重視／被重視

今日我響度諗，點解我會對佢咁好。

我關心佢，我好錫佢，當佢細妹一樣。

究竟我係真係一個好人對人好？

定只不過係自私地想有人關心返我錫返我？

新工作

返咗呢份新工之後，基本上每日都係響快樂之中渡過。

主要原因，係因為一班細路。


辛苦咩？

有時確實係幾辛苦。


但得到嘅快樂可以抵消每日面對嘅困難都疲累。


試用期已過，希望我會順利完成一年嘅合約。

《有病呻吟》

生病嘅日子，特別容易胡思亂想，或者係特別多愁善感．．．

《有病呻吟》

歌手：張學友
作曲：林健華
填詞：林夕
編曲：林健華

想喝水　給我水
或者高燒可勉強減退
然後鎮靜情緒
忘掉我這裡應該　有誰

不要想　只管睡
肉體安好不要怕心碎
無謂繼續麻醉
期待你會賜給我　藥水

#如果失戀註定逃不過
逃到病床前　才明白更多
和你分手都也捱得過
然而這夜為何
無能力退燒　多麼錯#

不要緊　請辜負
或者傷風比你更可惡
從病榻上回顧
其實愛你太辛苦　何苦

Repeat #

如果失戀註定逃不過
逃到病床前　才明白更多
和你分手都也捱得過
然而這夜為何
難承受痛楚

誰說失戀總會捱得過
捱到病床前　才承受最多
和你分手都也捱得過
為何徹夜難眠
良藥就算苦　請給我

回頭太難

今日收到佢嘅短訊。

佢話佢終於明白、理解同感受到我當日響工作上嘅情況同苦況。

佢已經遲咗職。


佢話佢最近生活得不太如意。

亞媽又入咗醫院，好似好運滯。


我嘅回應，都係循例嘅一些鼓勵說話。

同埋話佢知，我響過去嘅十個月，我過得很好。


無錯，我係專登講嘅。

我要佢知道，沒有佢嘅日子，我比以前快樂。


我唔知佢點解會搵我，可能佢真係冇其他人可以傾訴。

我哋一向都冇咩朋友。

又或者，係其他原因。


不過無論係咩原因都好，我都叫自己唔好諗得太多。

我，肯定唔會回頭。

一切，都已經太遲．．．

喊

響短短嘅一個星期，已經見到佢喊咗兩次。

一次係因為我同佢玩時整親佢。

一次係今日有同事窒親佢。

不過事後發現，原來佢係因為其他事而唔開心。


每次見到佢喊，我都會唔開心。

其實我唔知係因為係佢丫，定係任何女仔響我面前喊我都會唔開心唔知點咁。


見到佢咁易就喊得出，我好感慨。


因為，我已經有好耐喊唔出。

即使係睇愛情片，我最多都只係流淚。

而我知道，我其實係有需要大哭一場．．．

不知不覺

如果唔計上次嗰三個星期嘅短暫「錯誤」。

唔經唔覺，我已經單身咗十個月。

過去嘅十個月，個人、生活、工作嘅都轉變唔少。

尤其係個人心理、心態、行為上；有變好、有變差。


身邊出現過而令我胡思亂想嘅人又有幾個。

但始終，唔係嗰一回事。

我其實都未係好知自己想要啲乜。


每一件令我有新鮮感嘅事，我都會鍾意去做。

每一個令我有新鮮感嘅人，我都會鍾意去諗。


秤一秤，呢十個月以嚟嘅我確實係比以前快樂。

但係，缺少愛情生活嘅人生，又確實係枯燥．．．

後知後覺

搬咗嚟呢間屋都將近十年。

我返咗嚟定居都已經兩年，日日都用同一個廁所沖涼。

如果唔係上次沖涼時俾呢件嘢嚇一嚇。

我都真係唔知原來呢度有個水制位。

我，有點過份．．．

《姊妹情深》

因為一首《仍能情深愛上》，搵番呢套戲嚟睇。

又因為呢套戲，搵番首《仍能情深愛上》劇場版嚟聽。

《雙城故事》

陳可辛 第一部導演作品。

一直都好想睇，於是買咗碟。

冇預期中好，可能因為已經 out 咗，又可能因為我本身冇 mood ...


一連兩套戲都係 張曼玉，發覺佢真係好得．．．

《甜蜜蜜》

原來呢套戲都已經十三年了。

最近買番 VCD 重溫了一次。

一樣o既感動．．．

HOUSE M.D.

終於等到出碟，用咗一星期睇晒成輯。

沉迷 + 上癮．．．

CD again

屎忽痕想搵嘢買。

行過 HMV, 入咗去搵 張懸 嘅 CD.

自從響《康熙來了》聽過見過呢個歌手之後，鍾意咗。

拍檔

公司終於請到我個 partner 同我亞頭。

今日第一次見面兼開會。


Business 人同社福界嘅人，思想／理念真係好唔同。

好明顯，我同佢哋唔夾．．．

聽

平時出街，我都會聽住 mp3 將自己與世隔絕。

今日刻意唔帶，想聽吓呢個世界。

兩程車，聽到嘅都係廢話連篇。

有人話人狗眼看人低。

有個師奶講高清不過錯晒。

有個人同一個住院嘅病人傾電話。

有個小巴司機聽 Rock 'n' Roll.


