Ribena

依家每日都飲利賓納。

Bad News?

Proposed Changes to Australian Citizenship legislation

Terminology has been changed in the new Act from the 'grant of citizenship' to 'citizenship by conferral'.

There are a number of other changes to the provisions for citizenship by conferral, including an extension of the residence requirement from 2 to 3 years.

The commencement date for the new legislation is subject to its passage through Parliament.

However, 26 January 2007 is being used by the department for planning purposes.

The changes will affect all applications for Australian citizenship made on and after the date the new legislation commences.

http://www.citizenship.gov.au/law-and-policy/overview/index.htm

簡短o黎講，即係話，我好大機會要留o係澳洲多一年．．．

《美女廚房》

一個近期非常爆笑o既節目；我一口氣睇頭五集o既時候直情笑到頭都痛。

鄧麗欣《不要忘記》

電腦正常，人唔正常

部電腦總算回復正常，裝過另一個 Windows，慢慢裝番一o的日常應用 software 如 MSN, ICQ 等。不過我依家好少 online，有事搵我可以o係度留言或留MSN, ICQ offline message.

隻 HardDisk 已經拎o左去換，換唔換到都係未知之數；
成數唔高，話晒都已經買o左兩年，都係時候睇定另一隻兼換下牌子。

個人開始唔正常，尋晚到今朝總共訓o左十二個鐘；
由尋晚開始右邊下顎近頸位置開始痛，真係俾醫生講中，不過又唔似係喉嚨痛。
感冒唔緊要，千祈唔去係大頸泡就得喇。

尋日醫生叫我食多o的 維他命C，由於我冇食維他命丸o既習慣，所以由尋晚到依家都不停灌 橙汁同 利賓納。

計落都起碼有成六、七年冇飲過 利賓納 了．．．

眼發炎 + 預測感冒

左攪右攪之後隻眼捽之發炎，睇醫生之餘乘機偷懶一天。

以為粒o野係o的家族遺傳病要去睇專科割o左佢；
點知醫生話係普通眼瘡搽下藥膏幾日後會冇事；
不過佢話呢o的眼瘡多數係由其它病引起，
照一照我喉嚨之後佢話我幾日後就會感冒喎，
預測到咁勁？！

Format M:

Backup 終於完成，total 用o左 35 隻 DVD-R + 大量 CD-R 兼用埋其它 HardDisks o既空位約 100GB。

可以 Format M: 之後拎去換。

M for MP3, MTV and MOVIE.

Backup & Winning & 眼痛 & 犯太歲

今日主力係 backup HardDisk，用o左一日 burn o左廿幾隻 DVD 都未攪掂。

Backup 之餘就係打 Winning，用 Juventus + Zidane，如無意外下集 Winning 呢個組合會係隱藏隊 + 隱藏球員。

今日又再攪隻眼，攪到又紅又痛又矇。
我就係一個咁o既人，身體邊度一有事就會攪攪攪。

又再記起 花生糖 話今年屬羊o既人犯太歲。

大禮

生日，收到兩份大禮

壹：尋晚食完飯返到屋企之後一開機發現隻 250GB HardDisk 唔見o左，BIOS detect 到但 Windows 見唔到，左攪右攪之後 Windows 見得番隻 HardDisk 但一 click 入 folder 就 hang，但又可以 Defragment。

上高登求助之後決定 scandisk 再 defrag，到今朝隻 HardDisk 似乎已經回復正常，不過為穩陣起見，都係決定 backup。

打電話去相熟電腦舖問下隻 HardDisk 過o左保養未，原來隻 HardDisk 已經買o左兩年有多，Retail 保一年 Manufactory 保三年但未必一定有得換，不過可以一試。

250GB HardDisk，需時兩日o既 backup 行動開始。

隻 HardDisk 係用o黎裝儲o左十幾年o既 mp3, movie, radio record，冇o左都唔知點算．．．

貳：夜晚發現隻眼生o左粒o野，唔知咩o野。
生o係眼球上方o既眼皮之下，硬硬地。
原本唔痛，但o係我左攪右攪左捽右捽兼夾硬反開眼皮去睇下佢之後就開始有o的唔舒服。
觀察幾日之後先再算。

廿七歲

廿七年前o既今日，一九七九年七月二十號，我出世，重九磅十三安士，於那打素醫院。

廿七歲，如果好命o既話，有八十一歲，即係已經行o左人生o既三分一。

廿七歲，如果更好命o既話，有五十四歲，即係已經行o左一半；
短命代表更好命？
皆因我覺得冇需要亦唔希望咁長命。

不幸o既係，根據往績，我係生於一個長命家族；
太 "女麻" o係一百零幾歲先過身；
亞爺都成百歲先過身；
亞 "女麻" 依家近百托賴都仲行得食得訓得。

如果我可以承繼家族血統亦有成百歲o既話，
假設為一百零八歲，即係只係行o左四分一，
嘩，仲有八十一年，你叫我點頂呀？

毋須同我講生日快樂，因為我從來都唔覺得做人係一件開心o既事；即使我目前好幸福。

我出世，我冇得揀；
所以依家當我有得揀時我就一定揀，
揀一o的我鍾意o既o野去做去食去玩；
因為幾時死，我又係冇得揀，
所以o係死前盡量揀、揀、揀。

假期完畢

三個星期o既假話咁快就放完，又要返學。

放肆的一週

Day1：
(午)京都排骨飯 + 西多士 + 凍檸茶
(晚)出前一丁原味加隻蛋

Day2：
(午)日式豬肉拉麵 + 日式炒飯 + 三文魚刺身 + 日式餃子 + 烏龍茶
(晚)椒鹽雞扒 + 梅菜扣肉 + 有味飯(海南雞飯) + 青紅蘿蔔湯 + 飯後可樂一罐

