好耐冇見過彩虹了

Gym 3 - 食自己

今日開始自己 train 自己。

前前後後練o左兩個鐘。

練完之後冇乜感覺，以為對自己太從容。

結果，手瓜痛足三日，頭痛o左兩日。

晶哥電台

尋晚開台。

原來諗住齋播歌，結果開o左 mic。

開 mic，因為手寫板 hang o左。

已經好耐冇開過 mic，大大話話差不多有半年。

好耐冇試過 full server。

感覺良好。

下星期再開。

型！！！

Gym 2 - 手跛腳冇跛

今日第二堂，亦係最後一堂有 trainer，之後就要靠自己。

今日練o既o野相同，但方法唔同。

練完之後，雙手都跛o左。

痛足兩日，對手舉唔高，手肘頂多只可以舉到同膊頭平排。

學亞蘇煮『食送』之 蒜苗炒牛肉

學亞蘇煮『食送』之 家常豆腐

Gym - 手腳不聽使喚

今日正式 train。

練腿肌、練腹肌、練胸肌、練背肌、練呢樣練o個樣練o左差不多四十五分鐘。

練完之後，手手腳腳好似唔再屬於我咁。

跟住，痛足兩日。

星期四再續．．．

年初一

年初一，似乎唔太關我事。

打電話畀爹娘拜年，當時佢o地響馬來西亞，去緊一個好似叫『美麗島』o既地方，一個連電視都冇o既渡假地方。

打電話畀亞麻拜年，亞麻年紀大了，淨係知我係邊個，同埋講『乖喇』、『拜拜』兩句。

唔記得年初一仲做過o的乜，因為今日只不過係一個普通不過o既星期日。

病態天氣先生

由於暑假時經常留o係屋企兼怕熱o既關係，於是每朝都會上澳洲天文台 check 下每日最高溫度。

久而久之，變成一種習慣，由每朝 check 一次天氣，變成每日 check 幾次。

久而久之，由每日 check 幾次，變成每一個鐘都 check 一次，緊貼溫度變化。

久而久之，由 check 下每日o既天氣，變成 check 下成個星期o既天氣。

久而久之，由 check 下成個星期o既天氣，變成將成個星期o既天氣慨況記晒入腦。

如果有人問起，我可以詳細分析今個星期o既天氣走勢。

最近，連 雷達雨量圖 同 衛星圖 都睇埋，你話係咪有o的病態丫．．．

Pink Floyd

今日，聽 亞蘇，聽 李進、黃志淙 同 Sam Jor 講 Pink Floyd 講 Roger Waters，事關這位英國傳奇樂隊人物於 2 月 15 日將首度來港演出。

齋聽佢o地講，已經覺得 Pink Floyd 好傳奇、好吸引。

Pink Floyd 呢個名，聽就聽得多，但我腦入面冇印象邊隊係 Pink Floyd。

點知一播歌，音樂一起，我就知道了．．．

之後o個日，即刻去唱片舖搵碟。

之後o個幾日，不停播 Pink Floyd。

亞伯一名

當我上星期 join Fitness First (gym) o既時候， 我同時 join o左一樣叫 "Triple Pack" o既o野。

"Ever used a Personal Trainer before? Our Triple Pack product for our members, gives you three half hour sessions with a qualified Personal Trainer to help you maximize your club membership."

簡單o黎講，即係以平平o地o既價錢去請一個教練 train 我三堂，之後自由發揮。

如果之後再要教練跟，每堂堂費將會貴得很，係現時 "Triple Pack" o既兩倍價錢。

"Triple Pack" 包三堂，頭一堂係 "Assessment"，評估下你o既健康狀況，體能之類。第二、三堂先係正式 train 你教你點用o的器械健身。

"Assessment" 好簡單，都係度下你o的身高體重三圍，問下你o的飲食習慣，叫你做下 push-up, sit-up 之類之後記錄心跳率，同 test 下柔軟度等等。