由聽日開始，我決定聽番 mp3．．．

電台

最近上高登，發現到網上電台嘅活動好似活躍番。

搞到我都心思思想開番台。

不過，我又確實已經乾咗塘。

亦已經唔再可能好似以前咁多愁善感地做節目．．．

曾愷玹

睇《康熙來了》，有 曾愷玹。

唔明點解可以靚成咁，談吐儀態一流。

如果係香港人，選港姐贏硬。

《渺渺》

買咗一段時間都未睇嘅一齣戲。

感覺不錯。

有些對白，也很有意思。


「你不覺得這樣的幸福好不真實嗎？」

「但是不真實也比沒有好吧！」

《保持愛你》

等咗好耐好耐好耐好耐好耐．．．終於等到。


睇完，冇咩特別感覺。

唔知點解，最近睇愛情片都冇咩感覺．．．

CD

已經唔記得有幾耐冇買過 CD.

有次睇雜誌時知道有隻咁嘅碟，某日行過 CD 舗心血來潮之下所以買咗．．．

Nice moment

預祝「細佬」生日，食餐飯。

去咗一間話咗同佢去好耐嘅餐廳。

我相信去邊間「餐廳」嘅意義唔太大。

意義在於餐飯本身同埋快樂嘅時刻。

無心裝載

我成日以為自己無記性。

終於發現唔係。

原來我其實係對身邊大部份嘅事都「無心裝載」．．．

偷偷摸摸的親朋密友

今日聽《親朋密友》時聽到呢句：

「未被我撞破　都不願收線」

令我諗起我上兩個星期五晚重遇嘅嗰位朋友同埋「她」。


我記得佢哋傾偈時講過，當佢哋有拖拍緊嘅時候，身邊都仍然會有好多異性朋友兜兜轉轉。

而佢兩個都要神神秘秘咁聯絡。

手機上面對方個名，當然會係「男變女」，「女變男」。

聽佢哋講，好多拍緊拖嘅人都會係咁做。

可能係圈子問題，一個兩個人係咁，其他人好多時都會跟住變成咁。

當然佢哋唔會覺得有咩問題。

喺佢哋嘅角度睇，有嘢又好冇嘢又好，都可以減少另一半發現之後帶嚟嘅麻煩。


我不敢苟同。

我覺得如果一段關係發展到咁樣呃呃騙騙，已經冇咩意義可言。


我都有諗過，如果我真係同一個類似「她」咁嘅女仔響埋一齊，我會點？

我諗，對於佢嘅過去，我會不聞不問。

對於依階段嘅「隱瞞」，我唔會刻意去留意或挖出嚟。

只要，佢同其他人真係冇嘢就可以了．．．

諗起一首 李克勤 嘅歌，叫《偷偷摸摸》

癮

由舊年十二月到今個月，大大話話都已經買o左六、七對波鞋。

主要原因，當然係因為買o左新衫新褲要襯。


依家行街時，都會有鋪「波鞋癮」。

就算唔買，睇下都好。


不過諗諗下，如果咁都係癮o既話。

咁我o既「Tee 癮」就肯定更嚴重。

近半年，都起碼買o左廿件．．．

1111

我經常都會見到個鐘係四條一。

無論係 電話、電腦、電視新聞台 定 錄影機 個鐘都係。


基本上我都會響其它時間望鐘。

但每次一見到 11:11 出現時都會呆一呆。


因為 11月11號，係某一個人o既生日。


有o的o野，可能你會想忘記。

但簡單到只要一個電子鐘，就可以令你一世都忘記唔到一個人。

《生日快樂》

最近有鋪翻睇舊戲o既癮。

雖然大部份之前都已經睇過，不過多數翻睇時都唔多記得個劇情。

可以當新戲咁睇。


今晚睇呢套。

雖然記得個結局。

但估唔到，會睇到眼濕濕。

范曉萱

最近又開始響電視上面見到佢。


記得佢初出道o既時候，我已經有聽佢o既歌。

當時o既佢，形象清純過蒸餾水。

當時o既我，亦都只係一個十幾歲o既中學生。

之後到大約 2000年 左右，佢o既形象同歌曲風格變得截然不同。

耳環、紋身、金髮，完全係另一個人，一直維持到依家。


印象中睇過一o的報導，佢話佢以前o既形象只係唱片公司營造出o黎。

依家o既佢，先係佢真正同自己想要o既佢。
（唔知有冇記錯）

有一次響書局見到佢寫o既一本書，好似係講自己o既轉變之類。

望o左兩眼之後冇買。


望住 范曉萱 o既轉變，我開始諗。

究竟真正o既我係點o既呢？

新一頁

今日去o左簽約，新工將於 24/08/2009 開始。

同時見o左將會響o黎緊o個一年一齊做o野o既一班同事，感覺還好。

唯一係未見到我個 partner 同我亞頭。

因為仲未請到．．．

定案

所有o野都已經傾掂，進展順利。

想離開已經有一年，終於可以實行。


每一小步一小步咁行，到頭來就係一大步了。

天鵝

呢隻「天鵝」，帶唔到一日假期俾大家。

亦帶唔到我提早返香港。

感覺瞬間

陳曉東 有首舊歌叫《感覺瞬間》。

其實同我講o既o野冇咩關係，只係借個名o黎用下。


感情、感覺o既o野真係好奇怪；或者實情係我個人奇怪。

早排先至因為 ex-GF o既一兩個普通o既 sms 搞到左諗右諗好唔好搵番人。

到早兩日遇到另一個「她」之後已經將 ex 件事拋諸腦後之餘又諗「她」諗o左幾日。

到今日我又終於瞓醒叫自己唔好發夢同唔好諗多o左。


所有感覺都可以一閃即逝。

好可能真係代表根本唔係真．．．

曙光

過去o個一個星期發生o既事唔算太多，但每一件都非常精彩。