Day3：
(早)吞拿魚火腿奄烈 + 朱古力奶
(晚)蘿蔔牛腩飯

Day4：
(午)乾炒牛河 + 凍檸茶
(晚)叉燒燒肉燒鴨飯 + 西洋菜湯

Day5：
(午)Subways White Bread + Meatballs
(晚)香腸火腿菠蘿粒炒飯 + (食剩o既)叉燒燒肉燒鴨 + (飲剩o既)西洋菜湯

Day6：
(午)台灣牛肉麵 + 窩貼
(晚)有味飯(海南雞飯) + (食剩o既)椒鹽雞扒 + 梅菜扣肉

Day7：
(午)餐蛋麵
(晚)打邊爐

生理時鐘大兜亂

經過一星期o既努力，終於稍為將個生理時鐘校番正。

世界盃o既呢個月，可以話係生理時鐘大兜亂。

頭兩個星期，又要返學、又要做功課、又要 test 、又要睇波；
每日間歇性訓三、四個鐘兼食冇定時；
其實係幾乎連用o黎食o既時間都冇。

之後o個兩個星期放假，齋睇波同打機，個生理時鐘好有規律；
4:00pm 起身
8:00pm lunch
2:00am or 4:00am dinner
8:00am 訓
完全日夜顛倒。

冇波睇o個幾晚都早訓唔到，眼光光等天光，辛苦到爆。

今個星期開始逼自己早訓，訓唔到就起身；
由只訓到三個鐘，到訓到五個鐘，到今日終於可以完整地訓到七個鐘 0:00am ~ 7:00am，都算係咁喇。

Mount Buller 雪山一天遊

澳洲也會有雪，你知道嗎？

新發現！莊記海南雞飯配料

莊記海南雞飯配料
CHNG KEE'S HAINANESE CHICKEN RICE MIX

有o左呢個醬，我就可以餐餐都食海南雞飯喇。

YEAH ~

2006 FIFA WORLD CUP

名留千古

此情不再

世界盃四強、季軍戰、決賽

四強：德國 vs 意大利、葡萄牙 vs 法國

意大利贏波，左後衛 Grosso 再一次成為關鍵人物；
因為佢，澳洲同德國都先後出局；
呢場波不算太精彩，但勝在緊張又不太刺激。

法國贏波，球王 Zidane o既一球十二碼送走o左葡萄牙；
判唔判罰十二碼同葡萄牙係咪都應該得到一球十二碼，有排拗；
呢場波都不算太精彩，但勝在有幾多做戲場面同插水表演睇，仲有 Barthez 發神經；
不得不提葡萄牙守門員 Ricardo 救十二碼時捉路的確犀利。

季軍戰：德國 vs 葡萄牙

相信會打甩脾，面子尤關；
希望唔會又係零比零悶和九十分鐘。

決賽：意大利 vs 法國

一向唔鍾意意大利，但意大利贏面的確較高因為表現較好；
我支持(希望) Zidane 再展示球王本色o係退休前再奪世界盃。

巴西出局

繼八年前世界盃決賽三比零擊敗巴西，今晚法國再一次將世界冠軍巴西擊倒。

今場 Zidane 絕對有球王風範，頭頂腳踢過關斬將極度瀟灑。
Vieira + Makelele 經常響中場夾擊攔截，完全破壞巴西中場組織。

巴西球員表現落力，可惜冇一個踢出應有水準。
領隊臨場變陣未如理想，冇態o既 Ronaldo 打單箭頭，可惜見佢墮後居多，連佢都要回防，咁邊個射波？
雖然 Adriano 換入後都係一樣；
將 P. Juninho 擺係中場較後位置亦沒甚作為；
Kaka + Ronaldinho 不在狀態加上位置重疊；
Cafu 一早應該退落o黎，法國左路幾乎任攻。

其實由分組賽開始，巴西隊已經冇乜霸氣，散餿餿；
入到八強係因為對手弱加上條線好行，未見真章。

相反法國逐漸上力，十六強擊敗西班牙更加似打o左支強心針 + 回魂針。

我鍾意睇 Zidane，我鍾意睇踢巴塞時o既 Ronaldinho；
但我唔係法國隊 fans，我唔鍾意巴西隊。

每個位置每個球員逐件秤巴西隊可能真係無敵，
可惜將呢一班人夾埋一齊踢波時夾唔夾發唔發揮到又係另一回事。

情況就好似車路士咁，粒粒皆星都仍然與歐聯冠軍絕緣。

今屆世界盃最開心最興奮係今晚，
Henry 入波時我大叫o左出o黎！

高登 post：http://forum2.hkgolden.com/view.asp?message=671571

G2G網上電台討論區

G2G網上電台討論區 即將重開

http://radioforum.hk/

澳洲隊十六強止步

澳洲隊終於出局，算係超額完成。

好多人都替澳洲隊不值，但我覺得澳洲今場波抵輸。

有 35 ~ 40mins 打多一個都入唔到波，無得怨，四場波以今場表現最差； 希汀克 今場太保守，可以換人入o黎攻都唔換。

Viduka o既表現不值一提，但竟然有人話佢o係前場控球能力無人能及；
無人能及可能係因為其他前鋒更屎；十球有九球係佢斷纜呀大佬。

有人話希汀克想消耗意大利體力，加時先決勝；
唔換人住等加時先換之後 K.O. 對手？
足球比賽係臨完場一球就可以收你皮o既遊戲，你等？
等食屎啦！！！
意大利佬結果真係一球攪掂你，加時都冇得你加，人都冇得你換。

