年。
那年，我不在香港。
最近看著那些回顧的電視節目。
彷彿我沒經歷過，已再算不上是香港人。
明知你不會理我。
我又何苦要去關心你？
人總是這麼犯賤。
你：我拍拖係為結婚。
我：吓？
你：你唔係嘅咩？
我：唔係。
你：咁你拍拖為咩？
我：唔 ⋯⋯
你：吓？唔知？
我：唔 ⋯⋯ 為談情。
你：⋯⋯
想食就食。
想買就買。
想點就點。
我都唔知幾時死。
做乜要刻薄自己。
無聊。
忽然諗。
假如將來識嗰個女朋友係 曼城 或 巴塞 fans 嘅話。
咁點算？
如果你發覺公司部電腦會無緣無故重新啟動、熄機又或者神神化化。
咁你應該係得罪人了。
朋友因工作關係調往新加坡。
為期一年。
我羨慕不已。
記得當日回流香港後的第一份工。
本有機會每年都要到歐洲一、兩趟。
可惜我捱不到那一天已經離職了。
常常嚮往到外地公幹。
可以留上一年半載就更好。
朋友都說其實很辛苦。
我說沒試過我不心息。
朋友問，為何我常想離家（香港）出走。
我說，不知道。我從來就沒有思鄉病。
聽到一則由七十樓跳樓嘅新聞。
喚醒我呢個從未住得高過六樓嘅人嘅一個夢想。
就係將來有機會嘅話就有咁高住咁高。
情侶間應該可以有秘密嗎？
又或者說，夫妻之間還應該有秘密嗎？
都成夫妻了，還有甚麼需要隱瞞？
我常在想。
我應該給我的下一任女友知道我這個 BLOG 的存在嗎？
難道要待她成為了我的太太時才讓她知道？
朋友說，做人不要太坦白。
另一個朋友說，應該對她坦白再看她能否接受。
我想。
即使曾經碰壁。
我還是想坦白一點。
無緣無故，經過年半之後「風癩」又再復發。
又因為工作壓力太大了嗎？
上次折騰了數月，不知今次又要捱多久。
除了服藥，還是服藥。
我啲屋企人係基督徒。
而我自細亦喺天主教學校讀書。
但由我懂性開始（其實可能到依家都未懂？！）
或者講係由我有獨立思想開始。
我已經知道呢個宗教唔適合我。
一，我冇咁偉大。
二，我亦冇咁戇居。
身邊有兩個同事係好虔誠嘅基督徒。
最近同佢哋接觸多咗。
聽多咗佢哋講嘅道理。
慢慢咁就有啲嘢入咗腦。
響一星期前有啲嘢好困擾我嘅時候。
我竟然有一下嘅衝動想叫呢兩位同事帶我返教會。
好在最後魔鬼仍然企響我身邊阻止咗我咁做。
但我終於體驗到點解啲人響絕望時需要宗教作為精神支柱。
因為除咗宗教之外，佢就乜嘢都冇了。
當 Blu-ray 都只係賣 $49 嘅時候。
就係時候換走 VCD 同 DVD 了！
最近響工作上忙到癲咗。
每日都只係期待個 project 快啲完可以請假去旅行。
雖然來來去去都係去日本或者台灣。
但其實地點唔重要。
我只想離開香港抖抖氣。
買咗 CD 先醒起原來自己已經冇 CD Walkman.
於是又走去買部。
朋友話我傻。
我話佢哋唔識貨。
不過依家啲 CD Walkman 雞咗好多。
第四件事。
是要減肥。
過年時大吃大喝。
胖得連「事業線」也擠得出來了 ...
沒有情人的情人節。
難免會想起舊情人。
多年來並沒有在街上遇到舊情人。
是一件非常值得感恩的事。
一旦碰上了。
做甚麼好？甚麼也不做？
說甚麼好？甚麼也不說？
我不知道。
我不懂處理。
假如看到她拖著丈夫帶著小孩。
我會替她高興，然後替自己感慨一下。
假如看到她是一個人而無名指上還未戴上婚戒。
我或許又會胡思亂想一番。
所以。
還是不如不見比較好。
「咁耐冇拍拖，好心你就咪鬼咁奄尖啦！」
朋友勸。
「都已經只係得返一啲普通要求啫。」
我說。
「例如？」
朋友問。
「唔寫 blog ...」
我答。
「恭喜發財！」
「乖！俾封利是你，下年到你派喇！」
「嘩！講埋呢啲衰嘢，你似咒我多過似祝福我喎。」我笑。
今年嘅農曆新年對我嚟講只有一個意義。
就係連放九日假認真抖抖。
連一向被人感覺玩世不恭嘅鄭伊健都結婚埋了⋯
我以後又少咗個有力嘅擋箭牌。
Andy Warhol: "I am a deeply superficial person."
（安迪華荷：「我是一個深度膚淺的人。」）
我：「我是一個膚淺得不能再膚淺的人。」
假如有一日我結婚。
又假如我會請埋飲。
又假如我可以點菜。
乳豬全體一定不能少。
重點在於嗰兩盞燈。
同埋嗰兩粒罐頭車厘子。
唔好以為返工放工撞到十次八次就真係好有緣。
就算俾你撞到一百次都只不過可能係純粹巧合。
千祈唔好諗多。
你每日早餐都會飲盒檸檬茶。
我每次飲檸檬茶都會諗起你。
唔通我要戒甩檸檬茶先至可以忘記你？
「你成日話想搵個瘦嘅女朋友。究竟你要幾瘦？」
朋友問。
「營養不良吧！」
我答。
（圖為 桂綸鎂）