好耐都未，或者係從來都未試過生活得咁充實。

人生，的確開始有番o的意義。

孝

大舅父生日，六十大壽。

尋晚我同佢擺o左圍酒，一家人食餐飯。

我o地家人平時狗咬狗骨頂心頂肺，幸好當晚風平浪靜。


我唔叻表達感情。

只係諗到屋企o既長輩年紀越來越大，又冇結婚冇兒冇女。

做細o既，有能力o既時候做到幾多咪做幾多囉。

最緊要佢o地開心。

何況，由細到大佢o地都咁錫我。

我唔知呢o的係咪咁叫「孝」，我只係覺得係時候回報。

一擊即中

響未瞓醒o既情況之下接到 job offer。

原本都猶豫不決，但一諗到尋晚件事。

我就知道有o的o野如果響o個一刻唔好好把握o既話可能就咁就冇o左。

於是．．．


新工作、新生活正式開始。

又一個「她」

出席一個平常唔會出席o既場合。

機緣巧合之下遇上「她」。


我清楚知道自己咩狀態。

我亦都清楚知道因咩原因佢會帶俾我心如鹿撞o既感覺。

我更清楚我跟這個「她」只係萍水相逢冇結果之餘兼碰不得。


但人總會響好清楚一切o既情況之下仍然繼續自己呃自己。

仍然會覺得係個天係安排緊一o的好事俾自己而唔係跣自己，雖然擺到明一睇就知係跣。

所有發生o既支節都好似係一個好巧妙o既安排令自己覺得o係冇希望之下仍有一絲希望。


結果，我都係做o左一o的我知我唔應該做o既事。

結果，我都係俾o左自己一個我唔應該抱有任何期望o既奢望．．．

笑忘書

一句到尾：「多謝 細佬!」

開始懂了

請o左假去招聘會，盡了最大努力，希望有回音。

遇到個靚靚社工。


同時間，公司電腦方面又有問題，預o左。

今年從不間斷o既命運，唔可能返到公司o既時候仲有大鑊o野。

處之泰然。


開始學懂盡力去做好一件事．．．

開始學懂去爭取一o的o野．．．

終於知道咩叫問心無愧．．．

情

認識一個女人，如果用上正式稱謂，應該叫做「情婦」。

但o係其他人口中，係叫做「女朋友」。


見過呢個女人幾次，我都覺得佢 OK。

我亦都以為佢係o個個男人o既「女朋友」。

不過我心裡都有個疑問，就係呢兩個人點解會o係埋一齊？

我對個男人冇咩好感，雖然我唔識佢。

但我知佢環境應該唔錯。


直至有次同人傾開偈，先知道背後o既故事係點。

個男人有老婆，有仔女。

老婆響外國，仔女響香港。

o的仔女都知呢個「女朋友」o既存在。


我唔反對呢o的關係，家家有求o者。

不過好多時o的「大人」話我地呢一輩o既感情事兒戲同無虞。

其實佢地咪又係一樣。

五十步笑百步．．．

舉步難行

今日無意中響報紙見到星期三有一個招聘會，心思思想去。

十五十六左諗右諗一大輪之後再經兄弟姊妹朋友們鼓勵之下，我決定踏出第一步。


要改變，第一步永遠比較難行。


成功與否，係未知數．．．

愛理不理

唔知點解，我對好多事都會有一個愛理不理o既態度。


好似上星期唔知邊日，我發覺我廁所入面其中一盞燈壞o左。

我抬頭望一望，心諗：哦，又壞！

曾經諗過換o左佢，不過呢樣o野平時唔係我做開，又唔係暗到沖唔到涼，之後就由佢。

過o左唔知幾多日，忽然間望下天花板先發覺，原來已經換o左個新燈膽。

都係好淡然咁心諗：哦，換o左！

跟住就冇o野。


可唔可以唔再係咁？

水鞋

我有一對 Adidas「水鞋」。


唔知由幾時開始，我對 Adidas 波鞋不斷發出「唧唧」聲。

響公司做o野o既時候，由於環境比較靜o既關係，基本上我行到去邊，公司o既人一聽就知。


同同事傾偈，佢話個問題應該係因為我o係落雨天著過呢對鞋出街，入o左水導致。


由於對鞋實在太嘈o既關係，我決定將佢遣返大陸等落雨時先著。

抵死

已經唔係第一次。

無論我讀咩學咩都好，每次我一走堂都總係會 miss o左o的重要o野。

讀大學時係咁，舊年進修讀電腦課程時係咁，依家連讀興趣班都係咁。


做人，都係規規矩矩好o的．．．

DRY

我發覺，我個心依家係懸空o既。

冇伴，冇對象，冇目標。


以前有個習慣，總會響我活動o既圈子入面搵個寄託。

依家，連呢樣o野都冇埋。

公司冇，唱歌班冇，其他圈子入面都冇。


苦悶．．．

平淡

請o左兩日假。

尋日正日生日，晏晝去o左我最鍾意o既 峰壽司 同埋響 CWB shopping，夜晚返屋企同家人食飯。

今日就冇出街，響屋企睇戲打機。

可能好多人會覺得咁樣係浪費o左個假期。

但係咁樣静静地過我已經好滿足。

如果多個伴，當然更好．．．

三十而立

子曰：「吾十有五而志於學，三十而立，四十而不惑，五十而知天命，六十而耳順，七十而從心所欲，不踰矩。」

三十歲了，但我仍然係戇烚烚。


十歲、十八歲、廿歲、廿一歲生日時，都唔覺有咩特別；可能係我已經唔記得o左。

到三十歲生日，就硬係覺得有o的唔同咁。

但又講唔出有咩唔同。

所以，我今年都煞有介事咁搞大o的。