因為一球咁o既十二碼而出局，澳洲傳媒當然係嘈到拆天，插到意大利佬體無完膚；
最攪笑係佢o地拎一段偷拍某球隊習訓時練插水o既片段出o黎實牙實齒咁話呢段片係真o既而o個隊波就係意大利；真係得啖笑。

澳洲隊出局對澳洲人o黎講的確係悲痛o既一役；悲痛一日咁多。
o係出局後o既第二日，即係今日，o的人已經開始對足球同澳洲隊淡忘，甚至隻字不提。

可能下年o既呢個時候有澳洲人會問，今年澳洲隊o係世界盃踢成點，點解今年冇消息o既？
須知道世界盃四年一屆，可能係澳洲人唔需要知道o既常識。

高登 post：【世界盃討論】同唔同意澳洲抵輸？

練插水o既片段： http://www.youtube.com/watch?v=QRO626ImQek

打假波？！黑哨？！

潮流興屈一場波為『打假波』或『黑哨』。

依家每次只要場波o既賽果一唔合大眾心水或令大眾輸錢，大眾就會怒吼、高呼、批評場波為『打假波』或『黑哨』。

歸根究底，因為 $$$，因為輸 $$$。

如果你覺得有『打假波』或『黑哨』o既，你大可以唔睇；
如果你覺得有『打假波』或『黑哨』o既，你大可以唔賭；
如果你覺得有『打假波』或『黑哨』o既，唔該你o係賽前嘈定先，唔好到完場發覺自己眼光差導致輸錢先o黎馬後砲嘈喧巴閉。

『打假波』或『黑哨』確實存在，點解？
因為有一班連足球係圓o既都唔知o既幫兇每日o係度賭波。

今屆世界盃有冇『打假波』或『黑哨』？
我唔知，但球證質素參差係不爭o既事實。

上屆世界盃南韓有冇『打假波』或『黑哨』？
我都唔知，但我知道依家有四間意甲球會正因為控制賽果被調查而且隨時被判降班。

賊喊捉賊o既活生生例子。

閃電入球

今屆世界盃有一個現象，就係經常出現閃電入球。

無論係一開波，或係下半場再開波，好多時五分鐘內就會有入球出現，十分鐘左右領先兩球亦屢見不鮮。

而我幾乎每次都會錯過呢o的閃電入球，因為次次都o係度準備緊o野食．．．

澳洲晉身世界盃十六強

好多朋友問我澳洲晉身世界盃十六強係咪好開心，我o既答案係：不！

高登 post：預祝澳洲出局區

澳洲晉身世界盃十六強基本上已經係全城瘋狂，但可笑o既係可能有九成半以上o既澳洲人根本不知 soccer 為何物，情況就好似周街都係上集新聞透視訪問o個兩個o岩o岩投注完但會答你一隊波有十三個人落場o既女仔咁。

澳洲傳媒o既行為我亦唔係好欣賞，其實一向都有o的唔妥佢o地。
兩個從來唔關心 soccer o既電視台大攪足球節目叨光；澳洲人一向只關心 Footy、Rugby、Cricket 同 Swimming，平時想睇足球節目同足球新聞甚至搵人傾 soccer？發下夢好喇。
其實每次轉播一o的大型o既運動會如奧運會、冬季奧運會同英聯邦運動會咁，冇澳洲份參賽o既項目幾乎係冇得睇。睇奧運想睇下羽毛球乒乓球？都係發下夢好喇，齋睇游水啦你。

上次友賽贏希臘、和荷蘭，o的傳媒已經將澳洲隊捧到天咁高，好似可以贏世界盃咁；之後分組賽反勝日本，可以用報紙頭版狂窒日本串到爆，甚至有少少 racism；晉身世界盃十六強又整個電視廣告串美國、捷克，落人面。

澳洲隊故然係好拼搏，鬥志可嘉；但佢o地o既粗野踢法確實係不敢恭維；以友賽荷蘭為例，下下攔截都好似想收人皮咁，簡直癡撚線。

分組賽階段，我係支持日本同克羅地亞的，可惜兩隊都唔爭氣，唉。

世界盃十六強，意大利對澳洲，今次我反而會撐澳洲。
點解？
因為相比之下，我更唔鍾意意大利。

令人失望的兩齣續集

　

最近睇o左兩齣都幾期待o既電影續集，可惜非常令人失望。

一套係《BIG MOMMA'S HOUSE 2》，另一套係《UNDERWORLD：EVOLUTION》。
(Big爆任務2) (妖夜尋狼之魔間叛徒)

先講第一套，睇《BIG MOMMA'S HOUSE 2》係因為第一集條橋幾得又幾好笑，雖然第二集再扮肥媽媽已經欠缺新鮮感但諗住有得笑下都好，點知，完全笑唔出，個故事仲要悶到爆。
其中一幕仲要係抄周星馳套《食神》入面基哥扮女人沙灘 show motion 跑步，唉。
　

《UNDERWORLD：EVOLUTION》就更加令人失望。
三年前睇《UNDERWORLD》o既時候簡直係眼前一亮；故事、動作、特技、拍攝同音樂等等都冇得頂；點知今集每一樣o野o既水準連上集o既一半都冇．．．
如果唔係因為有 Kate Beckinsale，套戲真係冇乜好睇。
成齣戲最精彩o既係加插o左一段非常無謂兼冇需要o既情慾戲，唉。

模糊

我唔係好記得過去o既一個星期係點過o既，因為每日都模模糊糊。

食冇定時，訓冇定時；
功課做晒，學返晒，波睇晒。

至於訓覺，平均每日四個鐘間歇性訓下咁；
開波前訓下、半場時訓下、每場中間o個一個鐘訓下、坐車返學又訓下。

World Cup Fever !!!