將所有收集o左o既數據輸入電腦再經過計算就會得出一個叫 "Fitness Age" o既參考數值，要強調，係『參考』而已，冇準的。

我o既 "Fitness Age" 數值係．．．

異相牛油曲奇餅

情人節，諗o左好耐都決定唔到買乜好，於是搵o的o野搞下。

我有咩可以搞丫，又冇心思又冇情趣，最叻咪整下o野食咁大把。

記得 豬Bee 去過學整餅，於是我決定拜師。

問完 豬Bee，再事先張揚俾女朋友知，因為我唔識整餅兼怕買錯料。

又為o左慳皮，冇買牛油紙同花咀去o即餅，於是就出現o左一堆畸形牛油曲奇餅。

o的曲奇餅雖然異相，但又香又脆，食到女朋友讚不絕口，都幾有成功感同滿足感o架。

特別鳴謝：豬Bee

《Ｔｈｅ Ｄｅｐａｒｔｅｄ》﹙無間道風雲﹚

　

上畫o既時候已經去o左戲院睇，可能因為我好鍾意《無間道》同埋有好深刻o既印象o既關係 (至少睇o左五次)，所以覺得《無間道風雲》好唔掂，翻拍又唔係，改編又唔似，不倫不類咁，一味粗口多。

最近出o左 VCD，決定睇多次，希望響有中文字幕o既輔助之下對套戲o既理解同感覺可以有o的分別。

結果，睇完第二隻碟已經悶到睇唔落第三隻，要隔o左兩日之後響極度無聊等眼訓之下先睇埋佢。

雖然套戲唔好睇，不過我覺得o的歌同配樂幾好。

隻 OST 幾正，算係意外收穫。

蘇施黃《是他也是你和我》

自從 三姑(吳君如) 請假冇做商台之後我都好少聽收音機，不過最近又開始聽返。

繼電視之後，我連電台都捧 亞蘇 場。

個節目講o既o野間中都幾好笑 (只限 亞蘇 同 泰山)，有時又會好鬼悶 (聽眾電話)；但係個節目播o的歌就好奇怪，硬係好似同個節目唔係好夾咁，格格不入。

和牛 Wagyu Beef

尋日去o左食 和牛 (Wagyu Beef)，補祝女朋友生日 (7/2) + 預祝情人節 (14/2)。

原本我係唔知有 澳洲和牛 呢樣o野，係前排睇o左 TVB 一個叫《食盡東西》o既節目先知。

睇到 袁彩雲 同 陳嘉容 響 墨爾本 食 和牛 食到津津有味，睇完之後就一直好想試。

間餐廳好『日本』，唔似o個o的香港人開o既日本餐廳；餐廳上上下下都係由日本人負責，成晚都唔係好知班日本侍應o既英文o翕乜。

我o地每人分別叫o左一份 set dinner，除o左主菜同甜品唔同之外，其它食物一樣，前前後後差不多有十樣o野食。

一開始先o黎一個 和牛卷，之後有魚生、海膽、小龍蝦、蟹、帶子等等諸如此類o既海鮮o野；主菜分別係 三塊燒和牛片 同 一塊和牛扒；之後仲有 日式雞飯 同 麵豉湯；甜品分別 SHOYA Fudge 同 Cake Kurogoma Panacotta (唔知點譯，到 website 睇 menu 吧)。

開始o既時候樣樣o野都細細份咁，又逐樣逐樣慢慢上，幾驚食完唔夠飽，點知到食完晒都幾鬼飽。

味道方面，冇預期同想像中咁好食，不過都算幾好食，又夠正宗(日本餐)，每食完一款之後又會好期待下一款係乜，每款食物擺到埋o黎都會有驚喜 (唔記得個 menu 有乜之餘亦唔太睇得明有乜食同點整)，我食得好鬼開心。