雖然只係數字上加左一，但實際上其他人都唔會再當你係細路。
（廿九歲時都仲可以掹車邊扮下細）


三十歲了，係時候為人生打算下。

生日趴地

按照慣例，都係響生日前o既o個一個週末開「趴地」。

今年，都係同屋企人過。

原本打算 BBQ，因為天氣關係改為 大食會。


總括全日，係開心。

天公不做美

一早計劃好今晚出街食飯，星期日 BBQ，星期一、二放假 relax 下。

但睇個勢，呢幾日都係要響風雨中渡過。

男人

今日同老細傾偈時講起一個響大陸一齊做o野o既香港同事。

聽完之後，諗起最近響高登見到o既一句說話。

「十個男人九個嫖，一個在動搖。」


真的嗎？

鏡

我老母話我講o野態度好差。

我立即聯想到我可能只係一塊鏡。

可能唔係反映佢，不過可能係反映緊我身邊o既另一個人。


好多時我o地都會響親戚朋友身上搵到自己。


其實都唔知係我o地影響緊對方，定自己已經俾對方影響o左．．．

舊屎

因為一個網友提起一個我已經不太記得o既網友。

於是向其他網友詢問一下之餘順便講番起以前開電台o既日子。

跟住又去摷番其他人o的電台錄音o黎聽。

勾起好多回憶。


因為開台，令我認識到好多朋友（網友）。

因為開台，令我擁有一段快樂時光。


o個段日子，真係好開心。

步步為營

由於今年比較黑仔o既關係，好多o野都唔敢亂o黎。


話說都上o左o黎大陸半年有多，但個煤氣熱水爐一直都同我過唔去。

由一開始，未有煤氣錶顯示剩餘煤氣量o個陣，次次都係到我就冇煤氣沖涼。

到加o左煤氣錶之後，又到條熱水喉有事。

最大鑊o個次係沖沖下涼條喉頭尾接駁位置忽然間亂嚇熱水，縮遲o的都真係死得人。

跟住不斷搵人修理都整唔好，整好又壞，再整好又再壞。

我o的同事就壞都照用，我就知自己黑仔，唔敢博。

所以，我已經沖o左一段時間凍水涼。


最奇o既係，o的同事響o個度住o左幾年一直都冇事．．．

講就無敵

我記得我曾經同好多人好大聲兼拍晒心口咁講話我會響三十歲前減到肥。

結果，當然係唔得。

唔係因為冇嘗試過，而係依家o既工作同生活時間唔容許我實行我個減肥 plan。

所以，我決定放肆任食一星期。

之後再應承多自己一次。

由三十歲o個日起，我會開始減肥。

一定！！！


聽住先．．．

《不能說的 • 秘密》

一直都好鍾意呢套戲。

鍾意 桂綸鎂，鍾意 曾愷玹。

2007/10/15 睇第一次，到今日入埋 Blu-ray 版再睇多次，感覺依舊都在。

《老了十歲》

問堂妹借o左隻雜錦碟聽，無意中聽到呢首歌。

首歌o既o個種悲，一聽之下，立即愛上。

《老了十歲》

歌手：張敬軒
作曲：伍仲衡
填詞：林夕

情緒　死了　元氣　散了
力氣　未夠令愛移調

和你　夢醒了　第三者彷佛必要
而你　樂意　被纏繞

＊怎想到我像被人隨便拋低的玩具
　還不知應要怪誰　難道我豁得出去
　怎想到你被別人狂追便成為伴侶
　善變沒有罪　卻是壯舉

　良心可一敲即碎　女人開始使我恐懼
　遺失了你才明白我會消失了生趣
　連心肝都可失去　然後犧牲我的眼淚
　讓我　為你難堪下去 (像老了十歲)＊

難以　慘叫　唯有　苦笑
時間　為紀念你停掉

和你　避不了　指尖鬆脫的一秒
就似　自我　被焚燒

REPEAT＊

巴不得一飲即醉　至少不必恐怕進睡
為一個你難承受痛苦是我的不對
消失的擺於心裡　然後花光我的眼淚
便會 累到無知睡去

蔡依林 & S.H.E.

睇《康熙》睇到 蔡依林 同 S.H.E.

之前冇睇過佢o地o既訪問，冇睇過任何有佢地o既節目。


原來 蔡依林 都 OK 喎，唔係響雜誌、CD 封面、海報、MV 出現o個陣。

響《康熙》簡簡單單普普通通咁幾好幾吸引。


至於 S.H.E.，都幾好。

不過冇一個係我鍾意o個種 type。

雖然 Hebe 係靚女。


唔，「台毒」發作．．．

逃

一直都好想離開公司，越快越好。

可惜因為自己同其他外在因素，所以遲遲未走到。

每次知道要延期，我就會唔知點咁。

又基於某程度上o既責任心，我唔想咁不負責任一走了之。


想走又走唔到又好想快o的走o既呢個心理狀態令我每日都好苦惱。


今日有個朋友同我講：

「仲有幾個月，你不如疊埋心水搞埋佢，都唔爭在啦。」


有道理。

何必為難自己．．．

奇景

今朝大陸天朗氣清，萬里無雲。

抬頭一望，仲咁o岩見到有架飛機飛過。

七個月以o黎，第一次。

貪新鮮購物狂

我相信我係一個貪新鮮o既人，而且有o的病態購物問題。


好似我o個部只係用o左半年o既手機，我已經想換o左佢。

又好似我o個部用o左兩年仍然操作正常o既相機，我又想換埋佢。

買o左部 Amp 之後，又想買 Netbook。


成日都好想買呢樣買o個樣。

連 VCD、DVD、Blu-ray 都可以無端端掃一大堆。


每次駛完錢，都會心情舒暢．．．

天將降大任於 ...