究竟．．．

究竟有幾多人睇？

究竟有邊個睇？

究竟有邊個係我識佢時佢又識我？

究竟有邊個係我識佢時佢唔識我？

究竟有邊個係我唔識佢時佢識我？

究竟有邊個係我唔識佢時佢又唔識我？

請留隻字話我知。

第六隻了．．．

墨爾本時間六月十四日晚上七時三十分發現第六隻老鼠被捕。

我開始懷疑我呢間已隔離o既密封房間係有一條不為人知o既對外通道．．．

一條行屍

只係短短o既三晚 11pm ~ 7am (睇波)，我已經開始覺得自己似一條行屍。

一晚踩三場的確唔易，通常睇到尾場半場時 6am 左右就會頂唔蒲訓著o左。

可能因為過去一、兩個月o既睡眠時間太正常o既關係，依家唔捱得。

聽日又要開始返學喇，又 test 又 report 又 presentation，真係連訓都冇時間訓．．．

讀書 同 世界盃，梗係 世界盃 重要。

覆留言

今日有朋友o係 msn 問我點解唔o係個 blog 度覆留言；其實o係開始寫 blog o既時候已經決定o左唔覆。

覆得一個，又要覆另一個，跟住大家又會留言覆番我個回覆，之後我又要覆番o的人回覆我個回覆o既留言．．．

慢慢，呢度就變o左大家聚腳o既討論區，再唔係 blog；更何況，有前科．．．



放心，大家每個o既留言我都會用心睇。

夜晚天堂 日頭地獄

世界盃終於展開，夜波，最早十一點，最遲凌晨五點，一直踩到七月十號，晚晚精采。

上個禮拜星期一至五每日交一份 written report 再夾一次 presentation，下個禮拜有三份 written report 再加五個 test 再夾一次 presentation，再下個禮拜又有三個 test；不如一鎗打死我。

點樣安排訓覺時間先至最麻煩．．．

還記得四年前世界盃英格蘭對巴西當日冇去考一個已定案o既科目o既考試。

號外！！！

墨爾本時間六月九日晚上八時發現第五隻老鼠被捕。

話口未完，又o黎．．．

捕鼠慨況

如果唔係 SIVOTS 問一問我捉老鼠捉成點，我都唔記得要同大家交代下捕鼠慨況。

到目前為止，已經捕獲四隻老鼠，而第四隻老鼠係o係大慨三個禮拜前捉到o既。

o係過去呢三個禮拜入面，都冇再發現老鼠o既蹤跡，撤係地上o既米同放係地上o既老鼠夾都原封不動，好有可能相信已經捉晒。

房間仍未解封，以防萬一。

報告完畢。

冷 - 全日最高１０.９℃

鳴謝：亞嬋 及 彎彎

重開《晶哥電台》

好耐冇試過開台開得咁『開心』；或者應該形容為『滿意』或『滿足』。

亦都好耐未試過咁夜訓；上個月多數十二點前已經上床訓覺。

呢次個電台係有準備o既，播o既歌、講o既o野，都係o係離開o既一個月入面聽o既、諗o既。

雖然收聽人數唔多，但做到一次自己想做o既電台，我已經好『開心』、『滿意』、『滿足』。

今朝重播尋晚呢次o既《晶哥電台》，都係冇乜人聽。

我自得其樂。

啪制

呢排訓得幾好，閒閒o地都訓十至十一個鐘，可能係因為天氣凍o既關係，唔願離開暖笠笠o既被竇。

前排病入膏肓o既時候就真係訓得好差，再之前都經常訓得唔好。

我唔係一個好鍾意訓覺o既人，亦唔係一個唔需要訓覺o既人；但每次訓唔到覺o既時候我都會好苦惱。

每次o係床上面訓唔著輾轉反側o既時候我就會諗，點解人入睡唔可以好似同熄燈一樣，一啪個制就掂；簡單快捷。

我真係好希望將來可以有人發明到一個令人入睡o既『啪制』。

〝啪〞．．．Z ... z ... Z ... z ...

咳到甩肺

我終於知道咳到甩肺係咩感覺。

前兩晚訓覺o既時候咳o左一o野勁o既，之後個胸口近心臟附近一陣劇痛，痛到出唔到聲，之後每一次咳，每一次郁都痛，好唔對路。

到第二朝訓醒時劇痛仍然持續，又唔似平時o的肌肉痛，行路o既時候仲會覺得胸口入面有o的o野甩下甩下咁，於是走去搵學校個醫生幫我 check check，反正唔駛錢。

初步診斷結果都係肌肉痛，不過如果到星期一都仲痛緊就可能係個肺有事，到時要覆診。
應該唔係咳穿肺，因為咳穿肺會呼吸困難云云。

所以，我覺得應該係咳到甩肺．．．

一個月

一個月．．．

冇返學三個禮拜；但仍然名列前茅

咳o左三個禮拜飲o左五支共四款咳水食o左二排藥丸；都仍然咳緊

《電視》
　高朋滿座
　15/16
　向世界出發
　細說名城
　故宮 帝皇秘傳
　星期二檔案
　新聞透視
　鏗鏘集
　獅子山下
　東張西望
　加：老馮日記

《電影@屋企》
　野蠻秘笈
　超班寶寶
　雀聖 2 - 自摸天后
　得閒飲茶
　打雀英雄傳
　我和我的女友
　獨家試愛
　BROKEBACK MOUNTAIN 斷背山
　MUNICH 慕尼黑
　SYRIANA 油激暗戰