兩個人食，埋單共 HK$1,300，好鬼肉赤。

計劃七月我生日時再去，到時會試 和牛 Wagyu Beef Smokeless BBQ。



網址：
http://www.shoyamelbourne.com/

參考資料：
澳洲和牛 係早於十多年前從日本引入o既日本牛種再繁殖而來。其大理紋油花入口融化，綻放甘香食味，加上低於日本牛肉的價格，所以大受食家歡迎。



《參考圖片》

　

核突焗豬扒飯

睇《一粒鐘真人蘇》學整o既焗豬扒飯。

賣相有點核突，味道亦有待改善，不過我自己已經好滿意好開心。

唔知點解我次次買親豬扒都咁唔好彩，又臭臭o地。

註：圖中o既核突白色物體係溶o左o既芝士。

Search

我響個 blog 度加o左個 site meter，一開始寫 blog 時已經有。

裝o左 site meter，就可以知道有幾多人o黎、有邊個o黎、同埋經邊度o黎。

好多人都係經 search engine 如 Yahoo, Google, 百度 等等 search 到我個 blog。

而最多人 search o既頭五個項目係：

１：鄧麗欣 不要忘記
２：詩萊雅黑頭導出液
３：PES6
４：三國志十
５：眼瘡

9550

經過兩日響 高登 及 電腦領域 o既諮詢之後，決定買張 9550 來頂替 9800 Pro o既位置。

響呢邊買張舊款 display card，價錢貴不在話下，仲要長途跋涉兼阻礙重重先買到，真係坎坷。

最慘o既係，張 9550 o既表現令我非常失望。

《參考圖片》

9800Pro

用o左四、五年，張 9800 Pro 終於壽終正寢。

顯示咭出事前曾出現發高燒現象，可惜由於響墨爾本找不到合適o既顯示咭風扇進行風扇移植手術，搶救兩天之後終告不治。

驗屍報告證實 9800 Pro 係因為顯示咭上o既風扇損壞導致顯示咭過熱而燒毀。

註：
響香港只需 HK$388 已經可以買過一張新o既 9800 Pro，咁響墨爾本呢？
唔好意思，墨爾本再冇得賣。
莫講話張咭冇，連把風扇都冇，吹脹！！！

《參考圖片》

72% Extra Dark Chocolate

好難食。

咁難食o既o野都有人食o既？

Fitness First

join o左，希望會堅持．．．



Fitness First, fitness for everyone...everywhere

Fitness First offers everyone, no matter your age or fitness level, the opportunity to improve your health and fitness as well as have fun.

Fitness First provides comfortable surroundings, state-of-the-art equipment and the latest Group Fitness Programs. We have friendly and knowledgeable staff, ensuring our members receive a fantastic experience with every visit to the club.

Fitness First is the largest global club operator with over a million members in 500 clubs worldwide.

Fitness First is your passport to fitness, giving you access to over 60 convenient locations across Australia.

So wherever your travels may take you, there is likely to be a Fitness First Health Club right around the corner. It's never been so convenient to stay in shape!

一粒鐘真人蘇

由 07 年開始 download 蘇絲黃 呢個節目o黎睇，幾好笑，而且佢又會介紹好多好o野食。

雖然我冇得去食，不過齋睇都已經開心，為食嘛。

今年年尾返香港時先逐樣試。

由於覺得呢個節目幾好睇，於是走去 download 番晒 05 ~ 06 年 亞蘇 響有線做o既節目o黎睇，點知原來係唔同o既o野，集集都係教煮 '食送'。

雖然係教煮 '食送'，不過有時都幾好笑，而且好多款我都好想食，好想學煮。


蘇絲黃 係繼『軟硬』、『三姑(吳君如)』之後，另一個令我聽或睇佢o地個節目都會開懷大笑o既人。

蒸籠

自從買o左呢個『蒸籠』之後，多o左好多好o野食，開心到震。

蝦餃、燒賣、牛肉、潮州粉果、壽包、叉燒包、糯米卷、珍珠雞、鳳爪 同埋 小籠包。

間點心專門店仲有其它款式o既點心賣，下星期再買o黎試。