今年o既生活、心情，經常都好似坐過山車咁。

忽上忽落。

其實，正常o既人生都可能應該係咁。

只不過係我之前唔正常。


不過，今日真係有o的頂唔順。

不期然同個天講：

「不如你直接攞我命啦！」

「嗱, 命就有一條, 要唔要?」


我唔想亦冇打算過做「斯人」．．．

親人

唔記得由幾時開始，我好享受「家庭生活」。

唔係講緊結婚生仔兩公婆o個種，而係一家人齊齊整整o個種聚會。

例如：做節食餐飯，某人生日燒次o野食 之類。


曾幾何時，我都好唔鍾意呢類節目。

但隨住年紀越來越大，越來越覺得家人重要。

雖則佢o地唔可愛．．．


可能係因為，我知道佢o地終有一日會離開。

我怕失去，所以珍惜．．．

享受

新玩具到埗。

左駁右駁搞足一日。

好開心。

之後睇o左一個演唱會同一套戲。

正！！！

運吉

今日響銅鑼灣食晏，近嘉蘭中心，於是走去睇車。

T恤 + 短褲 + 背囊，點睇都唔似買得起一部「Ben 士」。

咁講真，我又的確係買唔起。


入到去o的 Sales 望一望我之後真係 show 都唔 show 下我。

直到我坐上架車度左搞右搞先至行埋o黎，不過都係一言不發。

咁我唯有扮下o野問下o野，問下幾時有貨，有咩色之類。

佢又即管扮下盡責咁敷衍下我。

吹o左兩咀之後我就閃人。


其實走入去「運吉」o既主要原因，係想睇下依家o的 Sales o既態度。

證實一下呢個世界真係好現實。


我已經認住o個條友，下次去落訂o個陣佢就知，哈哈哈！

講得出口

可能好多人都會覺得我好多時講o野都唔會理人感受。

其實我係想講出自己o既真正感受之餘仲刻意要對方感受下我o既感受。

因為好多人係唔鬧唔醒。

我今日好想同一個人講o既一句說話係：「其實我o地多你一個唔多，少你一個仲好呀！」

呢句說話，亦可以間中用o黎提醒下自己其實我係一樣幾咁唔重要．．．

新玩意

經過一輪左諗右諗心大心細十五十六之後，終於買o左我人生第一部 amp (擴音機- Amplifier)。

如果唔係多得「師父女」推波助瀾，都下定唔到決心。

介紹「師父女」俾我識o既o個個朋友話，我已經正式跌o左落「燒銀紙玩意」o既行列。

我相信我冇跌落火坑，或者係未。

因為當「師父女」好雀躍咁同我講o個o的過萬甚至過十萬o既音響o既時候，我仍然冇咩感覺。

我只係諗：咁貴，癡線o既咩！

ex

一個簡單不過o既短訊，將我從平靜裡徹底咁抽o左出黎。

半年以來，第一次聯絡。

我刻意好平淡咁回覆。

我唔希望佢會諗多，我更要制止自己諗多或做多。

我唔想重複犯錯．．．

《重複犯錯》

主唱: 古巨基
作曲: 陳輝陽@好好笑
編曲: 陳輝陽@好好笑
填詞: 林夕

不知你　難過寂寞
聽到你說　毫不快樂
令我想　我這一生往後娛樂　亦難快樂

如若我還尊重愛情
無謂問那次飛關島暢泳
其實你　找不到任何的高興

也許跟我吃喝進睡

會一生都使你有陰影　但求要逃命
彷彿以往接吻過程

無異於吻過路人　所以細雪無聲

＊突然之間很喜歡你恨我
　我從未愛到　要生生死死那麼多
　結束感情最悲壯結果
　原來似　以掌心撲火

　未算得到　偏得到你是哪位錯
　難道你我以相戀失戀去切磋
　會令情侶受苦已是愛
　但我答應我永不要重複犯錯＊

最慘戀愛會有過程　到沙灘多一次看星星　亦難以償命
當初與你有過愛情　同樣一吻有任何反應　已結成冰

如若我還尊重愛情
我會放棄了呼吸般鎮定
唯望你　吻別時做回些反應
沒有感情不怨命

REPEAT＊

回味過去每一吻
真切得　於嘴邊掠過
你的內心竟在避我

《He's just not into you》

買o左碟一段時間都未睇。

結果喜出望外，非常正！

尤其係講點解唔需要結婚o個段。

相信好多人睇呢套戲時都會好有共鳴。

又要破費買隻有英文字幕o既 DVD 或 Blu-ray 版本了。

《UNDERWORLD: Rise of the Lycans》

我好鍾意 UNDERWORLD o既第一同第二集。

非常鍾意o個隻。

未睇呢套前傳之前知道冇 Kate Beckinsale 時都估到會出事。

結果，真係失望到極點．．．

第二最愛

今日剪完髮走人打算拎番把遮o既時候，發覺有人拎錯o左我把遮走。

一把我好鍾意而又冇得賣o既遮，公司o野，地產商送o既。

又夠大又夠硬淨，好o野難求。

o係我唔想求其拎走其他人把遮o既情況之下，我唯有去買過把。

左揀右揀之下買o左一把o係o個個地方叫做稍為滿意o既。

不過始終都係之前o個把好。

響唔見遮o既o個一刻，其實都幾唔開心．．．

受不了

今日出街坐小巴o既時候，處於一個痛苦環境。

前面一個懶靚八婆全程傾電話嘈喧巴閉。

右面一個真係幾靚有林莉 feel o既女仔全程同亞媽傾偈不過有把低 B 聲。

耳朵受罪．．．

《愛在記憶中找你》

嘩，亞 sir 教新o野，但係我唔識呢首歌呀！

《愛在記憶中找你》

主唱：林峰
作曲：鄧智達
填詞：張美賢

我對你　這一生　哪個可比
我與你　差一些　永遠一起
邂逅時間場地　似連場好戲
要　自何頁說起

愛太重 深呼吸　欠缺空氣
愛太美 輕輕的　卻載不起
愛情來到時候　似明媚天氣
她走了　突然驟變雪落雨飛

＊如果可以恨你　全力痛恨你
連遇上亦要躲避
無非想 (要) 放下你　還是掛念你
誰又會及我傷悲
前事最怕有人提起
就算怎麼伸盡手臂
我們亦有一些距離

REPEAT＊ (＊)