《電影@戲院》
　Eight Below
　M:i:III
　The Da Vinci Code

《電台》
　她他她打到o黎
　西崎公園
　最佳配樂

《足球》
　FA CUP
　UEFA CHAMPIONS LEAGUE FINAL
　AUSTRALIA vs GREECE

個 list 應該唔止咁少，記性唔好，一個月內o既o野都記唔晒。

離開一個月

離開一個月．．．

號外：發現第三隻老鼠

於晚上十二時發現有第三隻老鼠。

究竟仲有幾多隻？
我就o黎癲．．．

大魚大肉，飲飽食醉

過去o既一個星期冇乜特別，主要都係飽住咁渡過。

星期六至星期一，三日內打o左兩次邊爐，飽到嘔。

星期六、日，兩日內食o左兩餐日本o野，爽。

之後o個幾日都食得幾好幾開心，有雲吞牛腩麵、麥記做午餐，夜晚又出街食過梅菜扣肉飯、椒鹽雞扒，又煮下飯煲下湯咁，幾好。

另外，最近愛上食 上海小籠包，幾乎日日食。買時已包好及雪藏，買返屋企蒸又得、煎又得，打邊爐或煮麵時放湯亦得，好好味。

晚晚都飽住訓，好幸福。

號外：第二隻老鼠被捕

第二隻老鼠於今晨終於被捕。

重回舊地

今日山長水遠返去以前住 homestay 時住o左三年o既o個區去拜託一位 uncle 幫幫忙做一件事。
叫人幫忙的確係一件好難開口兼尷尬o既事，尤其係其實唔太熟。
好在 uncle 好人。

三年冇返去呢個曾經住o左三年o既地區，坐番成日坐o既電車，行番成日行o既路，都冇乜感覺。
仲急急腳咁走，因為落雨。

Gas 爐

買o左個 Gas 爐 o黎打邊爐，好o野！
想買好耐o架喇。

麥兜："Sh ~ ~ ~ ~ Sh ~ ~ ~ !"

幾日前的自問自答﹝三﹞

問：你每日o係度做乜？
答：唔知。

問：點解會唔知？
答：唔知點解唔知。

問：唔知點解唔知自己每日o係度做緊乜o既人係咩人？
答：廢人。

問：點解係廢人？
答：因為只有廢人先會唔知點解唔知自己每日o係度做緊乜。

問：咁廢人應該點做人？
答：應該唔好做人。

問：即係咩？
答：廢人應該死。

Greek Easter Bread (2)

係復活蛋。

Greek Easter Bread (1)

又有 Greek Easter Bread 食喇，好好味o架，自從幾年前食過之後立即愛上，跟住每年都買o黎食。 搽牛油，正！

Greece Easter 係比我o地o既 Easter 遲o既，所有到依家先賣，而且剩係 Easter 先有得賣。(廢話)