你太遠　該怎麼　說對不起
你太近　一轉身　卻已高飛
快樂也許太短　似場流星雨
一眨眼　就如幻覺怕又記起

我情願我恨心憎你　我還在記憶中找你

好心做壞事？

有個女同事有臭狐。

其實我發現o左好耐，一直都想提點下佢點樣可以清除o個陣味。

不過唔知點開口。

我亞媽同我講過，o的人有臭狐好多時自己都會唔知。

或者，係唔知點處理。


記得情人節o個日，佢著得好靚，明顯係o約左人。

不過佢一行近你，你就會聞到o個陣味。

o個一刻，我覺得佢好慘，我好想幫佢。


今日，又同佢一齊做o野。

大熱天時，情況依然一樣。

於是我同朋友研究點樣可以免尷尬免現身o既情況下幫到佢。

最後覺得，一封唔係我筆跡o既匿名信加一支香體止汗劑可能係最好o既方法。


我最驚o既係：

1/. 俾人知係我做。

2/. 佢會喊。

《你要的愛》

有日睇《康熙》，見到 戴佩妮。

醒番起呢首《你要的愛》(台灣電視劇 - 流星花園 片尾曲)。

原來都已經 8 年。


聽番呢首歌o既時候響度諗，我依家o既戀愛態度，都有o的似歌詞o既最後一段咁。

如果有個女仔好似呢首歌咁而又出現響我身邊就好。


《你要的愛》

主唱：戴佩妮
作曲：戴佩妮
作詞：戴佩妮　

雖然經常夢見妳　還是毫無頭緒
外面正在下著雨　今天是星期幾
But I don`t know 你去那裡

雖然不曾懷疑你　還是忐忑不定
誰是你的那個唯一　原諒我懷疑自己

我明白　我要的愛　會把我寵壞
像一個小孩　只懂在你懷裡壞

你要的愛　不只是依賴
要像個大男孩　風吹又日曬　生活自由自在

將來！？

同同事傾偈，講起我o個個「只租樓不買樓」o既理論。

佢好簡單問一句：「老o左點算？」


係喎，我冇諗過呢個問題。

因為我一向o既思考方式，都係「冇將來」o既思路。

即係即使今日死o左，都唔會覺得可惜o個一種。

對將來冇打算．．．

對未來冇期望．．．

私人公眾地方

唔係好明點解，任何屋企成員都唔會當我間房係我o既私人地方。

亦都從來冇考慮過我需要私人時間同私人空間。

所以每逢放假有人o黎，我間房都係擠滿人。


我打機咩，總有一個人響度用我部電腦。

我睇電視／睇戲，又總會有人響我間房度傾偈。

明明屋企有幾部電視，點解係都要入我房睇我o個部？

都係o個o的台o者．．．


唔係話好介意，但係都唔好全天候有人留響我間房度丫。

我其實唔駛有人陪囉！

十六圈

一口氣打o左十六圈。

扣除食飯同休息時間，都大慨用o左十個鐘。

其實都幾攰。

妹妹仔

正如之前o既「公式」所講，我可以接受 (+2) 至 (+7) 呢個 range。

所以最近出街o既時候，不其然都會留意下o的「妹妹仔」。

今日去 Time Square 行街o既時間，都有兩個妹好仔令我眼前一亮。

係o個o的一望個腦就自然會諗「嘩，掂呀！」o既妹好仔。

我估，隨時都係得 16 歲左右。

依家o的女仔，真係好識打扮，再加上青春無敵，真係好吸引。


我開始明白，點解有咁多上o左年紀o既 uncle 會鍾意o的妹好仔。

Star Trek

今日趁有空檔去睇o左齣戲，因為好似好耐冇入過戲院。

睇o左《Star Trek》(星空奇遇記)。

一般；投入唔到。

一來係因為睇戲中途接o左兩個公司打o黎o既電話。

二來係我本身對呢類星球大戰片種冇咩興趣。

揀呢套o黎睇都係因為想有o的官能刺激同埋時間o岩而已．．．


見到做 Spock o既 Zachary Quinto，個腦都仍然當o左佢係《HEROES》入面o既 Sylar。

主播

越來越鍾意睇新聞、財經同天氣報告，因為o的主播越來越靚。

雖則靚唔靚真係好見仁見智。

不過依家o既主播樣貌質素比以前o既好又的確係事實。


瘦，樣貌唔錯，斯斯文文，有笑容，說話大方得體。

做女朋友或者做老婆搵呢o的都好o岩。


TVB 郭詠琴、鄭萃雯、龔偉怡、郭詠嘉；ATV 黃珊、李卓敏。

我都好鍾意睇。


反而好多人鍾意o既 周嘉儀、林小珍、黃婉曼、曾美華 我就冇咩興趣。

粗口