多謝 妹子！

p.s. 其實個味道好似港式牛油排包。

Oxo Smooth Edge Can Opener

有o左呢把罐頭刀，我再唔會界親手。
百幾蚊港紙，抵啦！！！
已買。

自問自答﹝二﹞

問：今日晏晝食乜o野？
答：海南雞飯。

問：好味麼？
答：一早知唔好味。

問：一早知唔好味又去食？
答：因為唔開心而又想開心番o的。

問：有開心番o的麼？
答：梗有，如果唔係點會去食唔好食o既海南雞飯。

問：食緊唔好食o既開心海南雞飯o既時間你諗到o的乜？
答：我o係度o徙緊米飯。

逃避

逃避、再逃避、不斷逃避．．．

可以逃到幾多歲？

我年紀已經唔細，而且睇怕我短期內都唔會死．．．

自問自答﹝一﹞

問：個 blog 係俾自己睇定俾人o地睇？
答：人o地。

問：點解要寫o野俾人o地睇？
答：唔知。

問：冇人o地o黎睇咁點？
答：摺o左佢。

Phillip Island

今日去o左睇 樹熊、袋鼠、袋熊、海豹、小企鵝。

（圖片後補）

寂寞的一群

沉迷網上世界、每日都花好多時間上網(鍾意上高登、鍾意上網識朋友、鍾意上網同人傾偈、鍾意玩 online game 等等)o既人，大慨都係寂寞的一群吧！

即使你有家人、即使你有伴侶、即使你有朋友；你也會感到寂寞。

時間

浪費時間很容易，善用時間卻很難。

開個電台播下歌、上高登睇下 post、玩下三國志ⅩⅠ、睇下 download 番o黎o既電視節目．．．

咁樣，好快就過o左十二個鐘；
咁樣，好快就過o左一日；
咁樣，好快就過o左一年；
咁樣，好快就一世．．．

咁樣樣，就浪費o左廿幾年o既時間；
而且，似乎，會繼續浪費．．．

Good Friday

冇心機，懶得寫。

待續．．．

Cold & Flu DAY & NIGHT

《第二十五屆香港電影金像獎》

等緊睇《第二十五屆香港電影金像獎》，希望到時個網站生生性性。

往年都好少睇金像獎，但今年特別想睇，因為我今年中o左電影毒，九成獲提名o既電影都睇o左。

期待．．．

半條命

連續幾晚唔夠訓，得番半條命。

隨時隨地都可能訓著。

講完

暫停兩天

趕緊o的死人 assignments，暫停寫 blog 兩天。

呢鋪大檸樂喇，原來唔止一隻老鼠！！！

三分鐘熱度

我份人好 “三分鐘熱度”。

仲記唔記得我之前介紹過一個我好鐘意聽o既電台節目叫《西崎公園 》？
我已經冇聽好耐了．．．

o個陣真係好鐘意聽，鐘意到要追番每一集“節目重溫”。聽呢個節目o既最大好處係可以一邊聽一邊思考，諗下自己同身邊o既人同事。

可惜我係一個冇耐性o既人，追追下已經冇再追。
有時一個人懶起上o黎，可以懶到連o野都唔想去諗。

reference: 《西崎公園 》Jessie

《獨家試愛》

導演: 葉念琛
演員：方力申、鄧麗欣、吳佩慈、侯莎莎、唐寧、王祖藍、關之彤、魏駿傑、Theresa、譚俊彥、陳秀珠
電影類型：愛情

今日睇o左《獨家試愛》o既預告片，以戲論戲，覺得呢套戲應該會幾好睇，期待。

但我唔想睇 吳佩慈。

官方網頁　預告片

《Wedding Crashers》﹙港譯：冒牌伴郎生擒姊妹團﹚

今日又睇o左另一套戲，《Wedding Crashers》﹙港譯：冒牌伴郎生擒姊妹團﹚，都算幾好笑。不過睇到中段已經估到個結局，太例牌。

連續兩日都睇到部得到歡樂同可以開懷大笑o既戲，都算係值得開心o既事。

應該買番隻 DVD(有英文字幕)去學下呢套戲入面o個o的尖酸刻薄o既英文，正！

返學好悶

返學好悶

講完

《春田花花同學會》

今晚係第二次睇呢套戲，仍然笑死我。
第一次睇o既時候係因為聽完電台亞三姑(吳君如)個節目之後等唔切所以 download o左個大陸戲院國語版o黎睇，o個陣睇已經覺得好好笑；今次呢個係粵語正版 DVD，聽番廣東話仲好笑，而且亦比大陸版多o左幾段小故事。

我冇睇黃巴士，我冇睇過麥兜o既書；我有睇麥兜電影，第一套都還可以，笑到下，第二套就差o的悶到訓著，我係以一個睇笑片搵開心搵娛樂o既心態去睇；我唔屬於o個個世界，我亦冇打算去領悟，我唔係麥兜 fans。

今次睇《春田花花同學會》係因為有一班我好鍾意o既演員，而且擺到明係笑片，哈哈哈！而且今次卡通部份都好好笑，全靠一班小朋友聲，哈哈！個故事都唔錯，有共鳴，哈！

睇呢套戲o既最大發現係 周筆暢(超級女聲亞軍)，估唔到佢可以咁懵，又懵得幾可愛。

放完假

話咁快，兩個星期o既假就放完。

放假，就係應該放假，唔做o野。
如果放假做o野，就會失去放假o既本意。
但係，每位老師都鍾意o係放假前俾功課學生等佢o地o係放假時可以有時間做。
痴痴地，放假做功課，咁算係咩假？
所以o係兩個星期o既假期入面，我都冇乜掂過o的功課。
因為，我要放假。

話說聽日有份 group assignment 要交(今日 dayoff)，我o係上星期二已經做好晒自己o個 part，仲差一份 report 要四個組員一齊埋尾。結果，約o左佢o地一個星期，始終都係攪到最後一日先一齊返學做(全世界學生都一樣，不論國藉)。做o左八成左右，大家又開始搵藉口閃，想返屋企先埋尾。結果，真係未完成就閃晒。夜晚，收到 email 話聽日o個堂 postpone 到下星期；份 assignment 都延至下星期交。如無意外，又會拖到下星期交之前先埋尾。

《Ｋｉｎｇ Ｋｏｎｇ》

今晚終於睇o左《King Kong》。

套戲爛到呢．．．差o的訓著。

記得上畫開頭o的人都係有彈冇讚，後期o的人又話三粒鐘有特技有猩猩有恐龍抵睇，我就話好彩我當時冇入場慳番幾廿蚊。

成套戲唯一可取之處係拍得 Naomi Watts 幾靚。

– 完 –

三國志ⅩⅠ(之二)

呢集真係唔係咁好玩，亦好易玩，失望。

雖然唔好玩，但仍然繼續玩，因為冇其它o野好玩。

玩 三國志，通常一玩就幾個鐘，坐o係度 ‘才禁’ ‘才禁’ ‘才禁’，o的時間就會無聲消逝。

浪費時間o既好方法。

掛靴

短期內都唔會再玩 Winning，轉攻 三國志ⅩⅠ。

純粹搞笑

【好想去呀！！！】個 post 純粹搞笑，毋須認真。

哈哈哈！！！

三國志ⅩⅠ(之一)

三國志ⅩⅠ(日文版) 已經出o左一個禮拜左右，見過o的圖片同網友o既討論之後，似乎唔太好玩，install 又麻煩，又話要拔 CD-ROM 先玩到云云。而我又唔曉日文，於是極力忍手唔 download 住，等中文版(雖知我係三國志遊戲o既忠實 fans，由第二代已經開始玩了)。

不過由於太悶o既關係(上回已交代)，玩 Winning 已經悶到冇可再悶，又咁o岩今日俾我見到隻 “三國志ⅩⅠ硬碟版免安裝正接玩”；所以，於是，結果．．．我再忍唔住。

下載中，熱切期待！

悶死人

最近悶死人。
悶死人o既原因係最近冇乜新 CD，亦冇乜新 VCD。

繼 Eason《 Life Continues》之後，終於等到隻 張敬軒《春．夏．秋．冬》，可算係望穿秋水。另外期待o既仲有 楊千嬅 同 At17。雖然 側田 都出o左新碟，不過真係冇乜興趣。o黎緊仲有隻 鄧麗欣，這個嘛．．．

電影方面，最近手頭上有四套戲，包括係《霍元甲》、《最愛女人購物狂》、《小企鵝大長征》、《親切的金子》。 《霍元甲》只係一般，令人失望；《最愛女人購物狂》都笑到下o既，總好過《喜馬拉雅星》；反而《小企鵝大長征》幾好睇，幾感人；《親切的金子》？完全冇興趣。

其實仲有隻《King Kong》(尋日到手)，都算係期待之一，可惜 Disc C 睇唔到(落唔到 CD-R 響 DVD 機度播)，唯有再等下添。

已經三月尾，舊年聖誕檔期o的戲應該出碟o架啦，點解等極都冇o架。

唉，悶死人．．．

好想去呀！！！

哎呀

呢輪講得最多o既一句說話係『哎呀』，因為經常呢度痛o個度痛。

繼身痕手痛肚痛手指痛之後，今日又多兩樣頭痛同腳板底痛。

可能係因為訓得唔好o既關係，個頭近後腦o既位置今日隱隱作痛，忽然之間拮你一下o個隻，又痛又討厭，又冇 panadol 喎。忽然，『哎呀』、忽然又『哎呀』。

可能係因為今日行得多企得多o既關係，回家途中腳板底抽筋，行下痛下，『哎呀、哎呀』。

又因為隻左手仲未完全康復，一擺錯位，一用錯力，又會『哎呀、哎呀』。

發雞瘟

唔記得之前有冇提過，近呢幾個月都『發雞瘟』。如果之前已經提過，就當潮文睇多次啦。

『發雞瘟』o既意思其實係近排愛上o左一種食品 - 海南雞飯。

過澳洲之前，我o係香港係冇食過 海南雞飯 o既。o係澳洲o既呢幾年，都係同 uncle 一家去食過幾次；我自己一個人係唔會去食o既，因為興趣不大。

不過近幾個月唔知攪乜鬼，非常鍾意食 海南雞飯，幾近瘋狂。瘋狂o既程度係我日日都想食，當然我冇日日食，不過我相信我真係可以日日食。周圍去搵邊度有 海南雞飯 食，city 每一間有 海南雞飯 o既餐廳都幾乎試勻，冇間掂；其它 suburb o既都有去食，又係一般；屋企附近o個間明知唔好食，都仍然經常買o黎食。

有點走火入魔，雞瘟入骨之勢。

朋友們，知唔知香港邊度有好味o既 海南雞飯？
介紹o黎丫。

p.s. 一講食o野，我就興奮。暫時o黎講，我覺得人生最快樂o既時間莫過於係食好o野之時。
遲下再寫下『食』。

蝴蝶效應 + 隨時暴斃

話說尋日去屋企附近買 lunch - 海南雞飯，天色非常之好，風和日麗。所以，有好多漂亮o既蝴蝶到處飛舞。

而我平生最怕o既昆蟲就係蝴蝶；冇錯，你冇睇錯，係蝴蝶。其次係青蜓同飛蟑螂；我的確怕蝴蝶多過飛蟑螂。唔知點解，o的蝴蝶硬係會向住你飛，而且飛行路線極不規則，你越避，佢地就越向你飛，好恐怖。飛蛾都還好，因為飛蛾多數唔會亂飛向你或者只會飛向燈，第二朝訓醒仲會離奇消失。

如是者，o係我行去買飯o既短短十零分鐘路程，我會行行下忽然左閃右避。

另外，行去買飯o既時候，只係一段短短o既斜路，我都可以行到胸口痛 + 胃痛。相信遲早有一日我會忽然暴斃。

呢輪個身體不斷發出警報，真係應該係時候做番下運動喇。
不過呢句說話我都已經講o左幾年。

p.s. 唔好以為我唔知咩係 "Butterfly Effect"

界手

唔知點解成日開罐頭都界親手，仲要次次都係見血界到手指主要關節位郁親都會痛死o個隻；今日仲要係俾有拉葉o個隻罐頭界親(毋須使用罐頭刀)，可惡！！！

我一定要買o個把開完罐頭之後免界口o既罐頭刀。
百幾蚊港紙就可以免再見紅，抵！！！

"開罐頭界親手" 呢個情況好鬼上一代甚至上一世紀 feel，唔似會係今時今日出現。

我真係好鬼老乜土。

冇耐性

越來越冇耐性，對好多事都係(即使以前曾經好有耐性)；開台係，聽電台又係，甚至o係高登睇 post 都係。

次次開台開到大約一個鐘左右就唔想再開落去草草收場冇耐性再安排節目內容。
次次聽台聽到大約十零廿分鐘左右就唔想再聽落去冇耐性等到有o野o岩聽。
次次o係高登見到o的 post 有兩三頁即使有興趣都冇耐性追落去。

反而踢 Winning 又好好耐性每日踢幾粒鐘都樂此不疲。

唔暢快

最近個 PS2 手制虧虧o地(可能係因為我成日掉佢落地o既關係)，踢起 Winning 上o黎極之唔暢快，成力大減，連續兩場輸俾曼聯(歐聯 + 英超)，為本球季唯一輸o既兩場波，可惡。

好，上 eBay 平平o地 bid 番個新手制先。

奇怪心態

o係墨爾本時我唔鍾意遇到香港人，
o係香港時我好鍾意遇到外國人。

甚麼心態？

M 痛

忽然肚痛，似足“M 痛”，雖然我冇可能有“M 痛”，但我見過其他人“M 痛”o既情況，所以我大慨估計得到有幾痛有幾辛苦。

六點左右，忽然肚痛，嘗試去廁所但又冇得痾；肚痛但冇得痾乃係人生一大慘事(其實我都覺得唔似係要痾o個隻肚痛)。沖個涼，諗住加速血液循環，點知之後仲大鑊。沖完涼，個肚痛到幾乎行唔郁，唯有上床攤抖下。痛到訓唔到，痛到手腳冰冷，痛到標冷汗，又谷住谷住。
係咪好似“M 痛”呢？