我平時好少講粗口，唔好話粗口，連粗俗說話都少。

尤其係響女仔面前。

講得最多 (粗口／粗俗說話) o既兩個情況，一係同個 老表／兄弟 msn，一係打機o個陣。


唔知點解，可能係由細訓練到大o既關係。

好自自然然響某o的人面前講o野就可以自動 tune 到去冇粗口o個個 channel。


奇怪o既係，我依家好多時都會俾異性朋友o既一句 粗口／粗俗說話 搞到啞口無言，唔知點應對。

次次都打一個突．．．

公式

響朋友口中聽到一條公式。

最理想o既女朋友年齡係：

男方年齡 除以 二 再加 七

如果個男人係 30 歲：

30/2 + 7 = 22

就即係話搵個 22 歲o既女朋友就最 fit。


之後我諗，以我最近o既「口味」，應該由 (+2) 至 (+7) 呢個 range 我都可以．．．

台毒

呢排，中o左台灣毒。

響香港o既時候，不斷睇台灣o既節目：

《天才衝衝衝》《康熙來了》《超級大頭目》《冒險奇兵》

坐車o既時候，又不斷聽國語歌：

《癡心絕對》《手放開》《最近》《黑色幽默》《童話》《曖昧》等等．．．

又覺得台灣女仔好吸引：

劉心悠、曾愷玹、艾莉絲、小嫻、趙虹喬、江語晨、迅猛龍、宋紀妍、張懸 等等．．．

上網 chat o既時候又好鍾意同台灣人傾偈。

又打算七月中去台北旅行。


已經癲o左！

《唯獨你是不可取替》

因為雜誌o既一篇報導談及一首歌及一幕畫面。

所以我買咗張《東亞華星演唱會》blu-ray 碟。

又因為由 鄭秀文 主唱加上 許志安 和唱o既《唯獨你是不可取替》呢一幕再加上歌詞內容。

令我好感動亦好感慨。


睇完o既時候我o係度諗，如果有一日我遇到一個人而我又響婚禮上好真心咁唱呢首歌俾佢聽。

應該係一件幾美滿o既事。


《唯獨你是不可取替》

歌手：許志安
作曲：Tetsuro Oda/Sho Uesugi/Miho Nakayama
填詞：梁芷姍

曾聽說有許多戀愛　沒有結果卻剩傷心者感慨
令我都刻意避開　是我不敢相信真愛
但你不惜真心真意對待　竟令我再感到意外
讓我獻出同樣被愛　全面喝采

如果今天將失去眼前的一切　剩低清風兩袖也不計
唯獨你一個是不可給取替　是我生命裡的一切
如早知今生跟你有幸可相愛　在當初應更努力為未來
其實我知道是可一不可再　下半生准我留住你　一直相愛

誰似你這般欣賞我　誰也說不上你一般清楚我
問我可需要甚麼　願你終身交託給我
讓我一生好好把你照料　請讓我體恤你需要
為你獻出全堤愛　從來沒缺少

如果今天將失去眼前的一切　剩低清風兩袖也不計
唯獨你一個是不可給取替　是我生命裡的一切
如早知今生跟你有幸可相愛　在當初應更努力為未來
其實我知道是可一不可再　下半生准我留住你　一直相愛

其實我知道　是可一不可再　下半生准我留住你　一直相愛

完結

經過o左八個月o既時間，終於將之前做 trading 時o既手尾搞掂。

希望「腸胃焦慮症」從此消失。

旁觀者清？

今日同個同事食晏，男性。

兩個男人，話題不外乎o個幾樣。

傾傾下偈，佢忽然間講o左句：「你變o左！」


我心諗：「唔，我自己知自己事，我把口係咁講o者，有幾多我又真係會做．．．」

病發

「腸胃焦慮症」又o黎．．．

對上一次都好似已經係兩個月前。

夭心夭肺

每次聽到呢首歌，都總會有點內疚．．．

《心亂如麻》

歌手：衛蘭
作曲：雷頌德
填詞：林夕
編曲：雷頌德

因初吻著你想慶賀　你卻開始疏遠我
假使你是覺得怯懦　你會不會拒絕我
你有意欲去找我　你會通電再會過
如實在認真喜歡我　或是有心敷衍我　如今只有三歲都清楚

＊是你不想我啦(嗎)　什至不找我啦(嗎)
　無非幾天變化　就像刮我幾千巴
　難道你共我親吻抱擁之後竟有偏差
　不想和我好　請求(不如)直說真話＊

很想你是愛得懶惰　至會多天不理我
心境正逐秒鐘跌墮　我哪一樣有做錯
過去你極愛惜我　快慰之後侮辱我
曾自問自私開心過　自問自卑擔心過　如今的我只要知清楚

Repeat＊

沒有膽色纏你　心亂如麻
回去吧　回去吧　來讓我傷口結疤

Repeat(＊)

老o野

最近上網玩一個叫 Omegle - Talk to Strangers o既o野。

遇到o既人，大部份都細我一大截。

16 ~ 22 歲係最常遇到o既年齡。

不論國籍，都係介乎呢個 range。


出去學唱歌，後生o個一批又係細我一截，4 ~ 10 年都有。


似乎，我經常或鍾意做o既o野都已經唔再適合我呢個年齡去做。

但偏偏，我就係依家先開始享受去玩呢o的後生仔女o既o野。

有時，都幾灰．．．

準備破產

終於俾我響香港搵到有得賣其中五款。

每支 HK$999。

如果買晒o既話．．．

E-Class Coupé

要我揸呢架o野？

唔好卦．．．

一刻

今晚同朋友響將軍澳打邊爐，盡興。

散 band 之後，依舊行去搭小巴返屋企。

行番以前送完女朋友返屋企之後行去搭車o既o個段必經之路。

同一時間，由於異常開心o既關係，想打俾人分享。

拎住電話，唔知打俾邊個。

唔係冇朋友可以打，而係我可以打俾佢地o既朋友並唔認識今晚同我食飯o既朋友。

就係分享完，都唔會有咩共鳴。

相信只有一個「女朋友」，才適合去分享我o個一刻o既快樂。

可惜，冇。

響o個一刻，我真正感覺到「空虛」同「寂寞」．．．

六四

廿年了，當時我八歲。

印象依稀，但未至於冇。

但感覺不深。

最記得我老豆叫我一齊睇電視，之後同我講。

「阿仔，睇清楚，呢個就係共產黨喇。」

言猶在耳．．．

平平無奇

沒甚麼事做，就這樣坐了三天。

開始想為什麼。

開始想離開。

郁身郁勢

每次出街或歸家，都免不了要坐小巴。

如果可以，我必定揀單人位。

如果冇，通常都會幾黑仔下。

遇著靚女坐隔離就一定冇份。

全程傾電話都還好，可以八卦下，或者聽歌蓋過。

但當遇著個成日郁身郁勢o既，好多時都會好痛苦。

隔無耐就撞到你或者郁你兩郁，有時真係想郁佢。

尤其係，訓訓下俾佢郁醒．．．

哭笑不得

自己公司，有個同事，大陸人。

有一張紙寫o左個款號，我叫佢寫個數量響旁邊。

佢寫 "9"，我話應該係 10 喎。

咁佢就即刻響 "9" o既右邊寫 "+ 1"，變左 "9 + 1"。

我話你寫個 "10" 啦，清楚o的。

跟住佢就改為 "9 + 1 = 10"。


我真係想死．．．

或者殺o左佢！

長生不老

係咪有一種基因病，會令人延遲衰老？

即使已經三、四十但個樣仍然似十幾歲？

如果係有o既話，我今日遇到一對咁o既夫妻。

如果係冇o既話，咁我今日遇到o既係一對非常人細鬼大o既情侶。

吃喝玩樂

吃 - 中午飲茶。

玩 - 下午唱K。

喝 - 夜晚自隊。

樂 - All of the above.

Star Wars Lightsaber

因為睇o左《愛到底》，我鍾意上一件玩具。

因為搵呢件玩具，我先知呢把o野叫 Lightsaber。


我係一個 Star Wars 白痴。

對 Star Wars o既所有o野我係一無所知。


我開始搵呢件玩具。

因為我想有一日，可以好似戲入面咁，搵到一個情人之後好欣愛咁互劈。

端午節

今年冇食糭。

因為屋企冇糭食。

－完－

待薄

食o左一餐非常把鬼o既燒烤。

食o左半碗從未如此「硬淨」過o既日本米飯。

呢餐飯，真係待薄o左個朋友。

不過諗番，好似次次同佢出去食飯都 食唔到／試唔到 好o野。

都唔知係我黑定佢黑，哈哈！

專業消遣

我又發覺我冇咩「專業消遣」。

我鍾意o既消遣，來來去去都係o個幾樣。

睇戲睇電視打機打籃球打下麻雀唱下K咁。

講睇戲，我又真係齋睇齋享受，唔似其他人又研究導演手法研究鏡頭分鏡之類一大堆研究。

講睇電視，我亦都係齋睇齋嘻嘻哈哈睇完就算，唔似其他人又分析劇情人物結構之類一大堆，可能我少睇電視劇。

講打機，我玩來玩去都係 Winning，間中先玩下其它例如揸車或冒險或打鬥遊戲，又唔似其他人會好努力咁鑽研技巧或有決心打爆機。

講打籃球，我又係冇咩技術可言除o左射三分，唔似其他人咁獨當一面。

講打麻雀，我都係至在打下兼同屋企人朋友嘻嘻哈哈玩下，唔似其他人咁係麻雀精。

講唱歌，我都仍然係學習階段，亦自知冇咩天份，至在同朋友一齊開心下，唔似其他人咁一鳴驚人。


仲有冇其他消遣？

好似冇．．．

不過想玩想學想精o既反而有一樣，就係「篤波」。

可惜冇腳．．．

專業興趣

我發覺我冇咩「專業興趣」。


例如有o的人，對影相好有興趣兼對攝影用品有一定認識而佢又唔係做o個行。

又例如有o的人，對巴士路線及巴士型號甚至引擎款式都瞭如指掌但又唔係巴士司機。

再例如有o的人，對飛機大炮坦克等軍事用品o既熟悉程度可以如數家珍般但響香港就連兵都唔駛當。

諸如此類．．．


我諗一諗自己，真係冇樣「專」。

極其量叫做對電腦方面熟識o的。

掹車邊叫做對影音產品有o的認識。

一般男人有興趣o既車，我可以話係一竅不通。


我究竟需唔需要有理冇理都搵番樣o野去「專」一「專」呢？

唔．．．好可能係時候有咁o既需要．．．

但係．．．「專」咩好呢？