輾轉反側一輪痛住訓o左一陣之後決定起身食 dinner 啪粒止痛藥。

其實我唔知點解會肚痛。

晚上八點半。

楊過？獨臂刀方剛？

隻左手已經痛o左兩個禮拜有多，o係 biceps 頂端近膊頭位置。

我唔肯定係因為咩事整親，最大機會係兩個禮拜前拆解廁所天花盞燈時屈親。隻手唔係成日都痛，係做某o的動作或郁到某o的方向時先會隱隱作痛。小心翼翼o左兩個禮拜，都已經差不多好番，點知尋日去超市同做家務時再次觸傷呢個位置，呢次就大濟了。之後成晚都痛，幾乎任何動作甚至一遞(逮)起隻手就已經痛；又痺，連訓覺時將隻手平放都痺下痺下。

呢濟o野相信冇多一個月都好唔番。

今日，成個楊過一樣，又或者可以係王羽演o既獨臂刀方剛。

下午四點。

繼續痕

仍然繼續痕，今日o既重災區主要係小腿，之前冇出過o既地方，又痕又紅又一撻撻；似乎要出勻全身先會好。

決定唔睇醫生唔會去藥房，頂多日。

好似劉建明話齋：『過埋今日就無事o架喇！』

沖個蘆薈浴之後食個午餐先。

下午一點半。

身痕

無端端出疹，唔知咩疹，可能係皮膚敏感，總之痕死人。

由前晚凌晨一點開始，當時我爬起身煮個出前一丁做消夜，見涼涼地，著番件睡衣，著o左冇幾耐對手臂開始痕，一睇發現對手臂開始起粒粒，即刻唔著件睡衣，當時已經覺得個情況唔似皮膚敏感，似出疹。食完個麵，攪下呢樣攪下o個樣到三點時發覺連大脾都開始痕同起粒粒，我就知道大鑊，拿拿臨用蘆薈露沖個涼潤一潤之後去訓。如我所料，到尋日訓醒o既時候已經慢延到個身，但對手o個o的已經開始退。由於好多o野要做，唯有照出街；亦因為比預計中小事，所以冇打算睇醫生，相信一兩日內會自然好。

我好怕出疹，因為初中時試過出過一次大大鑊o既，成個星期返唔到學，仲要打類固醇。

我一向冇對食物敏感，所以百思不能其解。

前日食過o既o野得三樣：
午餐係放o係雪櫃幾日o既 Pizza
五點半點食o左杯 椰子雪糕 + 芝麻雪糕
七點食o左 fish & chips

之後七點半左右忽然肚痾、凌晨一點開始出疹。
椰子雪糕 + 芝麻雪糕，係我第一次幫襯，可能就係呢杯o野出事；不過好番之後我會食多次睇下關唔關事。

尋日病情反反覆覆，時好時壞，到尋晚臨訓前已經好得七七八八，結果訓覺時又出，但比前晚少得多，算係好轉卦。仍未打算睇醫生，或者下晝去藥房睇下有冇o的咩幫到下。

今日依然好痕。

早上十點十分。

心頭好

連續三日貼o左三樣心頭好，係時候講講。

Lexus IS250 - 呢架係計 Lexus SC430、Nissan Z350、Mazda3 同 Volkswagen GOLF 之後最鍾意o既一部車。我本身唔係一個好車之人，亦對汽車o既o野一竅不通；所以過o左澳洲六年，拎o左車牌五年，我都未買車。雖知響外國生活，一部私家車幾乎係必需品，但我就寧願搬屋搬近o的返工返學o既地方坐交通工具都唔願買車，可想而知我對車o既興趣有幾大。幾年前諗過買 RAV4，舊年又差o的買得成 Mazda3，如果唔係改變計劃年半後返香港，相信我已經‘才查’緊；始終，響澳洲“長住”o既話就真係需要一部車。如果有得揀，我將來返到香港之後都唔打算買車；有數得計，香港o的車咁貴，隨時成世坐的士都未必坐到個車價出o黎。不過o的 uncle 成日話，做老闆，在公在私點都要有番部車；“需要”多過“想要”。

BMW C1 - 其實對電單車更冇興趣，不過自從見過 BMW C1 之後就改變o左。幾日前o係街見到架 C1，眼前一亮，覺得佢好鬼 cute、好鬼型。返到屋企幾乎上齊全世界所有 BMW offical 網頁都搵唔到有得賣，唔知型號又用唔到 Google search；結果去 eBay 就 search 到，eBay 真係乜都有。發現原來 C1 已經係 01/02 年間o既產品，亦似乎再冇新款再冇生產。如果仲有得賣，真係去考番個電單車牌買番架過下癮都好。唔知香港仲有冇呢？唔知仲有冇得訂架新o既呢？

Powerdesk - 睇雜誌發現o既一張電腦檯，一張真真正正o既電腦檯；因為電腦同檯二合為一。呢張檯o既主要賣點係冇電腦電線外露。真係幾型，其實又可以話係懶型。雖然電腦硬件係藏於張檯入面，但 config. 可以自由配搭，之後亦可 upgrade，Windows 又得，Mac 又得，唔錯唔錯。英國製造；唔知可唔可以訂張去香港呢？